Lô-chúi hoán chheng Chheng-chúi lô

 Liû-hêng-koa-á piān nā kóng tio̍h kian-sim ê ài-chêng, tō kóng ‘Bô-lūn hái-chúi ē ta, chio̍h-thâu ē noā, goá lóng bô piàn.’ 
 Tē-chân nā hoat-seng piàn-tōng, hái-chúi khó-lêng ē ta; Chio̍h-thâu nı̂-kú goe̍h-chhim mā ū he ē noā--ê, m̄-koh sı̂-kan lóng m̄-sı̄ jı̂n-lūi hiah-nı̄ té ê sı̀ⁿ-miā tán ē-tio̍h--ê. Tùi ài-chêng ū chit khoán kian-chhı̂, siáⁿ lâng thiaⁿ liáu bē kám-tōng ? Loân-ài tiong ê lâng eng-kai lóng bē khı̀-hiâm tùi-hong chò chit khoán ài ê soan-giân. Jı̂n-lūi tùi tāi-chū-jiân ê liáu-kái kiám-chhái m̄-sı̄ hiah choa̍t-tùi, ū-sı̂-á tāi-chū-jiân ē khí-phàn, sán-seng hō͘ lán bô hoat-tō͘ lí-kái ê toā piàn-tōng, goán hia ū 1 ê ‘Lô-chúi hoán chheng Chheng-chúi lô’ ê kò͘-sū. 
 Chit sı̂ ta̍k-ê lóng chai-iáⁿ Lô-chúi-khe hoat-goân tı̄ Lâm-tâu koān, ē-iû lâu koè Chiong-hoà, Hûn-lı̂m chhut hái. Hoān-sè ū lâng chai-iáⁿ kó͘-chá Lô-chúi-khe ê chú-liû m̄-sı̄ chit chūn chit tiâu, ùi Lâm-tâu chhut Chiong-hoà, Hûn-lı̂m keh-kài hia, lâu ǹg khah pak-pêng, chú-iàu ê khe sı̄ tı̄ Chiong-hoà koān lāi, hit chūn kiò chò Chheng-chúi-khe. Hun-chhe-kháu ê Khe-chiu it-tài tō-sı̄ ùi téng-iû Lô-chúi tı̄ chia tı̂m--lo̍h-lâi, chiah thūn--khí-lâi ê thó͘-tē, chin pûi, chèng siáⁿ-mı̍h lóng gâu seⁿ. Koh-lâi ê khe-chúi, tō ke chin chheng, piàn-chò iân-hoāⁿ chúi-chhân siōng hó ê lı̄-iōng. 
 Che sı̄ Lô-chúi hoán chheng ê le̍k-sú poē-kéng. Boé--á, Chheng-chúi-khe jú lâi jú e̍h, mā jú lâi jú chhián, kàu-boé piàn-chò 1 tiâu chheng-chúi-kau-á. Lô-chúi-khe chú-liû kái tō, Sai-lê-khe piàn Lô-chúi-khe ê chú-liû, chheng-chúi koh lô--khı̀. Tē-lí kap le̍k-sú pún-té tō ē lâi khı̀ tiông-ho̍k, che sı̄ beh kóng chit ê kò͘-sū chı̀n-chêng ài seng ū ê ki-chhó͘ koan-liām. 
 Goán i--á ê āu-thâu-chhù tō-sı̄ ùi Sai-lê-khe piⁿ ê 1 ê chng-thâu-á poaⁿ khı̀ pa̍t ūi--ê, goá bat mn̄g i goán goā-kong nah ē beh poaⁿ lı̄-khui kò͘-hiong? Hit chūn goá iáu sè-hàn, kàu chêng kúi nı̂-á, chiah chai-iáⁿ khah sı̍t ê kò͘-sū. 
 Goán goā-kong ū 6 ê hāu-seⁿ 2 ê cha-bó͘-kiáⁿ, goá ū 1 ê a-ı̂, 5 ê a-kū, soah kiám 1 ê khı̀. Chū sè-hàn, goá tō kám-kak kı̂-koài, goán 3-kū koh lo̍h--khı̀ piàn 5-kū, 4-kū soah bô--khı̀ ! Goán A-i kóng i ê 4 hiaⁿ ke i 2 hoè, chū-lâi sı̄ hiaⁿ-tı̄ chí-moē lāi-té siōng khiáu, siōng kut-la̍t koh siōng tit-lâng-thiàⁿ--ê. Hit-chūn goán goā-kong ka-tı̄ bô thó͘-tē, pa̍k lâng ê chhân choh tiān, ū ê hāu-seⁿ chò lông-tiûⁿ ê sit-thâu, ū ê sı̀-koè chò soàⁿ-kang, koh ū 1 ê khan gû-chhia leh kā lâng chài mı̍h-kiāⁿ thàn kang-chı̂ⁿ-á. 
