A-sêng, A-gı̄, A-hô chit 3 ê siàu-liân gín-ná ǹg Tiong-heng kó͘-hūn iú-hān kong-si teh kiâⁿ. In múi chı̍t ê sim-lāi lóng ū phāu chı̍t ê hi-bāng, chiū-sı̄ siūⁿ kóng nā khó oē tiâu, thang hō͘ lâng chhái-iōng chò kong-si ê chit-oân m̄ chin hó. Án-ni in chiū oē-thang chē tı̄ chin súi ê pān-kong-sek lâi pān-kong, thiaⁿ sǹg-poâⁿ tı̍t-tiak tı̍t-tiak ê siaⁿ, in iā oē-thang ha̍k-sı̍p chin choē hāng ê sū. A-gı̄ kóng “A-sêng, lí kóng kin-á-jı̍t oē khó sím-mı̍h?” A-sêng kóng “Kiám m̄-sı̄ Kok-bûn, Soàn-su̍t, Siông-sek”, chit 3 kho sı̄ A-sêng choè tek-ı̀ ê 3 kho, i ka-kı̄ siūⁿ kóng nā khó chit 3 kho, i it-tēng oē tiâu. A-gı̄ kóng “Tio̍h, goá iā sı̄ án-ni siūⁿ, put-kò kiám-chhái iáu oē khó sǹg-poâⁿ,” in-ūi tùi sǹg-poâⁿ ê sêng-chek lâi khoàⁿ, i sı̄ pí chit 2 ê tông-ha̍k khah hó.
In jı̍p kong-si ê toā-mn̂g kiâⁿ jı̍p keng-lí-sek, keng-lí khoàⁿ-tio̍h in jı̍p-khı̀, chiū chhiò-chhiò kóng “Lín sı̄ beh lâi khó liān-sı̍p-seng hò͘ⁿ”. In chı̍t choê ı̀n-tap kóng “Sı̄”, keng-lí chiū chí piah-kak ê 3 teh toh-á, kóng, “lín chē tiàm hia, toh-téng ê khà-phı̀ⁿ seng kā goá sǹg chı̍t ē, nā sǹg liáu chiah pò goá chai hit-ê sò͘-bo̍k”. In lóng tı̀m-thâu chiū chē tı̄ hia sǹg. Chóng-sı̄ in chin tio̍h-kiaⁿ toh-téng ê khà-phı̀ⁿ hui-siông chē, múi toh chı̀-chió ū 3 bān tiuⁿ. A-sêng sim-lāi teh siūⁿ “sǹg che ū sím-mı̍h lō͘-ēng? Goán sı̄ lâi chham-ka liān-sı̍p-seng ê khó-chhı̀ ê, iā m̄-sı̄ lâi chò kang, ūi sím-mı̍h kiò goán sǹg che?” I jú sǹg sim-lāi jú hoân-cha̍p. A-gı̄ iā sı̄ án-ni siūⁿ “Aih! Chit-ê keng-lí sı̄ m̄-sı̄ kap goán teh sńg-chhiò? Goán sǹg chiah-ê khà-phı̀ⁿ, ū sím-mı̍h lō͘-ēng, ná m̄ kā goán khó?” Chí-ū A-hô kám-kak che sı̄ chı̍t ê ū ı̀-gı̄ ê sū, i sǹg chı̍t pah tiuⁿ chiū chò kı̀-hō khǹg chò-hoé, chı̍t-pō͘ chı̍t-pō͘ ûn-ûn-á chò.
Sǹg tia̍p-á kú, A-sêng thun-lún boē tiâu chiū khı̀ mn̄g keng-lí kóng “Keng-lí sian-siⁿ, goá í-keng sǹg kàu chı̍t chheng tiuⁿ lah, lí beh kā goán khó boē?” Keng-lí iô-thâu kóng “Iáu-chá, iáu-chá, lí koh khı̀ sǹg”. I gia̍h thâu khoàⁿ sı̂-cheng, sı̂-kan í-keng 11 tiám poàⁿ lah. A-gı̄ sui-jiân bô kóng oē, chóng-sı̄ i ê ba̍k-chiu siông-siông teh khoàⁿ keng-lí, ı̀-sù ná chhin-chhiūⁿ teh mn̄g kóng “Hó boē? Goá thang kiat-sok boē?” Sı̂-kan teh beh kàu 12 tiám lah, A-sêng khoàⁿ sı̂-cheng, pak-tó͘ iā kám-kak iau lah, chóng-sı̄ keng-lí iáu boē kā in khó-chhı̀, in iáu tı̄ hia teh sǹg. A-gı̄ iā jím boē tiâu, i siūⁿ ài khı̀ goā-kháu chhoán chı̍t-ē khùi, m̄-bat chē hiah kú ê sı̂-kan, chı̍t sim iā siūⁿ kóng lâi pài-thok keng-lí seng kā in khó, chóng-sı̄ bô ióng-khı̀, in-ūi kı̀-tit i lāu-pē kā i kóng “Lí tio̍h hó-hó khı̀ khó, nā khó oē jı̍p kong-si, lí ê chiân-tô͘ chiū oē kng-bêng,” bān-it nā hō͘ keng-lí