Lóng sı̄ hâ-io-pò͘ hāi ê

e̍k Ū chı̍t ê ún-sū chiàu in sai-hū ê chí-sı̄, khı̀ kàu chı̍t ê chin chió lâng kiâⁿ-kha-kàu ê só͘-chāi, tah chı̍t keng chin kán-tan ê sè keng liâu-á, tı̄ hia toà, tı̄ hia chò lêng-sèng ê siu-liān. Ta̍k-jı̍t chá-khí sé-e̍k liáu āu, chiū chiong tâm ê saⁿ kap hâ-io ê pò͘ koà toà liâu-á piⁿ ê chhiū-á-téng pha̍k hō͘ ta. Ū chı̍t jı̍t, khı̀ hù-kı̄n ê chng-lāi kā lâng pun chia̍h-mı̍h tńg--lâi, hoat-kak i ê hâ-io ê pò͘ hō͘ iā-pô kā-phoà chı̍t khang. Keh-kang, i put-tek-put tio̍h khı̀ chng-lāi kā lâng pun chı̍t tiâu sin--ê. Koè kúi kang, i chiong hâ-io-pò͘ pha̍k toà chhù-téng, chiàu-siông chhut-khı̀ pun chia̍h-mı̍h, tńg--lâi, hâ-io-pò͘ iū koh hō͘ iā-pô kā kah chhùi-kô͘-kô͘ ah. I chin àu-náu. Chng-lāi ê lâng chiū kā i kóng, “Bô lâng ū hoat-tō͘ ta̍k-jı̍t lóng hō͘ lí chı̍t tiâu pò͘, goá khoàⁿ, kan-na chı̍t ê pān-hoat. Lí ē-sái chhı̄ chı̍t chiah niau. Iā-pô kiaⁿ niau.” I chin-chiàⁿ chhı̄ chı̍t chiah niau, tùi hit-jı̍t khí, iā-pô bô koh lâi kiáu-jiáu. I chin hoaⁿ-hí, ta̍k-jı̍t sè-jı̄ chiàu-kò͘ chit-chiah niau, iā ǹg chng-lāi pun chı̍t-koá gû-leng lâi chhı̄ chit-chiah niau. Koè kúi-jı̍t āu, chng-lāi ê lâng kā i kóng, ” Un2-sū sian-siⁿ ah, lí ta̍k-jı̍t ài gû-leng, iōng pun--ê ē-tàng chia̍h kúi-kang ? Siáⁿ-lâng ū hoat-tō͘ kui-nı̂ thàng-thiⁿ kióng-kip lí gû-leng--ah ? Goá khoàⁿ, lí tio̍h chhı̄ chı̍t chiah gû. Chiū lí ū-thang chia̍h, niau iā ū-thang chia̍h.” Koè kúi-kang āu, ún-sū tit-tio̍h chı̍t chiah gû, bián koh khı̀ pun gû-leng. Koh lâi, i su-iàu thó chı̍t-koá tiū-chháu lâi chhı̄-gû, chiū koh khı̀ chng-lāi. Lâng chiū kā i kóng, “Lí ê liâu-á piⁿ ū chin-choē khàng-tē, kā khai-khún-khún--leh, chiū m̄-bián ūi-tio̍h chhı̄-gû koh khı̀ kā lâng pun tiū-chháu lah! ” I chiū khai-sí lê-chhân. Chiām-chiām, i tio̍h chhiàⁿ chı̍t-koá kang-lâng. Āu-lâi kám-kak ū su-iàu khí chı̍t chō chhek-chhng. Choè-āu, i piàn-sêng tē-chú, chhoā-bó͘ seⁿ-kiáⁿ, kap it-poaⁿ ê lâng kāng-khoán, ta̍k-jı̍t bô-êng-chhih-chhih. Koè chı̍t-toāⁿ sı̂-kan, i ê sai-hū lâi chhoē--i, khoàⁿ-tio̍h tò-chhù lóng sı̄ cha̍p-mı̍h ka-khū, siūⁿ boē-hiáu, chiū mn̄g tı̄ hia ê lô͘-po̍k, “Í-chêng ū chı̍t-ê siu-tō-lâng tah liâu-á toà tı̄ chia, chit-má poaⁿ-tùi tó-ūi khı̀ ah ?” Lô͘-po̍k boē-hiáu hoê-tap. Sai-hū chiū tı̍t-chiap jı̍p-khı̀ chhù-lāi, khoàⁿ-tio̍h i ê tô͘-tē tú teh sǹg chı̂ⁿ sǹg lı̄-sek. Sai-hū mn̄g kóng, “Bô, tô͘-tē--ah, ia che sı̄ án-choáⁿ ? ” Tô͘-tē kiàn-siàu kah phak toà sai-hū ê kha-chêng ı̀n kóng, “Sai-hū--ah! Che lóng sı̄ hit tiâu hâ-io-pò͘ hāi--ê lah! ” (Hong-hiòng Tē 3 kı̂, 1990 nı̂ 3 goe̍h)