Tē 4 Chiuⁿ
Thau jı̍p lé-pài-tn̂g, lâng khoàⁿ-kı̀ⁿ
Lek-sı̄-ka tò-lâi i chhù liáu-āu, sim-lāi siūⁿ hit keng lé-pài-tn̂g ê só͘-chāi, siông-siông siàu-liām, siūⁿ beh koh khı̀ khoàⁿ. Thèng-hāu āu lé-pài-jı̍t ê-hng thiⁿ chhím-chhím àm, Lek-sı̄-ka koh khı̀; tiàm lé-pài-tn̂g goā-bı̄n phian-phiah ê só͘-chāi, thèng-hāu Tàn-lí khui-mn̂g. Teh tiám-teng ê sı̂, khoàⁿ kéng-chhat bô tı̄-teh, chiū thau jı̍p lāi-bı̄n, iû-goân bih tı̄ mn̂g-sı̀ⁿ āu, ka-kı̄ siūⁿ kóng, “Tàn-lí m̄-ài goá lâi, i nā chai goá tiàm chia, chiū beh cháiⁿ-iūⁿ?” Ka-kı̄ siūⁿ put-chí hó-chhiò.
Lek-sı̄-ka ta̍k lé-pài-jı̍t ê-hng án-ni khı̀ lé-pài-tn̂g; kè kúi lé-pài chiū oē jı̄n-tit sím-mı̍h lâng choè bo̍k-su, seng-sêng lò-lò, bı̄n chhiⁿ-sán, thâu-khak àⁿ-àⁿ ná chhin-chhiūⁿ teh siūⁿ tāi-chı̀ ê khoán-sit; siông-siông chhoā nn̄g ê cha-bó͘-kiáⁿ lâi chí lé-pài-tn̂g. Lek-sı̄-ka ba̍k-chiu siông-siông khoàⁿ chí nn̄g ê cha-bó͘ gín-á, sim-lāi siūⁿ in cháiⁿ-iūⁿ jı̍p chí lāi-bı̄n teh chē. Hit ê toā-hàn kap Lek-sı̄-ka pı̂ⁿ toā, ba̍k-chiu kap thâu-mn̂g o͘; hit ê sió-bē thâu-mn̂g pe̍h, bı̄n chhiⁿ. Nn̄g lâng i-chiûⁿ lóng sı̄ hó, chhin-chhiūⁿ ū lâng teh chiàu-kò͘ ê khoán-sit. Lek-sı̄-ka chiong chí nn̄g ê gín-á pí-phēng ka-kı̄ chhēng phoà-saⁿ m̄-káⁿ kūn-chêng, chiū sim-lāi thó͘-khùi.
Lek-sı̄-ka ta̍k lé-pài pài-saⁿ siông-siông kàu boē tiám-sim ê só͘-chāi. Tàn-lí kiaⁿ Lek-sı̄-ka oē mn̄g i lé-pài-tn̂g ê tāi-chı̀; nā-sı̄ Lek-sı̄-ka sı̄ khiáu ê gín-á, lóng bô mn̄g--i, tı̀ⁿ boē kı̀-tit. Í-āu lé-pài-jı̍t tiám-teng ê sı̂, Tàn-lí lóng bô kiaⁿ Lek-sı̄-ka lâi chí lāi-bı̄n. Beh kàu joa̍h-thiⁿ ê sı̂, chı̍t lé-pài kè chı̍t lé-pài, jı̍t chiām-chiām tn̂g. Lek-sı̄-ka nā beh jı̍p-khı̀, siông-siông kiaⁿ lâng khoàⁿ-kı̀ⁿ, sı̄ m̄-ài hō͘ Tàn-lí siū-khı̀.
