Koâⁿ--lâng ê àm-mı̂

Àm-mı̂, goá kap Bûn-siông-hiaⁿ sūn bô joā se̍k ê lō͘ kiâⁿ-kàu Chhiū-nâ-á, léng-ki-ki ê koâⁿ-thiⁿ chhin-chhiūⁿ hiān-sı̍t ê Tâi-oân siā- hoē, hō͘-lâng kám-kak chiâⁿ koâⁿ. Kin-á-jı̍t beh chhú-lí--ê, sı̄ 1-keng chò tiān-náu goā-khak ê lô-chu cheng-gı̄-àn. Thiaⁿ tong-sū-chiá teh kóng, in chit-má í-keng sı̄ chò 1-kang hioh 1-lé-pài--a, koh soà--lo̍h-lâi, m̄-chai kang-tiûⁿ siáⁿ-mih sı̂-chūn beh koaiⁿ--khí-lâi, ta̍k-ê lóng chin kiaⁿ-hiâⁿ. Lâi chham-ka khui-hoē--ê ū 50-kúi-hoè ê o͘-bah-sáng, mā ū tiong-liân ê ka-têng-chú-hū kap chiâⁿ siàu-liân ê goân-chū-bı̂n cha-bó͘ gín-á, ta̍k-ê khoè tı̄ bô joā toā-keng ê kheh-thiaⁿ, kám-kak ū tām-po̍h-á sio-lo̍h. “Sin-chhéng tiâu-kái liáu-āu, thâu-ke-niû tùi goán ê thāi-tō͘ ū khah hó--a, chhiūⁿ í-chá hioh-khùn lóng bô sǹg sin-súi, chò joā chē sǹg joā chē. Chit-kúi-kang thâu-ke-niû soah chú-tōng kóng beh hō͘ goán poàⁿ-sin--neh!” Pho͘h-sı̍t ê o͘-bah-sáng bı̄n-sek ū sió-khoa hoaⁿ-hí, piⁿ--á ê goân-chū-bı̂n cha-bó͘ gín-á sè-siaⁿ teh ı̀n: “Tùi goán siuⁿ hó, goán tian-tó ū tām-po̍h-á bē koàn-sı̀--neh.” Chı̍t-tı̄n lú-kang ê chhiò-siaⁿ chhiong-boán tı̄ bô joā khoah ê kheh-thiaⁿ. “Chhiūⁿ í-chá thâu-ke-niû tú chiap kang-tiûⁿ ê sı̂, ūi-tio̍h beh kiû piáu-hiān, kā seng-sán-soàⁿ ê sok-tō͘ ùi 100-goā tiâu-kàu 200-goā, hāi goán lóng bô sı̂-kan khı̀ lim-tê pàng-jiō, koh ū-lâng chò kah siàm-jiō. Che lóng ū lâng ē-tàng chò chèng-jı̂n.” Oē iáu-boē kóng soah, 1-tı̄n lâng tō sio-chı̄ⁿ giâ-chhiú, chhin-chhiūⁿ beh chèng-bêng in ka-kı̄ ê khó͘-lān. Goá kā “tiâu-kái-su” the̍h-koè-lâi khoàⁿ, hiông-hiông kiaⁿ-1-tiô, chit-keng thih-phoê khí ê kang-tiûⁿ, 10-goā-nı̂ lâi kèng-jiân liān 1-ê “phah-hoé-khı̀” to bô, sı̄m-chı̀ bô tô-seng chhut-kháu, nā hoat-seng ı̀-goā, hiō-kó it-tēng chin giâm-tiōng. Koh koè 2-kang tō beh tiâu-kái--a, sang “tiâu-kái-su” khı̀ Lô-kang-kio̍k liáu-āu, thâu-ke-niû thāi-tō͘ í-keng ū kái-piàn, ta̍k-ê lóng chin ū chū-sı̀n, m̄-koh kiat-kó ē án-choáⁿ, mā sı̄ ài khoàⁿ hit-kang ê chêng-hêng. Goá kap Bûn-siông-hiaⁿ ùi sio- lo̍h ê chhù-lāi kiâⁿ--chhut-lâi, goā-kháu ê thiⁿ-khı̀ koh khah koâⁿ--a. goá ê hiû-á tàn tı̄ chhia--nih bô chhēng tı̄ sin-khu-téng, kám-kak koh khah koâⁿ. Koâⁿ--lâng ê àm-mı̂ chiâⁿ chēng. (TGB Thong-sı̀n tē 18 kı̂, 2001 nı̂ 3 goe̍h)