Tē 8 Chiuⁿ
Bo̍k-su khı̀ Lek-sı̄-ka ê chhù
Lek-sı̄-ka kiâⁿ tit beh kàu i ê chhù, i ê chhù-piⁿ lóng sı̄ sòng-hiong ê lâng, tāi-ke chū-chı̍p teh khoàⁿ chı̍t ê lò-lò ê lâng chhēng hó ê i-chiûⁿ, Lek-sı̄-ka chı̀n-chêng lâi khoàⁿ, jı̄n-tit sı̄ bo̍k-su, chiū ēng siang-chhiú poah-khui chèng-lâng. Bo̍k-su khoàⁿ-kı̀ⁿ sı̄ Lek-sı̄-ka, sim-lāi toā hoaⁿ-hí.
Hit-sı̂ Lek-sı̄-ka chio bo̍k-su saⁿ-kap kiâⁿ kàu chı̍t tiuⁿ ê pháiⁿ lâu-thui, phoà-phoà ê lâu-téng, chhiûⁿ-piah húi-hoāi, ia̍h bô í-toh, phoà-chng ka-nn̂g tui, siang-pêng thang-á-mn̂g pô-lê phoà, ēng phoà-saⁿ phoà-choá lâi that; chı̍t ê hé-lô͘ siⁿ-sian; tiong-kan ēng chı̍t tè pang hē tı̄ phoà-chng ê téng-bı̄n choè í; chiū chhiáⁿ bo̍k-su chē, ka-kı̄ chē lâu-pang. Bo̍k-su khoàⁿ-kı̀ⁿ i chin sòng-hiong, bı̄n-sek thoè i iu-būn, chiū mn̄g Lek-sı̄-ka kóng, “Lí ê chhù chí-ū chit tè-á mah?”
Lek-sı̄-ka ı̀n kóng, “Chiàⁿ-sı̄; chāi-chá goá ê lāu-bú kap goá teh chng-hı̀ ê sı̂, ū khah toā keng, khah hó khoàⁿ, taⁿ siūⁿ goá seng-sêng hó-khoàⁿ, nā toā-hàn ê sı̂ koh khı̀ chng-hı̀, tek-khak m̄-sái chhin-chhiūⁿ chiah kan-khó͘.”
Bo̍k-su chiū kā Lek-sı̄-ka kóng, “Cha-bó͘ gín-á ah, goá taⁿ lâi chit tè, ı̀-sù ài tùi lí ê lāu-bú kóng, hō͘ lí khı̀ soaⁿ-lāi hó-hó ê chu-pâng tha̍k-chheh; m̄-chai lí ê lāu-bú khéng, á m̄-khéng.”
Lek-sı̄-ka chiū ı̀n kóng, “Goá siūⁿ lāu-bú tek-khak m̄-khéng; i bat kóng m̄ hō͘ goá tha̍k-chheh khı̀ lé-pài-tn̂g, kiaⁿ-liáu āu-lâi goá pı̀ⁿ choè bô lō͘-ēng ê lâng. Chiah-kú goá khı̀ lí ê lé-pài-tn̂g, in-ūi lı̄ goá ê chhù hn̄g-hn̄g, koh goá ê lāu-bú lé-pài-jı̍t siông-siông chiú-chùi, só͘-í m̄-chai goá khı̀.”
Bo̍k-su koh khah thoè i khó-lı̂n, àm-chı̄ⁿ siūⁿ, soè-siaⁿ kóng, “Goá sı̍t-chāi tio̍h thoè i phah-sǹg.” Lek-sı̄-ka lio̍h-á thiaⁿ-kı̀ⁿ, chiū kóng, “Lí m̄-sái thoè goá phah-sǹg, put-kò lí hō͘ goá jı̍p-khı̀ lé-pài-tn̂g, thiaⁿ lí kóng-bêng Siōng-tè ê tāi-chı̀ chiū hó. Siat-sú lí ēng hó i-chiûⁿ hō͘ goá chhēng, chhin-chhiūⁿ lí ê cha-bó͘-kiáⁿ, kiaⁿ goá ê lāu-bú khoàⁿ-kı̀ⁿ, chiū thǹg khı̀ tǹg, boé chiú chia̍h, só͘-í m̄-sái thoè goá phah-sǹg.”