Kàu chı̍t lé-pài bo̍k-su nn̄g ê cha-bó͘-kiáⁿ khah-chá chiū lâi, tı̄ gı̂m-kı̂ⁿ teh kiâⁿ hut-jiân khoàⁿ-kı̀ⁿ chı̍t ê cha-bó͘ gín-á chhēng phoà-saⁿ jı̍p khı̀; in chiū ia̍h koáⁿ-kín jı̍p, nn̄g ê saⁿ khan-chhiú teh khoàⁿ, sim-lāi teh ngia̍uh-ngia̍uh-chhoah, bı̄n liâm-piⁿ chhiⁿ, liâm-piⁿ âng. Bô khoàⁿ-kı̀ⁿ kò͘ lé-pài-tn̂g ê lâng, ia̍h bô khoàⁿ-kı̀ⁿ hit ê cha-bó͘ gín-á; to̍k-to̍k khoàⁿ ū lâng ê kha-jiah, chiah chai chit ê chhēng phoà-saⁿ bih tá-lo̍h. Chit ê siàu-liân--ê miâ kiò Eng-lı̄, chiū kā i ê toā-chí kóng, “Lán tio̍h kiò Lı̂m Tàn-lí.”
Lek-sı̄-ka thiaⁿ-kı̀ⁿ chiū chhut-lâi, bı̄n-sek chhin-chhiūⁿ pek-chhiat kiû kóng, “Lín m̄-thang kiò lâng lâi koáⁿ--goá; goá sı̄ chin kan-khó͘ ê lâng, lóng bô khoàiⁿ-oa̍h, chit ê só͘-chāi sı̄ tē-it hó. Goá kúi-nā pái tiàm chit só͘-chāi khoàⁿ lín jı̄-ūi, kap hit ê lò-lò thâu-khak àⁿ-lo̍h ê lâng, pı̂ⁿ-pı̂ⁿ jı̍p, pı̂ⁿ-pı̂ⁿ chhut; goá siūⁿ lín tek-khak sı̄ hó lâng, m̄-ài koáⁿ-tio̍k. Lí nā kiò kò͘ lé-pài-tn̂g ê lâng lâi, tek-khak oē koáⁿ-tio̍k goá; liân tê-piáⁿ ia̍h m̄ hō͘ goá chia̍h.”
Chit ê toā-chí thiaⁿ-kı̀ⁿ chiah ê oē chiū kā Lek-sı̄-ka kóng, “Lí chit-ê--ah, goán sı̍t-chāi m̄-ài hāi--lí; taⁿ goá chhiáⁿ mn̄g lí, Lí kàu chit tè bih tı̄ mn̂g-sı̀ⁿ āu, in-ūi sím-mı̍h tāi-chı̀?”
Lek-sı̄-ka chiū ı̀n kóng, “Goá ài tit thiaⁿ toâⁿ-khı̂m, koh ài tit bêng-pe̍k kı̂-tó ê tāi-chı̀, bo̍k-su ê tāi-chı̀, Siōng-tè sı̄ sím-mı̍h ı̀-sù; che lóng-chóng boē hiáu-tit, to̍k-to̍k oē hiáu-tit chit keng toā-chhù sı̄ hù-kùi ê lâng teh óng-lâi, chhēng hó ê i-ho̍k, chhin-chhiūⁿ lín chı̍t poaⁿ-iūⁿ; khó-sioh goá ê i-ho̍k phoà-noā, m̄-káⁿ kūn-chêng; goá ài jı̍p-khı̀ chı̍t pái, khoàⁿ chiah ê tāi-chı̀ oē tit bêng-pe̍k chiū hó.”
Eng-lı̄ thiaⁿ chia ê oē chiū ı̀n i kóng, “Hó; lí thang jı̍p-lâi, kap goán tāi-ke saⁿ-kap chē.” Chit ê toā-chí thiaⁿ i sió-bē ín Lek-sı̄-ka jı̍p-lâi, ēng chhiú tùi ka-chiah-āu tioh i sió-bē ê saⁿ, chı̍t bı̄n khoàⁿ Lek-sı̄-ka ê thâu kàu kha, sim-lāi teh siūⁿ chit ê lâng cháiⁿ-iūⁿ thang jı̍p--lâi, i-ho̍k phoà-noā chin sı̄ kiaⁿ-lâng, nā beh kap lán chē, chiah ê í-tiām oē bak-tio̍h lâ-sâm.
