I sı̄ Chúi-tńg-kha Kàu-hoē jia̍t-sim ê thiaⁿ-tō chiá, i tı̄ toē-hng ū tam-tng Khu-tiúⁿ cha̍p-goā nı̂, iā ū choè Tâi-pak-thiaⁿ chham-sū, siā-hoē sū-gia̍p iā jia̍t-sim teh choè. I ū choè tê-koán, kok hong-bı̄n lóng ài chài lâi boē i, seng-lí chin hoat-ta̍t, choè lâng chin tek-bōng, chin khiam-pi bô kiau-ngō͘, nā ū khoàⁿ-tio̍h lâng ta̍k pái tāi-seng kiò lâng. I ū kap Tân Hı̂m Tiúⁿ-ló choè hó pêng-iú, Tân Hı̂m Tiúⁿ-ló put-sı̂ ēng tō-lí teh chai-poê, āu-lâi sı̀n tō-lí. Khó-sioh hit-tia̍p i ê sū-gia̍p choè chin toā, lâng chin hoân, khah bô ki-hoē thang siú lé-pài. Chóng-sı̄ i chin hó-táⁿ kan-chèng tō-lí, tùi kàu-hoē chı̄n-la̍t oān-chō͘, Chúi-tńg-kha to̍k-lı̍p thoân-tō ê sı̂, i tan-tng thoân-tō sok-kim chı̍t poàⁿ. Kàu chhiáⁿ bo̍k-su ê sı̂, i tam-tng bo̍k-su sok-kim chı̍t poàⁿ. Thoân-tō-kio̍k chàn-chō͘-oân múi-nı̂ 20 kho͘, só͘ chhut ê ū kàu i lı̄-pia̍t sè-kan chiah soah.
I chin gâu khoán-thāi thoân tō-lí ê lâng, nā ū thoân tō-lí ê lâng á-sı̄ chiah-ê jia̍t-sim ê hoē-iú kàu i hia, ta̍k pái ū siū i ê hó khoán-thāi. Lí Chhun-seng Tiúⁿ-ló tı̄-teh ê sı̂, i ta̍k nı̂ chhiáⁿ i khı̀ Chúi-tńg-kha kóng tō-lí lâi lı̄-ek hoē-lāi hoē-goā ê lâng, sı̍t-chāi chin kám-sim. Put-hēng i ū tú-tio̍h thn̂g-jiō pı̄ⁿ, keng-kè cha̍p-goā nı̂ lóng bô choè sū-gia̍p, khah-siông tı̄ chhù-lāi, i kóng sı̄ hō͘ i khah ū ki-hoē thang chhin-kūn Siōng-tè, i ê hū-jı̂n-lâng Bān-só, kóng tı̄ bı̂n-chhn̂g khah-siông thiaⁿ i teh kı̂-tó, lán nā khı̀ thàm i, khah-siông sı̄ kap lán tâm-lūn tō-lí ê sū.
Chin khó-sioh, tı̄ pún nı̂ 1 goe̍h 18 hō, siū Chú kéng-tiàu i tò-tńg tı̄ Pē ê sin-piⁿ, hióng-siū 60 hè, 20 hō ē-po͘ 2 tiám tı̄ Chúi-tńg-kha pài-tn̂g choè chòng-sek, ū koaⁿ-bı̂n hoē-iú kúi-nā pah lâng lâi hoē-chòng, tāi-ke chin siong-pi. Chit-tia̍p ū lâu nn̄g ê kiáⁿ, Tı̀-bu̍t kun, Iām-hái kun, kap 7 ê sun kap i ê hu-jı̂n. Chhiáⁿ khoàⁿ Pò ê hiaⁿ-chí thoè i ê ka-cho̍k kı̂-tó, hō͘ in oē soà-chiap sı̄-toā-lâng ê só͘ choè.
Tân Hı̂m sı̄ Chúi-tńg-kha Kàu-hoē ê Tiúⁿ-ló, 14 hè chiū tı̄ Saⁿ-têng-po͘ tit-tio̍h tō-lí. Āu-lâi tı̄ Chúi-tn̂g-kha choè seng-lí, i ê lāu-pē m̄-chún i sı̀n tō-lí, soà khún-tio̍k i, pàng siaⁿ beh thâi sí i, nā lé-pài-jı̍t i ê pē khı̀ pài-tn̂g sûn, nā khoàⁿ i tı̄-teh sûi-sı̂ kiò I tò-khı̀. I chiū kap Chan Un Tiúⁿ-ló chham-siông, Chan Tiúⁿ-ló an-ùi i kóng, Siōng-tè ta̍k ūi tı̄-teh, lí tı̄ ta̍k ūi thang ho̍k-sāi Siōng-tè.
Hoat-kok phah Tâi-oân ê sı̂, lé-pài-jı̍t beh khı̀ lé-pài tú-tio̍h lâng chhiúⁿ pài-tn̂g, i chiū chhoā Chhoà Seng Thoân-tō cháu, ka-kı̄ ê seng-lí tiàm lóng hō͘ lâng chhiúⁿ liáu-liáu, pháiⁿ-lâng chhut siúⁿ-keh, kia̍h chhèng sı̀-koè chhē, āu-lâi chiah cháu khı̀ Tām-chúi, tı̄-hia choè seng-lí, soà jı̍p Sı̂n-ha̍k, āu-lâi ū siū phài khı̀ tiàm Lūn-á-téng, Tāi-lí-kán thoân-tō. Liáu-āu chiū hioh-khùn tı̄ Chúi-tńg-kha choè seng-lí. I tı̄ 1904 nı̂ choè Chúi-tńg-kha Tiúⁿ-ló kàu taⁿ, chin jia̍t-sim tı̄ kàu-hoē, gâu kan-chèng tō-lí, sui-jiân khah lāu ê sı̂ ū tú-tio̍h choē-choē ê pháiⁿ kéng gū, iáu-kú bô sit-chı̀.
Pak-pō͘ Tiong-hoē sêng-lı̍p ê sı̂, ū tam-tng Tiong-hoē ê Ki-sū. I ê seng-khu chin ióng-chòng, chin gâu ūn-tōng. Bô phah-sǹg tı̄ 4 ge̍h 20 hō ū khí phoà-pı̄ⁿ, āu-lâi jı̍p Má-kai I-ı̄ⁿ, tı̄ 5 ge̍h 14 hō téng po͘ 5 tiám hō͘ Chú kéng-tiàu an-jiân kui-thian, hióng-siū 69 hè. Lé-pài-tn̂g kú-hêng chòng-sek, ū Soan-kàu-su, Ko͘-niû, Bo̍k-su, Thoân-tō kap hiaⁿ-tı̄ chí-bē choē-choē lâi hù. I ū pang Tiúⁿ-ló-niû kap i 4 ê kiáⁿ, 4 ê cha-bó͘-kiáⁿ, kiû Chú an-ùi i ê ka-cho̍k, koh hō͘ in oē o̍h i ê hó só͘ kiâⁿ. A-bēng.
(Tâi-oân Kàu-hoē-pò tē 544 koàn,1930 nı̂ 7 ge̍h)