Bo̍k-su chiū mn̄g kóng, “Hiān-sı̂ lí ê lāu-bú tı̄ tá-lo̍h?”
Lek-sı̄-ka kóng, “Goá ê lāu-bú nā chia̍h chiú-chùi, ū sı̂ kàu nn̄g saⁿ jı̍t chiah tò-lâi; m̄-chai tá-lo̍h khı̀; siat-sú tı̄-teh, ia̍h m̄ thiaⁿ lí ê oē; in-ūi chāi-chá ū chı̍t ê thoân-tō ê lâng lâi khǹg--i, i lóng-chóng m̄ thiaⁿ, chiong thoân-tō ê lâng chhia-lo̍h lâu-thui-ē, hiám-hiám sí. Hı̀-pan lāi siông-siông kiò goá ê lāu-bú choè siat-phoat ê cha-bó͘, m̄-káⁿ hoān-tio̍h i.”
Bo̍k-su thiaⁿ chiah ê tāi-chı̀, ài thoè i siat-hoat, siūⁿ-lâi siūⁿ-khı̀ lóng bô hoat-tō͘, chiū koh mn̄g Lek-sı̄-ka kóng, “Téng-jı̍t lí kóng Tàn-lí ê tāi-chı̀, tàu-tí Tàn-lí sı̄ sím-mı̍h lâng?”
Lek-sı̄-ka thiaⁿ-kı̀ⁿ, sim-lāi siūⁿ chiū kóng, “Hit ê lâng put-chí khó-lı̂n goá, ēng ko-phi-tê hō͘ goá chia̍h. Lûn-tun siâⁿ lâng chin-choē, miâ Tàn-lí ia̍h choē, lí ia̍h choē-choē m̄-bat.”
Bo̍k-su bı̄n chhiò-chhiò kóng, “Lâng sı̍t-chāi choē-choē, goá bat boē liáu; hit lâng kó-jiân ū boē tiám-sim bô?” Lek-sı̄-ka thâu thı̀m-thı̀m, m̄-káⁿ kóng. Bo̍k-su koh mn̄g, “Ko-phi-tê chı̍t au kúi ı̂ⁿ?”
Lek-sı̄-ka ı̀n kóng, “Chı̍t ê toā au tı̄ⁿ-tı̄ⁿ sı̄ chı̍t ê toā-chı̂ⁿ, chiū boé poàⁿ-au ia̍h thang; piáⁿ ia̍h sı̄ án-ni boē.”
Bo̍k-su koh mn̄g, “Tê piáⁿ sı̄ hó-chia̍h mah?”
Lek-sı̄-ka chhùi cha̍p-cha̍p-háu ı̀n, “Chin hó.”
Bo̍k-su chiū koh kóng, “Taⁿ lí ta̍k chá-khí khı̀ i ê só͘-chāi, boé ko-phi-tê chı̍t au, toā-tè piáⁿ chı̍t ê thang chia̍h; lí kā i kóng, chhı̀n-chhái sím-mı̍h sı̂ thang khı̀ goá ê chhù thó chı̂ⁿ.”
Lek-sı̄-ka khí-thâu thiaⁿ chiah ê oē chin hoaⁿ-hí; jiân-āu sim-lāi siūⁿ boē choè--tit; goá í-keng ín Tàn-lí m̄ kóng chit ê tāi-chı̀; chhùi-tûn kha̍uh-kha̍uh-hò͘, chiū kóng, “Goá chai i m̄ án-ni-siⁿ, tek-khak m̄; lō͘ chin hn̄g, i boē tiám-sim ê sı̂ siông-siông bô-êng; tek-khak bô beh khı̀ lí hia thó-chı̂ⁿ.”