Eng-lı̄ chai toā-chí ê ı̀-sù, bı̄n chiū pı̀ⁿ âng, ba̍k-chiu kim-kin, chiong chhiú-lāi ê Sèng-chheh, hian-khui Ngá-kok ê phoe tē-jı̄ chiuⁿ, tùi toā-chí kóng, “Chit chat chheh kúi-nā jı̍t chêng, lán lāu-pē ū khui-thiah kóng-bêng hō͘ lán thiaⁿ,” chiū tha̍k, kóng, “Nā ū lâng koà kim chhiú-khoân, chhēng súi-saⁿ jı̍p lín ê hoē-tn̂g, ia̍h ū sòng-hiong ê lâng chhēng phoà-saⁿ pı̂ⁿ-pı̂ⁿ jı̍p-lâi; lín khoàⁿ-kı̀ⁿ chhēng súi-saⁿ ê lâng, kā i kóng chē chit ê téng-ūi; tùi sòng-hiong ê lâng kóng, Chhiáⁿ khiā piⁿ-á, á-sı̄ chē chia kūn goá ê kha-ta̍h-í; kiám m̄-sı̄ hun-piat sòng-hiong hó-gia̍h, sim-koaⁿ siūⁿ bô pı̂ⁿ-chiàⁿ mah?” Tha̍k liáu Eng-lı̄ chiū kóng, “Lán nā bô chhiáⁿ chit ê lâng jı̍p-lâi saⁿ-kap chē, sı̍t-sı̍t bô thàn êng-hián ê Chú Iâ-so͘ Ki-tok ê tō-lí, kóng m̄-thang ēng goā-māu hun-piat lâng.”
Chit ê toā-chí thiaⁿ chiah ê oē chiū thó͘-khùi chı̍t siaⁿ, kóng, “Sui-jiân Sèng-chheh sı̄ bêng-bêng kóng, nā-sı̄ chit ê tāi-chı̀ goá boē hiáu-tit phah-sǹg; tio̍h lâi mn̄g kò͘ lé-pài-tn̂g ê lâng.”
Lek-sı̄-ka thiaⁿ chiah ê oē chiū kóng, “M̄-thang, m̄-thang; lí nā hō͘ Tàn-lí chai, lêng-khó͘ hō͘ goá lâi-khı̀, khah hó; í-āu goá m̄-káⁿ koh-chài lâi. Kı̂-tó, thoân-tō kap Siōng-tè chiah ê tāi-chı̀, goá chiū boē hiáu-tit, ia̍h bô iàu-kín.”
Chit ê toā-chí thiaⁿ Lek-sı̄-ka chiah ê oē, chiū tńg chhiò-bı̄n, soè-á siaⁿ kā Lek-sı̄-ka kóng, “Lí m̄-bat Siōng-tè, nā-sı̄ goán tio̍h kóng hō͘ lí chai, sı̄ goán ê pún-hūn. Goán ê lāu-pē sı̄ bo̍k-su, chit-tia̍p lí kap goán jı̍p-lâi kı̀ⁿ--i, mn̄g khoàⁿ tio̍h cháiⁿ-iūⁿ.”
Lek-sı̄-ka kóng, “M̄-chai Tàn-lí oē khoàⁿ-kı̀ⁿ á-boē?”
Chit ê toā-chí kóng, “Lāi-bı̄n ū chı̍t keng ê pâng-á bo̍k-su í-goā, hán-tit ū lâng kàu hia; lí nā kap goán lâi-khı̀ kı̀ⁿ i, i chiū oē kóng chit ê tāi-chı̀ tio̍h cháiⁿ-iūⁿ; m̄-chai lí oē kiaⁿ á-boē, sı̍t-sı̍t m̄-sái kiaⁿ.”
Lek-sı̄-ka chiū kóng, “Goá bô kiaⁿ,” chiū hoaⁿ-hí tè in jı̍p--khı̀. Kiâⁿ kàu hit keng pâng-á ê mn̂g-kháu, chit ê toā-chí ēng chhiú phah-mn̂g. Lek-sı̄-ka khoàⁿ phah-mn̂g, sim-koaⁿ me̍h-kó͘ pit-pho̍k-chhéng, ū kiaⁿ ê khoán-sit. Chit ê sió-bē chiū an-ùi i kóng, “Lí ê sim-koaⁿ tio̍h pêng-an, m̄-sái kiaⁿ, goá ê lāu-pē m̄-sı̄ giâm-giâm ê lâng; chiū thiaⁿ-kı̀ⁿ pâng-á-lāi ū lâng kiò, “Jı̍p--lâi.”
