khó͘-khó͘ siap-siap ê táⁿ-má-ka-lō͘
Chhiah-iām-iām ê jı̍t-thâu
Sio-hut-hut ê thó͘-tē
Toā-châng mô͘-hông-á chheng-liâng ê chhiū-iáⁿ
Chin-chá chiū hoà-chò le̍k-sú ê oan-hûn
Bô hoat-tō͘ pó-hō͘
Hiàng-sı̂ chò-phoāⁿ ê gû-chhia
Chhân-hn̂g lāi lâu--lo̍h-lâi ê kha-jiah
Chó͘-kong chó͘-má lêng-hûn leh pâi-hoâi
Khin-khin kiò-tio̍h
Lâi-lâi khı̀-khı̀ ê kiáⁿ-sun
Siang-têng ê iû-lám ba-su
Chı̍t-tâi chı̍t-tâi
Pâi tı̄ toā-lō͘-piⁿ
Chhin-chhiōⁿ pûi-chut-chut ê toā-thâu-ke
Chı̍t-chng chı̍t-chng chiōⁿ-chhia
Chı̍t-chhoan chı̍t-chhoan lo̍h-chhia
Khiau-ku khiau-ku ê lāu-toā-lâng
Peh-kong chek-kong
Ko͘-pô chím-pô
Bông-bông ê gán-sı̂n
Thó͘-tı̍t thó͘-tı̍t ê kóng-oē
Thiaⁿ chhù-piⁿ-thâu-boé lâng leh kó͘-bú
Chham lâng lâi-khı̀ tàu-lāu-jia̍t
Kóng ū piān-tong thang niá
Ta̍k-ke lóng mā ài beh hó-gia̍h
Chháu-tē-lâng ê goān-bōng
Kı̂-thāi ū chı̍t-jı̍t
Khí toā-keng lâu-á-chhù
Pâng-tē-sán toā khí-kè
Khui BMW sái Benz
Kiáⁿ-sun ū thâu-lō͘ chò kàn-pō͘
Hái-piⁿ-lâng toā âu-khang
Kóng-oē ná hòng-sàng
Hái-po͘ siau-sit ū siáⁿ iàu-kín
Châi-thoân hō͘ goán thâu-lō͘
Soàⁿ-téng bô--khı̀ ū siáⁿ koan-hē
Châi-thoân hō͘ gún thâu-lō͘
Chhân-hn̂g hùi-tiāu ū siáⁿ iàu-kín
Ū chı̂ⁿ lâi goā-kok khoàⁿ hong-kéng
Hái-sán-ke siau-sit ū siáⁿ koan-hē
Ē tàng lâi-khı̀ Ò-chiu chia̍h liông-hê
Khong-khı̀ ná to̍k-bū ū siáⁿ iàu-kín
Tı̄-chia thàn-chı̂ⁿ niā-niā
Ia̍h m̄-sı̄ beh khiā tı̄ chia
Àm-mı̂ ê hái-hong
Nńg-nńg leh chhoe
Chhoe-koè chēng-chēng ê thó͘-tē
Chhoe-koè hong-ú chhong-song ê kó͘-chhù
Chhoe-koè chhù-chêng-chhù-āu ê chhiū-boé
Chó͘-kong chó͘-má ê lêng-hûn leh kóng-oē
M̄-thang boē-kı̀ thó͘-tē ê ióⁿ-chhı̄
Chia̍h koé-chí pài chhiū-thâu
Chia̍h han-chû-chhiam-bí pài chhân-thâu
Tiām-tiām ê goe̍h-niô
Chheng-chheng ê kng
Chiò chhian-nı̂ bān-nı̂ ê lāi-hái
Chiò chhian-nı̂ bān-nı̂ ê pho-lōng
Éng--lâi éng--khı̀
Chı̍t-siaⁿ chı̍t-siaⁿ
Chı̍t-kù chı̍t-kù
Lóng-sı̄ thiⁿ-tē ê pó-pı̀
Chio̍h-hoà-kang-gia̍p toā-kǹg-chhióⁿ
Goā-kháu pháiⁿ-koè pháiⁿ-phiàn ê tāng-ú-jiám
Iōng-chı̂ⁿ iōng-sè gēⁿ-áu ê o͘-chhiú
Chhun-hiòng bô-oē bô-kù ê hiong-thó͘
Hiòng khoàⁿ-kò͘
Lāu-chhù chó͘-sáⁿ ê hū-ló hiaⁿ-chí
Cheng-toa̍t kiáⁿ-kiáⁿ-sun-sun
Éng-oán seng-oa̍h ê thó͘-tē
Kim-gû o͘-gû
Te̍k-koân ê chu-pún-chú-gı̄
Hoâiⁿ-hêng tı̍t-lòng ê siā-hoē
Goán hái-kı̂ⁿ-á-lâng
Ǹg-bāng tı̄ tó-ūi
Chı̍t-pho chı̍t-pho ê chai-lān
Pang--lo̍h-lâi ê thô͘-chio̍h
Bâi-chòng ê soaⁿ-chng
Ū lâng kiò-thiⁿ ū lâng kiò-tē
Hā-hām ê hı̂-chhun
Ū lâng leh hiō-hoé
Ū lâng leh sio̍k-choē
Tāng-ú-jiám ê kang-gia̍p hiong-tı̀n
Pí-lē chin-koân ê gâm-chèng
Thiⁿ-kong-peh--á ê kàu-hùn kéng-kò
Kám bô-kàu choē
Chò-sit-lâng ê chhân-hn̂g
Thó-hái-lâng oá-khò ê lāi-hái
Pe̍k-hûn chheng-thian ê chúi-chhia iâm-tiâⁿ
Chhut-chhut-jı̍p-jı̍p ê sèⁿ-miā
Khí-khí-lo̍h-lo̍h ê hái-éng
Tāi-tāi kiáⁿ-sun leh seⁿ-thoàⁿ
Han-chû chhài-pó͘ ê jı̍t-chí
Iû-goân ū hı̂ ū hê
Ū chhiah-chhùi-á thang phoè
Ū chı̂m-á ū hún-giô-á
Ū ô-á thang chhím
Chia sı̄ lán ê thó͘-tē
Chhı̄-bó͘ chhı̄-kiáⁿ ê hái-kháu
Kiáⁿ-kiáⁿ-sun-sun seⁿ-thoàⁿ ê thó͘-tē
