Mn̂g-sı̂n
Hoān nā pài ngó͘-siōng ê ke, thiaⁿ-tn̂g ê mn̂g-piⁿ ū chhòng chı̍t ê hiuⁿ-lô͘, chiū-sı̄ teh ho̍k-sāi mn̂g-sı̂n; ǹg-bāng kā in kò͘ mn̂g, hō͘ iau-siâ kúi-koài m̄ káⁿ jı̍p in ê ke-lāi lâi kau-tı̂ⁿ.
Khoàⁿ Hong-sio̍k-khó kı̀-chài kóng, Siōng kó͘ ê sı̂, Sı̂n-su, Ut-lu̍t hiaⁿ-tı̄ nn̄g lâng ē lia̍h kúi, pah kúi nā hāi lâng in nn̄g lâng chiū lia̍h khı̀ chhı̄ hó͘. Só͘-í ta̍k ke bô lūn kùi-chiān koè nı̂ ê-hng chiū oē Sı̂n-su, Ut-lu̍t nn̄g lâng ê tô͘ lâi tah tı̄ mn̂g-hō͘-nı̍h; beh hō͘ kúi kiaⁿ m̄ káⁿ lâi.
So͘-sı̂n-kı̀ kóng Tông Thài-chong phoà-pēⁿ ê sı̂, mn̂g-goā ū kúi lâi tǹg chng-á-kak, iā thô͘-soa, thong lāi-bı̄n kiaⁿ-hiâⁿ m̄ káⁿ khùn. Thài-chong chin kiaⁿ, teh mn̄g i ê tiāu-sı̂n; Chı̂n Sio̍k-pó chiū chàu kóng, Goá goān kap Ô͘ Kèng-tek khiā tı̄ mn̂g goā siú mn̂g, kúi chiū m̄ káⁿ lâi.
Hit mê kó-jiân bô kúi-koài ê siaⁿ. M̄-kú Thài-chong put-jím in 2 lâng lóng bô khùn; só͘-í hoan-hù lâng, oē Chı̂n Siok-pó, Ô͘ Kèng-tek ê siōng tiàu tı̄ mn̂g-nı̍h, ná-chún oa̍h lâng teh kò͘.
Āu-lâi ê chiū kèng in chò mn̂g-sı̂n lâi pé-mn̂g.
Ngó͘-Sèng
Chhit-siu lūi-phian kóng, Ngó͘-thong sı̂n chiū-sı̄ Ngó͘-sèng; lūn ngó͘-sèng, ngó͘-hián, ngó͘-thong, miâ sui-jiân koh-iūⁿ kı̂-sı̍t sı̄ chı̍t-iūⁿ. So͘-sı̂n-kı̀ kóng, Tông-tiâu Hi-chong ê sı̂ ū chı̍t lâng sı̀ⁿ Ông miâ Jū; hut-jiân khoàⁿ-kı̀ⁿ toā kng tı̄ i ê hn̂g-lāi; chèng lâng khı̀ khoàⁿ, ū thian-sı̂n gō͘-ê tùi thiⁿ lo̍h-lâi; toā siaⁿ kóng, Goán siū thian-bēng beh lâi pó-pı̀ chia ê lâng, kóng liáu koh khı̀. Tùi án-ni hiah-ê lâng chiū khí-biō chng-siōng lâi ho̍k-sāi.
Sòng Hui-chong hong chò Ngó͘-sèng-hô͘: Sòng Lêng-chong hong Ngó͘-sèng-ông, khí Ngó͘-sèng-biō teh kèng-pài. Tùi lâng lı̄-khui chin Siōng-tè, só͘-í khoài sı̀n bô kin-pún ê gōng-oē.
Lêng-ông
Tiong-kok kap Jı̍t-pún-kok lâng lóng chin tùi-tiōng lêng, sǹg chò ke̍k pó-mı̍h. Tı̄ Hoâ-giâm keng kı̀ Lêng-ông ū cha̍p-ê. Kı̀-sò͘-lio̍k kı̀ Lêng-ông ū 8 ê. Bûn-hiàn thong-khó kı̀ Lêng-ông ū 5-ê, tiàm chúi-lāi; chúi ta lêng chiū bô. Sòng Hui-chong 4 nı̂ hong ngó͘ lêng-ông, Chheⁿ-lêng hong Kóng-jı̂n-ông, Chhiah-lêng hong Ka-te̍k-ông, N̂g-lêng hong Hu-èng-ông, Pe̍h-lêng hong Gı̄-chè-ông, Ou-lêng hong Lêng-te̍k-ông, khí Lêng-ông biō hō͘ lâng pài chè. Tú-tio̍h toā khòng-hān chiū khı̀ Lêng-ông bı̄n-chêng khit hō͘.
