Lāu-bú ê jı̍t

Lia̍t-ūi sió pêng-iú, 5 goe̍h tē-jı̄ lé-pài-jı̍t, chē-chē lâng beh kat chián-jiông hoe tı̄ in ê heng-chêng lâi lé-pài. Ū-ê lâng kat pe̍h-sek--ê, ū-ê lâng kat âng-sek--ê. Sı̄ in-ūi teh kı̀-liām chû-ài ê lāu-bó. Siàu-liân kàu lāu, ta̍k lâng lóng ū chı̍t ê lāu bó. Ū-ê lâng ê lāu bú iáu oa̍h tı̄ sè-kan, ū-ê lâng ê kiám-chhái í-keng tı̄ thiⁿ-téng. Chóng-sı̄ pêⁿ-pêⁿ lâi teh siàu-liām. Che sı̄ chı̍t ê chin hó koh súi ê só͘ chò. Lāu-bú iáu oa̍h ê lâng kat âng-hoe, koè-sin ê lâng kat pe̍h-hoe lâi hun-pia̍t. Che sı̄ sím-mı̍h ı̀-sù lè? Bí-kok tang-hái-hoāⁿ chı̍t ê sè-sè ê chng-siā nı̍h, ū chı̍t ê hū-jı̂n-lâng, chò Chú-jı̍t-o̍h ê kàu-oân 26 nı̂ kú. I chin jia̍t-sim, koh gâu ín-chhoā sè-kiáⁿ bat tō-lí. I bat chı̍t pái soat-bêng cha̍p-tiâu-kài ê tē 5 tiâu “Tio̍h hàu-kèng pē-bú” ê sı̂, ū kóng-khí ǹg-bāng tùi lín tiong-kan ē siūⁿ-chhut chı̍t ê hoat-tō͘ lâi kı̀-liām lāu-bú ê toā thiàⁿ-thàng. Hit sı̂ i ê cha-bó͘-kiáⁿ iā tı̄ hia. I put-chí ı̀n-siōng lāu-bú só͘ kóng chit kù oē. Āu-lâi chit ê hū-jı̂n-lâng koè-sin, kàu-hoē ū khui tui-tō-hoē lâi siàu-liām i koè-khı̀ ê hōng-sū. Hit sı̂ i ê cha-bó͘-kiáⁿ ū chiong chı̍t láng ê chián-jiông hoe lâi chng-thāⁿ sek-tiûⁿ. Chit ê chiū-sı̄ ēng chián-jiông hoe ê khí-goân. Āu-lâi ū chı̍t ê toā seng-lí lâng chàn-sêng chit ê sū, chiū tı̄ 5 goe̍h tē-jı̄ lé-pài-jı̍t, tiàm tı̄ i ê tiàm-lāi kí-hêng lāu-bú ê kı̀-liām-hoē. Che sı̄ lāu-bú-jı̍t ê khí-goân, sı̄ tú-tú Chú-āu 1908 nı̂ ê sū. Chit ê hó-sū chiū chiām-chiām piàn-thoân kàu sè-kài ta̍k só͘-chāi. Ēng chián-jiông hoe piáu-hiān lāu-bú ê thiàⁿ-chêng, ū kúi-nā hāng ê ı̀-sù: Pe̍h-sek sı̄ sûn-kiat. Âng-sek sı̄ jia̍t-chêng. Phang-bı̄ sı̄ thiàⁿ-thàng. Bō͘-sēng sı̄ jı̂n-chû. Chheⁿ-chhùi sı̄ thun-lún. Lán iàu-kín m̄-nā kı̀-liām, tio̍h sı̍t-chāi tı̄ lāu-bú chāi-siⁿ ê jı̍t, lâi hàu-kèng in, m̄-sı̄ chí-ū ēng mı̍h-kiāⁿ, tio̍h ēng sūn-ho̍k kap chun-kèng; koh tio̍h ū khó-chhú ê sı̀n-gióng seng-oa̍h, bián hō͘ i khoà-lū, iā m̄-thang kan-ta ēng chı̍t jı̍t lâi kı̀-liām, tio̍h ēng ta̍k jı̍t lâi kı̀-liām. Pó-lô Sian-siⁿ kà-sı̄ kóng, “Tio̍h chun-kèng lí ê pē-bú (che-sı̄ thâu chı̍t-tiâu ū kâⁿ èng-ún ê kài), beh hō͘ lí heng-thong, tn̂g hoè-siū tı̄ sè-kan (Í-hut-só͘ 6:23).” (Tâi-oân Kàu-hoē-kong-pò 761 koàn, 1952 nı̂ 5 goe̍h)