Kiàn-ha̍k Oa̍h-mı̍h ka-tı̄ pó-hō͘

Hô͘-sı̂n, ti-tu, chı̂m-á, choâ, í-kı̍p pa̍t mı̍h ê thâng-thoā, lâng nā kı̀ⁿ-tio̍h, chiū ài kā i phah sí. M̄-nā lâng ài hō͘ i sí, chiū in ka-tı̄ iā ē sio-kā, tùi án-ni ta̍k-jı̍t ū sí chiâⁿ chē. Sui-bóng án-ni, bô sí iáu oa̍h--ê, koh-khah chē. Che, ūi-tio̍h siáⁿ in-toaⁿ? Ū nn̄g-hāng. 1.Tùi in ê sek-tı̄ lâi tit-tio̍h pó-hō͘. A.Chhin-chhiūⁿ tı̄ hái-soa--nih, ū chı̍t-hō chı̂m-á, khah-siông chhut-lâi goā-bı̄n, bô tiàm tı̄ khang-lāi; i ê khak phú-sek, iā ū iù-iù ê âng-tiám, chhin-chhiūⁿ hái-soa sek, chin oh-tit hun-pia̍t thang lia̍h i. Iū-koh chı̂m-á tiàm tı̄ hái-piⁿ ê thô͘-moê nih, sek-tı̄ o͘-chhiⁿ, tú-tú chhin-chhiūⁿ thô͘-moê. Chiáu chin ài chia̍h in. Chóng-sı̄ in-ūi in ê sek kap thô͘-moê sio-tâng, chiū khoàⁿ bē chin. B.Ti-tu ū-ê tiàm tı̄ chhiū-nâ-lāi, sek-tı̄ kap ta ê chhiū-hio̍h sio-tâng. I nā hioh tı̄ bāng-nih, kha-chhiú khiû-liû teh, piàn chhin-chhiūⁿ chhiū-hio̍h. Koh ū chı̍t hō ti-tu, ēng ta ê chhiū-hio̍h kap chhiⁿ-thı̂, hē tı̄ bāng ê kiⁿ-thâu, chiah bih tı̄ hit lāi-bı̄n; lâng khoàⁿ-tio̍h, bē hun-pia̍t he sı̄ hio̍h, á-sı̄ ti-tu. C.Í-goā, ū phang chin sè-chiah, tiàm tı̄ chhiū-nih, sek-tı̄ chhiⁿ-chhiⁿ, chhin-chhiūⁿ sin hoat ê chhiū-hio̍h. Koh ū kâⁿ o͘-sek, chhiah-sek, kim-n̂g-sek, kap in só͘ chhái ê hoe-sim tâng-sek, nā ū tùi te̍k ài lia̍h in, sı̄ oh-tit chhoē. D.Tē-kiû ê lâm-ke̍k, pak-ke̍k, kui nı̂ thàng-thiⁿ, lóng-lo̍h seh kian-peng, tı̀-kàu sı̀-kè lóng pe̍h-pe̍h. Hia ê iá-siù, hı̂m, chiáu, ah ê sek iā sı̄ pe̍h; lâng beh lia̍h, á-sı̄ beh kā in phah-sí, sı̄ oh-tit. Sai ê sek sı̄ n̂g, kap in tiàm ê soa-sek sio-siāng, só͘-í ē siám-pı̄ tùi-te̍k. E.Choâ, nā tiàm tı̄ chhiū-nâ, á-sı̄ Thô͘-khang, in ê sek-tı̄ khah toā-bı̄n sı̄ chhiⁿ-sek kap chhiah-sek; nā soh tı̄ chhiū-nih, lâng khoàⁿ chò chhiū-ki, soà bē jı̄n-tit. Sı̀-kha choâ, iā sı̄ án-ni, nā un-lun-khûn, á-sı̄ chhun-tı̍t, chiū ē pı̀ⁿ-chiâⁿ kap chhiū-ki, chhiū-hio̍h, á-sı̄ chı̍t-in ê chháu tâng-khoán. Tùi án-ni ē siám-pı̄ tùi-te̍k, lâi pó-hō͘ in ê siⁿ-oa̍h. 2.Tùi thian-jiân ê sèng-chit. Ū-ê oa̍h-mı̍h, in ê khak tēng, tùi án-ni tit-tio̍h pó-hō͘. Ū-ê chin liú-lia̍h, ē cho̍h, ē cháu, ē thiàu. Ū-ê kín ná sih-nà chı̍t iūⁿ, lâng jip bē tio̍h. Chı̂m-á, ū nn̄g-ki chhiok-kak, thang chò ba̍k-chiu; in sı̀-kè sô-lâi sô-khı̀, ē khoàⁿ kı̄n-hū ta̍k hāng ê mı̍h. Ti-tu chiū bô án-ni, iáu-kú in ê ba̍k-chiu ē kiù in, ū-ê 6 lúi, ū-ê 8 lúi, ha̍p chiâⁿ chò chı̍t lúi, sı̀-bı̄n khoàⁿ lóng ē tio̍h; in-ūi ū lúi khoàⁿ kı̄n, ū lúi khoàⁿ hn̄g, án-ni ē tit-tio̍h pó-hō͘. Thâng-thoā ê lūi chin gâu siⁿ-thoàⁿ, bia̍t lóng bē liáu. Ta̍k chiah chı̂m-á só͘ siⁿ ê nn̄g, pí 50 chiah ke-bó só͘ siⁿ--ê khah chē. Chı̍t chiah ti-tu só͘ siⁿ-chhut ê ti-tu kiáⁿ, sǹg bē tit thang liáu. Chı̍t chiah phang-ông tı̄ phang-tû lāi, ta̍k nı̂ só͘ chhut ê sin phang, pí chı̍t ê toā-siâⁿ ê peh-sı̀ⁿ iáu khah chē. Koh ū chı̍t khoán ê oan-iuⁿ, i ê siū ê lāi-bı̄n ū oan-iuⁿ-kiáⁿ, pí toā châng chhiū ê hio̍h, koh khah chē. Só͘ kóng hiah ê oa̍h-mı̍h, sı̄ khoài tû-bia̍t ê, chóng-sı̄ Siōng-tè hō͘ in gâu siⁿ-thoàⁿ. Sui-bóng ta̍k-jı̍t hō͘ lâng phah-sí chin chē, iáu-kú só͘ chhun--ê, sı̄ chin-chē. (Tâi-oân Kàu-hoē-kong-pò tē 704 kı̂, 1947 nı̂ 8 ge̍h)