 Hit chūn, Sai-lê-khe téng iáu bô kiô, lâm lâi pak khı̀ lóng tio̍h liâu khe-té. Phó͘-thong-sı̂ chúi chhián, chiah im koè kha-poâⁿ niâ, kau-thong iáu ē-tit-koè. Nā hong-thai hō͘-chúi kı̂, téng-lâu chúi piàⁿ--lo̍h-lâi, kui ê khe-bı̄n ná hái--leh, chin gûi-hiám. Jı̍t-pún sı̂-tāi, ū chū-tōng-chhia--a, chúi nā lio̍h--á khah chhim--1-ē, chhia ē khı̀ tiâu--tio̍h, chit sı̂ tio̍h-ài iōng gû-chhia lo̍h khı̀ tàu thoa, kā chū-tōng-chhia kiù--khí-lâi. Kiù 1 pái 5 kho͘, chiàu hit sı̂ ê bu̍t-kè chí-sò͘ lâi pí, phēng chit chūn ko-sok kong-lō͘ thoa chhia khah kùi. Che sı̄ sái gû-chhia ê a-kū siōng hó thàn ê goā-lō͘-á chı̂ⁿ. 
 Chit ê 4-kū siàu-liân tō khı̀ lông-tiûⁿ chò soàⁿ-kang, chhân--nih hn̂g--nih siáⁿ-mı̍h khang-khoè lóng chò, bē-su sı̄ bē hō͘ lông-tiûⁿ ê tn̂g-kang, bô kéng chho͘-tāng iah khin-khó. Che lông-tiûⁿ ê thâu-ke sı̄ tē-hng sin-sū, kap tong-sı̂ ê Jı̍t-pún tāi-jı̂n ū siong-tong ê kau-poê, kiam chò chng-tiúⁿ, chin ū sè-le̍k. Chhù--nih ū 5 ê hāu-seⁿ kap 2 ê Cha-bó͘-kiáⁿ, thiaⁿ-kóng sı̄ bô-kāng ê bó͘ seⁿ--ê, siōng toā ê Cha-bó͘-kiáⁿ kè hō͘ 1 ê chhut-miâ ê ka-têng chò sin-pū, oân-phı̀n ê sı̂-chūn, kan-taⁿ kng siāⁿ ê tūi-ngó͘ tō khah tn̂g koè Sai-lê-kha ê khoah, thâu-kiâⁿ--ê koè khe--a, boé kiâⁿ--ê iáu-boē lo̍h khe-hoāⁿ. Chhù--nih choan-kang khı̀ toā só͘-chāi phèng-chhiáⁿ kúi-nā-ê sian-siⁿ tńg lâi chò gín-á ê ka-têng kàu-su, ū ê kà Hàn-o̍h bat Hàn-jı̄, mā ū kà hiān-tāi ê thian-bûn tē-lí, koh ū kà sǹg-siàu ê sò͘-ha̍k kap kà Jı̍t-pún gí, hāu-seⁿ kap cha-bó͘-kiáⁿ kui-tēng sı̂-kan siōng-khò, bē-su tı̄ chhù--nih pān 1 keng su-jı̂n ha̍k-hāu án-ni. 
 Chit ê goá m̄-bat kı̀ⁿ koè bı̄n ê a-kū sı̄ 1 ê chin hòⁿ-hiân ê siàu-liân-ke-á, khang-khoè nā m̄-sı̄ kài bô-êng iah-sı̄ kóng ū chò kàu 1 ê khám-chām, tō khı̀ kap thâu-ke ê gín-á tàu-tı̄n tha̍k chheh. Bô-lūn sian-siⁿ kà siáⁿ-mı̍h khò-thêng, i lóng kut-la̍t thiaⁿ. Thâu-ke chai-iáⁿ iā bē kı̀m-chí i khı̀, sian-siⁿ khoàⁿ i chiah-ni khı̂n o̍h, mā hoan-gêng chit ê gia̍h-goā ê ha̍k-seng. 