Bo̍k-su koh kóng, “Goá tek-khak oē thoè lí siat-hoat. Lé-pài-jı̍t lí kàu lé-pài-tn̂g lāi thèng-hāu lé-pài bêng-pe̍k, goá beh the̍h chı̍t ê toā-gûn-á hō͘ lí, chiàu ta̍t cha̍p-jı̄ ê toā-chı̂ⁿ, nā tú-tio̍h Tàn-lí chiū tio̍h kià i, ta̍k jı̍t thang khı̀ chia̍h; m̄-thang ēng hit ê chı̂ⁿ khı̀ boé pa̍t-mı̍h, tio̍h chiàu goá ê oē kiâⁿ; nā bô, goá chiū oē chai.” Bo̍k-su kóng chiah ê oē, chiū thoè i khó-lı̂n, koh mn̄g kóng, “Taⁿ lí ū sím-mı̍h tāi-chı̀ goá thang thoè lí phah-sǹg mah?”
Lek-sı̄-ka kín-kín ı̀n i kóng, “To̍k-to̍k hō͘ goá chai Siōng-tè ê tāi-chı̀ chiū hó.”
Bo̍k-su kóng, “Chit-tia̍p ū chı̍t kù oē thong-ti lí; siat-sú goá ài lí hō͘ goá choè kiáⁿ, lâi goá ê chhù kap goá ê cha-bó͘-kiáⁿ kau-poê, lí bē lâi ê sı̂, tāi-seng tio̍h soé seng-khu, chhēng sin ê i-chiûⁿ chiah thang jı̍p goá ê chhù. Taⁿ Siōng-tè ài lán ta̍k lâng choè i ê kiáⁿ-lūi, nā-sı̄ lán ū choē, lóng-chóng boē kham--tit, só͘-í Siōng-tè chhe I ê Kiáⁿ Iâ-so͘ kàng-sè thoè lâng sí, ēng i ê huih soé-tû lán ê choē, ēng kong-gı̄ jia-khàm, chhin-chhiūⁿ chhēng pe̍h ê saⁿ; án-ni-siⁿ chiah oē jı̍p thian-tông. Lí ta̍k pái kı̂-tó Siōng-tè, tek-khak tio̍h kóng, in-ūi Iâ-so͘ Ki-tok ê kong-lô. Iâ-so͘ Ki-tok sı̄ Siōng-tè ê kiáⁿ.”
Bo̍k-su oē kóng liáu, chiū bān-bān kiâⁿ lo̍h lâu-thui. Chit tiuⁿ lâu-thui chin pháiⁿ kiâⁿ. Lek-sı̄-ka siông-siông kiâⁿ chin se̍k, khoàⁿ i teh kiâⁿ bān-bān, chiū koáⁿ-kín chı̀n-chêng khı̀ chhoā--i. Bo̍k-su kap Lek-sı̄-ka kiâⁿ kàu koe-lō͘, chiū the̍h chı̍t ê soè gûn-á, chiàu ta̍t la̍k-ê toā-chı̂ⁿ hō͘ Lek-sı̄-ka, soè siaⁿ kóng, “Lí thang choè saⁿ jı̍t chia̍h.” Hit-tia̍p saⁿ-sı̂, bo̍k-su kóng, “Goān Siōng-tè ēng toā hok-khı̀ hō͘ lí.”
