Koeh Sò͘-ngô͘ Sió-toān
Koeh Sò͘-ngô͘ chiū-sı̄ Chháu-tun kùi Tông-hoē Koeh Tiau-sêng Bo̍k-su ê toā Lēng-ài, kin-nı̂ 19 hoè. Saⁿ goe̍h-boé tı̄ lán Tâi-lâm Tiúⁿ-ló-kàu Lú Ha̍k-hāu chut-gia̍p, tò-khı̀ chhù-nı̍h sūn-hàu i ê pē-bó, iú ài i ê sió-tı̄ sió-moē chí-ū 3 goe̍h-jı̍t kú nā-tiāⁿ. Tùi phoà-pēⁿ kàu lı̂m-chiong thâu-boé 11 jı̍t, tı̄ kı̂-tó tiong kui thian. Kin ē-tàu sı̄ lé-pài-jı̍t, ha̍k-hāu chiap-tio̍h chı̍t tiuⁿ toan-su, pò Koeh Sò͘-ngô͘ tı̄ sin-le̍k 17 hō koè-óng, lóng iáu-boē-bat thiaⁿ-kı̀ⁿ ū phoà-pēⁿ, hut-jiân thiaⁿ-kı̀ⁿ án-ni, bē bián-tit chin gông-ngia̍h koh chin tông-chêng i ê pē-bó, saⁿ-kap siong-sim lâu ba̍k-sái ah! Pêng-sı̂ koh sı̄ sin-thé kiān-khong, ū chheng-liân ê khı̀-khài, chhin-chhiūⁿ chhó-bo̍k tng bō͘-sēng teh-beh puh sin íⁿ ê khı̀-siōng chı̍t iūⁿ, bô phah-sǹg ê tiong-kan thiaⁿ-kı̀ⁿ chit hō siau-sit, bē kı̀m-tit gia̍h pit siá tām-po̍h lâi-le̍k hō͘ lia̍t-ūi pêng-iú chai, ū thang hō͘ lán siūⁿ chhut sin chı̀n-hêng ê hêng-ûi, sı̀n-gióng, lí-sióng iā kú káⁿ. 1. Lūn i ê seⁿ-sêng hó khoàⁿ, put-sı̂ chhiò-iông. 2.Sèng-chit un-sûn, hong-chèng. 3.Tùi jı̍p-ha̍k í-lâi sêng-chek chiām-chiām chı̀n-jı̍p iu-liông. 4.Gâu thé-thiap i ê sı̄-toā-lâng, chiat-khiām i ê só͘-hùi. 5.Tùi chhong-iú hó kám-chêng, pêng-iú lóng sı̄ kiò i Koeh--ê, ná-chún chin thiàⁿ i ê khoán. 6.Im-ga̍k cheng-kong, iā bat tı̄ Tang-mn̂g Sèng-koa-tūi chı̍t nı̂ kú, pang-chān Chú-jı̍t-o̍h ê kang iā ū. Téng-bı̄n só͘ kı̀ chit kúi hāng chin-chiàⁿ ū thang hō͘ lán siàu-liām. Ka-têng sı̄ sit-lo̍h chı̍t ê só͘ thiàⁿ gâu pang-chān ê lú-jı̂. Ha̍k-hāu sı̄ kiám chı̍t ê hó ê hāu-iú. Kàu-hoē sı̄ khiàm chı̍t ê gâu pang-chān ê jı̂n-bu̍t. Siā-hoē bô chhái chı̍t ê Lú Eng-hiông, thiaⁿ-kı̀ⁿ ê lâng bô m̄ kiò bô-chhái. Siong-sim ah! Kai-chài iā ū thang an-ùi ê só͘-chāi: 1.Bô hō͘ pē-bó ūi-tio̍h i ê phín-hēng hoân-ló. 2.Ha̍k-hāu bô ūi-tio̍h i kiàn-siàu. 3.Koh-khah thang an-ùi ê , sı̄ chı̍t ê chin-sı̍t ê Ki-tok-tô͘. 4.Káⁿ sı̄ Chú khoàⁿ i só͘ chò ê kang ū kè-ta̍t, m̄-kam i toà sè-kan siū-khó͘, chiap-la̍p i chiūⁿ-thiⁿ khı̀ hióng-siū chiâu-pı̄ ê hok-khı̀, chhin-chhiūⁿ chāi-chá chiap-la̍p Í-lo̍k chiūⁿ-thiⁿ chı̍t-poaⁿ-iūⁿ, lán tio̍h ēng chiah-ê oē lâi sio an-ùi. Kin-á-jı̍t thiaⁿ-kı̀ⁿ chit hō siaⁿ ná-chún chin kín-kip ê siaⁿ, ná Kiù-chú kòng bô-soàⁿ-tiān lâi lán tau kā lán kóng, “Tio̍h kéng-séng ah! Tio̍h kı̂-tó ah! bián-tit jı̍p bê-he̍k. Tio̍h hâ lín ê toà tiám lín ê teng. Tio̍h o̍h lô͘-po̍k su-hāu i ê Chú-lâng, sı̂-jı̍t pek kı̄n lah! Chit khoán ê siaⁿ, iā thang khó-pí Thian-tông toā-cheng ê siaⁿ-im ı̄n--lâi thàu lán ê hı̄-khang kiò lán chhéⁿ, kah lán tio̍h chún-pı̄. Só͘-í tio̍h tiuⁿ-tı̂, in-ūi lín m̄-chai lín ê Chú sím-mı̍h jı̍t beh lâi” (Má-thài 24:42). ( Tâi-oân Kàu-hoē-pò tē 545 koàn,1930 nı̂ 8 ge̍h)