Kap chó͘-sian kāng-miâ,
Chit-choā sin-khui ê lō͘ khí-thâu e̍h-e̍h oan-oan,
Nǹg-koè thih-kiô chiū khui-khoah, ǹg pak chhun-tián.
Tang-pêng sı̄ sin-khí ê bí-su̍t-koán,
Kim-sio̍k ê sek-goā tiau-khek
Chiò-lo̍h Lāi-ûi-pi Ûi-chek.
Ǹg sai tı̍t-tı̍t-kiâⁿ chiū kàu Chhâ-soaⁿ.
Ku̍t Âng-mn̂g-thô͘ ê khang-chhùi,
Chiām-chiām hō͘ sin-chai ê chhiū kô͘ hó--khı̀.
Sió-khe-poè Ûi-chí chēng-chēng tó tı̄ soaⁿ-kha.
Choè-āu chia̍h-chhun ê lâ-á-khak
Iáu iā tı̄ hia.
Sı̀-pah-nı̂ chêng, Ma-khah-tauh,
Lín sı̄ chhiùⁿ-koa ê hái-iûⁿ bı̂n-cho̍k.
Jı̍t--sı̂ kiâⁿ-chûn,
Lāi-hái ê hı̂-hê lia̍h-boē-khang,
Mı̂--sı̂ hioh tı̄ soaⁿ-tōng,
Kui-ke-hoé-á chú-chia̍h tong-jı̍t ê siu-sêng,
Tı̍t-kàu hit-chı̍t-kang,
Hàn-jı̂n ê hái-chha̍t-chûn pek-kı̄n hái-bı̄n,
Lín kā lâ-á piaⁿ--teh, peh--khí-lâi,
Ha̍p-le̍k khí tek-ûi tí-tòng.
Hit-sı̂ tek-ûi kiám ū tùi hái-hoāⁿ
Khí kàu Lāi-ûi-pi?
Le̍k-sú bô kı̀-chài
Lín hoán-khòng goā-lâi chhim-lio̍k ê chin-siòng.
Goá kan-taⁿ chai
Tek-ûi lō͘-boé hō͘ Hàn-jı̂n thiah-lı̍h sio bô--khi,
Kan-taⁿ chhun Takausaga ê tē-miâ,
Kı̀-liām chó͘-sian ê eng-ióng.
Ma-khah-tauh, Ma-khah-tauh,
Ēng chó͘-sian ê miâ só͘-hō ê lō͘,
Thàng kàu thiⁿ-piⁿ
Hō͘ toā-lâu cha̍h--teh,
Hō͘ ian-bū tah--teh ê soaⁿ-téng
Sı̀-pah-tang-chêng,
Lín kiám iā kiâⁿ chit-choā-lō͘,
Thâu pau pò͘-kin,
Sin phāiⁿ iù-eⁿ-á,
Hō͘ Hàn-jı̂n koáⁿ-lı̄-khui
Hái-piⁿ ê ka-hn̂g,
Boē-hù tı̄ kiaⁿ-hiâⁿ tô-cháu ê hong-poe-soa--nih,
Lâu-lo̍h jı̄m-hô kha-jiah?
Lín ê hêng-iáⁿ siau-iûⁿ
Tı̄ hn̄g-hn̄g ê chhim-soaⁿ.
Lín ê siaⁿ-im sit-lo̍h
Tı̄ kiáⁿ-sun ê kı̀-tı̂.
Lín chhim-o͘ ê ba̍k-chiu kiám bat kâm ba̍k-sái,
Oa̍t-thâu koh khoàⁿ chı̍t-pái
Éng-oán boē-tit tò khı̀ ê hái-hoāⁿ kò͘-hiong?
A̍h-sı̄
M̄-kam koh khoàⁿ choè lín khı̀?
Kap Hàn-jı̂n siⁿ ê āu-tāi,
Kàu toā-hàn,
Chiah chai bó-chhin ê miâ
Hō-chò Ma-khah-tauh.
Ma-khah-tauh, Ma-khah-tauh,
Hā-pan keng-koè chit-choā-lō͘,
Kúi-ā-pái, hām tı̄ chhia-tı̄n tiong-ng,
Goá kiò lín ê miâ.
Bêng chai seng-khu-lāi teh lâu
Ma-khah-tauh ê hoeh,
M̄-kú, kiám kiò-oē-chhíⁿ
Sit-sàn kú-kú Ma-khah-tauh ê lêng-hûn?
Ma-khah-tauh, Ma-khah-tauh,
Ma-khah-tauh ê cha-bó͘-sun
Liû-lōng tı̄ chó͘-sian ê goân-hiong,
Ka-ia̍h koh chhiⁿ-so͘ ê ke-chhı̄.
Lō͘-piⁿ ê liâng-tê-chhiū
Siàn-hong phı̍h-phı̍h-chùn.
Tı̄ mûi-hoe-lo̍k bat cháu-thiàu ê pêng-goân,
Goá ūi saⁿ-tǹg-pn̄g cháu-chông,
Bê-sit tı̄ chhia-ian--nih,
Chhoē-bô
Tò-tńg--khi ê-lō͘.
(Tâi-bûn-thong-sı̀n Tē 104 kı̂, 2002 nı̂ 10 goe̍h)
