Mı̄-pau Ki-khı̀

Jı̄-ché nn̄g-tang chêng sàng goá chı̍t-tâi chò mı̄-pau ê ki-khı̀. I kóng sı̄ pêng-iú te̍k-pia̍t tı̄ Bí-kok bé tńg-lâi sàng--i-ê. Goá chiū án-ne, kā hō͘ lâng hiâm tı̀n-tè ê mı̄-pau ki-khı̀ chiap--koè-lâi. The̍h chhut só͘-hù ê sı̍t-phó͘ khí lâi khoàⁿ, chò mı̄-pau ê khài-liām iah-sı̄ bô chı̀n jı̍p khı̀ goá ê thâu-khak té. Sı̍t-phó͘ kóng, nā chò boē hó-sè, chı̍t-pái kan-taⁿ ē-tit kái-piàn chı̍t-hāng in-sò͘. Nā chò ê mı̄-pau bô sêng-kong, in mā lia̍t-pió hō͘ lâng chai-iáⁿ án-choáⁿ tùi goā-piáu phoàn-toān sı̄ tó chı̍t-ê in-sò͘ bô hó-sè, ài án-choáⁿ tiâu-chéng chiah ē sêng-kong. Pit-kèng sı̄ se-hong bûn-bêng ê sán-bu̍t, liân chò mı̄-pau mā chin ū kho-ha̍k cheng-sı̂n. Khoàⁿ tio̍h chiah-nı̍h chē ē sit-pāi ê khó-lêng, soà hō͘ goá tiû-tû m̄-káⁿ chhı̀. Chit-tâi goā-hêng ū hiān-tāi-kám, sin-tak-tak ê chò mı̄-pau ki-khı̀ tio̍h án-ne hō͘ goá koaiⁿ tı̄ a̍p-á té. Kin-nı̂ hioh-joa̍h, saⁿ-ché lâi thit-thô. I sūn-soà kà goá i tú-á o̍h ē-hiáu, chò kah jia̍t-phut-phut ê se-tiám “cheese cake” kap “jio̍k-kùi-piáⁿ”. Bô siūⁿ--tio̍h, hō͘ i chhoā chı̍t-ê soà chhoā-chhut goá chò se-tiám ê chhù-bı̄. Ông-lâi-so͘, hēng-jı̂n po̍h-piáⁿ, le̍k-tāu-phòng, ke-nn̄g-ko......, chı̍t-hāng chhı̀ koè chı̍t-hāng, ná chhin-chhiūⁿ chı̍t-tiâu soh-á giú boē soah. Sui-jiân bô chhı̄-bı̄n siōng teh chò--ê hiah-nı̍h hó khoàⁿ-thâu, m̄-kú chin sı̍t-chāi iah ka-cheng seng-oa̍h ê chhù-bı̄. Chit-tiâu soh-á chit-má giú tio̍h chit-tâi chò mı̄-pau ê ki-khı̀--ah. Goá the̍h chhut keh-piah Iû-thài-thài Tâi-chè chò mı̄-pau ki-khı̀ ê sı̍t-phó͘ soat-bêng kap Bí-kok-pán--ê chò pí-kàu, chân-chân kā châi-liāu khǹg--lo̍h-khı̀. Khiàm-khoat sú-iōng ki-khı̀ ê soat-bêng-su, bong poàⁿ-po͘ chiah kiò-chhíⁿ chit-tâi chêng chhut-sı̀ tio̍h khùn kàu chit-má ê ki-khı̀. Chiū án-ne, goá him-sióng tio̍h chı̍t-tiûⁿ te̍k-pia̍t ê thiàu-bú piáu-ián. Bú-chiá sı̄ tàu tı̄ ki-khı̀ ē-bı̄n, chı̍t-ki chhun--chhut-lâi ê mo͘h-tà kap chı̍t-oân mı̄-thoân. Khí-chho͘, siaⁿ-im sè-á-siaⁿ-á, kha-pō͘ chin bān, oáiⁿ--chı̍t-ē koh tńg--chı̍t-ē. Bô kúi hun-cheng āu, kha-pō͘ thêng--leh, hut-jiân oāⁿ chı̍t-ê tiāu, kha-pō͘ kín koh ū la̍t. Mı̄-thoân chin kín tio̍h hêng-sêng ah, siang-lâng teh thiàu ê bú mā lú lâi lú sim-sek, ē-tit kóng ha̍p-chok oân-bí. Chı̍t-khùn-á ná teh thiàu ı̂ⁿ-bú, it-tı̍t se̍h kho͘-lı̀n, chit-niá ı̂ⁿ-kûn se̍h kah phòng-phòng-phòng. Chı̍t-khùn-á kui-oân ı̂ⁿ-lín-lín, tōng-chok khiok chin liú-lia̍h, oa̍t-thâu tńg-bı̄n hó chhin-chhiūⁿ choan-gia̍p ê bú-chiá, hō͘ goá khoàⁿ kah bū-sà-sà. Chı̍t-sı̂ sı̄ chin tâi-châi ê siok-lú, ba̍k-chı̍t-nı̍h koh piàn-sêng chin oa̍h-kut ê gín-á, thiàu khí mo͘h tı̄ piah-piⁿ, kan-taⁿ giú--chı̍t-ē, koh peh khí lēng-goā chı̍t-pêng, peh koân peh kē bô sı̂ thêng. Goá ka-kı̄ khoàⁿ kah jím boē tiâu, chı̍t-ê lâng chhiò hai-hai. Hiān-tāi kho-ki chin chiàⁿ ē piàn mô͘-su̍t. Koà nā khàm tiâu--leh, siáⁿ lâng ē chai lāi-té sı̄ teh bú chı̍t-chhut chiah-nı̍h súi koh ū chhòng-ı̀ ê bú--leh. Goá chai-iáⁿ, āu-pái goá it-tēng ē hō͘ i chin chē ê ki-hoē thiàu-bú, pó͘-sióng i koè-khı̀ ê ut-chut. Āu-pái goá nā bô-êng thang him-sióng i thiàu-bú ê sı̂, kan-taⁿ thiaⁿ tio̍h siaⁿ, goá ê thâu-khak té tio̍h ē hián chhut i teh thiàu-bú sim-sek kap khoài-lo̍k ê hêng-iáⁿ. (Tâi-oân-jı̄ Cha̍p-chı̀ tē 4 kı̂,2000 nı̂ 11 ge̍h)