Lē-lú-ha̍k

Chū khai Tâi í-lâi í-keng nn̄g-pah-goā nı̂ lah. Nā sı̄ ko͘-toaⁿ chit-ê hái-sū, bûn-hong iā chin-chió. Tng hit-tia̍p iáu-boē jı̍p Jı̍t-pún Tè-kok pán-tô͘ í-chêng, chiū chı̍t-pah ke ê gín-á jı̍p-o̍h tha̍k-chheh tāi-iok bô kàu 10 ke; chiū 10 ke ê tiong-kan ē bat-jı̄ cheng-kong kàu ē chò-bûn siá-phoe-ê, kiaⁿ-liáu khah-bô chı̍t-ke. Cha-po͘ gín-á siōng-chhiáⁿ án-ni, nā-sı̄ cha-bó͘ gín-á koh-khah chió. Tùi jı̍p Jı̍t-pún pán-tô͘ ê liáu-āu, Koaⁿ-hú ū siat-lı̍p Ha̍k-hāu, put-lūn sòng-hiong hó-gia̍h ê chú-tē lóng ū thang jı̍p-o̍h siū kàu-hùn; chiū ná chiām chı̀n bûn-hong ê khı̀-siōng. Nā m̄-sı̄ hit-hō chhiⁿ-mı̂, ngı̄-sim, sí-siú ê lâng, iā tek-khak chai chú-tē jı̍p-o̍h siū kàu-hùn ê iàu-kín. Taⁿ lūn kàu cha-po͘ gín-á jı̍p-o̍h, ta̍k-nı̂ ke-thiⁿ. Nā-sı̄ cha-bó͘ gín-ná lâi jı̍p-o̍h tha̍k-chheh iáu chin chió; cháiⁿ-iūⁿ ē hiah chió? Chhui-mô͘ i-ê iân-kò͘, ū 4 hāng ê pè-toan.

(1) Tâi-oân ê hū-jı̂n-lâng bô koàn-sı̀ chhut-goā, nā kı̀ⁿ-tio̍h cha-po͘-lâng chiū ùi; che sı̄ tùi pē-bó hiaⁿ-tı̄ chū sè-hàn chiū giâm kı̀m-chí i, m̄-thang lâm, lú chhap-cha̍p ê iân-kò͘; che sı̄ chı̍t-hāng ê pè-toan.

(2) Tùi sè-hàn chiū kā i pa̍k-kha, bô hoân-ló i-ê kan-khó͘ kiâⁿ, kap siong-hāi sin-thé, kan-ta óng-lâi chiū tiàm tı̄ chhù-lāi, teh chng-thāⁿ i-ê seng-khu; che sı̄ nn̄g-hāng ê pè-toan.

(3) Liû-thoân kóng, Hū-jı̂n-lâng nā jı̍p-o̍h tha̍k-chheh bat-jı̄ bô lō͘-ēng, kiaⁿ-liáu ū sún-hāi; nā kè-lâng ê liáu-āu, chí-ū sı̄ giâ cheng-khū-thûi cheng-bí, the̍h poà-ki poà-bí, sàu-tē, ho̍k-sāi ang ko͘, iúⁿ-chhı̄ kiáⁿ, chiū kàu-gia̍h chı̄n hū-jı̂n-lâng ê pún-hūn lah, bat-jı̄ bô lō͘-ēng; che chiū-sı̄ saⁿ-hāng ê pè-toan.

(4) Tùi-tiōng cha-po͘ khoàⁿ-khin cha-bó͘; pē-bó nā siⁿ cha-po͘ chiū hoaⁿ-hí, siⁿ cha-bó͘ chiū iàm-ò͘ⁿ, sı̄ kóng nā siⁿ cha-po͘ ū thang chhoā-bó͘, siⁿ cha-bó͘ tio̍h kè pa̍t-lâng. Tāi-ke án-ni saⁿ-tham saⁿ liû-thoân, chiah khǹg chit-hō khoàⁿ-khin ê sim, bô ài thè cha-bó͘ gín-á siat-hoat hō͘ i jı̍p-o̍h siū kàu-hùn; che sı̄ sı̀-hāng ê pè-toan.

Taⁿ tāi-khài lâi kóng cha-po͘ lâng ê koân koè-thâu tı̄ hū-jı̂n lâng. Tùi chheng-pah nı̂ chêng kàu-taⁿ, hū-jı̂n-lâng siū bû-lí ê ap-chè; kàu hiān-kim iā sı̄ án-ni. Chhin-chhiūⁿ cha-po͘ tùi hū-jı̂n-lâng ū tò͘-hı̄n ê sim, ū khǹg-siâ ê sim, ū hı̀-lāng ê sim, ū khi-bú ê sim, chit sı̀ hāng ê só͘ kiâⁿ sı̄ khoán-thāi hū-jı̂n-lâng kheng-po̍k chı̀-ke̍k. Koh chı̍t hāng, kı̀m-chí i chhut-goā, khoán-thāi i chhin-chhiūⁿ chiáu-siù koaiⁿ tı̄ chiáu-lang; ēng kha-pe̍h pa̍k i-ê kha, khoán-thāi i chhin-chhiūⁿ chhâ-siōng teh hı̀-lāng.

