Lūn Song-sū 02

Lūn Pán-lāi ê Mı̍h-kiāⁿ

Sè-sio̍k bé àn, iā tio̍h pān pán-lāi-pê liāu; ū nn̄g-sian choá-ang-á it-lâm it-lí hō-chò koan-kán, ı̀-sù káⁿ-sı̄ beh hō͘ sí-lâng chhe-ēng, bián-tit i léng-chēng. Koh ū chhâ-se chháu-chhio̍h beh hō͘ i thang ēng. Ū gia̍h lâng koh chò chı̍t-tè chhit-chheⁿ-pang lâi khoà tı̄ pán-lāi ê ē-té, jiân-āu sin-si hē tı̄ pang-téng-bı̄n. Chit-phı̀ⁿ-pang chha̍k chhit-khang, chiū hō-chò Chhit-chheⁿ-pang. Sı̀n Chú lâng ēng chhit-chheⁿ-pang, nā kan-ta ēng chò khoà sin-si ê lō͘-ēng sı̄ thang; ı̂-chiá choá-ang-á kap kúi-nā-hāng pa̍t-mı̍h tek-khak m̄-thang.

Ū lâng mn̄g kóng, Lâng sí, ēng Sèng-chheh kap Ióng-sim-si kap sin-si khı̀ tâi thang mah? Ìn i kóng, Kiaⁿ-liáu jú-kú chiū jú pı̀ⁿ ı̄ⁿ-toan. Tit-kiù ê lâng sui-jiân ū gı̂m-si o-ló Siōng-tè, tek-khak m̄-sı̄ sè-kan teh ēng chit-hō si. Be̍k 5:8-10, 14:23.

Lūn Chih-pán, iā kóng Chih toā-chhù

Pán beh kàu chhù ê sı̂, song-ka ê lâm-lí lóng tio̍h chhēng song-ho̍k, phè gı̂n-choá,chò káu pê khı̀ chih, hō-chò chih-pán iā kóng Chih chhù. Pán kng kàu tiâⁿ-nih hē-teh, chih pán ê lâng chiong gı̂n-choá tò tı̄ pán ê lióng-pêng-piⁿ, jiân-āu koh pê kàu sı̀ piⁿ lâi khàu. Iā ēng chı̍t-táu-bí, chı̍t chheng chı̂ⁿ, ū lâng iā ēng chı̍t chiah pe̍h-ke, chò-hoé khoà tı̄ pán-téng.

Sui-jiân bô chı̄n chai ta̍k-hāng ê ı̀-sù, nā-sı̄ oa̍h lâng pê khı̀ chih sí-sí ê koaⁿ-chhâ, chiū-sı̄ put-thong bû lí. Nā kóng hit-khū-pán sı̄ pē-bó ê chhù, tio̍h chun-kèng kūi--i, siáⁿ-sū m̄ kūi pē-bó só͘ khí ê sin-chhù? Lâi kūi chhâ chò ê sí-pán, kiám m̄-sı̄ gōng mah?

Chit hō lé m̄-bián lâng kóng; sı̀n Chú lâng chū-jiân m̄-thàn.

Lūn Jı̍p-bo̍k ê só͘-chò, só͘ ēng ê mı̍h, só͘ kóng ê oē

Kéng hó sı̂ lâi siu sin-si lo̍h-chhâ hō-chò Jı̍p-bo̍k. Jı̍p-bo̍k hit-sı̂ nā ū lâng seⁿ-siùⁿ kap sí-lâng sio-chhiong, put-lūn chhin-se tio̍h kiâⁿ-khui, m̄-thang oá khı̀ khoàⁿ. Tio̍h ēng tāu-pô͘, chio̍h-thâu kap sí-lâng hē tı̄ pán-lāi, chhut-soaⁿ kā i kóng, Tio̍h chio̍h-thâu noā, tāu-sı̄ⁿ chhut-gê, chiàⁿ thang kap kiáⁿ-sun sio-kı̀ⁿ. Ì-sù sı̄ kiaⁿ i sí-liáu ē lâi chhoā kiáⁿ-sun khı̀. Iā kiû i tio̍h pó-pı̀ kiáⁿ-sun heng-ōng, hoat-ta̍t, pêng-an, sūn-sū.