siū-khı̀, khó boē jı̍p chiū chhiⁿ-chhám. Só͘-í i chí-ū thun-lún koh sǹg, chóng-sı̄ i ê thâu-náu teh siūⁿ pa̍t hāng bô choan-sim teh sǹg, soah boē kı̀-tit sǹg kàu goā choē, i koh chài têng-sǹg. Chóng-sı̄ A-hô lóng m̄-bat gia̍h-thâu, chí-ū tı̄ hia jı̄n-chin teh sǹg, “tang, tang, tang ...” sı̂-cheng tân 12 tiám lah. A-sêng sim chin tio̍h-kip, giōng beh khiā-khí--lâi. A-gı̄ iā-sı̄ án-ni, in 2 lâng lóng thêng-chí kang-chok, chí-ū A-hô iáu teh sǹg. A-sêng kap A-gı̄ lóng teh khoàⁿ keng-lí, tán khoàⁿ i oē kóng “Lín ē-po͘ chiah lâi khó”, chóng-sı̄ keng-lí àⁿ-thâu teh khoàⁿ sin-bûn, bô beh chhap in. In lóng teh kı̂-koài, chí ū tı̄ hia teh tán khoàⁿ, keng-lí oē khui-chhùi boē? Chı̍t hun-cheng koè-khı̀, 2 hun-cheng koè-khı̀, 10 hun-cheng koè-khı̀ lah, keng-lí iáu teh khoàⁿ sin-bûn. “Keng-lí!” A-sêng tòng boē tiâu chiū toā siaⁿ kiò, “Ouh!” keng-lí ı̀n liáu chiū gia̍h-thâu khí-lâi, A-sêng mn̄g “Í-keng 12 tiám lah, goán thang tńg-khı̀ chia̍h pn̄g, ē-po͘ chiah koh lâi?” Keng-lí ı̀n kóng “M̄-bián, m̄-bián, hiān-chāi í-keng khó liáu lah”, “goán lóng iáu boē khó lah?” “Chóng-sı̄ goá í-keng lóng kā lín khó lah, lâi, lín lâi”. A-sêng A-gı̄ chiū khı̀, A-hô iáu tı̄ hia teh sǹg. “A-hô! Kín lâi!” A-sêng kiò, “tán chı̍t ē goá chit pah tiuⁿ sǹg chı̍t-ē”, A-hô ı̀n-tap chiū iáu tı̄ hia teh sǹg, A-hô koáⁿ-kín sǹg liáu chiū kiâⁿ oá-lâi.
Keng-lí chiū kóng “Taⁿ, lín kin-á-jı̍t í-keng khó liáu lah, goán ê kong-si hiān-chāi só͘ khiàm-ēng ê liān-sı̍p-seng iā í-keng chhoē tio̍h lah. Lín tāi-iok iā oē chai. Chı̍t ê lâng bô lūn chò sím-mı̍h tāi-chı̀, lóng sı̄ chin tiōng-tāi ê chek-jı̄m, tùi chit-ê chek-jı̄m tio̍h ài ū thun-lún ê sim, koh tio̍h oē choan sim khı̀ choè, chiah oē sêng-kong. Kin-á-jı̍t, 3 ūi lâi khó-chhı̀, goá chai-iáⁿ lín ê ha̍k-gia̍p lóng chin hó, chóng-sı̄ goá khiok m̄ chai lín ū chit khoán ê cheng-sı̂n á-bô. Hiān-chāi chhı̀-giām ê kiat-kó, chí-ū Ông A-hô ū ta̍t-tò chit-ê phiau-chún, goán sı̄ su-iàu chit khoán ê jı̂n-châi. Taⁿ goán ê kong-si koat-tēng beh phèng i lâi kang-chok. ” In 3 ê tùi kong-si chhut-lâi, sim-chêng lóng bô siâng. Te̍k-pia̍t sı̄ A-sêng kap A-gı̄ sim-lāi chin kan-khó͘, A-sêng kóng “Beh nā chai-iáⁿ án-ni, goá it-tēng oē hó-hó tı̄ hia sǹg”. A-gı̄ iā kóng “sı̄, goá chin hō͘-hoé, goá ê lāu-pē it-tēng oē mē goá”. A-hô kóng “M̄-bián hō͘-hoé, iā m̄ bián kan-khó͘ sim, keng-lí teh kóng iā chin tio̍h, lán tio̍h ài ū thun-lún ê sim kap choan-sim, chiah oē sêng-kong”. A-sêng, A-gı̄ thiaⁿ liáu lóng tı̀m-thâu. Sèng-keng kóng “Tı̄ chı̀ sió-khoá ê sū chı̄n-tiong ê, tı̄ toā ê iā chı̄n-tiong, tı̄ chı̀ sió-khoá ê sū put-gı̄ ê, tı̄ toā ê iā put-gı̄ ! ” (Lō͘-ka 16:10)
(Ka-têng ê pêng-iú tē 54 kı̂, 1962 nı̂ 8 goe̍h)
