Lūn Pe̍h-oē-jī ê Lī-ek
| Lūn Pe̍h-oē-jī ê Lī-ek Chok-chiá: Ia̍p Hàn-chiong
|
Lūn choè Pe̍h-oē-jī ê iàu-kín
TaN khí-thâu choè chit-ê pe̍h-oē-jī ê, i-ê ì-sù sī chaíⁿ-iūn ah ? Chiū-sī beh hō͘ lâng oē-bat, só͘-í chí ēng jī-cha̍p-saN ê jī-bú tiān-tiān, chiū-sī a, b, ch, chh, e, g, h, i,j, k, kh,l, m, n, ng, o, o͘, p, ph, s, t, th, u ; che sī beh hō͘ lâng koē jīn . Koh tī jī-cha̍p-saN ê jī-bú ê tiong-kan ū hun-pia̍t tûn-im, chhí-im, chi̍h-im, âu-im, phīn-im ê koh-iūn ; chhin-chhiūn b, p, ph, u, sī tûn-im ; ch, chh, g, k, kh, s sī chhí-im ; h, i, j, l, t, th sī chi̍h-im ; o, o͘, e sī âu-im ; m, n, ng sī phīn-im ; che sī beh hō͘ lâng tha̍k-liáu oē hun-bêng . ( Khoàn 1 Ko-lîm-to 14 : 9 . )
Koh ū ēng pat-im choè kì-hō, lâi hun-pia̍t piân-cheh, hō͘ lâng khui-chhuì chiū ū koâin-kē tāng-khin ê chhù-sū, m̄-sái hūn-loān . Koh ēng chhiat-im choè hoat-tō͘ lâi tàu chiân jī, ū-ê nn̄g-jī tàu chiân chi̍t-jī, ū ê saN-sì-jī gō͘-jī tàu chi̍t-jī, che sī beh hō͘ lâng koē tha̍k . Chóng-sī jī-bú sui-jiân chió, nā ēng i pâi-lia̍t saN-tàu, chiū ū chhian-piàn bān-hoà ēng lóng boē liáu . Che sī thâu-sū, ē-bīn pâi-lia̍t gō͘-toān tāi-lio̍k lâi gī-lūn .
Tē-it-toān
Lūn tha̍k pe̍h-oē-jī khah-iân tha̍k Tiong-kok jī, chiū-sī koē tha̍k, koh m̄-sái lēng-goā koé-seh ; in-uī Tiong-kok jī put-chí choē, koé-seh put-chí oh ; khe-khó Khong-hi jī-tián ê jī boē sǹg-tit, chi̍t-jī siông-siông ū kuì-nā hō koé-seh . Gín-ná tuì chhit-poeh hè ji̍p-o̍h, tio̍h tha̍k-chheh kàu chhit poeh nî, cha̍p-lâng tiong chhang-miâ-ê kiám-chhái ū chi̍t-nn̄g lâng tāi-khài oē bat khah-chhián ê jī, chí ū bat jī-im tiān-tiān, lóng boē hiáu-tit koé-seh; tio̍h koh tha̍k cha̍p-goā nî chiah oē koé-seh . Kiám-chhái só͘ koé ū sî ia̍h oē chhò-gō͘, oh tit ta̍k-jī ta̍k-kù hun-bêng, che m̄-sī Tiong-kok jī ê m̄-hó, to̍k-to̍k sī in-uī ha̍k-būn ê oh-tit cheng-kong, koh koé-seh boē it-tēng ê iân-kò͘.
TaN tāi-lio̍k kú-khí chi̍t-nn̄g jī choè pîn-kù . Chhin-chhiūn kò͘--jī, ū só͘-chāi koé choè iân-kò͘, ū só͘-chāi koé choè pún-jiân, ū só͘-chāi koé choè só͘-í . Koh chhin-chhiūn í--jī, ū só͘-chāi koé choè ēng, ū só͘-chāi koé choè thang, ū só͘-chāi koé choè in-uī . M̄-nā án-ni, iáu ū choē-choē oh-tit koé ê jī, sui-jiân chiū phok-ha̍k ê lâng ia̍h boē-oē ta̍k jī koé-seh kàu bêng . Khoàn Bo̍k-su ū sî chhián Siù-châi lâi kà Sèng-chheh, ia̍h bat koé-seh m̄-tio̍h, m̄-sī in-uī i m̄-bat jī, á-sī boē hiáu--tit koé-seh, to̍k-to̍k sī in-uī jī-gī ê koé-seh boē oē it-tēng ê iân-kò͘ . TaN hit-hō ū ha̍k-būn ê lâng siōng-chhián boē-oē koé-seh kàu tú-hó, hô-hòng chhián-ha̍k ê lâng thài-thó oē koé-seh Sèng-chheh kàu bô chhò-gō͘ ah? Nā boē-oē koé-seh Sèng-chheh, beh thái oē bêng-pe̍k tō-lí ah ? Só͘-í ū sim siat-kàu ê lâng ài thoân tō-lí tī ta̍k-kok, tek-khak tio̍h chiong Sèng-chheh hoan-e̍k hit só͘-chāi ê jī kàu bêng, hō͘ lâng thang tha̍k .
Chóng-sī Tiong-kok jī put-chí oh-tit koé-seh, só͘-í chiah choè chit-ê pe̍h-oē-jī hō͘ lóng-chóng ê lâng thang o̍h ; koh chiong Sèng-chheh kap ta̍k-hō ê chheh hoan-e̍k pe̍h-oē-jī tha̍k, ka-kī káng-kiù chheh-lāi ê tō-lí . Siat-sú bô chit hō pe̍h-oē-jī, chiū put-chí chió lâng oē hiáu-tit tha̍k Sèng-chheh. Che sī hián-bêng tha̍k pe̍h-oē-jī ū khah-iân tha̍k Tiong-kok jī.