Nā-sı̄ hō͘ lâng hāi-sí--ê, á-sı̄ kap lâng ū oan-siû jiá-hō tı̀-kàu sí--ê, chiū hō͘ i kia̍h kiàm kap thô-ki, thâu-mn̂g phah-soàⁿ, kha chhēng chháu-ê, thâu seh n̂g-choá-liân. Chhut siaⁿ kā i kóng, Hāi lí, kap lí ū oan-siû ê lâng, lí tio̍h hián-hián khı̀ chhoē i. Che chiū-sı̄ ı̄ⁿ-toan. Siōng-tè kóng, Sin-oan tō Goá, Goá tek-khak pò--i. Lô. 12:19, Sin. 32:35. Sí-lâng tek-khak bē ē ka-tı̄ sin-oan, Siōng-tè chiàⁿ ē. Chhòng 4:9-11.

Iā tio̍h chı̍t hù sió-seng-lé tı̄ koan-piⁿ lâi hàu, ū lâng iā pān chı̍t phiⁿ chiok-bûn lâi tha̍k. Chhiáⁿ pē-bó chiâu-chn̂g ê lâng lâi tèng teng, tèng teng ê sı̂ tio̍h kóng hó oē. Teng-thâu tio̍h hiòng-chhut, chhú chhut-teng ê ı̀-sù. Sí-lâng ê kiáⁿ-sun lâm-lí, ta̍k lâng kia̍h chı̍t ki âng-teng, tiám chek-á, se̍h koan lâi khàu; chiàⁿ kiâⁿ saⁿ-lı̀n, tò kiâⁿ saⁿ-lı̀n.

Chit téng-bı̄n kok-hāng só͘ chò, m̄ bián ta̍k-hāng kóng hit ê ı̀-sù; lán iā chai sı̄ ı̄ⁿ-toan, chū-jiân m̄ thàn.

Lūn beh chhut-chòng ê sı̂ só͘ chò

Jı̍p-bo̍k liáu, koan hû chhut goā-bı̄n khoà tı̄ í-téng. Tō-sū ēng pe̍h-pò͘ lâi oē chı̍t-sian siōng, khoàⁿ sí-lâng sı̄ lâm á-sı̄ lí, só͘ oē ê siōng iā tio̍h hun lâm lí. Siōng oē hó, the̍h cha-bó͘-kiáⁿ ê chı̂ⁿ ēng pò͘ pau, ùn o͘ ba̍k lâi tǹg tı̄ só͘ oē ê siōng; hō-chò Ìn chı̂ⁿ hoan. Siá sí-lâng ê seⁿ-sı̂ jı̍t goe̍h, nı̂-hoè, hûn-bōng, chó͘-che̍k chiūⁿ sı̂n-chú. Sı̂n-chú siá hó, chhāi tı̄ toh-téng; pâi seng-lé lâi hàu, hō-chò Khí-bé; lēng pān chı̍t hù seng-lé khı̀ soaⁿ-nı̍h, koan lo̍h khòng iám-thó͘ liáu lâi hàu, hō-chò Lo̍h-bé.

Khí-bé liáu beh sàng-chòng ê lâng, put-lūn chhin-se, lâm lí, tio̍h chhēng song-ho̍k, tı̄ toh-chêng sio hiuⁿ lâi pài; pài liáu kūi lo̍h khı̀ kha̍p-thâu, chhiú phâng chı̍t poe chiú, chiong chiú tò lo̍h thô͘, chhut-siaⁿ ai, hō-chò Tiān-chiú.

Tiān-chiú liáu, hàu-lâm cha-bó͘-kiáⁿ, sim-pū tio̍h chò káu pê kàu koan-piⁿ kūi-teh khàu. Tō-sū chhēng ho̍k, phah nâ-poa̍h, liām keng, se̍h koan kúi-nā-lı̀n chiū khí kiâⁿ, chò chêng chhoā lō͘. Hàu-lâm hàu-hū tio̍h oá koan-piⁿ lióng-pêng lâi kiâⁿ, hō-chò Khı̂ⁿ-koan. Kı̂-ı̂ chhin-se, lâm kiâⁿ koan-chêng, lí toè koan-āu.

