Tâi-oân Sèng Sı̂n
Oá 70 nı̂ chêng, tı̄ Sió-thian-tông ū chı̍t ê sı̀ⁿ Chng ê chí-moē, boē sı̀n Chú ê sı̂, kiáⁿ chı̍t ê seⁿ, chı̍t ê sí; kàu sı̀n Chú liáu, seⁿ loā-chē ê, iā lóng sí !
Āu-lâi tiōng-hu khı̀ Tâi-lâm kā Thô͘ Bo̍k-su chú-chia̍h; pún-sin sı̄ tı̄ pún só͘-chāi, kā hoē-iú ê-lâng cheng-bí, in-chhâ la̍k-chháu, oāⁿ chhùi-chia̍h. Jı̍t-mê siūⁿ-tio̍h ka-tı̄ ê pháiⁿ-miā, sàn-hiong, ko͘-to̍k; put-sı̂ lâu ba̍k-sái!
Thâu-ke-má khoàⁿ-liáu tông-chêng, an-ùi i kóng, ”Lí mài khàu, goán cha-bó͘-sun-á chiah pun lí thiàⁿ!” Ū chı̍t jı̍t, i chiū mn̄g thâu-ke-má kóng, “Lín cha-bó͘-sun-á kóng beh hō͘ goá, ū iáⁿ bô?” Thâu-ke-má ı̀n kóng, “Goán cha-bó͘-sun-á hō͘ lí, lí kiám ū thang hō͘ i chia̍h?”
Chit ê pháiⁿ-miā chí-moē thiaⁿ-tio̍h án-ni, chiū toā-khàu kı̂-tó kóng,“Siōng-tè ah! Lí nā siúⁿ-sù goá kiáⁿ-jı̂, bô-lūn lâm-lú, lóng beh hiàn chò Chú ê kang. Nā hō͘ goá ū chı̂ⁿ thang Chioh--lâng, goá beh pàng lâng ka-jı̄-lāi chiū hó.”
Bô loā-kú, tiōng-hu sı̂ thâu-lō͘ tńg--lâi, ang-bó͘ tâng-sim keng-êng. Liân-liân seⁿ nn̄g ê cha-bó͘, kap nn̄g ê ta-po͘--ê. Sū-gia̍p iā chiām-chiām hoat-tián. Tiōng-hu bô tha̍k-chheh, chí-ū bat pe̍h-oē-jı̄; múi-mê khah bô êng,beh khùn ê sı̂, iā tio̍h seng tha̍k kúi chiuⁿ ê Sèng-keng, á-sı̄ Thian-lō͘ le̍k-thêng; sui-jiân m̄-bat hàn-bûn, iáu-kú āu-lâi tng 11 hāng kong-chit, tû-khı̀ tiúⁿ-ló kap pó-chèng nn̄g-hāng í-goā, kı̂-û lóng ū thàn-chı̂ⁿ. Taⁿ chit ê chí-moē, sı̄ chı̍t ê “Khí thiàⁿ chiah chai khí thiàⁿ lâng”--ê, tùi tı̄ sàn-hiong lâng, ū toā liōng! Hó khoán-thāi chhut-goā lâng, bô-lūn hoē-lāi hoē-goā, ná chhin-chhiūⁿ hit chng ê kong-koán. Hó khoán-thāi thoân-kàu-ka, nā kàu-hoē lāi ê lâng-kheh lâi,soà chhiáⁿ khı̀ chò poê-pin, siu-sêng ê sı̂, bí sàng kui chio̍h, chhâ sàng kui chhia.
Tùi tı̄ hōng-hiàn, ang-bó͘ lóng chin kam. Khí pài-tn̂g ê sı̂, kheh kam-chià ê chı̂ⁿ la̍k-chhit-pah kho͘ lóng the̍h khı̀ kau; hiàn-tn̂g-sek ê sı̂, cha-bó͘-kiáⁿ ê sai-khia ti lia̍h khı̀ thâi. Hiàn hn̂g chò kàu-hoē ê ki-pún châi-sán. Ta̍k khoán iân-hāng, ang-bó͘ sûi-lâng hiàn.
Nn̄g ê cha-bó͘-kiáⁿ ūi-tio̍h beh kè thoân-tō, lóng hō͘ in tha̍k 7 goe̍h-jı̍t ê Hū-o̍h.
Nn̄g ê hāu-seⁿ ūi-tio̍h beh hō͘ in chò thoân-tō, lóng hō͘ in tha̍k Tiong-o̍h.
Āu-lâi kàu 80 goā hoè lı̂m-chiong.
Hiān-sı̂ ê hō͘-è oá pah-it lâng, kı̂-tiong í-keng hōng-hiàn chò Thian-kok ê te̍k-kong-tūi, kám-sú-kun, koat-sí-tūi, kap phó͘-thong-peng--ê, kiōng ū 11 lâng, ǹg-bāng bô kú ē ke kàu 14 miâ. Í-goā iā ū nn̄g-miâ tng koè lı̂m-sı̂-peng--ê.
(Tâi-oân Kàu-hoē Kong-pò tē 820 hō, 1957 nı̂ 4 goe̍h)
