Lú-tô͘ Ia̍p Kian-sı̀n ê Sió-toān
Ia̍p Kian-sı̀n sı̄ goá só͘-thiàⁿ ê toā cha-bó͘-kiáⁿ. Chú-āu 1903 nı̂ chhut-sı̀. Tùi 3 hoè khí siông-siông tú-tio̍h phoà-pı̄ⁿ, tı̀-kàu ka-chiah-kut khiau-ku. Sòng I-seng kap kı̂-û ê Sian-siⁿ chı̄n-la̍t ài pang-chān i tit-tio̍h hó, chóng-sı̄ bô hoat-tō͘. Só͘ keng-kè ê kan-khó͘ kóng boē liáu, kàu tı̄ pún-nı̂ 10 ge̍h 7 jı̍t ē-pō͘ 7 tiám cheng chiū hō͘ Chú kéng-tiàu i tńg-khı̀. Lūn i só͘ keng-kè ê chōng-hóng goá ài siá 4 hāng pâi-lia̍t tı̄ ē-bı̄n:
1.Lūn i-ê sin. I tùi 3 hè ê sı̂ chiū oē tè lâng chhùi-bé gı̂m-sı̂, 4 hè ê sı̂ chiū oē hiáu kı̂-tó; ta̍k àm, ta̍k chá-khí, ta̍k saⁿ-tǹg, bô boē kı̀-tit kı̂-tó ê sū; ta̍k-àm nā bô kap lâng choè ke-têng ê lé-pài, sui-jiân chin kan-khó͘ i iā m̄ khı̀ khùn. Kàu i chit pái boē khí-lâi kap lâng lé-pài, i iáu-kú kiò goán tio̍h tı̄ i ê pâng-keng lé-pài. Kàu i beh lı̂m-chiong ê jı̍t goá khoàⁿ i ê seng-khu put-chí kan-khó͘ ê khoán, goá ū kā i kóng beh chio i ê lāu-bú saⁿ-kap lé-pài, i chin hoaⁿ-hí. Goá ū tha̍k Sèng-keng hō͘ i thiaⁿ, kóng tō-lí an-ùi i. Goá ū mn̄g i ū hoân-ló bô? I kóng lóng bô hoân-ló. Kı̂-tó soah, i ê sim chin pêng-an, hêng-iông hián-chhut chin hoaⁿ-hí ê khoán. Kàu i beh kè-óng ê sı̂ lō͘-bé kù chiū-sı̄ kóng, “A-pá, tio̍h lâi lé-pài,” chiū an-jiân kè-sı̀.
2.Lūn i ū-hàu. Tùi i oē-hiáu-tit liáu-āu, chiū siông-siông khoà-lū kiaⁿ-liáu hō͘ pē-bú siū-khı̀; ū-sı̂ khoàⁿ i ê sió-tı̄ sió-bē bô koai, i chiū hiâm i cháiⁿ-iūⁿ m̄-kiaⁿ hō͘ pē-bú siū-khı̀. I ê pı̄ⁿ nā kan-khó͘ iā chin gâu thun-lún i ê kan-khó͘, m̄-káⁿ chak-chō pē-bú. I beh lı̄-khui sè-kan hit ē-po͘ ū khó͘-khǹg goá kap i ê lāu-bú kóng, “A-pâ, Án-niâ, lín lóng m̄-thang hoân-ló, kan-khó͘ sı̄ goá-ê; bô iàu-kín, lín nā hoân-ló oē phoà-pı̄ⁿ.” án-ni ū kóng kúi-nā pái.
3.Lūn i ê hô-pêng. Tùi i choè gin-ná kàu pia̍t-sè, i ê khoán sı̄ chin koai; khoàⁿ-kı̀ⁿ ê lâng lóng chin thiàⁿ i. Goá m̄-bat khoàⁿ i kap gin-ná-phoāⁿ oan-ke.
4.Lūn i ê thian-chu. Goá khoàⁿ i-ê sin-thé chin lám chiū m̄-káⁿ hō͘ i tha̍k-chheh. Kū-nı̂ ū chún i tha̍k, bô loā-kú jı̄-bú lóng o̍h liáu, Chin-tō Būn-tap iā ka-kı̄ soà tha̍k liáu, āu-lâi ta̍k àm lóng oē kap goán tha̍k Sèng-keng. Tı̄ kū-nı̂ khoàⁿ lâng chhiah phòng-se chhiah soàⁿ ê chı̂ⁿ-tē, i chiū ài chhiah, bô loā-kú iā lóng oē hiáu-tit. Taⁿ goá siá kúi-jı̄ ài hō͘ lán o̍h i ê hó bô͘-iūⁿ. Sui-jiân ū tām-po̍h thang hō͘ choè pē-bú ê lâng siong-sim, iáu-kú ū thang hoaⁿ-hí ê só͘-chāi, in-ūi Siōng-chú ū hó-ı̀-sù soah i ê kan-khó͘, kéng-tiàu i kàu Thian-tông, kú-tn̂g ê só͘-chāi, tit-tio̍h éng-oán ê hok-khı̀. Tio̍h kám-siā i ê in-tián.
(Tâi-oân Kàu-hoē-pò tē 369 koàn,1915 nı̂ 12 ge̍h)