Lú-sèng m̄-sı̄ jio̍k-chiá

Lâng, sı̄ kiông á-sı̄ jio̍k, nā ēng jio̍k-thé ê khùi-la̍t chò phiau-chún, tong-jiân lú-sèng chiū-sı̄ jio̍k-chiá, tān-sı̄, Siōng-tè siúⁿ-sù hō͘ lâng ê, m̄-nā sı̄ jio̍k-thé ê khùi-la̍t, koh ū chin-choē hong-bı̄n ê châi-tiāu kap te̍k-tiám. Iû-kı̂ sı̄, bûn-bêng hoat-tián kàu chit-chūn, ūn-iōng thé-la̍t ê kang í-keng chin-chió, kap lâm-sèng sio pí, tû liáu thé-la̍t í-goā, lú-sèng sı̍t-chāi m̄-sı̄ jio̍k-chiá. Lâm-sèng hô͘-lú-bóng hō͘ lâm-sèng ê jio̍k-thé khah hoat-ta̍t, tān-sı̄ iā hō͘ sim-chōng kap hoeh-kńg ê hū-tam khah tāng, cha-po͘-lâng khah chá sí. Lú-sèng ê keng-kı̂ hō͘ lú-sèng chin-choē bô hong-piān, tān-sı̄, tı̄ lú-sèng thêng keng chı̀n-chêng, hoān-tio̍h sim-chōng-pı̄ⁿ--ê, chí-ū lâm-sèng ê 4 hūn chi 1, kàu 7 hūn chi 1. Lán lóng siūⁿ kóng, cha-po͘-lâng khah ióng-kám, m̄-thang sió-khoá tāi-chı̀ tō lâu ba̍k-sái, tān-sı̄, in-ūi bô lâu ba̍k-sái, chiū lâu hoeh, ap-chè kám-chêng ê lâng siōng-gâu ūi-chhut-hoeh, lâm-sèng khah gâu ūi-chhut-hoeh, che kap siong-sim ê sı̂ kiông-chè ka-kı̄ m̄-khéng lâu ba̍k-sái ū koan-hē, koh in iōng lim-chiú hoat-sia̍p kám-chêng. Chin-choē cha-po͘-lâng lim-chiú liáu chiah ē khàu. Hui-ki sit-sū kap chhia-hō, lâm-sèng khah gâu sí. Hū-jı̂n-lâng ē-tàng hō͘ chı̍t-ê bí-biāu ê oa̍h-miā tı̄ in ê pak-tó͘-lāi hêng-sêng, seng-tióng, chit-ê tiōng-iàu ê kang-chok, sı̄ lâm-sèng chò-boē-kàu--ê. Tùi jı̂n-sèng lâi kóng, lú-sèng ū chin-choē chin-súi ê te̍k-chit, chhin-chhiūⁿ un-jiû, chû-pi, tông-chêng, thé-thiap, koan-hoâi, jı̄n-choē ê sim téng, chiah-ê lóng-sı̄ Iâ-so͘ só͘ kiông-tiau chin tiōng-iàu ê te̍k-chit. Tān-sı̄, tāi-pō͘-hūn ê cha-po͘-lâng gō͘-kái kóng, “He sı̄ loán-jio̍k--ê cha-bó͘-lâng kò-sèng.” Só͘-í, cha-po͘-lâng ê kò-sèng pı̀ⁿ-choè khah ui-giâm, m̄-káⁿ piáu-lō͘ kám-chêng, m̄-khéng jı̄n-choē, boē-hiáu an-ùi lâng, sit-khı̀ chhoā-gín-á kap gín-á chiap-chhio̍k ê khoài-lo̍k. Tùi le̍k-sú lâi khoàⁿ kò-jı̂n ê lêng-le̍k, lâm-sèng khah ū sêng-chiū, che sı̄ in-ūi lán hō͘ lú-chú khah-chió ê kàu-io̍k, koh hān-tiāⁿ in kan-na ē-sái chò chhù-lāi ê kang. Lâm-lú tong-jiân ū bô-kāng-khoán ê iu-tiám, lán boē-sái kóng lú-sèng it-tēng pí lâm-sèng khah iu-siù, tān-sı̄, chı̀-chió lán iā boē-sái kóng, “Lú-sèng sı̄ jio̍k-chiá.” (Hong-hiòng Tē 9 kı̂, 1991 nı̂ 3 goe̍h)