A-tiong sı̄ Ióng--á ê hó pêng-iú, chū chò gín-á sı̂-tāi, A-tiong ê gû-káng leh siáu, piàⁿ sè-pà, Ióng--á jiok tio̍h gû koh kā tòng--khí-lâi, ùi gû kha-chiah-phiaⁿ kā kiaⁿ gah poàⁿ-sió-sí ê A-tiong kiù--lo̍h-lâi liáu-āu, 2 ê tō ná sai-kong-á sēng poe, khò͘-toà kat-sio-liân. Ióng--á lâng ióng hàn-chháu chho͘, chū-lâi sı̄ m̄-chai thang hoân-ló ê lâng, kiàn nā khoàⁿ--tio̍h lóng-sı̄ 1 ki chhùi-á chhiò-chhiò, ke̍k-ke sı̄ bı̄n-á chhâ-chhâ chhoh-kàn-kiāu--2-kù, tāi-chı̀ tō koè--a, nah chai chit kúi kang, ta̍k pái kı̀ⁿ bı̄n to ba̍k-thâu kat-kat, ū-iáⁿ chin thè i tam-iu.
Ióng--á sı̄ kū-nı̂ chhoā bó͘--ê, in bó͘ kiò chò A-chiáng, tı̄ kè ang chı̀n-chêng sı̄ choan-bûn sı̀-koè leh kā lâng siu chéng-kah kiam bán bı̄n--ê, kiat-hun liáu tō bô chò--a. Pún-té A-chiáng bô siūⁿ beh kè hō͘ chng-kha choh-sit lâng, ūn-miā chok-lōng, in-iân ū-sı̂ sı̄ chù hó-hó, chin oh cháu-siám.
Chhoā tio̍h chit ê lâng chheng-ho͘ chò ‘Chéng-kah hoe’ ê súi bó͘, Ióng--á chin kā thiàⁿ-sioh, chhân-hn̂g chho͘-tāng ê khang-khoè lóng m̄-kam hō͘ i bak, ka-tı̄ ngı̄ chò. Ū lâng chhiò i kóng : “Chhoā súi bó͘ bē-su chng-kha lâng hak 1 su sin sebilo͘h, phāⁿ sı̄ phāⁿ--lah, cheng-chha iōng bē tio̍h, khē tı̄ chhù--nih khoàⁿ hóng--ê.”
I iā bē siūⁿ-khı̀, bûn-bûn-á chhiò, ı̀n lâng kóng: “Kóng bóng kóng, chhù lāi ū sebilo͘h thang khoàⁿ hóng, bián chhēng kan-taⁿ sim-chêng tō sóng.”
A-chiáng ē-sái kóng sı̄ Ióng--á siōng pó-poè--ê, kui nı̂ lâi, A-tiong chai-iáⁿ Ióng--á bô sioh kan-khó͘, kan-taⁿ siūⁿ beh hō͘ in bó͘ ū 1 ê khah chiâⁿ-iūⁿ ê jı̍t-chí thang koè, chiàu kóng chit chūn bô eng-kai khoàⁿ tio̍h chit khoán iu-thâu kat-bı̄n chiah tio̍h ! Mn̄g--i koh bô ài kóng, sı̍t-chāi hō͘ lâng thè i hoân-ló.
Chng-lāi ū 1 ê kiò chò Khoeh--á ê lāu cha-bó͘, m̄ chai beh án-choáⁿ kóng i ê sin-hūn, bô chhân thang choh, m̄-koh seng-oa̍h koh iáu ē tit koè, i sı̄ choan-bûn leh kā lâng khan ang-ı̂ kiam siu-kiaⁿ--ê. Chit ê sı̂-tāi, tiāⁿ-tio̍h ū lâng m̄ chai chit khoán hâng-gia̍p tùi kó͘-chá Tâi-oân lâng ê ı̀-gı̄, chhiáⁿ hō͘ goá chit ê kóng-kó͘--ê kiam piān-sū, ke oē chò 1-ê-á kái-soeh.
