Hiân-kò Chia̍h Thâu-lō͘
Tâi-oân keng-chè kha-pō͘ kín,
kok hâng kok gia̍p jı̍t-jı̍t sin.
Kang-gia̍p tài tong seng-oa̍h piàn,
siā-hoē kiat-kò jı̍t-jı̍t chhian.
Lông-chhun chò-sit chhoē bô lâng.
to͘-chhı̄ kang-tiûⁿ moá lô-kang.
Sin-chu ti-liâm chè-tō͘ jû,
būn-tê tiông tiông tio̍h sam-su.
Hiân-kò chhut-sı̀ tı̄ chhân-chng,
chhù--nih bô lâu poàⁿ khu hn̂g.
A-kong lâng kiò “kho͘-tháng sêng”,
a-tia phah-thih tō͘ it-seng.
Sam-tāi chheng-hân lô-tōng té,
hiaⁿ-tı̄ chí-bē gō͘、la̍k ê.
Sàn-chhià iū koh toā ka-cho̍k,
A-niâ thoa-boâ ná kan-lo̍k.
Ūi-tio̍h toā-kiáⁿ pang ka-têng,
ko-put-lı̄-chiong ha̍k lâi thêng.
Siūⁿ beh chò-sit chhù bô chhân,
phah-thih sin-thé hiâm po̍h-pán.
Chng-thâu chng-boé se̍h chı̍t lı̀n,
chhoē bô thâu-lō͘ thang oá sin.
tia siūⁿ ka̍h lóng bô pō͘,
chí-ū sàng khı̀ chhoē a-ko͘.
Ko͘-tiūⁿ toà tı̄ toā to͘-chhı̄,
kài-siāu kang-tiûⁿ hoāⁿ ki-khı̀.
Tāi-seng chhı̀ ēng saⁿ koh ge̍h,
Ū chò kang-chı̂ⁿ chiah ū the̍h.
Chhı̀-ēng kı̂-kan bô pó-hiám,
siū-siong sńg mı̍h kā-kı̄ thiap.
Ūi-tio̍h pó-chhı̂ ko seng-sán,
jı̍t-mı̂ kau-thè chiàu lûn-pan.
Khang-khoè ū hun toā-sió ge̍h,
toā ge̍h ka-pan chia̍h thâu-ke.
Lé-pài iā ū toā-só hun,
beh hioh toā--ê chiah ū hūn.
M̄-bián kóng tio̍h sió Hiân-kò,
tia to thiaⁿ kàu hoe kô-kô.
Bô-lūn jû-hô sı̄ thâu-lō͘,
thâu-ke nā hó lán chiū hó.
Kāng nā beh chò tio̍h kut-la̍t,
jı̄ lán iā tio̍h ke-kiám bat.
Ou-chhiú kang-hu liān tit chāi,
m̄-kiaⁿ lán lâng bô chiong-lâi.
Chhut-mn̂g a-niâ ū kau-tài,
Hiân-kò khek tiâu tı̄ sim-lāi.
Siang-chhiú pau-hok koà chiūⁿ keng,
hui-pia̍t kò͘-hiong phun chiân-thêng.
Sim-phō ǹg-bāng jı̍p to͘-chhı̄,
Hiân-kò chò kang chin piàⁿ-sı̀.
Siōng-pan só o̍h ta̍k-hāng kı̀,
hā-pan lâng chio tak-hāng sı̂.
Ngó͘-hoe chap-sek gê-hông teng,
oán-jû hûn-ian koè gán chêng.
Khı̂n o̍h kang-hu khı̂n bat-jı̄,
kı̂-thāi chá jı̍t chhut-thâu-thiⁿ.
Siáⁿ-chai khang-khoè ná ki-khı̀,
siâng khoán tōng-chok siâng khoán mı̍h.
Ōng-sēng cheng-le̍k bô teh tháu,
khang ū thâu-khak ná chháu-pau.
Ou-chhiú chiàu bak kang-hu bô,
chiân-tô bông-bông sin-chúi khó.
Siā-hoē tē-ūi khiàm chiàu-kò,
chhut-lō͘ biáu-biáu thiⁿ-sek o͘.
Lô-kang pêng-iú choē siàu-liân,
ta-sò seng-oa̍h chin khoài siān.
Hā-pan chhin-lâng bô tı̄ piⁿ,
chū-jiân sêng-kûn sı̀-koè khı̀.
Hap-sian lim-chiú iû ia̍h-chhı̄,
se̍h-ke thiaⁿ-koa khoàⁿ toā-hı̀.
Sui bô iú chiú kim-tiau chùi,
Sim-mn̂g lân ūi bêng-jı̍t khui.