Kı̂-sı̍t chhâ-khó bô lêng, iā bô lêng-sı̂n, sè-sio̍k só͘ chheng ê lêng, chiū-sı̄ chhin-chhiūⁿ Tiô-chiu lâng só͘ pài ê toā boé choâ. Khóng-chú kóng, “Chúi-lāi siû-ê, chai thang ēng bāng pha; teh poe-ê chai thang ēng chı̀ⁿ siā; chóng-sı̄ lêng goá m̄ chai i cháiⁿ-iūⁿ khiâ hong-hûn chiūⁿ-lo̍h”. Tı̀-sek chhin-chhiūⁿ Khóng-chú, siōng-chhiáⁿ kóng m̄-bat lêng. Siáⁿ-sū chū-chok chhong-bêng lām-sám chhòng lêng lâi teh ho̍k-sāi?
Ló͘ Pan-kong
Ló͘ Pan keng ū kóng, Ló͘ Pan sı̀ⁿ Kong-su miâ Pan, jū miâ I-tı̀. Lāu-pē miâ Hiân, lāu-bó sı̀ⁿ Ngô͘; sı̄ chhun-chhiu Ló͘ Tēng-kong 3 nı̂ 5 goe̍h chhe 7 chhut-sı̀. Pài Pâu Ló-táng o̍h kang-hu O̍h-liáu kang-gē chin hó, chò lâng ke̍k kı̂-khiáu; gâu khek-oē, gâu khí-chhù, chō chûn, chō chhia, í-kı̍p ta̍k hāng khı̀-khū. Bat kā in lāu-bó chò chhâ lâng kā thoa chhia; ki-koan chı̍t-ē tín-tāng chhia ka-tı̄ ē kiâⁿ. Iā bat khek chhâ chò boa̍h-hio̍h; poe tı̄ khong-tiong 3 jı̍t-kú bē ka-la̍uh lo̍h-lâi. Bēng-chú o-ló Kong-su-chú sı̄ kı̂-khiáu ê lâng chin ū iáⁿ.
Só͘-í kàu taⁿ chò ba̍k-kang ê lâng kèng Ló͘ Pan-kong chò chó͘-su. Bêng Éng-lo̍k-kun hong chò Hū-kok toā sai-hū-thâu.
Pat-sian
Tō-kàu toā iàu-kín ê tō-lí, sı̄ kóng tō͘ lâng jı̍p in ê kàu thang sêng-sian bē-sí.
Beh sêng-sian ê hoat-tō͘, sı̄ tio̍h khı̀ soaⁿ-lāi chēng-chēng siu-hēng, chia̍h chhiū-hio̍h chia̍h chháu-kin, liān kim-tan; āu-lâi lóng bián chia̍h ngó͘-kok; chhun iông-khı̀, bô im-khı̀, chiū ē oāⁿ kut-thâu piàn-hoà chò sian. Lūn khı̀ chò sian sı̄ bô iáⁿ ê sū, taⁿ m̄-bián piān-lūn. Chóng-sı̄ tùi Goân-tiâu í-lâi ū gō͘ thoân kóng ū 8 ê lâng khı̀ sêng-sian. Khe-khó in 8 lâng ê lâi-le̍k lóng sı̄ bû-khe chi-tâm, kan-ta sı̄ hò͘ⁿ koài-ê só͘ liap-chō, m̄-kú chhú-sı̂ chiâⁿ chò kò͘-sū. Taⁿ bóng-kı̀ Pat-sian ê miâ tı̄ ē-té:
Hàn Chiong-lı̂, Lí Thiat-koái, Chô Kok-kū, Hân Siong-chú, Nâ Chhái-hô, Hô Sian-ko͘, Tiuⁿ Kó-ló, Lū Sûn-iông, chiū-sı̄ Lū Tōng-pin. Hiān-sı̂ ū lâng oē tô͘ tiàu teh sio-hiuⁿ kèng-pài. Chóng-sı̄ Tiong-kok chò i-seng ê lâng kap khui io̍h-tiàm io̍h-hâng, lóng chin kèng-tiōng Lū Tōng-pin, chheng chò Io̍h-châi-ông chó͘-su. Ta̍k nı̂ 4 goe̍h 14 jı̍t chò i ê siⁿ-jı̍t teh ho̍k-sāi.
