Cha-hng chá-khí,
Siōng-tè tùi Thiⁿ-téng khoàⁿ I ê peh-sı̀ⁿ.
I khoàⁿ tio̍h Gio̍k-lân,
Tó tı̄ pı̄ⁿ-chhn̂g thòng-khó͘ haiⁿ-haiⁿ-chhan.
Siōng-tè toā-toā lı̂n-bín i.
Án-ni Siōng-tè chiū hoan-hù:
Lo̍h-khı̀, Thiⁿ-sài, lo̍h-khı̀,
Lo̍h-khı̀ Tâi-oân, Pı̂n-tong-koān,
Khı̀-kàu Lâm-chiu, Khe-lâm-chhoan,
Khı̀ chhoē Gio̍k-lân.
I teh jím-siū thòng-khó͘ kap chhı̀-liān;
I tı̄ goá ê hn̂g-tiong lô-khó͘ chin-kú,
Í-keng ià-siān,
I í-keng hui-siông ià-siān.
Lo̍h-khı̀, Thiⁿ-sài, lo̍h-khı̀,
Chhoā Gio̍k-lân lâi goá chia.
Thiⁿ-sài chiū khiâ pe̍h-bé,
Lâi kàu sè-kan,
Lâi kàu Tâi-oân Pı̂n-tong-koān,
Lâm-chiu Khe-lâm-chhoan.
Lâi kàu Gio̍k-lân ê bı̂n-chhn̂g-piⁿ.
Gio̍k-lân bô tio̍h-kiaⁿ,
Chhin-chhiūⁿ hoan-gêng hó pêng-iú,
Hoán-tńg khin-siaⁿ soeh chhut:
“Goá beh tńg khı̀ kò͘-hiong ah.”
Chū án-ni bi-bi-chhiò, ba̍k-chiu kheh.
Thiⁿ-sài chiū phō i, chhin-chhiūⁿ phō eⁿ-á,
Poe ǹg Thiⁿ khı̀,
Poe kàu êng-kng ê só͘-chāi,
Hē tı̄ Iâ-so͘ ê hoâi-pau--lı̀n.
Iâ-so͘ chhin-chhiú chhit khı̀ i-ê ba̍k-sái,
So pêⁿ i moá-bı̄n ê jiâu-hûn,
Thiⁿ-sài teh khin-siaⁿ chhiùⁿ-koa,
Iâ-so͘ phō i tı̄ hoâi-pau-tiong khin-khin iô,
Koh chhut siaⁿ kā i kóng: lí hó-hó hioh-khùn,
Lí hó-hó hioh-khùn, hó-hó hioh-khùn.
(Hong-hiòng siong-ge̍h-khan tē 16 kı̂, 1992 nı̂ 5 ge̍h)