Lek-sı̄-ka tò-lâi sim-lāi siūⁿ; taⁿ goá chhin-chhiūⁿ chı̍t ê pù-lâng. Tē-jı̄ jı̍t sı̄ pài-sı̀, thiⁿ-kng ê sı̂, Lek-sı̄-ka chiū iô-iô pái-pái, thé-thé biān-biān, kiâⁿ kàu Tàn-lí boē tiám-sim ê só͘-chāi, chiū chiong chı̍t ê soè ê gûn-á kau Tàn-lí, koh kóng bo̍k-su khı̀ i tau ê tāi-chı̀. Tàn-lí thiaⁿ, sim-lāi kiaⁿ bo̍k-su tek-khak tùi Lek-sı̄-ka chhâ i ê tāi-chı̀; chiū siūⁿ beh koáⁿ Lek-sı̄-ka khı̀; nā-sı̄ thoè i khó-lı̂n, tiap-á-kú thó͘-khùi chı̍t siaⁿ, sim-lāi siūⁿ, “Siat-sú goá ê tāi-chı̀ nā hō͘ hù-kùi ê lâng chai hiâm--goá, goá chiū chiong chit ê tāi-chı̀ lâi soah, ia̍h bô siong-kan; nā-sı̄ bô hiâm, tio̍h koh lâi boē tiám-sim thàn chı̂ⁿ, khah hó; án-ni-siⁿ tio̍h koh hō͘ i chia̍h.”
Tē 9 Chiuⁿ
Lek-sı̄-ka phoà-pı̄ⁿ
Ta̍k-ê lé-pài-jı̍t, Lek-sı̄-ka jı̍p lé-pài-tn̂g, bo̍k-su ê cha-bó͘-kiáⁿ ū the̍h poàⁿ-kū-lo̍h ê saⁿ kap bō, lâi sàng--i; Lek-sı̄-ka ta̍k jı̍t bô chhēng, lok tı̄ lé-pài-tn̂g lāi ê mn̂g-āu, thèng-hāu lé-pài-jı̍t chiah khı̀ chhēng, jı̍p lé-pài-tn̂g. Kóng tō-lí ê sı̂, bô lâng chhin-chhiūⁿ Lek-sı̄-ka hı̄-khang chēng-chēng thiaⁿ, ba̍k-chiu tı̍t-tı̍t khoàⁿ bo̍k-su teh kóng tō-lí. Kàu lé-pài soah, chiū jı̍p bo̍k-su ê pâng-á-lāi, bo̍k-su ê cha-bó͘-kiáⁿ ta̍k lé-pài lûn-liû the̍h gûn-á lok tı̄ hé-lô͘ téng, hō͘ Lek-sı̄-ka lâi the̍h. Bo̍k-su ta̍k pái ēng kúi kù oē kà-sı̄--i. Lek-sı̄-ka chiong chit ê gûn-á, ta̍k pái khı̀ kià Tàn-lí, thang boé tiám-sim.
Āu-lâi kè nn̄g-saⁿ ge̍h jı̍t, hit-jı̍t lé-pài bo̍k-su bô khoàⁿ-kı̀ⁿ Lek-sı̄-ka, pâng--nih ê gûn-á ia̍h bô lâi the̍h. Tàn-lí ta̍k jı̍t pâi tiám-sim ia̍h bô khoàⁿ-kı̀ⁿ Lek-sı̄-ka, sim-lāi kı̂-koài teh iu-būn; koh siūⁿ Lek-sı̄-ka kap goá bô-chhin bô-chhek, mih-sái iu-būn, nā-sı̄ sim-lāi siông-siông teh siūⁿ Lek-sı̄-ka; m̄-chai i ê chhù tı̄ ta̍h-lo̍h, siūⁿ joā-kú, hut-jiân kı̀-tit téng-jı̍t Lek-sı̄-ka ū tùi goá kóng, bo̍k-su bat khı̀ i ê chhù, goá lâi-khı̀ mn̄g bo̍k-su, chiū oē chai; nā-sı̄ kiaⁿ bo̍k-su oē gı̂ goá, kóng i chı̍t lé-pài bô lâi nā-tiāⁿ, goá mih-sái thoè i iu-būn; koh kiaⁿ bo̍k-su oē chai goá teh boē tiám-sim ê tāi-chı̀, só͘-í sim-koaⁿ m̄-káⁿ siūⁿ, ia̍h m̄-káⁿ mn̄g.