Cha̍p-peh Lô-hàn
Piàn khoàⁿ Biō-ú toā giâm, toā sı̄; tı̄ toā sı̂n pu̍t ê tiān, lióng pêng-piⁿ ū chhāi 18 Lô-hàn ê siōng.
Pu̍t keng kóng goân-pún O-lô-hàn, A-lô-o, lóng sı̄ Thian-tiok kok ê oē, hoan-e̍k chiū-sı̄ Chin-jı̂n; ı̀-sù sı̄ Sek-kia ê tô͘-tē; lâng chun-kèng i ū tek hu̍t-tō, hō-chò O-lô-hàn. Chiàu Pu̍t-ke ê lâng kóng Lô-hàn ū 500 lâng m̄-nā 18 lâng. Chit 18 Lô-hàn ê siōng tı̄ Pu̍t ê bı̄n-chêng, sı̄ teh pang-chān Pu̍t-chó͘ kiâⁿ hoat-tō͘ lâi sêng lûn-hoê.
Taⁿ 18 Lô-hàn ū i ê miâ, chóng-sı̄ ta̍k ê miâ 7, 8 jı̄ chin tn̂g; tı̄-chia siá thâu nn̄g jı̄ chiū hó. (1) Pin-pho, (2) Kia-lo̍k, (3) Ka-poa̍t, (4) So͘-pı̂n, (5) Lo̍k-kí, (6) Poa̍t-tô, (7) Ka-lí, (8) Tāi-to͘, (9) Sut-phok, (10) Poàn-thok, (11) Hō͘-lô, (12) Ná-ka, (13) In-khiat, (14) Sut-ná, (15) A-chí, (16) Chù-chhâ, (17) To͘-lân, (18) Pin-thiô.
Sek-kia kı̀-jiân bô iáⁿ khı̀ sêng hu̍t, i ê ha̍k-seng kèng khah bô iáⁿ.
Ngó͘ kok sı̂n Lâu Béng chiong-kun
So͘-chiu-hú-chı̀ kı̀ Ngó͘-kok sı̂n sı̀ⁿ Lâu miâ Joē; sı̄ Sòng-tiâu tù miâ ê bú-chiòng, khı̀ tı̄n-bông tı̄ Goân-peng ê chai-lān. Sòng sú-kı̀ kóng, Sòng Lí-chong goân-nı̂ pak-sı̀ ê peng lâi kong (Pak peng chiū-sı̄ Goân-peng); Lâu Joē kian-siú nn̄g goe̍h goā jı̍t khah ke kiù-peng bô lâi, ka-tı̄ chai siú bē tiâu, chiū chū-chı̍p thong ke ê lâng lim to̍k-io̍h sí; chiū chiong sin-si lóng sio, jiân-āu pún-sin chū-chı̄n. Kàu pêng-tiāⁿ chiū hong Lâu Joē chò Iông-ui-hô͘; bô kú koh hong Kiat-siông-ông, lı̍p sû chè-sū.
Sè-sio̍k kóng Lâu Joē sí-liáu chò sı̂n, teh koán hông-thiông kiò chò Lâu Béng chiong-kun; tiau siōng khí biō teh ho̍k-sāi; lóng phah-sǹg i ē hō͘ nı̂-tang hó siu-sêng, pó-pı̀ ngó͘-kok bô hō͘ chháu-meh thâng-thoā hāi; choh-sit lâng chin tùi-tiōng teh pài.
Sam-chheng
Tō-kàu ê tō-sū lia̍h-chò Goân-biâu-oàⁿ ê Sam-chheng-tiān chò tē it toā. Hit ê tiān-lāi ū 3 sian toā phô͘-sat. (1) Goân-sí thian-chun, (2) Lêng-pó thian-chun, (3) Thài-siōng thài-kun Ló-chú. Tō-kàu ê lâng kóng Goân-sí, Lêng-pó, nn̄g ê thian-chun, hiān-sı̂ êng-êng bô pān-sū; lóng sı̄ kau hō͘ Thài-siōng Ló-kun teh koán bān-sū. Che sı̄ Tō-kàu ê lâng ka-tı̄ phiàn, soà phiàn pa̍t lâng.