Tē 5 Chiuⁿ
Hó ki-hoē thiaⁿ tō-lí
Lek-sı̄-ka kap chí nn̄g ê chí-bē jı̍p pâng-lāi, khoàⁿ-kı̀ⁿ bo̍k-su teh chē hang-hé, chhiú the̍h chı̍t pún si; chiū ha̍p--khí-lâi, ba̍k-chiu tı̍t-tı̍t khoàⁿ Lek-sı̄-ka. Nā-sı̄ Lek-sı̄-ka, sui-jiân kúi-nā pái khoàⁿ-kı̀ⁿ bo̍k-su ê bı̄n, bē bat tú-tio̍h bo̍k-su ēng ba̍k-chiu tı̍t-tı̍t siòng--i, sim-lāi chiū kiaⁿ. Tiap-á-kú bo̍k-su ê bı̄n pı̀ⁿ-choè khó-lı̂n ê khoán-sit. Lek-sı̄-ka chiū khah hó-táⁿ teh khiā. Chí nn̄g ê chí-bē chiū kūn-chêng, kā i ê lāu-pē kóng Lek-sı̄-ka ê tāi-chı̀.
Bo̍k-su chiū kóng, “Soè-kiáⁿ, lí thang jı̍p--lâi.” Lek-sı̄-ka chiū kiâⁿ kàu bı̄n-chêng, siang-chhiú kiok-kiong, ba̍k-chiu tı̍t-tı̍t khoàⁿ bo̍k-su ê bı̄n. Bo̍k-su chiū mn̄g kóng, “Soè-kiáⁿ, lí ê miâ kiò sím-mı̍h?” Ìn kóng, “Kiò-choè Lek-sı̄-ka.”
Bo̍k-su kóng, “Lí chit ê miâ chin sı̄ kı̂-koài, goá bē-bat thiaⁿ-kı̀ⁿ.”
Lek-sı̄-ka ı̀n kóng, “In-ūi chāi-chá goá ê lāu-bú sı̄ poaⁿ-hı̀ ê lâng, ū chı̍t chhut-thâu i chng-choè Lek-sı̄-ka, só͘-í chiong chit ê miâ lâi hō. Goá soè-hàn ê sı̂ ia̍h bat khı̀ chng-hı̀; hiān-sı̂ khah toā-hàn, chng-liáu m̄-hó khoàⁿ, pa̍t-jı̍t toā-hàn nā súi, chiū beh koh khı̀, che tāi-chı̀ iáu-kú tio̍h thèng-hāu kú-kú. Lí sı̄ bo̍k-su mah?”
Bo̍k-su ı̀n kóng, “Chiàⁿ-sı̄.”
Lek-sı̄-ka koh mn̄g, “Bo̍k-su sı̄ sím-mı̍h?”
Bo̍k-su ı̀n kóng, “Sı̄ lô͘-po̍k ê lâng.” Chí nn̄g-ê cha-bó͘-kiáⁿ tiàm tı̄ sin-piⁿ khiā-teh, thiaⁿ chit kù oē, put-chí kı̂-koài.
Lek-sı̄-ka chiū koh mn̄g, kóng, “Chhiáⁿ lí kóng-bêng sı̄ sím-mı̍h lâng ê lô͘-po̍k.”
Bo̍k-su ēng un-sûn ê khoán-sit kóng, “Goá sı̄ Siōng-tè kap lâng ê lô͘-po̍k; Lek-sı̄-ka ah, goá ia̍h sı̄ lí ê lô͘-po̍k.”
Lek-sı̄-ka thiaⁿ chí kúi kù oē, ba̍k-chiu chiū khoàⁿ pâng-lāi só͘ pho͘ ê tē-chian, só͘ pâi ê kau-í, lóng-chóng sı̄ hó ê mı̍h; koh khoàⁿ chí nn̄g-ê cha-bó͘ gín-á só͘ chhēng ê i-ho̍k, ia̍h sı̄ chin súi, khoàⁿ-liáu chiū khoàⁿ ka-kı̄ ê i-ho̍k lóng sı̄ phoà-noā; sim-lāi siūⁿ i beh thài kóng sı̄ goá ê lô͘-po̍k? Chiū iô-thâu ha-ha-chhiò.
