Khuh-loh

Goán tau khah chá ū 1-chiah káu-á kiò chò Khuh-loh, i sı̄ tı̄ goán tau seng-oa̍h siōng kú ê káu-á. Chha-put-to tı̄ goá kok-hāu-á 3~4 nı̂ ê sı̂-chūn, goán a-peh chái-khí khı̀ cháu-kiāⁿ, Khuh-loh tō toè tı̄ a-peh āu-piah it-tı̍t kàu chhù , koáⁿ mā koáⁿ bē cháu, tō án-ne, Khuh-loh tō toà--lo̍h-lâi, m̄-chai-iáⁿ i sı̄ án-choáⁿ siūⁿ--ê? I chin chū-jiân tō piàn-chò chhù--nih seng-oa̍h ê 1-pō͘-hūn, goán nā sı̄ khı̀ siōng-khò, chhit-thô, bé mı̍h-kiāⁿ......, piān nā chhut-mn̂g, i tō toè tiâu-tiâu. I tú-lâi hit-chūn, nā toè goán chhut--khı̀, goá lóng ē hoân-ló i chhoē bô-lō͘ tńg--khı̀, ah sı̄ kiaⁿ i toè siuⁿ kú ē bô-la̍t, lō͘--nih koh bô chúi thang lim...... Ē-kı̀--ê ū 1-pàiⁿ i tó tih khùn, goá bô sè-jı̄ tah-tio̍h i ê boé-liu-á, i kan-taⁿ giah-thau khí--lâi, kā goá khoàⁿ khoàⁿ--ê, bô chhiūⁿ chhù--nih ê tı̄- boé-á, kā tah--tio̍h, soah hō͘ i kā--neh! Che kám ē-sái sǹg sı̄ i tùi goá ū sı̀n-jı̄m? In-ūi tû-liáu goán a-peh, goá kap i siōng hó! Boé--á, goá tāi-ha̍k 1-nı̂-á ê sı̂, ū 1-pàiⁿ pàng-ká tńg--khı̀, soah bô khoàⁿ-tio̍h Khuh-loh, mn̄g a-bú chiah chai-iáⁿ i sí--a, m̄-koh goá soah bô pi-siong ê chêng-sû, goá teh siūⁿ kong, i tı̄ lēng-goā 1-ê sè-kài, iû-goân ē koè kah chiok hó--ê. Chit-phiⁿ beh siá hō͘ goá siōng hó ê pêng-iú----Khuh--loh. (TGB Thong-sı̀n tē 8 kı̂, 2000 nı̂ 5 goe̍h)