Kheⁿ-saⁿ-ko͘
So͘-sı̂n-kı̀ ū kı̀ Kheⁿ-saⁿ ko͘-niû, sı̄ Sam-sian-tó ê lâng, in tâng-pau ê hiaⁿ Tiō Kong-bêng chō͘ Siong-tiâu tı̄n-bông; saⁿ ê ko͘-niû thiaⁿ-kı̀ⁿ in hiaⁿ hō͘ lâng thiâ-khı̀, iā lóng chê chhû, ēng i hoat-su̍t lâi chō͘ Siong Tiū, soà lóng siāng-jı̍t tı̄n-bông. Bú-ông iâⁿ Siong í-āu Khiong-chú-gâ thek-hong Tiō Kong-bêng chò sı̂n, soà hong i saⁿ ê sió-moē chò Kheⁿ-saⁿ ko͘-niû. Sè-sio̍k thoân kóng Kheⁿ-saⁿ-ko͘ teh chiáng kim-táu-chheⁿ, chù-tiāⁿ lâng choán-sè, he̍k-sı̄ hō͘ i chò hù-kùi; he̍k-sı̄ hō͘ i chò pı̂n-chiām ê sū. Hū-jı̂n-lâng bô seⁿ kiáⁿ-jı̂, chiū tùi i kiû kiáⁿ, kèng i chò Sian-ko͘ ê Chù-siⁿ-niû-niû. Hong-sı̂n-toān só͘ kı̀ lóng sı̄ pe̍h-chha̍t bē sı̀n-tit.
Ông-iâ--360 Chı̀n-sū
Lūn Ông-iâ ê kò͘-sū, m̄ chai chhut tı̄ sím-mı̍h chheh ū kı̀. Chhâ-khó Hu̍t-keng, Sı̂n-toān bô khoàⁿ tio̍h Ông-iâ ê lâi-le̍k, só͘-í goá m̄ chai. Ǹg-bāng phok-ha̍k ê chu-kun in ū khoàⁿ chhian-su bān-koàn thang kóng-bêng i ê lâi-le̍k.
Chóng-sı̄ bat thiaⁿ ló-sêng ê lâng kóng kúi-kù bóng kı̀ tı̄ ē-té, m̄ chai sı̄ tio̍h á m̄ tio̍h. Ū lâng kóng Ông-iâ ū hun chêng ông, hō͘ ông. Chêng ông sı̄ tı̄ Tông-tiâu chiū hong, kóng sı̄ Tông Bêng-hông beh chhı̀ Tiuⁿ Thian-su ē lia̍h iau-chiⁿ ê pún-sū, chiū chiong hiah-ê hān-lı̂m chı̀n-sū chiām-sı̂ koaiⁿ tı̄ thô͘ khut-té; chiū chhiáⁿ Tiuⁿ Thian-su lâi. Tông Bêng-hông chiū kā i kóng kı̄n-lâi tı̄ Kiong goā ê tē-hia̍t lāi, ū siaⁿ lı̄n-lòng kiò m̄ chai sı̄ iau, á-sı̄ koài, á-sı̄ lâng, á-sı̄ siáⁿ-hoè, chhiáⁿ lí kóng. Thian-su chiū sái hoat-le̍k, ēng pó-kiàm chı̍t-ē tu̍h khı̀, tē lāi hiah-ê tha̍k-chheh lâng sí liáu-liáu. Tông Bêng-hông khoàⁿ in óng-sí chiū hong hit kúi pah ê hān-lı̂m chı̀n-sū chò Ông-iâ thè thiⁿ sûn siù ê tāi sı̂n-tō.
Hō͘ ông sı̄ Bêng-tiâu Éng-lo̍k kun só͘ hong, iû-goân sı̄ Chı̀n-sū oan-óng sí, chiū hong chò Ông-iâ; ū 360-ê, ū-ê sèⁿ Chu, Lí, Koeh, Tı̂, Sio, Siau; chē-chē kóng bē liáu, Che sı̄ liû-thoân m̄ chai hi-sı̍t. Bat khı̀ mn̄g chı̍t ê chhut-miâ hoê-siūⁿ, i kóng Ông-iâ m̄ sı̄ hu̍t, sı̄ Tō-kàu ê sı̂n-tō, m̄ sı̄ chāi in Pu̍t keng, in bô tiōng m̄ chai-iáⁿ; iā kóng Ông-iâ keng tı̄ Tâi-oân biō-ú chió-chió ū; kóng nā sı̄ ài chai Ông-iâ ê lâi-le̍k tio̍h khı̀ Tâi-lâm hú-téng 6 phò͘ lō͘, ū chı̍t só͘-chāi miâ Lâm-kun-sin; hit só͘-chāi ê Ông-iâ sı̄ Tâi-oân tē-it chá, iā tē-it toā; in hia ū Ông-iâ ê keng-tián, chiong 360 sian lóng chiàu pâi, siông-sè kóng-bêng ta̍k sin ê lí-le̍k.