Lūn Chhut-chòng ê sı̂ só͘ ēng ê mı̍h-kiāⁿ

Sè-sio̍k ū sı̂n-chú kap tōng-hoan; sı̂n-chú chhāi tı̄ bí-táu-lāi, toā-kiáⁿ phō táu, chhiú kia̍h tōng-hoan. Ū gia̍h lâng ū toā-sun kiō, chiū sı̂n-chú toā-sun phō. Siáⁿ-sū tiōng toā-sun? Kó͘-lé beh chè chó͘-chong, tio̍h hō͘ toā-sun chhēng chó͘-chong ê i-chiûⁿ chē teh siū-chè, hō-chò Si-chú. Taⁿ bô ēng si-chú, iáu teh tiōng toā-sun, sı̄ sêng-chiap kó͘-lé ê liû-thoân.

Hûn-pe̍h. Ēng pò͘, á-sı̄ kı̀n, lâi jı̍p tek-pán, á-sı̄ pang-á, tiong-ng siá sí-lâng ê miâ-sèⁿ hoè-siū, lióng-pêng siá seⁿ-sı̂ jı̍t-goe̍h, chiū hō-chò Hûn-pe̍h. Ì-sù sı̄ beh hō͘ sı̂n-hûn i-oá. Che sı̄ ı̄ⁿ-toan. Hó-lâng sí, hûn chek-sı̂ kàu thian-tông, pháiⁿ-lâng sí, hûn liâm-piⁿ lo̍h tē-ge̍k; thái-thó ū sı̂n-hûn thang tiàm tı̄ hûn-pe̍h?

Bêng-seng, sio̍k kóng, Lêng-cheng. Ēng âng-tiû siá pe̍h-jı̄. Chit hō mı̍h tû-khı̀ koaⁿ-ke pù-lâng í-goā chió lâng ēng. Chò Bêng-seng ê tn̂g-té, chiàu koaⁿ-chit phín-kip ê toā-sè lâi hun. Ì-sù sı̄ sí-lâng put-jím lı̄-pia̍t, só͘-í siá i-ê chiok-ūi tek-hēng lâi hián-bêng i.

Âng-teng. Ai-tiōng, sio̍k kóng Hàu-thn̄g, Hàu-thn̄g. Lé-kı̀ Būn-song kap Song-ho̍k sù-chè kóng, Hàu-lâm pi-siong pē-bó sí, iu-būn bô chia̍h, sin-khu soe-lám; tio̍h koái-á hō͘ i kia̍h chiàⁿ ē kiâⁿ. Siat ai-tiōng ê ı̀-sù sı̄ án-ni. Pē sí, ai-tiōng tio̍h ēng tek, tek ê chat tı̄ goā-bı̄n; piáu-bêng pē ê kiàn-kong lı̍p-gia̍p chāi goā-thâu. Bó sí, Hàu-thn̄g tio̍h ēng tông-chhiū, sio̍k ēng khó͘-lēng, chhâ sı̄ cha̍t-pak, piáu-bêng bó ê kiàn-kong lı̍p-gia̍p tı̄ lāi-bı̄n. Pē ê Hàu-thn̄g tio̍h ı̂ⁿ-ı̂ⁿ, pí i chhin-chhiūⁿ thiⁿ; bó ê hàu-thn̄g tio̍h sı̀-liām, pí i chhin-chhiūⁿ tē. Sàng-chòng ê lâm lí kok lâng tio̍h kia̍h chı̍t ki âng-teng-á tiám-chek. Ì-sù sı̄ kā sí-lâng chhiō kng, hō͘ i hó-kiâⁿ-lō͘. Tùi se̍h-koan kia̍h khí, kàu oân-soaⁿ liáu kùi tı̄ lêng-toh-ē; kàu tû-lêng hit jı̍t chiàⁿ sio--khı̀. Ū lâng hiat tı̄ lō͘-piⁿ. Hiān-sı̂ Hàu-thn̄g ēng chiâⁿ-chhioh tn̂g, thái-thó ē hō͘ hàu-lâm chò-la̍t-tit. Sí-lâng bē khoàⁿ-kng, tiám teng-á sím-mı̍h lō͘-ēng? Só͘-í chit nn̄g-hāng sı̀n Chú lâng bián ēng.

