Lōng-tōng-chú Koa

1. Phı̀-jū toā-hiaⁿ kap sió-tı̄
  Sió-tı̄ sim-koaⁿ ài saⁿ-lı̄
  Ài pun hūn-lāi ê ke-gia̍p
  M̄ kap pē-hiaⁿ ū kau-sia̍p

2. Hián-bêng ché kiáⁿ toā put-hàu
  M̄ thàn lāu-pē ê ke-kàu
  Lāu-pē tı̀-hūi khǹg un-jiû
  Chhut chāi ché kiáⁿ khı̀ phiau-liû

3. Ke-gia̍p pun-liáu siūⁿ pháiⁿ-sı̀
  Só͘-í m̄-káⁿ kín-kín khı̀
  M̄-kú hêng-lí khoán chê pē
  Bián-kióng pài-pia̍t chiū saⁿ-lı̄

4. Chiū kàu ı̄ⁿ-pang khı̀ khiā-khí
  Kau-poê pêng-iú chin hoaⁿ-hí
  Tiàm hia khiā-khí bô hoat-tō͘
  Chı̂ⁿ-châi ke-gia̍p oh pó-hō͘

5. Chia̍h-chhēng koè-thâu kap chiú-chùi
  Só͘ pun ke-gia̍p ti-chı̄n hùi
  Tú-tio̍h tı̄ hia toā ki-hng
  Chiàⁿ chai kan-khó͘ taⁿ kàu-mn̂g

6. Chiū oá chı̍t-lâng lâi chí-ki
  Hit-lâng kah I khı̀ chhı̄ ti
  Ta̍k-tǹg só͘-chia̍h bô kàu-gia̍h
  Chiū chiong tāu-khak koh lâi chia̍h

7. Tāu-khak chho͘-chho͘ oh-tit pō͘
  Siūⁿ-tio̍h ba̍k-sài ná lo̍h-hō͘
  Hut-jiân hoán-hoé siūⁿ-tio̍h pē
  Chiū kóng goán chhù kang chin chē

8. Taⁿ tio̍h kín-kín tńg hiuⁿ-lí
  Chiàⁿ bián toā chia gō beh sí
  M̄-kú tek-choē thiⁿ kap pē
  Taⁿ tio̍h lóng-chóng kā pē chhē

9. Goá taⁿ sı̍t-chāi chin put-tē
  Kiû lí hō͘ goá chò kang-gē
  Liâm-piⁿ oa̍t-thâu chiū tò-tńg
  Saⁿ-lı̄ iàu-kú ū hiah hn̄g

10.Lāu-pē khoàⁿ-kı̀ⁿ hoat chû-pi
  Kín-kín cháu khı̀ phō the chim
  Hit-sı̂ thâu-mn̂g pı̀ⁿ chiáu-siū
  Sin-chhēng phoà-noā phah kat-kiû

11.Chiàⁿ-chhiú kiah koáiⁿ phāiⁿ ka-chı̀
  Tò-chhiú jiàu chiūⁿ thâu tàm-chı̀
  Lāu-pē khoàⁿ-liáu bô siū-khı̀
  Sim-koaⁿ hoán-tńg the tek-ı̀

12.Ché kiáⁿ hoán-hoé jı̄n put-sı̄
  Lāu-pē poàⁿ-kù bô chek-pı̄
  Hoan-hù lô͘-po̍k kín hoê-ke
  The̍h saⁿ chhiú-chí í-kı̍p ê

13.Chiū thâi gû siat iân-sia̍h
  Tāi-ke hoaⁿ-hí tio̍h lâi chia̍h
  In-ūi chē kiáⁿ pún sı̄ sí,
  Kai-chài koh oa̍h thang hoaⁿ-hí

(Tâi-lâm Kàu-hoē-pò Tē 366 koàn, 1915 nı̂ 9 ge̍h)