Goá sı̄ koáⁿ kiàn-bûn ê lâng, iū bô chiâu-pı̄ ê chheh; só͘-í bô oē thang kóng bêng Ông-iâ ê sū. Toā ǹg-bāng chai iáⁿ ê lâng thang chí-kàu chiū-sı̄.
Sam-mâu Chin-kun
Sı̂n-sian thong-kàm, So-sı̂n-kı̀ lóng kı̀ Sam Chin-kun, sı̄ saⁿ ê hiaⁿ-tı̄-á sı̀ⁿ Mâu, miâ Êng, Kò͘, Kó; kúi-nā sè-tāi tiàm Siám-sai Hâm-iông ê tē-hng; ún-ku tı̄ Ko͘-khiok-san; ū sı̂n-jı̂n thoân-siū pı̀-koat hō͘ in 3 lâng siū-liān sêng-sian: chheng thian pe̍k jı̍t khiâ pe̍h ho̍h poe chiūⁿ thiⁿ. Peh-sı̀ⁿ chiū khí sû chhāi siōng lâi pài. Kàu Sòng Thài-chong hong chò lū-sêng chin-kun.
Lâu Chin-kun
Kóng-ı̂-kı̀ ū kı̀ Chin-kun sı̀ⁿ Lâu miâ Hái, jū-miâ Chiau-ta̍t, chhiok hō Hái-siâm-chú, sı̄ Iàn-san ê lâng; chò koaⁿ tı̄ Ian-kok: chū-sè hò͘ⁿ Ló-chú ê tō-lí. Ian-ông chhiàm-chheng hông-tè; Lâu Hái kàn-chèng m̄ thiaⁿ, chiū sı̂-koaⁿ khı̀ iû thiⁿ-ē. Tú-tio̍h Lū Tōng-pin sian chiū tō͘ i khı̀ chò sian. Kàu Goân Sūn-tè hong chò Chin-kun; khí biō-ú teh tiau siōng teh pài.
Ông Goân-soè
Ông Goân-soè chiū-sı̄ Ông Lêng-koan, Sòng tiâu ê tō-sū, chin gâu ēng siâ-su̍t phiàn lâng. Bêng Sêng-chó͘ hong chò Thian-chiòng, khí Thian-chiòng biō lâi ho̍k-sāi. Kóng thian-chiòng ū 26-ê, chit ê Ông Lêng-koan sı̄ tē it ê thian-chiòng, teh pé-siú thiⁿ-mn̂g. Kak-gō͘-soán-sin ê chheh kóng, Ông Lêng-koan chò thian-chiòng chiáng 33 thiⁿ-mn̂g ê só-sı̂, chān Gio̍k-hông siú lâm pak ke̍k, ap-chè iau-mô͘ kúi-koài, pó-hō͘ kok-ka peh-sı̀ⁿ pêng-an. Peh-sı̀ⁿ khoài phiàn, oh chhéⁿ-gō͘, kàu taⁿ iáu chē-chē pài i.
Tiuⁿ Ông-kong
Tiuⁿ Ông-kong chiū-sı̄ Sû-san ê Tiuⁿ Pu̍t, 2 goe̍h 11 jı̍t chhut sı̀. Bat tı̄ Chiat-kang khui hô-kau hō͘ chûn-chiah thong óng. Āu-lâi lâng khí biō lâi pài. Tú-tio̍h chúi-chai lóng lâi kiû pó-pı̀. Sòng Jêng-chong hong chò Lêng-chè-ông. Sè-sio̍k chheng chò Tiuⁿ Ông-kong, Tiuⁿ Tāi-tè. Gô thoân kóng i ū kè-tı̀ lâi hián-sèng, in bó͘ hiàn chò chio̍h thâu.
Lûi-kong Lûi-bó
Lán tùi siū Mô͘-kúi iú-he̍k í-lâi m̄-nā pài sí-liáu ê lâng chò sı̂n-pu̍t, ia̍h pài seng-sêng ê mı̍h chò sı̂n. Chhin-chhiūⁿ pài Lûi-kong, Lûi-bó, chit hō sı̂n.