Ū chı̍t jı̍t Tàn-lí kàu i ê chhù, lóng bô tāi-chı̀, chiū chiong só͘ chioh--lâng ê bú-chı̂ⁿ, lı̄-sek ê siàu-phō͘, kap hiān-kim lóng-chóng poaⁿ chhut-lâi sǹg, kiōng ū nn̄g-chheng kho͘, sǹg-liáu toā hoaⁿ-hí, kóng, “Goá ia̍h sı̄ pù-lâng--lah.” Koh kè chı̍t lé-pài, Tàn-lí khoàⁿ-kı̀ⁿ Lek-sı̄-ka ia̍h bô lâi, sim-lāi koh-khah iu-būn hoân-ló, lóng bô siūⁿ boē tiám-sim ê tāi-chı̀, oē hō͘ bo̍k-su chai, to̍k-to̍k siūⁿ tek-khak tio̍h lâi-khı̀ mn̄g bo̍k-su.
Hit-sı̂ bo̍k-su kóng tō-lí liáu, jı̍p pâng-á-lāi teh khiā, khoàⁿ-kı̀ⁿ hé-lô͘ téng ê gûn-á koh bô lâi the̍h, sim-lāi iu-būn, thâu-khak àⁿ-lo̍h, tú-tú Tàn-lí phah-mn̂g jı̍p-lâi. Bo̍k-su chiū mn̄g kóng, “Beh sím-mı̍h tāi-chı̀?” Tàn-lí chiū ı̀n kóng, “Chí nn̄g lé-pài Lek-sı̄-ka lóng bô lâi, m̄-chai sím-mı̍h tāi-chı̀; chhiáⁿ lí kā goá kóng i ê chhù tı̄ ta̍h-lo̍h, goá beh khı̀ chhâ i sím-mı̍h tāi-chı̀ bô lâi.”
Bo̍k-su chiū kóng, “Án-ni-siⁿ chin hó; goá, kap goá ê cha-bó͘-kiáⁿ ia̍h thoè i iu-būn; pún-jiân goá ài chhin-sin khı̀ mn̄g, khó-sioh lóng bô êng.” Chiah ê oē kóng liáu, chiū tùi Tàn-lí siông-sè kóng Lek-sı̄-ka ê só͘-chāi.
Tàn-lí í-keng thiaⁿ bêng-pe̍k, chiong lé-pài-tn̂g koaiⁿ só, siūⁿ Lek-sı̄-ka ê chhù chin hn̄g, thèng-hāu bı̂n-á chá-khí boē tiám-sim liáu, chiah lâi-khı̀. Kiâⁿ kúi pō͘, koh siūⁿ m̄-thang, chit-tia̍p jı̍t iáu-bē àm, eng-kai tio̍h lâi-khı̀; chiū chı̍t-lō͘ kiâⁿ kàu pùn-sò-tiâⁿ ê bı̄n-chêng, chı̍t keng sı̄ bé-pâng. Tàn-lí chiū tùi hit keng jı̍p--khı̀; só͘-chāi chin kiaⁿ-lâng, àm-àm lóng bô khoàⁿ-kı̀ⁿ, m̄-chai hit keng sı̄, á m̄-sı̄.
Teh khiā ê sı̂, thiaⁿ-kı̀ⁿ lâu-téng ū lâng ê siaⁿ-im khin-khin kóng, “Goán ê Pē, kiû lí chhe chı̍t ê lâng lâi pang-chān goá; sı̄ in-ūi oá-khò Iâ-so͘ ê kong-lô. Sim só͘ goān.”