Hó-sū beh o̍h chhian-bān nı̂,
pháiⁿ-lō͘ tı̍t kiâⁿ bián sı̂-ki.
Hiân-kò chı̍t-pái chia̍h tiong-tàu,
tâng-phoāⁿ saⁿ iok hông-hun āu.
Tāi-ke khiâ-chhia lâi sio piàⁿ,
siáⁿ lâng khah kín siáⁿ lâng iâⁿ.
Iâⁿ sı̄ eng-hiông chin chhiâⁿ-iāⁿ,
Su--ê lak-sui the̍h chı̂ⁿ chhiáⁿ.
Thoak-chiat siā-hoē kāu sio-soà,
chhı̀-khek kak-lo̍k ín-iú toā.
Chı̍t-pái chhı̀ liáu ū chu-bı̄,
āu-pái lâng chio iū koh khı̀.
Pêng-iú sio chhiáⁿ bô kàu khoàⁿ,
hiān-kim kau-ek chhiúⁿ chiūⁿ thoaⁿ.
Iû-ke se̍h-chhı̄ taⁿ koè sı̂,
pio-chhia ùi-jiân sêng hong-khı̀.
Sù-hong eng-hiông chiâu tân lûi,
ngó͘-ô͘ hó-hàn sak choè tui.
Chiân-in hiō-kó bô khı̀ siūⁿ,
pio-chhia ná piàⁿ ná toā tiûⁿ.
Tı̍t kàu chhut-sū jı̍p pēⁿ-ı̄ⁿ,
jı̂n tó chhia húi siōng-sū tı̂ⁿ.
Koaⁿ-thiaⁿ ı̍t būn sam-put-ti,
pē-bó ba̍k-sái kō boē lı̄.
Chheng-chhun ı̍t khı̀ put-chài hoê,
kong-im kim-chı̂ⁿ lân bé-bē.
Chit-khoán tō-lí thong lâng bat,
khó-sioh thong-lō͘ phah sí-kat.
Chu-hong chǹg hoat chhoē khang-phāng,
oân-kang hok-lı̄ khin-khin pàng.
Lô-iú sim-siaⁿ chió lâng mn̄g,
siā-hoē thoak-chiat sûi tam-tng?
Tâi-oân Sio̍k-gú ū teh kóng
Kok-ūi hiong-chhin tiām-tiām chēng,
hō͘ goán pài-thok kúi hun-cheng;
Ū oē bô kóng tòng boē tiâu,
chia̍h hó bô pò sim-thâu ngiau.
Lán ê chó͘-sian ū tı̀-hūi,
lâu-lo̍h hó oē chı̍t toā tui.
Chı̍t-tāi thoân liáu koh chı̍t-tāi,
taⁿ lûn tio̍h goán pò lín chai.
Tâi-oân sio̍k-gú ū teh kóng,
jı̂n-gı̄ thāi-jı̂n sù-hái thong.
Tiong-giân-ge̍k-ní ek tı̄ hêng,
liông-io̍h-khó͘-khió tı̄ pēⁿ-chèng.
Chháu-lê m̄ kiaⁿ jı̍t-thâu pha̍k,
châng-sui m̄ kiaⁿ toā hō͘ ak.
Chò lâng nā si khiā tit chiàⁿ,
poàⁿ-mı̂ phah mn̂g iā bô kiaⁿ.
Tâi-oân sio̍k-gú iū-koh kóng,
khoah chhùi ê lâng chia̍h sù-hong.
Pêng-iú phoà-pak lâi saⁿ-kı̀ⁿ,
ta̍k lâng thâu-hia̍h chit-phiàn thiⁿ.
Ū chı̂ⁿ bô chı̂ⁿ gbián oàn-thàn,
cha̍p-nı̂ hong-súi lûn-liû choán.
Un7-miā hó pháiⁿ bián kè-kàu,
phah-piàⁿ ê lâng oē chhut-thâu.
Tâi-oân sio̍k-gú iā-teh kóng,
bô châi ê lâng gâu phòng-hong.
Lūn chò tāi-chı̀ bô poàⁿ hāng,
chhùi-kak choân pho khı̀ sí lâng.
Téng koân jı̍t-thâu chhiah iāⁿ-iāⁿ,
ē-té sûi lâng kò͘ sı̀ⁿ-miā.
Chûn koè bô hûn chúi bô iáⁿ,
hó͘ sí lâu phê lâng lâu miâ.
Ou-a oē chai hoán pō͘ gı̄,
iûⁿ kūi siang-kha suh bó-ni.
Kiáⁿ-jı̂ m̄ chai kèng pū-bú,
cheng-siⁿ put-jû ti káu gû.
Eng-hiông bô-lūn chhut-sin kē,
chin-kim put-phàⁿ koè toā-hoé.