Bo̍k-su thiaⁿ Lek-sı̄-ka teh chhiò, sim-koaⁿ koh-khah thoè i khó-lı̂n.
Lek-sı̄-ka chiū koh mn̄g kóng, “Siōng-tè sı̄ chı̄-chūi, lí sı̍t-chāi bat I mah? Goá ê lāu-bú khah hó sèng-tē ê sı̂, ia̍h bat Siōng-tè ê miâ kā goá chiok-hok; nā-sı̄ goá m̄-chai sím-mı̍h ı̀-sù.”
Bo̍k-su tit-beh ı̀n ê sı̂ pâng-mn̂g khui-khui, Tàn-lí tùi goā-bı̄n jı̍p--lâi; khoàⁿ-kı̀ⁿ Lek-sı̄-ka tı̄ bo̍k-su ê bı̄n-chêng teh khiā, bı̄n chiū toā sit-sek, chhiú oá mn̂g-piⁿ, toā-khùi teh chhoán, chhin-chhiūⁿ boē kóng-oē. Lek-sı̄-ka khoàⁿ Tàn-lí, sim-lāi chiū kiaⁿ, ba̍k-chiu sı̀-koè khoàⁿ, bô só͘-chāi thang cháu, thang bih. Bo̍k-su chiū tùi Lek-sı̄-ka kóng, “Tı̄ tâi-ē ū só͘-chāi lí thang chē; tio̍h tiām-tiām siông-sè thiaⁿ, chiū oē chai Siōng-tè sı̄ chı̄-chūi.” Chiah ê oē kóng liáu, bo̍k-su chiū hoan-hù Tàn-lí, kóng, “Lí chhoā chit ê gín-á khı̀, hō͘ i chē hit só͘-chāi.”
Tàn-lí chiū chhoā Lek-sı̄-ka kàu tâi-chêng, chē tâi-ē ê só͘-chāi. Lek-sı̄-ka toā hoaⁿ-hí, ba̍k-chiu sı̀-koè khoàⁿ, thiaⁿ-kı̀ⁿ toâⁿ-khı̂m ê siaⁿ-im, koh khoàⁿ-kı̀ⁿ hit nn̄g-ê cha-bó͘ gín-á chē tı̄ i ê í-piⁿ, kap i saⁿ tùi-bı̄n.
Chit ê toā-chí kiaⁿ Lek-sı̄-ka toà tı̄ tn̂g-lāi m̄-bat lé-sò͘, kàu kı̂-tó ê sı̂, chiū ēng chhiú kí lo̍h, ı̀-sù sı̄ kah Lek-sı̄-ka tio̍h kūi; kàu gı̂m-si ê sı̂, chiū ēng chhiú kí koâiⁿ, ı̀-sù chiū kah Lek-sı̄-ka tio̍h khí--lâi. Chit ê sió-bē siông-siông tùi Lek-sı̄-ka ê bı̄n-chêng, ū hoaⁿ-hí ê bı̄n-sek, ı̀-sù chiū-sı̄ an-ùi Lek-sı̄-ka; nā-sı̄ Lek-sı̄-ka chin toā hoaⁿ-hí, lóng bô kiaⁿ, sim-lāi siūⁿ chiah ê hù-kùi ê lâng, chhin-chhiūⁿ chāi-chá soè-hàn ê sı̂, tı̄ khoàⁿ-hı̀ ê só͘-chāi chha-put-to chı̍t-poaⁿ-iūⁿ.
Hit-tia̍p bo̍k-su khí-lâi kóng Sèng-chheh thoân tō-lí. Lek-sı̄-ka kó-jiân tiām-siām siông-sè thiaⁿ, nā-sı̄ sim-lāi boē toā bêng-pe̍k; ba̍k-chiu ài khoàⁿ bo̍k-su khó-lı̂n ê bı̄n, hı̄-khang ài thiaⁿ bo̍k-su thoân-tō ê siaⁿ-im. Tàn-lí siông-siông tiàm tı̄ Lek-sı̄-ka ê sin-piⁿ sûn-lâi sûn-khı̀, kiaⁿ i m̄-bat tn̂g-lāi ê lé-sò͘; nā-sı̄ Lek-sı̄-ka chit sı̂ lóng bô siūⁿ kàu Tàn-lí ê tāi-chı̀, to̍k-to̍k koat-ı̀ ài chai Siōng-tè sı̄ chı̄-chūi, bo̍k-su sı̄ cháiⁿ-iūⁿ.