Tàn-lí chai sı̄ Lek-sı̄-ka ê siaⁿ, toā hoaⁿ-hí chiū kiò kóng, “Lek-sı̄-ka--ah, goá lâi--lah;” sı̀-koè bong-lâi bong-khı̀, bong-tio̍h lâu-thui, koáⁿ-kín chiūⁿ-khı̀. Sı̀-koè àm-bong-bong, kai-chài Tàn-lí seng-khu ū toà chū-lâi-hé, koh chı̍t ki chek; tiám-to̍h khoàⁿ-kı̀ⁿ Lek-sı̄-ka, tó tı̄ lâu-kok chı̍t niá phoà-chhio̍h, bô phē, ēng phoà i-chiûⁿ choè phē, bı̄n chhiⁿ-chhiⁿ.
Hit-sı̂ Lek-sı̄-ka khoàⁿ-kı̀ⁿ Tàn-lí, ba̍k-chiu kim-kim, toā hoaⁿ-hí kóng, “Lí lâi, goá chin hoaⁿ-hí; sı̄ Siōng-tè kah lí lâi--mah?”
Tàn-lí chiū kūi tı̄ chháu-chhio̍h téng, khan i ê chhiú, bong i ê thâu-khak, loa̍h i ê thâu-mn̂g, ı̀n kóng, “Chiàⁿ-sı̄.”
Lek-sı̄-ka kóng, “Siōng-tè kı̀-jiân kah lí lâi, tek-khak ū hoan-hù lí sím-mı̍h tāi-chı̀.”
Tàn-lí kóng, “Siōng-tè kóng goá sı̄ ū choē ê lâng, in-ūi goá ài-sioh chı̂ⁿ-châi, ū sòng-hiong ê cha-bó͘ gín-á goá boē hiáu ài-sioh i. Chāi-chá sı̄ Siōng-tè kah lí lâi goá boē tiám-sim ê só͘-chāi, ài tit goá khó-lı̂n lí, goá lóng-chóng bô hit hō ê sim-koaⁿ lâi chiàu-kò͘. Bo̍k-su kóng tō-lí ê sı̂, khoàⁿ goá ê sim-koaⁿ thàu-thàu, ū kóng, ‘Gōng ê lâng--ah, kin-á-jı̍t beh chiong lí ê lêng-hûn lia̍h--khı̀, lí só͘ chek-chū ê mı̍h oē kui sím-mı̍h lâng?” Goá thiaⁿ chia ê oē, siūⁿ sı̄ Siōng-tè mn̄g goá, bô oē thang ı̀n; koh siūⁿ sı̄ Siōng-tè kap goá sǹg-siàu ê jı̍t-chí kūn--lah, goá lóng boē hiáu-tit tio̍h cháiⁿ-iūⁿ choè.”
Lek-sı̄-ka chiū kóng, “A-peh--ah, lí chin-chiàⁿ sı̄ hó-lâng, sı̄ á m̄-sı̄?”
Tàn-lí thiaⁿ chiū lâu ba̍k-sái, ı̀n kóng, “Goá sı̄ tāng-choē ê lâng, m̄-sı̄ hó-lâng; goá mı̂-jı̍t khûn-kín choè tāi-chı̀, lóng-chóng sı̄ in-ūi chı̂ⁿ-gûn, chiū khı̀ kò͘ lé-pài-tn̂g ia̍h sı̄ in-ūi án-ni. Chit-tia̍p Siōng-tè chek-pı̄ goá sı̄ gōng ê lâng, bô phah-sǹg āu-lâi ê tāi-chı̀. Goá siūⁿ lí pí goá khah gâu, khah hó, ū toā ǹg-bāng āu-lâi oē chiūⁿ thian-tông.”
Lek-sı̄-ka thiaⁿ chiah ê oē chiū kā Tàn-lí kóng, “Lí kı̀-jiân oē hiáu--tit; kiám m̄ oá-khò Iâ-so͘ ê kong-lô, kiû Siōng-tè pang-chān lí choè hó lâng?”