Ang-ı̂ eng-kai sı̄ Pêⁿ-po͘ cho̍k hong-sio̍k koàn-sı̀ ê 1 chióng sin-hūn, tı̄ hiān-tāi gí kiò chò ‘Thong-lêng ê lâng’, thè lâng kā tú sí bô joā kú ê chhin-lâng khan lâi biān-hoē kóng-oē kiò chò ‘Khan-bông’; nā sí chin kú--a, iah-sı̄ kóng kap tùi-hong bô siáⁿ chhin-chiâⁿ koan-hē--ê beh ín lâi mn̄g oē tō kóng sı̄ ‘Khan ang-ı̂’.
Siu-kiaⁿ sı̄ ‘Siáu-jı̂ kho choan-bûn’, gín-á tio̍h kiaⁿ mà-mà-háu, bē chia̍h bē khùn bô 1 ê tiāⁿ-tio̍h, tı̄ i-liâu bô hiah hoat-ta̍t ê sı̂, tō chhoā khı̀ hō͘ lâng siu-kiaⁿ. Bián chia̍h io̍h, bô chù-siā, bē khó͘ bē thiàⁿ, kan-taⁿ té 1 oáⁿ bí chiam-chiam, iōng gín-á chhēng--koè ê saⁿ pau tiâu--leh, phō gín-á khı̀. Siu-kiaⁿ ê lâng tiám 3 châng hiuⁿ tı̄ chiam-ı̂ⁿ ê oáⁿ-bı̄n hoê, chhùi--nih liām-chiù, liáu-āu kā saⁿ tháu khui, khoàⁿ bí-bı̄n ê tô͘-iūⁿ kái-soeh, kóng gín-á sı̄ khı̀ hō͘ siáⁿ-mı̍h kiaⁿ--tio̍h iah-sı̄ soah--tio̍h.
Khan ang-ı̂ ū siu âng-pau lé, bô hiān-kim mā ē-sái iōng sàng mı̍h-kiāⁿ tāi thè. Siu-kiaⁿ bô siu chín-hùi, hit oáⁿ bí tō-sı̄ siā-lé. Nā tı̄ hiān-tāi, ang-ı̂ eng-kai kóng sı̄ kó͘-chá ê āu-hiān-tāi chu-sı̀n-gia̍p, tiān-náu bāng-lō͘ mā bô hoat-tō͘ hō͘ im-iông kài hō͘-siong thong phoe. Siu-kiaⁿ--ê tong-jiân sio̍k tı̄ sı̄ i-su kong-hoē. Khoeh--á bô pò͘ gah 1 lı̂ tē, 1-nı̂-thàng-thiⁿ tō-sı̄ bí-àng m̄-bat khang--koè, kóng--lâi, gia̍p-bū iáu sǹg ún-tēng.
Khoeh--á toà tı̄ kau ē chng-á boé, Ióng--á in tau sı̄ tı̄ kau téng chng-á thâu, A-chiáng pún-té kap Khoeh--á 2 lâng bē kiâⁿ gah hiah chiap. Ū 1 pái, Khoeh--á beh chhut chng khı̀ kā lâng khan ang-ı̂, tùi Ióng--á in mn̂g-kháu-tiâⁿ boé koè, hit kang jı̍t-thâu chin mé, A-chiáng siūⁿ-kóng hit thò kā lâng siu chéng-kah, chhat chéng-kah iû ê ke-si kú bô iōng, chū kè Ióng--á liáu-āu, i tō bô koh khò chit tô͘ choán-chia̍h, ka-tı̄ mā m̄-bat iōng--koè, kiaⁿ seⁿ-ko͘, tō phah khui tı̄ tiâⁿ--nih phak, Khoeh--á khoàⁿ--tio̍h, chin kah-ı̀, hoan-thâu tńg--lâi ê sı̂, choan-kang jı̍p khı̀ chhoē A-chiáng kóng oē.