Hong-sı̂n ián-gı̄ kóng Lûi-sı̂n sı̀ⁿ Bûn miâ Tiōng; hia̍h thâu ū 3 lúi ba̍k-chiu, khiâ kı̂-lı̂n kiâⁿ tı̄ thiⁿ-ē. Siong-tiâu ê sı̂ chò cháiⁿ-siòng, āu-lâi hō͘ Chiu Bú-ông thâi; Khiong Chú-gâ hong i chò Lûi-sı̂n. Sòng Kiong-chong hong lûi chò Ui-hoà-ông. Sè-sio̍k teh chng Lûi-kong ê siōng chhin-chhiūⁿ ū la̍t ê lâng, hiàn-khui-heng, kha-chiah chhah nn̄g ki sı̍t, thâu-hia̍h 3 lúi ba̍k-chiu, bı̄n âng chhiah; ē-hâi tn̂g-tn̂g, kha-jiáu lāi-lāi, chhiú kia̍h thûi, ná beh phah ê khoán, seng-khu koāⁿ 5 ê liân kó͘, chāi tı̄ biō lāi hō-chò Lûi-kong. Chng chı̍t sian chhin-chhiūⁿ hū-jı̂n-lâng, siang-chhiú the̍h kiàⁿ hō-chò Lûi-bó. Bāng i pó-pı̀ pêng-an.
Kok-liông-toān kóng, Im-iông nn̄g-ê khı̀ saⁿ pek, chiū kek chò lûi.
Taⁿ sè-kan lâng lı̄-khui Siōng-tè sim pı̀ⁿ chò o͘-àm. M̄ chai bān-mı̍h sı̄ Siōng-tè chhòng-chō hō͘ lâng ēng. Hiān-sı̂ kek bu̍t ê ke ēng lûi tiān chò chē-chē ki-khı̀ lêng-khiáu hó ēng. Chhin-chhiūⁿ tiān-soàⁿ-phoe, tiān-im, liû-seng-khı̀, tiān-khı̀ hoé, chē-chē khı̀-khū, lóng sı̄ chò lâng ê lō͘-ēng. Bô iáⁿ Lûi-sı̂n ē kàng-chai sù-hok.
Sat-bó Tāi-ông
Sè-jı̂n sit-lo̍h chin-lí, m̄-nā pài lûi sih-nà chò sı̂n, iā ū khı̂m-siù thâng-thoā. Chhin-chhiūⁿ Tâi-oân ū só͘-chāi Bé-kong-iâ, Gû-ông-iâ, Choâ-ông, Chháu-meh niû-niû. Chheng-kok So͘-chiu sǹg sı̄ chhong-bêng bûn-ngá ê só͘-chāi, nā sı̄ Gō͘-koān o̍h chêng ū khí chı̍t chō toā sı̄ miâ chò Sat-bó tāi-ông biō; peh-sı̀ⁿ teh kèng-pài chin lāu-jia̍t. In-ūi siū hoê-siūⁿ só͘ phiàn só͘ bê, khı̀ lia̍h sat-bó kúi-nā chiah, ēng choá pau khı̀ lok tı̄ hiuⁿ-lô͘-nı̍h, án-ni hō-chò Sat-bó tāi-ông; kóng ē tō͘ chèng sat-bó kap thâng-thoā, khı̀ se-thian sêng pu̍t choán-sè. Só͘-í lâng chhut-la̍t kèng.
Hāi-ah ! Lâng sı̄ bān-mı̍h tiong tē-it chun-kùi; taⁿ hoán-tńg ka-tı̄ lêng-jio̍k khı̀ pài tē it ù-oè ê mı̍h chò sı̂n pu̍t sı̍t-chāi thang pi-siong khó-lı̂n.
Iâm-lô-ông
Khoàⁿ Gio̍k-le̍k-chhau-toān ū kı̀-chài Iâm-lô-ông ū 10-ê, hun-chò 10 tiān, teh sím-phoàⁿ im-kan ê tē-ge̍k.
Tē-it tiān ê tē-ge̍k ông, sı̀ⁿ Chiúⁿ, 2 goe̍h chhe 1 siⁿ-jı̍t. Tē-jı̄ tiān ê tē-ge̍k ông, sı̀ⁿ Le̍k, 3 goe̍h chhe 1 siⁿ-jı̍t. Tē saⁿ tiān ê ông sı̀ⁿ Î, 2 goe̍h chhe 8 siⁿ-jı̍t. Tē sı̀ tiān ê ông sı̀ⁿ Lū, 2 goe̍h 18 siⁿ-jı̍t. Tē gō͘ tiān ê ông, sı̀ⁿ Pau, chiaⁿ goe̍h chhe 8 siⁿ-jı̍t. Tē la̍k tiān ê ông, sı̀ⁿ Pit, 3 goe̍h chhe 8 siⁿ-jı̍t. Tē chhit tiān sı̀ⁿ Táng, 3 goe̍h 27 siⁿ-jı̍t. Tē 8 tiān sı̀ⁿ N̂g, 4 goe̍h chhe 1 siⁿ-jı̍t. Tē káu tiān ê ông, sı̀ⁿ Lio̍k, 4 goe̍h chhe 8 siⁿ-jı̍t. Tē cha̍p tiān ê tē-ge̍k ông, sı̀ⁿ Sih, 4 goe̍h 17 siⁿ-jı̍t.
