Lāu-lâng

Hit-ê lāu-lâng goá chhiâng-chāi tı̄ soè ê a-phà-toh lâu-kha khoàⁿ-tio̍h i. I ê chhēng-chhah bô siáⁿ piàn-hoà, se-chong-khò͘, pe̍h T-shirt, po̍h-po̍h ê hiû-á kap chı̍t-téng『連戰』『蕭萬長』ê bō͘-á, chhiú--nih the̍h lok-á té khang-kan-á, tú tio̍h lâng tō iōng goā-séng-khiuⁿ ê Hoâ-gí mn̄g:『有沒有空瓶子啊?』 I ê sin-thé khoàⁿ--khí-lâi chiâⁿ ióng, ún-tàng sı̄ chò-peng liān--ê. I chit-má ê thâu-lō͘----nā chún-kóng he sǹg-sı̄ thâu-lō͘, sı̄ khioh pháiⁿ-tâng kū-siā khı̀ bē. Nā beh kóng, i sı̄ 1949 nı̂ lâi--ê hit-phoe, tō-sı̄ lán kóng ê lāu-ô͘-á. Chiàu-lí kóng, goá èng-kai ài tông-chêng--i, m̄-koh tian-tò-péng, goá soah tām-po̍h-á gê-siâu--i, chú-iàu in-ūi i kóng-oē goá thiaⁿ bô, mā m̄-chai beh án-choáⁿ ı̀n. I hoān-sè kám-kak goá chiok bô lé-māu, boé--á mā bô-ài koh mn̄g--goá-a. Ū chı̍t-kang, goá tńg-lâi tı̄ a-phà-toh chhut--lâi ê saⁿ-kak-thang hia, khoàⁿ-tio̍h kéng-chhat-chhia thêng tı̄ lō͘-piⁿ, nn̄g-saⁿ ê kéng-chhat teh bô-êng. Oá koè-khı̀ khoàⁿ, lāu-lâng tó tı̄ thô͘-kha, kóng sı̄ koè toā-lō͘ bô sè-jı̄, hō͘ chhia kauh--tio̍h. Goá khiā tı̄ piⁿ--á khoàⁿ, lāu-lâng chhiú--nih koh kā sok-ka-lok-á lak ân ân, kin-á-jı̍t khioh ê pháiⁿ-tâng kū-siā lóng tı̄ lāi-té. Goá khiā tı̄ hia khoàⁿ, lāu-ô͘-á, lí ê『戰士授田證』, lí ê『退伍俸』--leh? Lí ūi chit-ê thé-chè hi-seng poaⁿ-sı̀-lâng, oāⁿ-tio̍h siáⁿ? Sı̄ siáng pàng-sak--lí-ê? Lāu-lâng pı̄n-toāⁿ chhoán-khùi--a, m̄-koán thiaⁿ ū thiaⁿ bô lóng bē ı̀n-siaⁿ. Kéng-chhat teh bô-êng, kiò goá mài tòng-lō͘, kiù-hō͘-chhia lâi kā lāu-lâng kng-khı̀ chèng, ōⁿ-iⁿ ōⁿ-iⁿ......bô-lâng hoê-ta̍p goá ê būn-tê. (TGB Thong-sı̀n tē 32 kı̂, 2002 nı̂ 5 goe̍h)