Tàn-lí kóng, “Boē, boē; goá khı̀ lé-pài-tn̂g kı̂-tó ê sı̂, sui-jiân kūi--teh, sim-lāi lóng sı̄ teh siūⁿ pù-lâng ê tāi-chı̀. Goá tùi soè-hàn ê sı̂ kàu chit-tia̍p, ta̍k hāng in-ūi chı̂ⁿ; lí khı̀ goá boē tiám-sim ê só͘-chāi, goá m̄-bat ēng chı̂ⁿ boé hō͘ lí chia̍h, ia̍h m̄-bat boé i-chiûⁿ hō͘ lí chhēng. Chit-tia̍p lí teh phoà-pı̄ⁿ, sı̄ in-ūi goá pêng-sò͘ m̄-bat chiàu-kò͘ lí; siūⁿ-lâi siūⁿ-khı̀, goá chiū-sı̄ tāng-choē ê lâng.”
Lek-sı̄-ka thiaⁿ chiah ê oē in-ūi pı̄ⁿ tāng, chiū khin siaⁿ tùi Tàn-lí kóng, “Chiông-chiân goá kàu lé-pài-tn̂g siông-siông thiaⁿ bo̍k-su kóng, “M̄-sı̄ lán thiàⁿ Siōng-tè, sı̄ Siōng-tè tāi-seng thiàⁿ lán, chhe-khián I ê kiáⁿ thoè lán choè sio̍k-choē ê chè-hiàn.”
Tàn-lí kóng, “Chit chat ê Sèng-chheh goá siông-siông thiaⁿ, tāi-seng chin ài thiaⁿ, āu-lâi chı̍t hı̄-khang jı̍p, chı̍t hı̄-khang chhut, lóng bô iàu-kín; hāi--ah, goá ê sim-koaⁿ ngı̄!”
Lek-sı̄-ka thiaⁿ chiah ê oē, ba̍k-chiu khoàⁿ Tàn-lí ê bı̄n, chin-sı̍t khó-lı̂n, chiong chhiú ng-bı̄n, khin-siaⁿ kı̂-tó kóng, Goān Siōng-tè hō͘ Tàn-lí a-peh ê sim pı̀ⁿ-choè nńg; lóng sı̄ in-ūi oá-khò Iâ-so͘ sio̍k-choē ê kong-lô. Sim-chèng só͘-goān.”
Kı̂-tó soah, hit-sı̂ Lek-sı̄-ka, Tàn-lí nn̄g lâng lóng bô kóng-oē; koh tiap-á-kú Tàn-lí khoàⁿ-kı̀ⁿ Lek-sı̄-ka chı̍t-sin gı̍h-gı̍h-chùn teh koâⁿ-jia̍t, koáⁿ-kín thǹg chı̍t niá hó-hó ê saⁿ, jia Lek-sı̄-ka ê seng-khu; hut-jiân sim-lāi chiū kı̀-tit Iâ-so͘ só͘ kóng chı̍t kù oē, chiū-sı̄ kóng, “Lín kı̀-jiân án-ni khoán-thāi goá ê hiaⁿ-tı̄ tē-it soè ê chı̍t-ê, chiū-sı̄ khoán-thāi goá.” Hit-sı̂ Tàn-lí jia̍t-sim, siang-chhiú ng-bı̄n, thâu-khak àⁿ-lo̍h, toā pek-chhiat kı̂-tó kóng, “Goá ū choē, kiû Siōng-tè lı̂n-bín goá.”
Tē 10 Chiuⁿ
Kı̂-tó èng-giām ū chhun
Tàn-lí hit-mê tiàm tı̄ Lek-sı̄-ka ê lāi-bı̄n bô tó--khı̀, ū chhiáⁿ keh-piah ê hū-jı̂n-lâng khı̀ bé mı̍h, bé-chhài lâi chú hō͘ Lek-sı̄-ka chia̍h; i pún-sin kui-mê chē teh chiàu-kò͘ Lek-sı̄-ka. Lek-sı̄-ka jia̍t-kông ê sı̂, kúi-nā pái kı̂-tó Siōng-tè, ia̍h bat thoè Tàn-lí kiû. Chit ê keh-piah ê hū-jı̂n-lâng kā Tàn-lí kóng, “Lek-sı̄-ka ê lāu-bú kúi jı̍t chêng khı̀ pa̍t só͘-chāi, in-ūi kiaⁿ i ê cha-bó͘-kiáⁿ ê pı̄ⁿ siong-tiōng oē kè-lâng, só͘-í bô tò-lâi; goá nā ū êng, chiū oē kè-lâi khoàⁿ--i.”