Iā ū kóng lâng sí-liáu im-hûn tio̍h keng-koè chit 10 tiān ê ông lâi phoàⁿ-toàn hó pháiⁿ, lâi hiat tı̄ 138 téng ê tē-ge̍k siū kan-khó͘. Só͘ siū ê kan-khó͘ chiū-sı̄ ū-ê kau sim-koaⁿ hō͘ choâ chia̍h; ū-ê kā i thǹg-theh koaiⁿ tı̄ ke̍k léng ê peng-sng; ū-ê chı̀m tı̄ hoeh-tı̂; ū ê ēng thih-oe lâi chhoe; ū-ê hō͘ i lám pû âng ê tâng-thiāu; ū-ê ta̍h pû âng ê thih-liān; kı̂-kı̂ koài-koài ê hêng-hoa̍t kóng pu̍t-chı̄n. Gio̍k-le̍k toān iā ū kóng, nā keng-koè 10 tiān siū kan-khó͘ moá, chiū lûn-hoê lâi choán-sè; khah hó-ê chiū choán-sè chò hù-kùi tn̂g-hoè-siū; pháiⁿ-ê chiū choán-sè siⁿ chò cheng-siⁿ, khı̂m-siù, thâng-thoā ê lūi; choē-koà moá chiū koh tâu-thai chò lâng. Sek-kàu ê lâng án-ni chò chit phiⁿ pe̍h-chha̍t oē; khiok sı̄ ài kéng-kài lâng m̄-thang chò pháiⁿ; só͘-í chng Iâm-lô-ông ê siōng, gû thâu bé bı̄n, chhiú the̍h thih-liān, ná chún beh pa̍k lâng khı̀ im-kan ê khoán-sit. Káng-kiù sı̍t-chāi bô iáⁿ ū 10 ê Iâm-lô-ông, sı̄ pu̍t-kàu ê lâng liap-chō. Só͘-í hō͘ Jû-kàu ê lâng pok in ê mâu-tún. Chhin-chhiūⁿ Su-má--sı̄ ki-chhı̀ pu̍t-kàu ê Iâm-lô-ông, kóng, Iâm-lô-ông chiong in lāu-bó soà sím-phoàⁿ, á-sı̄ pàng-khoan in lāu-bó; sím-phoàⁿ lāu-bó put-hàu, pàng-khoan in lāu-bó put-gı̄. Put-hàu, put-gı̄ ê lâng án-choáⁿ chò sím-phoàⁿ si leh?
Jû-kàu ê lâng m̄ sı̀n sí-āu ê sím-phoàⁿ sı̄ ke̍k-toā chhò. Sek-kàu ê lâng m̄ chai, lām-sám tō͘-choān sí-āu ê sím-phoàⁿ, iā sı̄ ke̍k toā ê chha-biū.
Kám-siā Siōng-tè siúⁿ-sù lán ū chin-lí ê Sèng-keng thang khak-sı̍t chai sí-āu ê sím-phoàⁿ, chai bêng thian-tông, tē-ge̍k ê sı̍t-chêng, lóng m̄-sı̄ liōng-iok tó͘-ioh; koh chai sím-phoàⁿ ê toā Chú-cháiⁿ m̄-sı̄ pêng-siông lâng, sı̄ éng-éng oa̍h Siōng-tè ê kiáⁿ Iâ-so͘ Ki-tok. I lâi chō sè-kan, iā lâi kiù sè, beh koh lâi phoàⁿ-toàn thiⁿ-ē oân-moá bān-sū.
Sı̂-kàu sè-kan ê lō͘-bé Iâ-so͘ Ki-tok beh hián-bêng lâi tiàu siⁿ, sí ê lâng siū sím-phoàⁿ. Hó ê lâng beh hióng-siū thian-tông éng-oa̍h toā hok-khı̀. Pháiⁿ-lâng kap pháiⁿ-kúi tông siū toē-ga̍k éng-sí ê kan-khó͘. Che oē ū phêng-kù khak-sı̍t thang sı̀n. M̄-sı̄ chhin-chhiūⁿ Sek-kàu lām-sám kóng Iâm-lô-ông cha̍p-tiān ê sím-phoàⁿ bô phêng bô-iáⁿ ê sū.