Tē 6 Chiuⁿ
Thâu chı̍t pái kı̂-tó
Lé-pài soah, bo̍k-su tú-tú lo̍h tı̄ tâi-ē, hit-sı̂ Tàn-lí tit-beh chhoā Lek-sı̄-ka chhut-khı̀. Bo̍k-su chiū khan Lek-sı̄-ka ê chhiú iû-goân jı̍p hit ê pâng-á-lāi, chí nn̄g-ê cha-bó͘ gín-á tè ka-chiah-āu ia̍h jı̍p--lâi. Bo̍k-su in-ūi kóng Sèng-chheh, seng-khu siān, bı̄n chhiⁿ-chhiⁿ, ba̍k-chiu pàng khoeh, ióng cheng-sı̂n, thâu-khak àⁿ-lo̍h kı̂-tó kóng, “Chú--ah, chiah ê cha-bó͘ gín-á sı̄ lí iûⁿ-kûn ê tiong-kan ê iûⁿ-á-kiáⁿ, tio̍h pang-chān goá lâi iúⁿ-chhı̄ chiah-ê.”
Kı̂-tó liáu, chiū kā chiah ê cha-bó͘ gín-á kóng, “Lâng ài bat Siōng-tè m̄-sı̄ khoài ê tāi-chı̀; nā-sı̄ ū chı̍t hāng bêng-bêng thang chai, Siōng-tè chiū-sı̄ choè lán ê Pē, sı̄ goá ê Pē; Lek-sı̄-ka--ah, I ia̍h sı̄ lí ê Pē; chí nn̄g-ê cha-bó͘-kiáⁿ goá chin thiàⁿ, chı̄n-la̍t chiàu-kò͘; nā-sı̄ Siōng-tè thiàⁿ lí, pí goá thiàⁿ goá ê cha-bó͘-kiáⁿ, koh-khah chhim.” Kóng soah, tāi-ke hoaⁿ-hí, nā-sı̄ Lek-sı̄-ka siūⁿ ka-kı̄ ê tāi-chı̀ chiū thó͘-khùi, ēng iu-būn ê siaⁿ kóng, “Goá ê lāu-pē sı̄ cháiⁿ-iūⁿ, goá lóng m̄-chai.”
Bo̍k-su kóng, “Siōng-tè lí ê Pē, lí ê tāi-chı̀, i lóng-chóng chai, in-ūi Siōng-tè bô m̄ tı̄-teh, bô m̄ chai; lán boē khoàⁿ-kı̀ⁿ i, i oē khoàⁿ-kı̀ⁿ lán; lán nā ēng oē kı̂-tó, ū khiàm-kheh sím-mı̍h mı̍h, ia̍h thang kiû, I siông-siông thiaⁿ-kı̀ⁿ.”
Lek-sı̄-ka chiū mn̄g kóng, “Goá i-chiûⁿ phoà-noā, pa̍t lâng chin hó-khoàⁿ, m̄-chai goá oē pı̂ⁿ-pı̂ⁿ khı̀ kiû-tit, á boē?”
Bo̍k-su chiū ı̀n kóng, “Oē; chit-tia̍p lí nā ài sím-mı̍h mı̍h, chiū thang kiû.”
Lek-sı̄-ka thiaⁿ chiah ê oē, ba̍k-chiu sı̀-koè khoàⁿ, sim-lāi teh siūⁿ goá khoàⁿ-kı̀ⁿ Siōng-tè; chiū o̍h bo̍k-su ê khoán-sit, ēng nn̄g ki chhiú ng-bı̄n, thâu-khak àⁿ-lo̍h, chiū kiò, “Siōng-tè--ah, goá ài bêng-bêng chai lí, koh ài lí thoè goá hêng Tàn-lí hō͘ goá chia̍h tê-piáⁿ ê chı̂ⁿ.”