 4-kū khah toā-hàn liáu-āu, goā-kong pún-té ū siūⁿ beh hō͘ i tńg lâi chhù--nih toè a-hiaⁿ chò pa̍t hāng soàⁿ-kang, m̄-koh i it tio̍h tı̄ hia ē-tàng bián-hùi tha̍k chheh, sui-bóng kang-chı̂ⁿ bô chē, iáu-sı̄ m̄-kam lı̄-khui. 1 ba̍k-nı̍h, to iā kúi-nā-nı̂--a. I chò lâng tiong-hō͘, sèng-tē koh un-sûn. Chit kúi nı̂ lāi, tı̄ lông-tiûⁿ chin hō͘ lâng o-ló, liān thâu-ke mā tùi i jú lâi jú kau-tiōng, lông-tiûⁿ ê toā sè hāng khang-khoè lóng kau i hoa̍t-lo̍h. A-kū tı̄ lông-tiûⁿ ê sı̂-kan pí ka-tı̄ chhù--nih khah tn̂g. Lông-tiûⁿ ū koá khah oàⁿ lâi ê kang-lâng, soah lia̍h-chún-kóng i sı̄ thâu-ke-á kiáⁿ--leh. 
 Ū 1 kang, 4-kū tńg--lâi, kā goā-kong kóng bô-beh koh khı̀ lông-tiûⁿ--á; Mn̄g i lí-iû, sian mn̄g to m̄ kóng, kan-taⁿ kóng beh toè 3 hiaⁿ khı̀ khan gû-chhia. Goā-kong chai-iáⁿ chit ê gín-á kò-sèng kiông, kóng chhut tō sı̄ oē, mā sûi-chāi i ka-tı̄ khı̀ chú-ı̀. Koè 2 kang, lông-tiûⁿ ê thâu-ke soah chhin-sin lâi chhoē--i, kóng nā hiâm chı̂ⁿ siuⁿ chió, ē-sái khí, m̄-thang sı̂ thâu-lō͘. A-kū kian-sim kóng bô beh khı̀, kap kang-kè koân-kē bô koan-hē. Thâu-ke kā goā-kong pài-thok, kóng ta̍k-ê kāng-sèⁿ kiam kāng thiāu-á-lāi--ê, chāi-lâi lóng kā i tòng-chò ka-tı̄ ê hāu-seⁿ tùi-thāi, chia̍h kāng toh pn̄g, kap i ê gín-á tha̍k kāng-khoán chheh, ū siáⁿ tāi-chı̀ lóng thèng-hó chham-siông. Goā-kong it-tı̍t hoē sit-lé, kóng chiah khoaⁿ-khoaⁿ--á khǹg--i, chhiáⁿ thâu-ke mài kiàn-koài. 
 Tē 3 kang, 4-kū kap 3-kū chhut-khı̀ kā lâng chhia si-koe, bô tı̄ chhù--nih. 1 ê chhēng-chhah chin bô-kâng ê sió-chiá lâi chhù--nih, kóng beh chhoē 4-kū, goā-kong chim-chiok khoàⁿ, chiah chai sı̄ lông-tiûⁿ ê chhian-kim, kóng-sı̄ sian-siⁿ ū kà sin ê khò-thêng, pun sin ê chheh, the̍h lâi beh hō͘ a-kū. Hit sı̂ goā-má tú leh sé-saⁿ, i soah khû lo̍h khı̀ tàu sé, kóng beh tán a-kū tńg--lâi. Goā-kong tō kám-kak giâu-gı̂, 4-kū khan gû jı̍p--lâi, khoàⁿ tio̍h sió-chiá, bı̄n soah âng-âng, kā gû pa̍k tı̄ chhù-kak ê thiâu-á piⁿ, tō chio khı̀ goā-kháu--a. 
 Goā-kong kap goā-má chin hoân-ló, khoàⁿ pān-sè, 2 ê ká-ná ū leh kiâⁿ ê hêng, goā-má kóng siang hong-bı̄n ê hō͘-tēng chha hiah koân, án-ni bē-sái. Goā-kong siūⁿ khah chim-chiok, i kóng hō͘-siōng lóng sèⁿ Chiong, sı̄ bô-it-tēng kāng thiāu-á lāi, chóng--sı̄ kāng sèⁿ tō bē-sái chò chhin-chiâⁿ. Che bô kā in tòng--1-ê, chá bān ē chhut tāi-chı̀. 