Kè-siū-têng. Ū lâng oē sí lâng ê hêng-tô͘, hō-chò Khioh siáu-éng, iā kóng, Khioh tāi-siū. Chhut-chòng ê sı̂ hit pak siáu-éng hē tı̄ chhâ-kiō, kng tı̄ koan chêng; hit téng-kiō chiū hō-chò Kè-siū-têng. Chòng liáu tò--lâi hit pak siū kùi tı̄ An-lêng ê só͘-chāi.

Khioh tāi-siū thang hō͘ kiáⁿ-sun khoàⁿ chó͘-kong ê hêng-siōng, khiok m̄-sı̄ ı̄ⁿ-toan, chóng bē-pí-tit hip-siōng khah tio̍h-hoat.

Khai-lō͘-sı̂n, iā kóng Khóng-kèng

Ēng choá kô͘ chı̍t sian lò-lò ê choá-lâng, bı̄n-māu hiong-ok thang kiaⁿ, chhiú kia̍h lāi-khı̀, hō-chò Khai-lō͘-sı̂n. Nn̄g lâng oē bı̄n, thâu-mn̂g phah-soàⁿ, hû choá-lâng lâi kiâⁿ. Ì-sù sı̄ beh koáⁿ-tio̍k hiong-sı̂n ok-soah, hō͘ bông-hûn bián kiaⁿ. Ū só͘-chāi bô ēng. Che sı̄ ı̄ⁿ-toan. Kı̂-ı̂ moâ-teng, âng-chhái, pe̍h-chhái kı̀-jiân m̄-sı̄ ı̄ⁿ-toan, ēng iā bô hông, m̄ ēng iā ē chò--tit, m̄-bián khu-chip koè-thâu.

Bán-liân, sio̍k kóng Liân-te̍k, Kó͘-ga̍k

Ū ke-sū ê lâng koè-sin ū chhin-chiâⁿ pêng-iú, ēng tiû siá jı̄ lâi chēng song-ka, hō-chò Liân-te̍k. Só͘ siá ê jı̄ tāi-khài sı̄ chheng-ho͘ o-ló koè-sı̀ ê lâng. Chhut-chòng ê sı̄ song-ka pâi hiah-ê liân-te̍k tı̄ koan-chêng chò êng-hián. Āu-lâi tiàu tı̄ thiaⁿ-thâu. Che m̄-sı̄ ı̄ⁿ-toan.

Ū lâng mn̄g kóng, Ū só͘-chāi ê kàu-hoē ū kong ê liân-te̍k, liân-te̍k--nı̍h só͘ siá, khah chē sı̄ piáu-bêng tō-lí, thang koh ēng mah? Ìn i kóng, Ū hit-hō mı̍h piān, beh ēng iā bô hông; bô hit-hō mı̍h iā bián tiâu-kang lâi chò. Sè-sio̍k só͘ hiâm put-chāi liân-te̍k.

Kó͘-ga̍k chiū-sı̄ ta̍k hō ê ga̍k-khı̀, chhin-chhiūⁿ Kó͘-chhoe toā lô hit-hō. Sè-sio̍k song-sū put-lı̄ ga̍k-khı̀; chiàu in kóng, ū iu-būn ê phó͘, iā ū hoaⁿ-hí ê phó͘. Nā bô kó͘-chhoe sàng-chòng, chiū-sı̄ ke̍k-sàn ê lâng. Chit-hāng sı̀n Chú ê lâng bián chip-it cheng-lūn. Song-ka nā chhim-chai tō-lí, bián ēng sı̄ hó; siat-sú kian-chip beh ēng, chiū bián-kióng ap-chè i, iā sı̄ kiáu-jiáu ê sū. Khó-í iû-chāi lâng phah-sǹg, hiān-sı̂ bián lı̍p tēng-kui.

