Lí Put-pí goá

Ì-tāi-lı̄ ū chı̍t ê phoê-oê-sai, i sı̄ kèng-khiân ê Ki-tok-tô͘, toà tı̄ chı̍t-keng chin oe̍h-soè ê pâng-keng, múi-jı̍t teh siu-pó͘ chèng-lâng ê phoà-oê, lô-khó͘ só͘ tit ê; chí-ū oē-thang ı̂-chhı̂ i ê pak-tó͘ nā-tiāⁿ, chóng-sı̄ i thong-jı̍t hí-lo̍k chhiùⁿ-koa. Ū chı̍t-jı̍t Ì-tāi-lı̄ ê thài-chú in-ūi sim hoân-būn só͘-í tı̄ ke-lō͘ teh sàn-pō͘, keng-kè hit só͘-chāi, khoàⁿ-kı̀ⁿ phoê-oê-sai chiū kı̂-koài mn̄g kóng: “Chı̍t ê phoê-oê-sai án-ni ê lô-khó͘, cháiⁿ-iūⁿ oē-thang chiah-nı̍h hí-lo̍k, goá sı̄ thài-chú, cháiⁿ-iūⁿ hoán-tńg bē-thang khoài-lo̍k ah?” Phoê-oê-sai hoê-tap kóng: “Lí put-pí goá, só͘-í lí bô khoài-lo̍k.” Ông-chú kóng: “Goá ê pē sı̄ chı̍t-kok ê chú, goá sı̄ kok-ông ê siong-sio̍k jı̂n, siáⁿ-sū put-pí lí?” Phoê-oê-sai kóng: “Goá kóng lí put-pí goá lí m̄ siong-sı̀n, goá ê lāu-pē koán lí ê lāu-pē, lí ê lāu-pē sı̄ goá ê lāu-pē phài ê!” Ông-chú mn̄g kóng: “Lí tàu-tí sı̄ chı̄-chūi ê kiáⁿ?” Phoê-oê-sai hoê-tap kóng: “Goá sı̄ thiⁿ-téng chin-sı̂n ê kiáⁿ, sı̄ Bān-ông ê Ông, Bān-chú ê Chú ê kiáⁿ-jı̂, só͘-í lí put-pí goá. Ū Chú Iâ-so͘ ê Lêng tiàm tı̄ goá sim-lāi, choè goá hí-lo̍k ê goân-thâu, lí ū mah?” (Oa̍h-miā ê Bí-niû tē 54 kı̂, 1958 nı̂ 11 ge̍h)