Han-chı̂ m̄ kiaⁿ lo̍h thô͘ noā,
chí-kiû ki-hio̍h tāi-tāi thoàⁿ.
Tâi-oân sio̍k-gú chin-chiàⁿ chē,
chı̍t-kù chı̍t-kù chin pó-poè.
Tâi-oân sio̍k-gú chin-chiàⁿ chàn,
ta̍k-kù chhin-chhiūⁿ cheng teh tân.
Ài lâng hó-sū ke-kiám kiâⁿ,
chhù-piⁿ kè-piah ná chhin-chiâⁿ.
Lán hó iā tio̍h pa̍t-lâng hó,
sè-kan chiām-sı̂ lâi thit-thô.
Jı̂n-seng oán-jû cháu-bé-teng,
pi hoan lı̄ ha̍p sı̄ siông-chêng.
Ū oē bô kóng tòng boē tiâu,
khó-sioh beh kóng kóng boē liáu.
Ū-iân chhian-lí lâi siong-hoē,
bāng kun kè-sio̍k khéng chai-poê.
It-phâng-hong-sūn chio̍k sin-nı̂,
tāi-ke ka-hô bān-sū-heng.
Oh ! A-niâ goán mā beh bāng
Chá-khí Chhân--nı̍h tú koah tiū,
ē-àm chha̍t chiū peh-koè-chhiûⁿ;
Pêng-iú à ! lí kiám ū sim-koaⁿ,
sûn-jiân m̄-chai!
goán ê tiū-á ta̍k-lia̍p to kàu-koāⁿ.
Thàu-hong lo̍h-hō͘ goán m̄-kiaⁿ,
thian-chai tē-piàn goán jı̄n-miā;
Chóng--sı̄, A-niâ-oh!
àm-mı̂ nā-sı̄ hiah-ni tn̂g,
thiⁿ-sek khah tán to boē kng;
Goán ê jı̍t-chí, goán ê jı̍t-chí,
chhin-chhiūⁿ hân-tang ê be̍h-sūi
téng-ē siang-thâu-sng.
Châ-àm ka-pan kàu poàⁿ-mı̂,
jı̍p-mn̂g bó͘ kián chhá-chhá--chhíⁿ;
A-tia à ! lí sı̄ khı̀ tó-ūi,
kiám lóng m̄-chai goán teh tán lí tńg--lâi chiong lô͘ ûi.
khang-khoè chho͘-tāng goán m̄ kiaⁿ,
koāⁿ lâu moá-bı̄n goán jı̄n-miā;
Chóng--sı̄, A-niâ-oh!
àm-mı̂ nā-sı̄ hiah-ni tn̂g,
thiⁿ-sek kah to boē kng;
Goán ê ǹg-bāng, goán ê ǹg-bāng,
chhin-chhiūⁿ nı̂-boé ê chióng-kim
loā-choē lân phah-sǹg.
A-tia ê chûn iū chhut-phâng,
thiaⁿ kóng iû-goân khı̀ goā-pang;
Chhong-thian à! lí tio̍h ū ba̍k-chiu,
chı̍t lō͘ khoàⁿ-kò͘
goán tia chit-pái bô koh chò kaⁿ-siû.
Hái-bı̄n hong-hiám goán m̄ kiaⁿ,
hō͘ lâng khoàⁿ-soe goán jı̄n-miā;
Chóng--sı̄, A-niâ-oh!
àm-mı̂ nā-sı̄ hiah-nı̄ tn̂g,
thiⁿ-sek khah tán to boē kng;
Goán ê chiân-thêng, goán ê chiân-thêng,
Chhin-chhiūⁿ tah-bū ê káng-kháu
Sı̀-bı̄n chhoē bô mn̂g .
Ū lâng teh bı̂n-bāng,
jı̍t iā bāng, mı̂ iā bāng;
Bāng kı̀ⁿ chèng chhiū-á oē toā-châng,
Bāng kı̀ⁿ io gín-á oē chiâⁿ-lâng.
Ū lâng teh bı̂n-bāng,
Jı̍p iā bāng,chhut iā bāng;
Bāng kı̀ⁿ jı̍p-soaⁿ soaⁿ boē pang;
Bāng kı̀ⁿ chhut-hái hái boē âng.
Oh! A-niâ ! goán mā beh bāng,
bô-lūn lō͘-thâu ū loā hn̄g;
bô-lūn àm-mı̂ ū loā tn̂g;
Goán lóng beh kiâⁿ,
kiâⁿ kàu kiⁿ chı̄n oàn-hūn nńg;
goán lóng beh tán,tán kàu jı̍t-chhut iāu tang-hng.