Pàng-choá

Chı̍t lâng the̍h gı̂n-choá tı̄ koan-chêng, thiah gı̂n-choá hiat lo̍h thô͘, hō-chò Pàng-choá. Khah siông sı̄ kiáⁿ-sài teh pàng. Ì-sù sı̄ beh hō͘ bông-hûn ū kı̀-jı̄n thang tò--lâi chhù--nı̍h. Ū lâng kóng, Sı̄ kā soaⁿ-sı̂n bé lō͘ koè.

Chit-hō ê só͘-chāi sı̄ put-thong bû lí. Nā sı̂n-hûn tio̍h jı̄n hit ê choá chò kı̀-jı̄n, chiū ún-tàng ē kiâⁿ chhò lō͘. In-ūi hong chı̍t-ē chhoe, gı̂n-choá chiū sı̀-kè poe, sı̀-sàn khı̀; kiám m̄-sı̄ hāi bông-hûn bô soaⁿ bô sū mah? Nā kóng tio̍h bé lō͘ chiàⁿ ē-tit koè, chiū boē ū choá ê sı̂, bông-hûn m̄-chai thái ū lō͘ thang koè?

Lūn Phoà-thó͘ khui-khòng

Tio̍h kéng hó sı̂ jı̍t chiàⁿ bián-kiaⁿ siong soah. Chı̍t-ê chhin-lâng chhēng sò͘-i pau pe̍h, pān chı̍t-hù seng-lé kap tē-lí-su khı̀, pâi seng-lé sio hiuⁿ, kūi teh kā Thó͘-tı̄-kong khit tē, soà kiû i pó-iū. Kiû liáu ku̍t thô͘, hō-chò Phoà-thó͘. Tē-lí-su keh keⁿ pí jı̄-hiòng, hō͘ thó͘-kong khui-chò, hō-chò Khui-khòng. Sè-sio̍k nā bô tē-lí-su chhoē tē kah keⁿ, chiū kiaⁿ siong soah, kiáⁿ-sun bē heng-ōng. Che chiū-sı̄ ı̄ⁿ-toan. Sèng-keng kóng, Bān-hāng hó ê siúⁿ-sù tùi Siōng-tè chhut (Ngá-kok 1:17) Tek-khak m̄-sı̄ tùi hûn-bōng lâi.

Nā beh ū tē-lêng ē tı̀-ı̀m lâng, tē-lí-su ē chhoē hó-hia̍t, chiū sàn-hiong pi-chiān ê lâng, éng bô chhut-thâu ê jı̍t-chí, in-ūi bô chı̂ⁿ thang chhiáⁿ sian-seⁿ chhoē tē; Thian-chú, Chu-hô͘, Kheng-siòng ē kú-tn̂g heng-ōng, tāi-tāi êng-hián; in-ūi ū koân ū sè thang kéng hó tē-lí. Choáⁿ-iūⁿ tiâu-tē ē piàn-oāⁿ, Kong, Hô͘, Kheng-siòng bô tiāⁿ-tio̍h lâng?

Lūn sé-chēng

Bâi-chòng liáu tò--lâi, chhāi chı̍t-tháng chúi tı̄ tiâⁿ--nı̍h, tō-sū sio hû hō͘ lóng-chóng tàu kha-chhiú ê lâng lâi sé, hō-chò Sé-chēng; ı̀-sù sı̄ sé liáu chiū m̄-sı̄ chheⁿ-ba̍k, chiàⁿ bē chhek-tio̍h lâng. Iā tio̍h kàu chó-iū-lı̂n mn̂g-kháu, tō-sū liām chiù iô giang-á, ēng tek-se hiù chúi; iā sı̄ sé chheng ê ı̀-sù.