Chí nn̄g-ê cha-bó͘ gín-á thiaⁿ i kı̂-tó ê oē, sim-lāi phah-sǹg toā m̄ ha̍p-gı̂; nā-sı̄ bo̍k-su thiaⁿ-kı̀ⁿ i só͘ kiû--ê, chiū toā pek-chhiat lâu ba̍k-sái, thoè i kóng, “Sim só͘ goān.”
Tē 7 Chiuⁿ
Só͘ mn̄g ê kù chhı̀-chha̍k sim-koaⁿ
Tàn-lí tiàm tı̄ pâng-á goā teh thèng-hāu, beh ēng oē chek-pı̄ Lek-sı̄-ka; nā-sı̄ Lek-sı̄-ka í-keng tùi piⁿ-thâu ê mn̂g chhut-khı̀. Taⁿ tio̍h thèng-hāu kàu pài-saⁿ ê jı̍t-kı̂ chiah oē chek-pı̄ i; sim-lāi siūⁿ beh háng--i, ia̍h beh kā i kóng í-āu m̄ koh ēng piáⁿ hō͘ i chia̍h; nā koh khoàⁿ i tı̄ lé-pài-tn̂g, beh kiò kéng-chhat lia̍h--i.
Kàu pài-saⁿ chá-khí Lek-sı̄-ka iû-goân lâi tı̄ tiám-sim toh-piⁿ. Tàn-lí hit-sı̂ bô êng; i chiū kiâⁿ jı̍p tı̄ tek-láng teh chē thèng-hāu. Tiap-á-kú chia̍h tiám-sim ê lâng soàⁿ liáu, Lek-sı̄-ka chiū mn̄g kóng, “Siōng-tè ū thoè goá hêng lí hō͘ goá chia̍h tê-piáⁿ ê chı̂ⁿ á-bô?”
Tàn-lí chiū kóng, “Lí kóng sím-mı̍h mı̍h? Siōng-tè hêng goá mah! Bô.”
Lek-sı̄-ka chiū koh kóng, “Goá phah-sǹg Siōng-tè tek-khak oē thoè goá hêng; taⁿ lí m̄-sái kiaⁿ, goá ū pek-chhiat kiû choē-choē pái; bo̍k-su ia̍h ū tùi goá kóng Siōng-tè oē thiaⁿ goá só͘ kiû.”
Tàn-lí thiaⁿ chiah ê oē chiū pı̀ⁿ-bı̄n ba̍k-chiu kim-kim khoàⁿ Lek-sı̄-ka, chiū mn̄g kóng, “Lek--ah, lí ū tùi bo̍k-su kóng goá ū teh boē tiám-sim ê tāi-chı̀, á-bô?”
Lek-sı̄-ka chiū chhiò, ı̀n kóng, “Goá lóng-chóng bô kóng-khí, nā-sı̄ tùi lé-pài ê-hng kàu taⁿ choē-choē pái ū kóng hō͘ Siōng-tè thiaⁿ; koh nn̄g, saⁿ jı̍t i tek-khak oē thoè goá hêng.”
Tàn-lí thiaⁿ chiah ê oē, bı̄n chiū hoaⁿ-hí, tùi Lek-sı̄-ka kóng, “Lí sı̄ chhang-miâ lêng-lāi ê cha-bó͘ gín-á, taⁿ goá beh kau-tài lí chı̍t kù oē; lí í-āu m̄-thang kā pa̍t-lâng kóng goá teh boē tiám-sim ê tāi-chı̀. Goá pún-jiân teh kò͘ lé-pài-tn̂g; chit ê lé-pài-tn̂g lóng sı̄ hù-kùi ê lâng, ta̍k ge̍h ū chı̂ⁿ chhiàⁿ--goá; siat-sú in nā chai goá teh boē tiám-sim, chiū oē khoàⁿ-khin goá, sı̂--goá, m̄ hō͘ goá kò͘ lé-pài-tn̂g.”
Lek-sı̄-ka thiaⁿ chiah ê oē, chiū mn̄g kóng, “Lí kı̀-jiân kò͘ lé-pài-tn̂g, ta̍k ge̍h ū chı̂ⁿ thang niá, cháiⁿ-iūⁿ beh lâi boē tiám-sim.”
