Lô-má-jı̄ ūn--tōng

T. K. C. tı̄ 1949 nı̂ ê Chóng-hoē ū phài chı̍t ê pō͘-hoē, kiò choè Lô-má-jı̄ chhui-hêng Pō͘-hoē. Hit ê bo̍k-tek sı̄ beh koh-khah chek-ke̍k-tek chhui-hêng Lô-má-jı̄ tı̄ kàu-hoē lāi. Chit ê pō͘-hoē koè-khı̀ nn̄g nı̂ kú sui-jiân ū pài-thok chin chē ūi ê sian-siⁿ ēng Lô-má-jı̄ tù-chok chheh, in-ūi keng-chè-tek kap ı̀n-soat ê ki-su̍t-tek ê khùn-lân, kàu hiān-chāi lóng iáu boē thang sı̍t-hiān, tı̀-kàu hō͘ lâng kám-kak chit ê Pō͘-hoē lóng bô teh choè sím-mı̍h. Tı̄ Ka-gı̄ kin-nı̂ tō͘ T. K. C. Chóng-hoē ū kiám-thó chit ê Pō͘-hoē, tāi-ke jı̄m-tēng Lô-má-jı̄ sı̄ tı̄ Tâi-oân thoân hok-im choè iàu-kín ê khı̀-kū. Hit ê lí-iû chiū-sı̄: (1) Lô-má-jı̄ (Pe̍h-oē-jı̄) sı̄ oē thang piáu-hiān lán ê pe̍h-oē ê ı̂-it ê bûn-jı̄. Beh thoân hok-im tio̍h ài ēng hit toē-hng ê pe̍h-oē, chit ê sı̄ chong-kàu kái-kek í-lâi ê goân-chek, iû-kı̂ sı̄ tùi goā-kok thoân-tō ê hiān-tāi-sú só͘ tit-tio̍h ê kiat-lūn. (2) Chiàu thóng-kè, Tâi-oân lâng ê 8 siâⁿ í-siōng sı̄ lông-bı̂n kap lô-tōng-chiá. In ê toā pō͘-hūn sı̄ m̄-bat jı̄, á-sı̄ boē kı̀-tit jı̄, boē hiáu tha̍k Sèng-keng. Só͘-í beh thoân hok-im tı̄ in tiong-kan ê sı̂, tio̍h ài tāi-seng kà in bûn-jı̄. Lô-má-jı̄ sı̄ pí hàn-jı̄ ke chin iông-ı̄ⁿ ha̍k-sı̍p. (3) Lán ū ēng pe̍h-oē hoan-e̍k koh ēng Lô-má-jı̄ ı̀n ê Sèng-keng. Chiàu án-ni siūⁿ--khí-lâi, Lô-má-jı̄ sı̄ Tâi-oân kàu-hoē ê pó-poè, m̄-kú choè-kı̄n kàu-hoē lāi ū chin-choē lâng chiām-chiām teh khoàⁿ-khin Lô-má-jı̄, iā chı̄n-liōng teh ēng Hàn-jı̄. Chit khoán ê kheng-hiòng tùi tı̄ Tâi-oân chiong-lâi ê thoân-kàu tek-khak oē siⁿ-chhut chin toā ê chó͘-tòng. In-ūi nā bô ēng Lô-má-jı̄, bô hoat-tō͘ thang hō͘ m̄-bat jı̄ ê lâng tha̍k Sèng-keng, tı̀-kàu tùi lông-bı̂n á-sı̄ lô-tōng-chiá ê thoân-kàu, á-sı̄ beh ı̂-chhı̂ in ê sı̀n-gióng, sı̄ chin-chiàⁿ khùn-lân. Só͘-í tı̄ T. K. C. Chóng-hoē tāi-ke khoàⁿ chit ê Lô-má-jı̄ chhui-hêng ūn-tōng sı̄ chin iàu-kín, koh phài Chiam Thiam-bo̍k Tiúⁿ-ló, Tı̄ⁿ Liân-khun Bo̍k-su, kap goá choè pō͘-oân beh chhui-hêng chit ê ūn-tōng. Taⁿ beh ēng sím-mı̍h hong-hoat lâi chhui-hêng Lô-má-jı̄? Hiān-chāi goán ū teh kè-oē chı̍t hāng sū, chiū-sı̄ beh hoat-khan T. K. C. Digest. Chit ê sı̄ tùi Ka-ná-tāi, Bí-kok, Eng-kok, Tiong-kok, Jı̍t-pún téng, ta̍k kok chióng-chióng ê cha̍p-chı̀ kap sin-bûn kéng kap lán ê sı̀n-gióng, í-kı̍p jı̍t-siông seng-oa̍h khah ū koan-hē ê bûn-chiuⁿ, the̍h hit ê iàu-tiám hoan-e̍k choè lán ê pe̍h-oē, ēng Lô-má-jı̄ ı̀n-soat, āu-lâi choè Kàu-hoē Kong-pò ê hū-lio̍k, kap Kong-pò choè-hoé kià hō͘ kok kàu-hoē. Phian-chip, hoan-e̍k í-kı̍p ı̀n-soat, chiām-sı̂ beh pài-thok Tâi-pak Chè-lâm-koe kàu-hoē bûn-su thoân-tō-pō͘ hū-chek. Tāi-seng chı̍t pō͘ sı̄ Kong-pò ê nn̄g phiⁿ gia̍h. Chit ê T. K. C. Digest ê bo̍k-tek sı̄: (1) Ài kài-siāu sè-kài ta̍k-kok ê ki-tok-tô͘ sı̀n-gióng kap jı̍t-siông seng-oa̍h hō͘ lán thang chò chham-khó. (2) Ài hō͘ lâng chai-iáⁿ Lô-má-jı̄ sı̄ chin ū lō͘-ēng ê bûn-jı̄. (3) Ióng-sêng tha̍k-chheh kap cha̍p-chı̀ ê sı̍p-koàn. Koan-hē chhui-hêng Lô-má-jı̄ ūn-tōng lēng-goā m̄-chai tio̍h ài chò sím-mı̍h khah hó, chhiáⁿ lia̍t-ūi kap goán tàu siūⁿ, nā oē thang hoat-piáu ı̀-kiàn tı̄ Kong-pò, hō͘ tāi-ke chai-iáⁿ sı̄ chin bān-hēng. (Tâi-oân Kàu-hoē-kong-pò tē 760 kı̂, 1952 nı̂ 4 ge̍h)