Lūn An-lêng, iā kóng Khiā-lêng

Saⁿ-jı̍t kô͘ chı̍t-chō choá-chhù chhāi tı̄ thiaⁿ-thâu, hō-chò Lêng-chhù; chhù-lāi ū hûn-sin, iā ū lâm-tông lí-pı̄ kin-sûi tı̄ bı̄n-chêng; ı̀-sù sı̄ beh sū-hāu bông-hûn. Lêng-chhù ê lióng-pêng ū só͘-chāi pâi sí-lâng ê i-chiûⁿ, ê, bō, kap i pêng-jı̍t teh iōng iàu-kín ê mı̍h-kiāⁿ. Lêng-chhù chêng pâi chı̍t-tè toh, chhāi bo̍k-chú hiuⁿ-lô͘, hō-chò Lêng-toh. Chá-àm tio̍h sio-hiuⁿ tiám-chek, ta̍k-jı̍t nn̄g-pái thiⁿ-pn̄g lâi khàu, hō-chò hàu-pn̄g. Ū só͘-chāi ê hong-sio̍k kı̀ⁿ saⁿ-tǹg thiⁿ chı̍t-oáⁿ pn̄g chhāi tı̄ sí-lâng pêng-sı̂ só͘ chē ê ūi. Hit ūi pa̍t-lâng m̄-thang chē.

Thàu-chá thàu-àm tı̄ khiā-lêng ê só͘-chāi lâi khàu, hō-chò Kiò khí Kiò khùn. Nā ū chhin-chiâⁿ pêng-iú lâi bāi-song, chú-lâng tio̍h ı̄-pı̄ ta̍k-hāng hó-sè, chiàⁿ chhoā i kàu lêng-chêng lâi sio-hiuⁿ, kı̀ⁿ ū lâng lâi bāi-song, ta̍k pái tio̍h thı̂-khàu, bô án-ni chiū m̄-sı̄ lé, lâng chiū hiâm i put-hàu.

Sí liáu chhit-jı̍t tio̍h cheng-chı̂ chò koé pān toā seng-lé lâi hàu, hō-chò Chò thâu chhit; chhit-jı̍t tio̍h chò chı̍t-pái sûn, chhe-it cha̍p-gō͘ tio̍h khah kang-hu lâi hàu. Ta̍k-pái chò sûn ê mı̍h-kiāⁿ kok ū koh-iūⁿ. Ēng mı̍h lâi chè bông-hûn, hō-chò Chò-sûn.

Lūn Oân-soaⁿ, Siā-thó͘, Ín-hûn

Tâi liáu saⁿ-jı̍t kiáⁿ-sun tio̍h chhēng song-ho̍k, pān nn̄g hù seng-lé, chı̍t hù chè bōng, se̍h bōng lâi khàu, hō-chò Oân-soaⁿ; chı̍t hù pâi tı̄ thó͘-tı̄ bōng-á chêng lâi hàu, hō-chò Siā-thó͘. Hàu-liáu the̍h chı̍t-tè bōng-thâu thô͘ tò-khı̀ hē tı̄ hiuⁿ-lô͘, hō-chò Ín-hûn.

Ū só͘-chāi sı̄ kàu chhit-jı̍t chiàⁿ pān seng-lé khı̀ hàu, soà ín-hûn tò--lâi, ı̀-sù sı̄ kóng, sí-lâng chhit-jı̍t chiàⁿ chai i sí lah, lâi mn̄g Thó͘-tı̄-kong ê lō͘-kèⁿ; só͘-í song-ka iā tio̍h chı̍t hù seng-lé chè thó͘-tı̄, kiû i chí-tiám bông-hûn.

Thâu chhit hit mê-hng, Lêng-chhù, Lêng-toh ê ē-kha tio̍h thai hoe-hún, á-sı̄ hoé-hu, thiⁿ-kng thang giām bông-hûn hoê-ka ê kha-jiah.

Nā ū beh chò Kong-kó, Ín-hûn tio̍h chhiáⁿ Hoê-siūⁿ, á-sı̄ Tō-sū chiàⁿ ē ēng--tit. Nā chhiáⁿ i ín-hûn, iā tio̍h chhiáⁿ i chò sū. Chit téng-bı̄n ta̍k-hāng lóng bô ha̍p chin-lí ê kà-sı̄.