A-hiaⁿ a-hiaⁿ
Chhiáⁿ lí koh-chài gı̄m goá ê chhiú
Chut-la̍t gı̄m hō͘ ân-ân
Chhiáⁿ lí m̄-thang pàng
Lí kóng hiaⁿ-tı̄ sı̄ chı̍t-sı̀-lâng
Lí chò-un-á ê chhiú
Phoê chho͘-chho͘ bah kāu-kāu
Thio-thô͘ kòng toāⁿ-hoāⁿ
Lia̍h-hı̂ taⁿ tāng-tàⁿ
Hang pâi-tek ká toā-kho͘ iân-soàⁿ
Hiâⁿ toā-tiàⁿ géng hı̂-hú
Bú kah moá-sin tāng-koāⁿ
Bô-lūn thiⁿ joā-tàng joā-koâⁿ
Bô-lūn chàu joā-sio joā-joa̍h
Goá chı̍t-sı̀-lâng
Khoàⁿ lí boâ koh boâ
M̄-bat thiaⁿ lí
Kóng-sng kiò-thiàⁿ
Lí chò-un-á ê chhiú
Chiok-toā chiok-toā chiok-toā
Chhiu-thiⁿ kó-un-á a̍h-hong-pêⁿ
Koâⁿ-thiⁿ sûn-un-á-chúi lo̍h-sng chiàu-siông kiâⁿ
Chhun-thiⁿ tiám hı̂-chai taⁿ lô͘-á cháu toā-hoāⁿ
Thiⁿ-kng bí-khng chı̍t-tē chı̍t-tē hàiⁿ keng-kah
Hong-thai-thiⁿ tòng chúi-lâu taⁿ-thô͘ kò͘ toā-hoāⁿ
Joa̍h-thiⁿ khan-hı̂-á saⁿ-keⁿ-mêⁿ-poàⁿ kàu thàu-chá
Lêng-á chı̍t-niá chı̍t-niá
Theⁿ khı̀ bāng-kè pha̍k-ta
Bú kah toā-lia̍p koāⁿ sè-lia̍p koāⁿ
Lí chài mô͘-hông-á chhâ
Lí kù mô͘-hông-á chhâ
Lí phoà mô͘-hông-á chhâ
Lí pho͘-soa pâi-chhut lán mn̂g-kháu chng-á-tiâⁿ
Lí kin toà a-pa-á sin-khu-piⁿ
Chı̍t-sı̀-lâng iōng kiâm-sng-khó͘-chiáⁿ
Siá-chhut lán ê ūn-miā
A-hiaⁿ a-hiaⁿ
Lí chiah chhit-cha̍p-it niā-niā
Chhiáⁿ lí iōng chò-un-á ê chhiú
Koh chài gı̄m--goá
Koh gı̄m hō͘ ân-ân
Goá hoaⁿ-hí goá tông-ı̀
Lí kóng hiaⁿ-tı̄ sı̄ chı̍t-sı̀-lâng
