Lí Bêng-tē Tiúⁿ-ló ê Sió-toān

Lí Tiúⁿ-ló sı̄ Choân-chiu ê lâng. I lâi tı̄ Báng-kah choè kim-á-tiàm, ū lâi thiaⁿ tō-lí. 1900 nı̂ ū niá soé-lé, sı̄ Kai Bo̍k-su kā i niá soé-lé, āu-lâi ū choè chip-sū. Kàu 1905 nı̂ ū seng choè Tiúⁿ-ló. I siông-siông hù Sió-hoē, Tiong-hoē, Tāi-hoē, iā kúi-nā pái khı̀ Tâi-lâm. 1934 nı̂ 12 ge̍h 6 jı̍t pia̍t-sè, án-ni thâu kàu bé, choè Tiúⁿ-ló 29 nı̂. Lí Tiúⁿ-ló tùi pài Siōng-tè khí, chin jia̍t-sim, hán-tit bô kàu pài-tn̂g choè lé-pài, i lâi lé-pài, sı̂-kan chin chún. 1904 nı̂, chiū-sı̄ 31 nı̂ chêng, i ū thê-chhiòng kàu-hoē tio̍h to̍k-lı̍p. I chiū kap chèng tiúⁿ-ló, chip-sū chham-siông, hit-tia̍p Pak-pō͘ iáu-bē ū Tiong-hoē. I kap chèng tióng-chip, khı̀ Tām-súi kap Hoâ Bo̍k-su, Gô͘ Bo̍k-su chham-siông, in chin hoaⁿ-hí, chiū thoè in pín Ka-ná-tāi ê Bú-hoē, chún in siat Tiong-hoē tı̄ Pak-pō͘. Bú-hoē ū chún, chiū tēng hit nı̂ 10 ge̍h 4 jı̍t, tı̄ Tām-súi Sı̂n Ha̍k-hāu khui Pak-pō͘ ê Tiong-hoē, tùi hit-tia̍p khí, chiū kéng kúi-nā lâng lâi khó kàu-su. Kàu 1906 nı̂ 4 ge̍h 3 jı̍t, Báng-kah Kàu-hoē chiū thâu-chı̍t ūi to̍k-lı̍p chhiáⁿ bo̍k-su. Kàu chit-tia̍p bo̍k-su iáu tı̄-teh. Í-keng keng-kè 29 nı̂ kú, chit ê sı̄ Lí Tiúⁿ-ló ê kó͘-chhui. Taⁿ i í-keng bô tı̄ sè-kan, Báng-kah ê Kàu-hoē tio̍h siàu-liām i. Taⁿ i í-keng kè-óng, Lí Tiúⁿ-ló-niû tı̄ 10 ge̍h 29 jı̍t iā kè-óng, nn̄g ê pı̂ⁿ-pı̂ⁿ 69 hè. Hu-hū chin hô-bo̍k, Lí Tiúⁿ-ló-niû chin un-sûn, m̄-bat thiaⁿ-kı̀ⁿ i kap lâng oan-ke, nn̄g ê choè-tı̄n tńg-khı̀, chin ū hok-khı̀. Taⁿ i ū chı̍t ê hāu-siⁿ, í-keng kè-óng, ū chı̍t ê sim-pū iáu tı̄-teh. Koh ū chı̍t ê toā-sun, hiān-sı̂ tı̄ Tām-súi Tiong-o̍h teh tha̍k-chheh, iáu ū 3 ê cha-bó͘-sun, i ê ka-cho̍k lóng ū lâi lé-pài, chhiáⁿ tāi-ke thoè in kı̂-tó.

(Tâi-oân Kàu-hoē Kong-pò tē 599 koàn, 1935 nı̂ 2 ge̍h)