 Hit kang, it-tı̍t kàu chia̍h-àm-pá 4-kū chiah ka-tı̄ tńg--lâi. Goā-kong tng chiòng hāu-seⁿ ê bı̄n-chêng kā i kiò--lâi, mn̄g i sı̄-m̄-sı̄ ū kap lâng lām-sám lâi? Tùi-hong sı̄ ū chı̂ⁿ ū sè ê lâng, sı̄ thâu-ke, koh-sı̄ pı̂ⁿ-pı̂ⁿ sèⁿ Chiong--ê, lán thǹg-chhiah-kha--ê thı̄n lâng chhēng phoê-ê--ê bē khí. 4-kū kóng sı̄ goā-kong gō͘-hoē, sió-chiá kap i tō ká-ná goā-kháu lâng leh kóng ê tông-chhong koan-hē án-ni, tı̄ ha̍k-gia̍p siōng sio khe-khó, sio bián-lē, m̄-sı̄ goā-kong só͘ siūⁿ--ê án-ni. 
 Chha-put-to poàⁿ-nı̂, 4-kū lóng bô koh khı̀ lông-tiûⁿ, thâu-ke tāi-khài mā chún tú-hó--a, tō bô-koh lâi chio i khı̀ tàu kha-chhiú. 4-kū sái gû-chhia ê sı̂, chhiú--nih sûi-sı̂ lóng chah chheh leh khoàⁿ. Phó͘-thong sı̂ bı̄n-á kat-kat, kap lâng bô-oē-bô-kù, mā bô lâng chai i leh siūⁿ siáⁿ. Ū 1 pái, 1 tâi chē Jı̍t-pún lâng ê o͘-thâu-á chhia tiâu tı̄ khe-té, 4-kū iōng gû-chhia kā i tàu thoa--khí-lâi, he Jı̍t-pún lâng khoàⁿ 4-kū chhiú--nih hit pún chheh, iōng Jı̍t-pún oē mn̄g--i, 4-kū mā iōng kāng-khoán oē kap i kóng, 2 ê lâng soah tı̄ tùi-hoāⁿ ê Sai-lê hoāⁿ piⁿ chē tı̄ thô͘-kha khai-káng 1 po͘. Boé--á, 3-kū mn̄g in sı̄ kóng siáⁿ, chiah kóng sı̄ hit ê Jı̍t-pún lâng sı̄ 1 ê bûn-ha̍k-ka, kap i thó-lūn bûn-ha̍k ê tāi-chı̀. Tùi chng-kha lâng lâi kóng, che sı̄ chin hi-kı̂--ê. Chóng--sı̄, 4-kū sı̄ 1 ê khan gû-chhia ê bûn-bêng lâng. 
 Tāi-chı̀ tō hoat-seng tı̄ ū lâng beh kā lông-tiûⁿ ê sió-chiá chò hm̂-lâng, sió-chiá m̄ kè, in lāu-pē pek i kóng nı̂-hoè iā ū--a, tùi-hong koh chin sù-phoè, nah-ē m̄ kè, kám ka-tı̄ ū siáⁿ phah-sǹg? Cha-bó͘-kiáⁿ khah hó-táⁿ, kóng beh kè goán 4 kū. Che sı̄ chin giâm-tiōng ê tāi-chı̀, sin-hūn bô ha̍h--bô-táⁿ-kín, kāng sèⁿ--ê tı̄ hit-sı̂ ê siā-hoē sı̄ choa̍t-tùi bô khó-lêng hun phoè. Thâu-ke lâi chit-mn̄g 4-kū, mē i bōng-un-poē-gı̄, chia̍h lâng ê thâu-lō͘ soah koái lâng ê cha-bó͘-kiáⁿ, bē-su chhı̄ niáu-chhí kā pò͘-tē--leh, tùi Chiong--ka ê chó͘-sian khoàⁿ beh án-choáⁿ kau-tài. 4-kū tiām-tiām lóng bô ı̀n gah 1 kù oē, thâu lê-lê kù-chāi lâng mē. 
 Thâu-ke beh cháu ê sı̂, pàng 1 kù oē kóng: “Nā beh chhoā goán cha-bó͘-kiáⁿ, thèng-hāu Lô-chúi-khe chúi hoán chheng chiah lâi kap goá kóng !” 