Chng-kha lâng bô-lūn cha-po͘ cha-bó͘ lóng tio̍h choh chhân kò͘ hn̂g, liân bı̄n to bē kò͘ tit súi, nah ē ū êng-kang kap tiâu-kiāⁿ thang koán gah chéng-thâu-á--khı̀, A-chiáng sui-bóng in ang Ióng--á m̄-kam hō͘ i kō thô͘ bak chúi, chóng--sı̄ khah khin-khó ê chhù-tiâⁿ khang-khoè mā ē tàu chò, koh ū kiat-hun chêng ê 1 chân iân-kò͘, soah ka-tı̄ ū hit hù siu chéng-kah chhat chéng-kah iû ê ke-si mā bô leh iōng. To̍k-to̍k chit ê Khoeh--á, chò ang-ı̂ goân-pún tō ū koá kap lâng bô kāng ê chng-thāⁿ, chhēng-chhah, koh bián choh sit, tong-jiân ē siūⁿ beh kā chéng-kah chng--1-ē, tō ko͘-chiâⁿ A-chiáng kā i siu, koh beh chhat koài-sek ê chéng-kah iû.
Chhím khai-sí, A-chiáng kóng i bô beh koh kā lâng siu chéng-kah--a, boé-chhiú, Khoeh--á kap i tiâu-kiāⁿ kau-oāⁿ, kóng nā kā i siu chéng-kah, bô-lūn A-chiáng siūⁿ beh kap sí joā kú ê lâng kóng oē, i lóng ū hoat-tō͘ tiàu--lâi. A-chiáng tı̄ iáu boē kè Ióng--á chı̀n-chêng, ū kap lâng loân-ài--koè, mā ū sàng toā-piáⁿ koāⁿ-tiāⁿ--a, nah chai soah chhut chhia-eh iáu-siū--khı̀, m̄ chai i chit sı̂ tı̄ im-kan koè liáu ū hó--bô, mā m̄ chai i ū hoaⁿ-hí chit ê bô iân ê bó͘ kè hō͘ Ióng--á bô ? Chin siūⁿ beh kap i kóng-oē mn̄g 1 ê chin. Khoeh--á kóng khan ang-ı̂ m̄-sı̄ chhı̀n-chhái tō khan ū, ài kéng sı̂ kéng só͘-chāi, koh tio̍h iōng chin chē hāng tō-khū, kiò A-chiáng tán 2 kang āu, goe̍h-niû bô kng ê àm-mı̂, chiah khı̀ kau ē chng boé chhoē--i.
Chāi-lâi A-chiáng chin hán-tit chhut mn̂g, siōng chē sı̄ tńg khı̀ āu-thâu chhù, lóng ē kiò Ióng--á phoāⁿ--i, chng-kha lâng nā m̄-sı̄ sûn chhân-chúi, mā bô lâng saⁿ-kiⁿ-poàⁿ-mı̂ leh chhut mn̂g--ê, A-chiáng nah ē kò͘-tēng 1 kò goe̍h lóng ē ū 1 àm, tán Ióng--á khùn--khı̀ tō chhut--khı̀. Hit mê, Ióng--á beh khùn chı̀n-chêng tê koàn siuⁿ chē, poàⁿ-mê peh khí-lâi pàng jiō, chiah chai-iáⁿ in bó͘ bô khùn tı̄ bı̂n-chhn̂g téng, chhù-lāi, chhù-chêng chhù-āu lóng chhoē bô 1 ê lâng-iáⁿ, jú chhoē siūⁿ jú bô. Hoan-tńg-kang cheng-sı̂n, A-chiáng kāng-khoán chá-tǹg khoán sio-sio tán i chia̍h, iā bô kóng cha-mê cháu khı̀ toh-ūi ê tāi-chı̀. Koh lâi kúi kang, àm-sı̂ lóng chin chèng-siông, Ióng--á 1 sı̂ soah giâu-gı̂ kám-sı̄ hit mê ka-tı̄ leh hām-bı̂n ?
Kúi kò͘ goe̍h āu, Ióng--á chiah chai-iáⁿ A-chiáng 1 kò͘ goe̍h ē thau cháu chhut-khı̀ 1 pái, lóng-sı̄ Lán-lâng goe̍h-té ê poàⁿ-mê, i soah giâu-gı̂ in bó͘ kám-sı̄ goā-kháu thó khè-hiaⁿ? M̄-koh A-chiáng chāi-lâi to hiah un-sûn, tùi Ióng--á mā chin tah-sim thé-thiap, thài ē án-ni? Che tō-sı̄ Ióng--á iu-thâu kat-bı̄n ê goân-in, i sı̄ beh án-choáⁿ kóng hō͘ A-tiong chai ?