Koh chı̍t hāng, lâng kiám m̄-bat kiò hū-jı̂n lâng chò loē-chō͘? Nā hū-jı̂n gín-á bô siū kàu-hùn, kàu toā-hàn thái-thó ē pang-chān ke-lāi, chéng-chê ke-lāi hú-ióng sè-kiáⁿ? In-ūi tı̄ ke-lāi chéng-chê hú-ióng sè-kiáⁿ, kap tı̄ o̍h-tn̂g ê kàu-hùn pêⁿ-pêⁿ iàu-kín. Lán ài ǹg-bāng kiáⁿ-jı̂ cheng-kong tı̀-sek, sûn-choân, chiū m̄-thang bô tı̄ ke-lāi kà-sı̄; tı̄ ke-lāi kà-sı̄ lóng-sı̄ oá-khò lāu-bó ê chek-sêng. Nā-sı̄ chò lāu-bó sè-hàn m̄-bat siū kà-sı̄, kiám ē kà-sı̄ i-ê kiáⁿ-jı̂ mah? Koat-toàn bô chit-ê lí-khı̀. Kó͘-chá lâng khah ū tı̀-sek ê, iā ū khoà-lū chit-ê tāi-chı̀, bat tù Lú-ha̍k chheh. Chhin-chhiūⁿ Lâu Hiòng ê Lia̍t-lú toān. Kı̄n-sè ê lâng chhin-chhiūⁿ Nâ Téng-goân iā bat tù Lú-ha̍k chheh chı̍t-phō. Lán kiám m̄ tio̍h siūⁿ kó͘-chá ū tı̀-sek ê lâng tù-chheh kám-kek sim mah? Taⁿ lūn-kàu tùi-tiōng cha-po͘ khoàⁿ-khin cha-bó͘ ê hong-sio̍k, m̄-nā chı̍t-jı̍t nā-tiāⁿ, nā-sı̄ chiong goá chı̍t-lâng lâi thòng-kái bián-lē, iā-sı̄ khang-khang tio̍h-boâ. Só͘-í goān chèng-lâng ē bêng-pe̍k, lâi tû-khı̀ chit hō mâu-pēng.

Koh chhı̀-mn̄g chı̍t-hāng. Chhin-chhiūⁿ siⁿ cha-bó͘ tio̍h kè pa̍t-lâng, chiū khoàⁿ-khin i, nā siⁿ cha-po͘ ū thang chhoā-bó͘ chiū tùi-tiōng i, ta̍k-ke bô hun-pia̍t chit-ke hit-ke, lóng sı̄ kóng chhı̄ cha-bó͘ sı̄ pa̍t-lâng ê, só͘-í lóng bô hō͘ i jı̍p-o̍h siū kà-sı̄; cha-po͘ chhoā pa̍t-ke ê hū-jı̂n-lâng, chiū lóng bô siū kà-sı̄ ê, chèng-lâng lóng siū chit-hō pè-toan, beh tùi tó-ūi khı̀ chhoā gâu ê hū-jı̂n-lâng mah?

Án-ni thang chai m̄-thang sit-lo̍h thiⁿ só͘ siúⁿ-sù ê tek-hēng. Hiān-kim tang-sai ta̍k-kok, mn̂g-hō͘ toā-khui, ū siat-lı̍p sin-bûn-pò thang thong sè-kài ê siau-sit; hoān-nā miâ-siaⁿ kok, cháiⁿ-iūⁿ jı̂n-ài, hó hong-sio̍k, kok-ka cháiⁿ-iūⁿ heng-ōng, m̄-bián chhut-mn̂g ē thang chai. Hiān-sı̂ sè-kài bûn-bêng kok ē heng-khí, ū siat Lú-o̍h-tn̂g, Lú-sin-bûn í-kı̍p Lú sian-siⁿ, Lú I-seng, hū-jı̂n-lâng ē kà-sı̄ bián-lē, ē kia̍h-pit siá-jı̄ chò bûn, cháiⁿ-iūⁿ ē thang tit-tio̍h chit-hō tı̀-hūi ê hok-khı̀? chiū-sı̄ chiàu pêng-siông ê jı̂n-lūi lâi khoán-thāi cha-bó͘ lâng, hō͘ i jı̍p-o̍h siū kà-sı̄, chiū ū tit-tio̍h chit-hō tı̀-hūi, pêⁿ-pêⁿ thang chò toā lō͘-ēng ê lâng.

Khó-sioh Tâi-oân ê cha-bó͘ gín-á, khah chē bô jı̍p-o̍h, sı̄ tùi chò pē-bó ê lâng bô ài hō͘ jı̍p-o̍h tha̍k-chheh. Taⁿ toā bián-lē chò pē-bó ê lâng tio̍h khoán-thāi i-ê cha-bó͘-kiáⁿ kap hāu-siⁿ pı̂ⁿ-pı̂ⁿ iàu-kín, hō͘ i jı̍p-o̍h siū kà-sı̄, chiàⁿ ē hō͘ hū-jı̂n-lâng thang poah-khui hûn-bū, khoàⁿ-tio̍h chheng-thiⁿ, bián-tit kú-tn̂g tiàm tı̄ o͘-àm ê tē-ge̍k-tiong.

(Tâi-lâm Hú-siâⁿ Kàu-hoē-pò tē 212 koàn, 1902 nı̂ 11 ge̍h)