Lūn Iû-thài lâng
Sèng-keng kúi-nā ūi ū kóng, Iû-thài lâng tio̍h lia̍h chò tāi-seng. Kiù-chú pún-sin iā sı̄ hoan-hù I-ê ha̍k-seng tio̍h tāi-seng khı̀ Iâ-lō͘-sat-léng thoân hok-im. Pó-lô sı̄ put-chí bêng-pe̍k Iâ-so͘ ê ı̀-sù, só͘-í iàu-kín tāi-seng ka-tı̄ thàn, kóng hō͘ in thiaⁿ.
Taⁿ kiaⁿ-liáu lán ı̄ⁿ-pang lâng khah-siông bē kı̀-tit in; bē kı̀-tit lán ê Chú sı̄ Iû-thài lâng; bē kı̀-tit Sèng-keng sı̄ tùi Iû-thài lâng ê chhiú chhut. Lán khah-chē só͘-ū--ê sı̄ tùi in m̄-tı̍hⁿ--ê soà kàu tı̄ lán; m̄-sı̄ lán khah ē kham-tit, sı̄ in-tián pe̍h-pe̍h hō͘ lán. Sèng-keng ū kóng, In-ūi in m̄-sı̀n hō͘ Siōng-tè at-chı̍h, lín in-ūi sı̀n lâi liû-chûn, tio̍h sè-jı̄ kiaⁿ-hiâⁿ bo̍h-tit ū chū-ko ê sim-koaⁿ (Lô-má 11 : 20). Koh kóng, In nā sı̀n Iâ-so͘, ē ná chhin-chhiūⁿ tùi sí koh-oa̍h ê lâng.
Chó͘-ke kàu-hoē m̄-sı̄ lóng-chóng bē kı̀-tit in. Lín í-keng chai lán Eng-kok ê Tiúⁿ-ló-kàu m̄-nā chhe goán lâi Tâi-oân, iā ū chhe Bo̍k-su, Ko͘-niû, I-seng khı̀ Ē-mn̂g kúi-nā ūi, Soàⁿ-thâu kúi-nā ūi, koh Sı̍t-la̍t iā ū. Kiám-chhái lín chió-chió lâng chai tı̄ Ka-lâm-tē ê pak-pêng, chı̍t-ūi hō-chò Aleppo (sǹg-sı̄ A-lân ê sio̍k-tē) tı̄-hia iā ū goán ê Bo̍k-su, Bo̍k-su-niû, I-seng, I-seng-niû, khı̀ toà hia ; koh in teh ǹg-bāng bô loā-kú ū nn̄g-ê Ko͘-niû piān-piān thang khı̀ hia tàu-chān Iû-thài ê hū-jı̂n-lâng lâi sı̀n Iâ-so͘ chò in ê Bí-sài-a.
Koh tı̄ Lûn-tun-siâⁿ ê tang-pêng iā ū thoân-tō sian-siⁿ teh chhut-la̍t ín-chhoā Iû-thài lâng. Kàu-hoē ê Bo̍k-su, Tiúⁿ-ló, í-kı̍p Ko͘-niû ū khı̀ chān. Ko͘-niû tiâu-kò͘-ı̀ khı̀ o̍h Hi-lı̄-nı̂, Hi-pek-lâi ê jı̄ thang kap in tâm-lūn khah bêng-pe̍k. Ū siat chē-chē hoat-tō͘ iàu-kín ài kiù in. Ū siat I-koán kò͘ in ; tı̄ chhù-lāi tàu-chān kang, iā ū khui àm-o̍h hō͘ in ū ki-hoē thang bat Sèng-keng, koh ū kà-sı̄ in ê sè-hàn kiáⁿ chò kang-gē thàn-chia̍h. Tùi án-ni ū chē-chē ê sı̀n Kiù-chú, chin jia̍t-sim chān in ê sian-siⁿ. Hia ê lâng ài chhiáⁿ lán chit-pêng tio̍h chhiat-chhiat thè in kiû. Tùi án-ni ǹg-bāng tāi-ke ē kap Pó-lô tâng-sim chı̍t-ı̀ lâi kóng, Hiaⁿ-tı̄ ah ! goá sim só͘ ı̀-ài sı̄ I-sek-lia̍t ē tit-tio̍h kiù soà thè in kiû Siōng-tè. Lín nā chhiat-chhiat thè in kiû, Siōng-tè ē toā-toā hoaⁿ-hí. Lán tio̍h thé-thiap Iâ-so͘ ê chêng ; nā bô, kiaⁿ-liáu I chiū m̄-tı̍hⁿ lán.
(Tâi-lâm Hú-siâⁿ Kàu-hoē-pò tē 197 koàn, 1901 nı̂ 8 ge̍h)