Ū 1 mê, Ióng--á choan-kang m̄ káⁿ khùn, tán in bó͘ khí chhn̂g, tō iap āu kā boé-hêng, toè kàu kau ē, beh chhut chng--a, khoàⁿ i kiâⁿ jı̍p khı̀ Khoeh--á in tau, kı̂-koài, pâng-keng lāi koh tiám la̍h-chek-á hoé, Khoeh--á chhut-lâi khui mn̂g, A-chiáng bô kóng oē tō jı̍p--khı̀, hun-bêng sı̄ iok-hó--ê, kám-kóng Khoeh--á thê-kiong tiûⁿ-só͘ hō͘ khè-hiaⁿ hoé-kı̀ chò sán-khùiⁿ ? Ióng--á 1 sı̂ lia̍h kông, siūⁿ beh chông jı̍p khı̀ lia̍h-kâu, koh kiaⁿ siuⁿ chhóng-pōng nā hut m̄ tio̍h--khı̀, tāi-chı̀ tō bē siu-soaⁿ, bô ta-oâ, bih tı̄ thang-á piⁿ thau thiaⁿ thau khoàⁿ, khoàⁿ A-chiáng ta̍k kò͘ goe̍h lóng ē thau cháu chhut-lâi 1 mê sı̄ leh pı̀ⁿ siáⁿ-mı̍h báng. La̍h-chek-á hoé soah hoa--khı̀, àm-bin-bong, khoàⁿ lóng bô, liam-mi tō thiaⁿ tio̍h Khoeh--á m̄ chai leh liām siáⁿ chiù-gí, liām chin kú, liáu-āu, Khoeh--á ê siaⁿ soah piàn cha-po͘ siaⁿ, kap A-chiáng leh ı̀n-tap.
Chit sı̂, Ióng--á chai--a, A-chiáng sı̄ lâi hō͘ Khoeh--á thè i khan ang-ı̂, khan hit ê pún-té kap i tēng-hun tı̄ lông-hoē chia̍h thâu-lō͘, boé--á khiâ Vespa hō͘ hoè-bu̍t-á chhia lòng--sí-ê. Chai-iáⁿ in bó͘ m̄-sı̄ goā-kháu thó khè-hiaⁿ liáu-āu, Ióng--á sim-chêng ū khah hó, kap A-tiong koh ū kóng ū chhiò, i kā tàu-tı̄n--ê kóng ka-tı̄ put-eng-kai o͘-pe̍h hoâi-gı̂ ka-tı̄ ê bó͘, i sı̄ cháu khı̀ Khoeh--á hia khan ang-ı̂ beh chhoē hit ê bô-iân--ê, kóng--lâi, iā sǹg chin ū chêng. A-tióng kóng oa̍h-lâng bē-sái kap sí-lâng kè-kàu, sè-kan bô lâng kóng oa̍h-lâng leh kap sí-lâng ek chhò͘-sng--ê, an-ùi i khoan-sim koè jı̍t.
Tāi-chı̀ kàu chia iáu bē soah, chit chām sı̂-kan, Ióng--á soah jú siūⁿ jú gêng-sim, bêng-bêng goá chit ê oa̍h-lâng chiah-nı̄ ài--lí, sioh--lí, lí iáu bē boán-chiok, ta̍k kò͘ goe̍h khı̀ chhoē sí-lâng lêng-hûn, kám-kóng sí-lâng ē thó-thàn chhı̄--lí ? A-chiáng ê sim iáu hù tı̄ pa̍t-lâng sin-khu téng, sui-bóng kóng sı̄ sí--khı̀ ê lâng, oa̍h-lâng m̄-sı̄ bē kap sí-lâng kè-kàu, nā khan-sia̍p tio̍h ài-chêng, siáⁿ-mı̍h to ū lâng leh kè-kàu! Ióng--á chiàⁿ-bı̄n kā A-chiáng kóng chhut i ê put-boán. Lâng A-chiáng mā chin Ahsari, kóng bē koh khı̀ chhoē Khoeh--á khan ang-ı̂--a, chhiáⁿ ang-sài bián hiah kāu chhau-hoân.
