Lāu-lâng Thè-hiu beh Án-choáⁿ

Kū-nı̂ saⁿ--goe̍h, ma-ma lı̄-khui chia̍h-thâu-lō͘ 15 nı̂ ê pēⁿ-ı̄ⁿ. Iáu ē kı̀-tit 15 nı̂-chêng, sit-gia̍p saⁿ-nı̂ ê ma-ma chin bô kán-tan chiah chhoē-tio̍h pēⁿ-ı̄ⁿ chhan-thiaⁿ ê khang-khoè, hū-chek hit-ê pō͘-mn̂g--ê ū gō͘ ê lâng, hū-chek pēⁿ-ı̄ⁿ lāi-té só͘-ū i-hō͘ jı̂n-oân kap pēⁿ-lâng ê saⁿ-tǹg; in-ūi kang-chok sèng-chit khah te̍k-sû, khang-khoè chhái lûn-pan-chè, pun-chò jı̍t-pan kap sió-iā-pan, bô-lūn lo̍h-hō͘, chhut jı̍t-thâu, hioh-khùn-jı̍t iah-sı̄ 29 mê, koè-nı̂, lóng khó-lêng ài lûn i tı̍t-pan. Ìn-sióng tiong, che 10 goā nı̂ lâi, ta̍k-nı̂ ê 29 mê, ma-ma chha-put-to lóng tiàm tı̄ pēⁿ-ı̄ⁿ , chóng--sı̄ kā pēⁿ-ı̄ⁿ--nih tı̍t-pan i-hō͘ jı̂n-oân kap toà-ı̄ⁿ pēⁿ-lâng ê àm-tǹg chhoân-hó liáu-āu, chiah koáⁿ-kín chông tńg-lâi chhù--nih kap goán chia̍h thoân-ı̂ⁿ-pn̄g. Kin-nı̂ koè-nı̂, goán chin hoaⁿ-hí ma-ma chóng-sǹg ē-tàng lâu tı̄ chhù--nih, kui ke-hoé-á tàu-tı̄n chia̍h-pn̄g, m̄-bián tiàm pēⁿ-ı̄ⁿ tit-pan, m̄-koh ma-ma ê sim-chêng ná-chhiūⁿ ū khah tı̂m-tāng. Sui-bóng ū teh chù-ı̀ pò-choá jı̂n-sū kóng-kò, chhin-chiâⁿ pêng-iú mā lóng ē tàu sio-pò, m̄-koh ùi saⁿ--goe̍h hông chu-khián kàu-taⁿ, lóng it-tı̍t chhoē bô thâu-lō͘, 56 hoè--a, bı̄n-tùi sit-gia̍p, tō-sǹg sı̄ kiông-chè thoè-hiu--a, bı̄-lâi, kám sı̄ ài khò hāu-seⁿ? I m̄ chai-iáⁿ āu poàⁿ-sı̀-lâng ê seng-oa̍h beh án-choáⁿ, siūⁿ-tio̍h che, it-hiòng kian-kiông ê ma-ma bı̄n--nih choân-sı̄ hoân-ló kap jiâu-hûn. Pēⁿ-ı̄ⁿ chhím-thâu iōng gia̍p-bū liáu-chı̂ⁿ chò lí-iû, khiàm oân-kang sin-súi, mā khui-koè kúi nā pái oân-kang hoē-gı̄, tap-èng kóng beh kā gı̂n-hâng tāi-khoán, lâi la̍p-chheng só͘ khiàm ê sin-súi. M̄-koh, thiaⁿ-kóng pēⁿ-ı̄ⁿ keng-êng-chiá tâu-chu chhò-gō͘, pēⁿ-ı̄ⁿ ê châi-bū í-keng piàⁿ-khang--khı̀-a, châi-bū gûi-ki mā hoat-seng kúi nā pái, thoa koh-chài thoa, ài hō͘ oân-kang ê sin-súi iû-goân hoat bē chhut--lâi, khiàm chhiau-koè poàⁿ-nı̂--a. Chiâⁿ-chē oân-kang ūi-tio̍h seng-oa̍h kap keng-chè, í-keng lēng-goā chhoē thâu-lō͘, m̄-koh tùi hiah-ê chò 15~20 nı̂, í-keng ū-hoè ê chú-chia̍h kang-chok jı̂n-oân, te̍k-pia̍t sı̄ hū-lú lâi kóng, chá tō hō͘ chiū-gia̍p chhı̄-tiûⁿ pâi-tû--khı̀-a, kan-taⁿ ē-tàng chı̍t-kang thoa-koè chı̍t-kang, tán-thāi kı̂-chek chhut-hiān. Kı̂-chek bô khó-lêng chhut-hiān, siōng bû-nāi ê sı̂, thâu-ke the̍h gō͘-hūn chhiat-kiat-su kap gō͘-tiuⁿ 10-bān-kho͘ ê chi-phiò, tı̄ gō͘-ê tiong-lāu-nı̂ hū-lú bı̄n-thâu-chêng, poàⁿ-siâⁿ poàⁿ-ui-hia̍p, poàⁿ-nı̂ bô niá-tio̍h sin-súi--a, tùi chit gō͘-ê chhut-bē lô-tōng-la̍t ê hū-lú lô-tōng-chiá, 10-bān-kho͘ khak-sı̍t ē hō͘ in chin giàn, sûi tō kā hit gō͘-hūn chhiat-kiat-su chhiam--lo̍h-khı̀, chhut-bē ka-tı̄, mā chhut-bē 10 goā nı̂ ê lô-tōng kè-ta̍t, lô-tōng-chiá ê chun-giâm koh chı̍t-pái kı̀-chāi chu-hong chau-that. Chiàu lô-ki-hoat kui-tēng, thâu-ke in-ūi liáu-chı̂ⁿ iah-sı̄ gia̍p-bū sok ân ê sı̂, ē-tàng chiong-chí lô-tōng khè-iok, thâu-ke ài chiàu kui-tēng hoat hō͘ lô-kang khián-sàn-hùi: tı̄ kāng chı̍t-ê thâu-ke ê sū-gia̍p tan-ūi chia̍h-thâu-lō͘, múi moá chı̍t-nı̂ ài hoat chı̍t-kò-goe̍h pêng-kun kang-chu ê khián-sàn-hùi. Oāⁿ chı̍t-kù oē kóng, ma-ma èng-kai ē-tàng niá-tio̍h chha-put-to 15 kò-goe̍h sin-súi ê khián-sàn-hùi, m̄-koh i oân-choân bô liáu-kái ka-tı̄ ê lô-tōng koân-ek, soah niá bô-kàu saⁿ-kò-goe̍h ê khián-sàn-hùi lâi chū-tōng lı̄-chit. Goá m̄-káⁿ kā i kóng, i sûi ài bı̄n-tùi koh khah bô-chêng ê hiān-sı̍t: chı̍t-ê lô-tōng hū-lú, keng-koè kui-sı̀-lâng ê lô-tōng hù-chhut liáu-āu, lāu--lâi bô thoè-hiu-kim, sı̄-sè ūi-tio̍h āu-chı̍t-tē ê seng-oa̍h to kiōng-beh bē chhoán-khùi--a, i bē chhun-chhiú kā sı̄-sè thó poàⁿ-kak-gı̂n, án-ne lâi, lāu-lâng thoè-hiu liáu-āu ê seng-oa̍h sı̄ beh án-choáⁿ koè? (TGB Thong-sı̀n tē 74 kı̂, 2005 nı̂ 11 goe̍h)