Tē Chông-ông
Sè-sio̍k gô thoân múi nı̂ 7 goe̍h 15, hō-chò tiong-goân, tē-ge̍k kúi ông khui óng-sí siâⁿ ê gō-kúi chhut-lâi. Só͘-í kiò 7 goe̍h hō khèng-goa̍t chè phó͘-tō͘-kong; miâ chò Û-lân-phûn-hoē. “Û-lân-phûn” sı̄ Thian-tiok-kok oē, hoan-e̍k chiū-sı̄ “kiù tò-tiàu--ê”, chiū-sı̄ kiù tò-tiàu ê kan-khó͘ kúi; toā siat phó͘-chè lâi chhiau-tō͘ gō-kúi; só͘-í 7 goe̍h chè kúi-sı̂n hō-chò phó͘-tō͘.
Chhit goe̍h 30 jı̍t sı̄ Tē Chông-ông ê siⁿ-jı̍t, chèng lâng koh khah kèng sim teh pài.
So͘-sı̂n-kı̀ kóng, Tē-chông-ông sı̄ Tông-tiâu lâng, miâ chò Bo̍k-liân, sı̄ Sin-lô-kok lâng, pài Jû-lâi pu̍t chò sian-siⁿ tek hu̍t tō, sí-liáu chò Tē-chông-ông, lâi chiáng-lí im-kan ê sū-bū; chò Iâm-lô-ông 10 tiān ê thâu-chàng; 10 tiān ê Iâm-lô-ông lóng tio̍h khı̀ tiâu-pài kiâⁿ-lé. Só͘-í ta̍k-ê biō-ú lóng ū tiau-khek Tē-chông-ông ê siōng. Chò koaⁿ-chhâ tiàm kèng khah tùi-tiōng teh ho̍k-sāi.
Lūn Bo̍k-liân sí-liáu khı̀ chò Tē-chông-ông, che sı̄ bô pı̂n-kı̀ koh bô chêng-lí. In-ūi Tē-chông-ông khı̀ koán tē-ge̍k, sı̄ Tông-tiâu ê sı̂ chiah ū. M̄-kú Tông-tiâu í-chiân im-kan siáⁿ lâng teh koán? Kiám sı̄ lâu khang-ūi kúi-nā chheng nı̂-kú, lâi tán-hāu Bo̍k-liân chhut-sı̀, chiah khı̀ chiáng im-kan sū? Tek-khak bô chit hō chêng-lí. Iū koh chhı̀-mn̄g Tē-chông-ông khı̀ koán im-kan ê tē-ge̍k, sı̄ siáⁿ lâng hō͘ i chit ê chit-hūn, chiū kóng sı̄ Gio̍k-hông hong hō͘ i ê chit. M̄-kú nā khoàⁿ chêng phiⁿ, chiū chai Gio̍k-hông sı̄ hi, sı̄ ké, sı̄ lâng liap-chō. Gio̍k-hông sı̄ ké, chiū thok i ê miâ só͘ hong ê sı̂n-pu̍t, lóng sı̄ bô iáⁿ liáu-liáu; m̄ bián piān iā bêng-pe̍k.
Goá sı̄ chhián ha̍k e̍h-te̍h ê lâng, bô káng-kiù kàu ta̍k sian sı̂n-pu̍t ê thiat-té, put-kò chiū só͘ chai chı̍t-sut-á bóng siá lâi chò phoāⁿ. Ǹg-bāng phok-ha̍k ko-bêng ê sian-siⁿ thang kóng-bêng khah siông-sè, hō͘ chèng lâng chai só͘ kèng lóng sı̄ ké-iàⁿ ê sı̂n-pu̍t ngó͘-siōng, tit-tio̍h chin-lí ê chiò kng, khı̀ ké kui chin. Bô loā-kú hō͘ thong Tiong-kok Tâi-oân lâm-pak lóng bô chı̍t sian pu̍t, it-chı̄n lâi ho̍k-sāi to̍k-it chin-oa̍h ê Siōng-tè.
Thiⁿ-pē jı̂n-ài toā chû-pi,
Iúⁿ-chhı̄ pó-hō͘ bān bı̂n;
Khó-sioh peh-sı̀ⁿ m̄ pài I,
Khı̀ pài ngó͘-siōng kúi-sı̂n.
Lán chò Iâ-so͘ ê ha̍k-seng,
Tit chai kiù-sè hoat-tō͘;
Tio̍k kia̍h chin-tō ê kng-teng,
Chhoā lâng khı̀ ké kui chin.
Sim chèng só͘ goān.