Koè 2 kò͘ goe̍h, Khoeh--á poaⁿ khı̀ Sin-gû-chng-á, kā khan ang-ı̂ kap siu-kiaⁿ ê gia̍p-bū lóng ı̂-kau hō͘ i ê tek-ı̀ mn̂g-tô͘ A-chiáng. Khoeh--á kám-kak A-chiáng pí i khah ū sı̂n-iân, ta̍k àm ná khan ná kà, tāi-kè sı̄ A-chiáng ài kā hit cho͘ siu chéng-kah, chhat chéng-kah li-li khok-khok ê ke-si thâu-á sàng--i.
A-chiáng ùi chéng-kah hoe piàn ang-ı̂ liáu-āu, Ióng--á chhù--nih ū lâng tàu thàn, thiaⁿ kóng ū khiām koá chı̂ⁿ, i chò khang-khoè mā bô khah-chá hiah kut-la̍t piàⁿ-sè. In bó͘ nā leh khan ang-ı̂ ê sı̂, tō kóng i seⁿ-sı̂ bē ha̍h, bē-sái tı̄ piⁿ--á, nā bô, sı̂n-hûn bē oá--lâi, kiò Ióng--á khı̀ chhoē A-tiong chhit-thô. A-tiong khoàⁿ Ióng--á ê bı̄n jú lâi jú iu, ba̍k-thâu jú kat, mn̄g i kóng sı̄-m̄-sı̄ iáu leh kap sí-lâng kè-kàu ? I koh m̄ sêng-jı̄n, chit khoán chèng-thâu liân hó pêng-iú mā bô châi-tiāu i.
A-chiáng chò ang-ı̂ ê miâ-siaⁿ jú lâi jú hiáng, liân goā-chng--ê mā ū lâng lâi chhoē, tiāⁿ-tiāⁿ ài kui lé-pài chêng tō seng pâi hō-bé chiah chhiâu ū sı̂-kan. Gín-á siu-kiaⁿ ê sit-thâu lı̄-sûn chiah chı̍t-oáⁿ bí, tō bô ún lâng chit-hāng--a. Ióng--á siūⁿ-kóng A-chiáng chiah sûn-chêng ê lâng, tiāⁿ-tio̍h mā ē khan hit-ê khiâ Vespa--ê chhut-lâi kóng-oē. Thâu-khak lāi tō phû-chhut khah-chá A-chiáng hō͘ lâng chài, tn̂g-thâu-chang hō͘ hong chhoe tín-tāng, kui-lō͘ lóng sı̄ i khoài-lo̍k ê chhiò-siaⁿ, jú siūⁿ jú ū-iáⁿ. Koh koè chı̍t-nı̂, A-tiong tō hán-tit khoàⁿ-tio̍h Ióng--á, thiaⁿ lâng hán-kóng i lóng tı̄ ke--nih poa̍h-kiáu, chin chió tńg-lâi chng--nih, i tı̄ ke--nih koh kat-tio̍h chı̍t-ê chiú-ka-té ê hoé-kı̀, nn̄g-lâng tı̄ hia ū soè chı̍t-keng chhù.
Chha-put-to A-chiáng ang-ı̂ chò 3 nı̂ liáu-āu, lâng-kheh siuⁿ chē, mā soá khı̀ khah nāu-jia̍t ê ke--nih khui tn̂g, kiò Ióng--á kā hit ê hoé-kı̀ chò-hoé chhoā tńg lâi toà, chèng-sek piàn Ióng--á ê sè-ı̂. M̄-koh, A-chiáng kāng-khoán un-sûn hó sèng-tē, toā-bó͘ sè-ı̂ m̄-bat oan-ke, cheng-chha koè bô joā kú, hit ê sè-ı̂ mā leh toè A-chiáng o̍h khan ang-ı̂.
（“Pha-hng ê kò͘-sū” Tâi-pak-chhı̄: Tâi-gí Thoân-pò, 2000 nı̂ 3 goe̍h Chho͘-pán)