Bı̂n-á chá-khí boé tiám-sim ê lâng khoàⁿ Tàn-lí bô lâi pâi, chin kı̂-koài, nā chai i chā-mı̂ tiàm chit-tè choè che tāi-chı̀, koh-khah kı̂-koài.
Thiⁿ-kng ê sı̂, Tàn-lí chiū chhe lâng chhiáⁿ i-seng lâi. I-seng kóng tio̍h poaⁿ pa̍t-keng chhù khı̀ i-tı̄. Tàn-lí chiū ēng ka-kı̄ ê i-chiûⁿ jia Lek-sı̄-ka ê seng-khu, soè-jı̄ phō lo̍h lâu-ē, chhiàⁿ bé-chhia chē kàu i ê chhù. Chit ê chhù-chú sı̄ hū-jı̂n-lâng, chiū lâi chó͘-tòng. Tàn-lí the̍h chı̍t ê kim-tùn-á, ta̍t nn̄g-kho͘-poàⁿ hō͘ i, chiū bô koh chó͘-tòng. Tàn-lí hit-sı̂ koáⁿ-kín siá-phoe kià hō͘ bo̍k-su kóng, “Chun-kùi ê sian-siⁿ, chhiáⁿ lâi goá ê phoà-chhù, khoàⁿ Lek-sı̄-ka; i ê phoà-pı̄ⁿ siong-tiōng, Siōng-tè nā bô lı̂n-bín káⁿ oē sí. Goá eng-kai tio̍h kàu lí ê chhù thong-ti; in-ūi goá chiàu-kò͘ Lek-sı̄-ka, m̄-káⁿ pàng-lo̍h, só͘-í toā-táⁿ siá phoe chhiáⁿ lí lâi, ǹg-bāng lí toā-liōng khoan-iông sià-bián goá. Koh Lek-sı̄-ka kià chhéng-an lí ê cha-bó͘-kiáⁿ.”
Bo̍k-su tı̄ chhù-lāi teh khoàⁿ chheh, chiap-tio̍h Tàn-lí ê phoe, chiū koáⁿ-kín lâi; jı̍p-khı̀ khoàⁿ-kı̀ⁿ Lek-sı̄-ka tó tı̄ bı̂n-chhn̂g--nih, seng-khu chı̍t têng phê piⁿ-kut nā-tiāⁿ, bı̄n chhin-chhiūⁿ sí-lâng. Lek-sı̄-ka seng-khu ià-siān, lóng bô kia̍h-thâu khí-lâi khoàⁿ. Bo̍k-su khoàⁿ-kı̀ⁿ Tàn-lí chē tı̄ bı̂n-chhn̂g-piⁿ teh sǹg i ê gûn. Bo̍k-su chiū kiâⁿ kàu bı̂n-chhn̂g chêng, Lek-sı̄-ka khoàⁿ i, bı̄n pı̀ⁿ âng-âng hún-hún, chiū hoaⁿ-hí soè-siaⁿ kóng, “Bo̍k-su lí lâi; goá ê só͘ kiû, Siōng-tè ta̍k hāng ū hō͘ goá, to̍k-to̍k Tàn-lí a-peh ê tê-piáⁿ chı̂ⁿ, iáu-bē thoè goá hêng.”
Tàn-lí hut-jiân kia̍h-thâu khí-lâi tán-chih bo̍k-su, kóng, “Siōng-tè ū hêng goá kàu kúi-nā pē, chiū-sı̄........(Goân-chheh ū khiàm ia̍h, bô oân-chéng)