 Joa̍h--lâng kāu hong-thai, hit nı̂ chò toā-chúi, ùi téng-iû lâu lo̍h lâi chin chē mı̍h-kiāⁿ, liān bı̂n-chhn̂g mā phû tı̄ khe--nih, siōng chē--ê sı̄ soaⁿ-téng ê toā châng chhiū-á, hō͘ hong-thai khau--khí-lâi, toā sam lâu--lo̍h-lâi, iân khe ê lâng lóng khı̀ kau toā chhâ, chin chē bo̍k-châi lóng-sı̄ chin ū kè-ta̍t--ê. 4-kū mā iōng kau-á tàu chho͘ soh-á kap lâng leh khioh toā chhâ, hiông-hiông 1 kho͘ chiok toā châng ê Hinoki lâu--lâi, 4-kū kau--tio̍h, chúi chin chhoah-lâu, lâng kap chúi leh piàⁿ la̍t. Kiat-kio̍k, 4-kū tō hō͘ toā sam thoa lo̍h khı̀ Lô-chúi-khe, sí-thé tńg--lâi ê sı̂, i ê bı̄n koh leh chhut la̍t ê khoán-sè. 
 Ū lâng tı̄ 4-kū piⁿ--á, khoàⁿ pān-sè m̄ hó, kiò 4-kū pàng chhiú, koh beh kā 4-kū ê chhiú pak lı̄-khui toā soh. M̄-koh 4-kū chhiú gı̄m chiok ân, ba̍k-chiu gı̂n-ò͘-ò͘, kiò lâng mài chhap chhiú. Hit sı̂, nā bô pàng chhiú, hoān-sè mā ē toè 4-kū hō͘ toā-chúi kńg--khı̀. In kóng 4-kū ká-ná m̄-sı̄ it tio̍h toā chhâ m̄-kam pàng, sı̄ leh chhoē-sí ê khoán. 
 Hong-thai toā-chúi liáu, Sai-lê-khe ê chúi piàn gah chin chheng-khı̀, bē-su hit tiûⁿ toā-chúi sı̄ thiⁿ-kong-peh--á choan-kang beh lâi sé-tn̄g jı̂n-kan ê oè-soè, hân thiⁿ-tē 1 ê chheng-khı̀ siùⁿ. Tı̄ khe-á té choh-sit ê kang-lâng khoàⁿ tio̍h ká-ná ū siáⁿ mı̍h-kiāⁿ tı̄ chúi--nih, liâu oá khı̀ khoàⁿ chim-chiok, sı̄ lông-tiûⁿ ê sió-chiá. Hit-sı̂ chúi chin chhián, bô khó-lêng ē im--sí-lâng, tiāⁿ-tio̍h sı̄ koat-sim beh chhoē-sí, choan-kang kā thâu-khak tu̍h tı̄ chúi--nih. 
 Sū-āu, ū hong-siaⁿ thoân--chhut-lâi, kóng i-seng giām si hoat-hiān hit ê sió-chiá ū-sin 3 kò-goe̍h--a. Tong-jiân, che mā bô chin khak-sı̍t, i-seng sı̄ lông-tiûⁿ thâu-ke ê pêng-iú, oē bē chhı̀n-chhái kā lâng kóng. 
 Goán 4-kū beh chhut-soaⁿ ê sı̂, lông-tiûⁿ thâu-ke ū lâi, i kā goā-kong kóng beh kā 2 ê siàu-liân lâng tâi chò-hoé, só͘-ū song-sū lóng i beh hoa̍t-lo̍h. Goā-kong iā bô ı̀-kiàn, bô lâng oàn-thàn siáⁿ, che sı̄ kok-lâng ê miā, beh oàn tō oàn in bô eng-kai chhut-sı̀ tı̄ sèⁿ Chiong ê ka-têng. 
 Koh-lâi tn̂g-tn̂g ê jı̍t-chí, khe piⁿ ê lâng bô-koh iōng khe-chúi ê chheng kap lô chò chiù-choā, thiⁿ-tē ê tāi-chı̀ m̄-sı̄ lâng ē-tàng chhiâu-chhek--ê. Chóng--sı̄, lô-lô ê toā-chúi beh toa̍t goán hit ê goá m̄-bat khoàⁿ--koè ê 4-kū ê miā mā tio̍h i ka-tı̄ hoaⁿ-hí kam-goān. Chheng-chheng ê chhián chúi iā bē-tàng chó͘-tòng hit ê sió-chiá ê koat-chı̀. Lô-chúi hoán chheng Chheng-chúi lô, chin-chiàⁿ ê ı̀-sù tō-sı̄ án-ni. 

（“Pha-hng ê kò͘-sū” Tâi-pak-chhı̄:Tâi-gí Thoân-pò, 2000 nı̂ 3 goe̍h Chho͘-pán)