Tàn-lí thiaⁿ i só͘ mn̄g ê oē, chhiú chiū iô tē-á lāi ê chı̂ⁿ hō͘ Lek-sı̄-ka khoàⁿ, chiū kóng, “Goá ta̍k-jı̍t thang thàn choē-choē chı̂ⁿ, kàu nı̂-bé chhun-tit choē-choē.”
Lek-sı̄-ka chiū ı̀n kóng, “Lí ài hiah-choē chı̂ⁿ in-ūi siáⁿ-sū? Sı̄ beh hō͘ Siōng-tè, á-bô?”
Tàn-lí bô oē thang ı̀n, sim-koaⁿ chiū chhı̀-chha̍k, sim-lāi siūⁿ goá só͘ chhun ê chı̂ⁿ lóng-chóng bô khai-ēng. Goá khoàⁿ pa̍t-lâng nā ū chı̂ⁿ chiū khí toā-chhù, boé hó ke-si; goá to̍k-to̍k chı̍t keng chhù-á, ia̍h bô hó ê ke-si, chí-ū chı̍t tè toh-kūi, chı̍t pún siàu-phō͘ teh kı̀ hit ê lı̄-sek ê siàu; koh ū chı̍t ê tē-á toé kim nā-tiāⁿ; pêng-sò͘ m̄-bat ēng chı̂ⁿ hō͘ lâng, put-kò ēng chia̍h-chhun ê tê-piáⁿ hō͘ Lek-sı̄-ka chia̍h, i tùi Siōng-tè kiû thoè i hêng--goá. Hit-sı̂ Tàn-lí liông-sim ka-kı̄ chek-pı̄, bô oē thang ı̀n, ké-ı̀ khàm-sàu chı̍t siaⁿ, sim-lāi tiû-tû, chhiú chiū chhng tē-á lāi, the̍h-chhut chı̍t ê toā-chı̂ⁿ, hō͘ Lek-sı̄-ka.
Lek-sı̄-ka chiū kóng, “Án-ni boē choè-tit; goá bô kiû Siōng-tè kah lí the̍h chı̂ⁿ hō͘ goá, siông-siông tùi Siōng-tè kiû thoè goá hêng.”
Tàn-lí ēng thun-thò͘ ê siaⁿ kóng, “Siōng-tè tek-khak oē hêng--goá, chiū-sı̄ kap goá sǹg-siàu ê jı̍t-kı̂ beh kàu lah.” Lek-sı̄-ka thiaⁿ chit kù oē, chiū mn̄g kóng, “Siōng-tè ū sǹg-siàu ê jı̍t-kı̂ á-bô? Goá soè-hàn teh chng-hı̀ ê sı̂, chin ài sǹg-siàu ê jı̍t-kı̂ kàu.”
Tàn-lí chiū kóng, “M̄-sı̄ chit hō ê jı̍t-kı̂, sı̄ sím-phoàⁿ hó pháiⁿ lâng ê jı̍t-kı̂; choē-choē lâng m̄-ài tit kàu.” Lek-sı̄-ka chiū kóng, “Nā-sı̄ lí ài tit kàu, sı̄ m̄-sı̄?” Tàn-lí chiū kóng, “Choè lí chia̍h;” sim-lāi siūⁿ sı̍t-sı̍t bô hoaⁿ-hí chit ê jı̍t-kı̂ kàu.
Lek-sı̄-ka chia̍h liáu, beh tò-khı̀ ê sı̂, chiong hit ê chı̂ⁿ hêng--i. Tàn-lí tek-khak m̄ siu. Lek-sı̄-ka chiū kóng, “Lí kó-jiân m̄-khéng siu, bı̂n-á-jı̍t goá chiong chit ê chı̂ⁿ the̍h-lâi kā lí boé tiám-sim, chhin-chhiūⁿ pa̍t-lâng, thang mah? Í-āu lí ê tāi-chı̀ goá tek-khak bô tùi pa̍t-lâng kóng; choè lí pàng-sim.” Kóng-liáu Lek-sı̄-ka chiū chiong chit ê chı̂ⁿ pau tı̄ saⁿ-lāi, chiū hoaⁿ-hí tò-khı̀.
