Tē 4 Chiuⁿ
“Nā ū lâng ài toè goá, chiū tio̍h khoàⁿ bô ka-kı̄, jı̍t-jı̍t giâ i ê sı̍p-jı̄-kè lâi toè goá.”
Má bo̍k-su tı̄ i ê chheh-pâng teh chún-pı̄ ē-àm kı̂-tó-hoē ê tê-ba̍k. I tı̄ sek-lāi kiâⁿ lâi kiâⁿ khı̀, tùi thang-á khoàⁿ-tio̍h Khek-lûi thoân-tō-su ê pò͘-phâng, í-kı̍p Khek-thàn chng kē-kē ê kiàn-tio̍k-bu̍t. I khui thoah-á, the̍h chêng-jı̍t só͘ siá ê chı̍t-tiuⁿ toaⁿ, hit-tiuⁿ toaⁿ án-ni siá: Goá chò bo̍k-su beh o̍h Iâ-so͘ èng-kai chò ê kúi-hāng sū:
1. Tio̍h ài koè kán-tan phok-sò͘ ê seng-oa̍h. 2. Tio̍h hó-táⁿ tùi ké-hó ê lâng káng-tō, m̄-thang kiaⁿ i ê châi-sán, tē-ūi. 3. Bô-lūn tùi hù-kùi, á-sı̄ sàn-hiong ê lâng, lóng tio̍h pı̂ⁿ-pı̂ⁿ sı̍t-hêng thiàⁿ-sim. 4. Thun-lún kan-khó͘, khek-kí thāi-jı̂n. 5. Hoán-tùi Lē-bûn chhı̄ ê chiú-tiàm, ǹg hiah-ê lâng thoân-tō, pang-chān tūi-lo̍h ê lâng tit-kiù. 6. Hoè-chí kin-nı̂ Au-chiu ê lú-hêng, chiong hit-ê lú-hùi hō͘ khah su-iàu ê lâng khı̀ choán-toē hiu-ióng.
Má bo̍k-su tha̍k-liáu kám-kak chiah-ê iáu bô kàu-gia̍h, chiū koh chı̍p-tiong cheng-sı̂n teh siūⁿ Iâ-so͘ ê sim-ı̀, Iâ-so͘ ǹg i ê hi-bōng. I chù-sı̂n tı̄ chit-ê sū, tı̀-kàu mn̂g-lêng teh tân iā bô thiaⁿ-tio̍h, tı̍t-kàu lâng-kheh lâi kàu mn̂g-kháu chiah chhéⁿ-ngō͘ khí-lâi. I kia̍h-thâu khoàⁿ-tio̍h Khek-lûi thoân-tō-su khiā tı̄ mn̂g-kháu. “Má bo̍k-su, goá ū chı̍t-hāng tāi-chı̀ ài pài-thok lí. Lí chai-iáⁿ chit kúi-àm goán tı̄ Khek-thàn chng ê pò͘-tō, in-ūi La̍h-kiat sió-chiá ê koa-siaⁿ, ū khip-ín chin-choē lâng, tı̀-kàu pò͘-phâng boē thang iông-la̍p.” Khek-lûi thoân-tō-su kóng kàu chia, kia̍h-thâu thàm Má bo̍k-su ê bı̄n-sek.
Má bo̍k-su hián-chhut hoaⁿ-hí ê bı̄n-iông kóng:
“Kám-siā Chú, goán ū thiaⁿ-tio̍h lín tı̄ hia ê kang-chok.”
“Goá ài pài-thok lí ê chiū-sı̄ ē-àm ài lí lâi hia káng-tō, in-ūi goá ū kám-mō͘ tı̀-kàu bô siaⁿ.”
“Chin sit-lé, goá ē-àm ū kı̂-tó-hoē ê chú-lí.” Má bo̍k-su thê-sı̂, chóng-sı̄ hut-jiân koh kái-piàn i ê ı̀-sù kóng “Ah! á-sı̄ goá chiah to͘-ha̍p lâi-khı̀.” Khek-lûi thoân-tō-su chhim-chhim kā i seh-siā liáu ài saⁿ-sı̂ tńg-khı̀.
“Khek-lûi sian-siⁿ, chhiáⁿ bān leh, lán saⁿ-kap lâi kı̂-tó.”
Nn̄g-lâng chiū kūi-lo̍h tâng-sim ūi hit àm ê chū-hoē kı̂-tó, in peh khí-lâi ê sı̂ lóng khak-sı̀n Chú oē chhin-chū lı̂m-chāi tı̄ ē-àm ê chū-hoē.
Sı̂-kan kàu, Má Bo̍k-su seng kàu pài-tn̂g, tı̄ hia í-keng ū chin-choē lâng teh thèng-hāu, i chiong ē-àm boē tàng chú-chhı̂ kı̂-tó-hoē ê lí-iû kā in kóng liáu koh kóng:
“Só͘-í goá ē-àm tio̍h kàu Khek-thàn chng chú-chhı̂ pò͘-tō-hoē, lín tiong-kan 2,3 lâng saⁿ-kap lâi khı̀ pang-chān goán, kı̂-û ê lâng tiàm chia ūi goán kı̂-tó.”
Ū 5, 6 lâng kap bo̍k-su saⁿ-kap khı̀. Kàu ūi, pò͘-phâng lāi í-keng moá-moá sı̄ lâng. Khai-sí ū La̍h-kiat sió-chiá ê to̍k-chhiùⁿ, kı̂-tó liáu chiū Má bo̍k-su soà-chiap káng-tō. Chóng-sı̄ tùi thiaⁿ-chiòng tiong hut-jiân khí soan-hoa ê siaⁿ. “Heⁿ! Tē 1 kàu-hoē ê bo̍k-su iā káⁿ lâi chia mah?” Ū lâng teh chhiò, ū lâng teh phah chhiú, ū lâng teh kho͘ sı̂-á. Má bo̍k-su ēng chhiú pí ài in chēng-chēng, chóng-sı̄ ná lâi ná kiáu-chhá. Má bo̍k-su chiū ǹg La̍h-kiat kóng “Chhiáⁿ lí chhiùⁿ chı̍t-tè koa, nā lí ê koa-siaⁿ tāi-khài oē hō͘ in tiām.”
La̍h-kiat chiū chhut-siaⁿ gı̂m:
Lí sim ū khang-ūi hō͘ Chú mah? I khiā tı̄ mn̂g-goā phah mn̂g, Chû-ài ê siaⁿ tùi lí khún-kiû, Siáⁿ-sū iân-tı̂ m̄ khui-mn̂g? Kín khui sim-mn̂g, kín khui sim-mn̂g, Khui sim-mn̂g hō͘ Chú jı̍p lâi, Pe̍h-pe̍h un-tián nā m̄ chiap-siū, Ki-hoē koè-khı̀ bô koh lâi.
Koa-siaⁿ chı̍t-ē chhut, hoē-chiòng chiū chek-sı̂ an-chēng ǹg La̍h-kiat hit-bı̄n. Má bo̍k-su iā siū chit-ê kong-kéng kám-tōng, koh-khah khak-sı̀n Iâ-so͘ oē ēng La̍h-kiat ê siaⁿ.
Chhiùⁿ-koa liáu, bo̍k-su kè-sio̍k káng-tō, só͘ kóng sı̄ chhiau-koè i ka-kı̄ só͘ oē hiáu kóng ê. Koè-khı̀ i m̄-bat siūⁿ tio̍h chiah-ê tūi-lo̍h ê lâng, chóng-sı̄ kin-á-jı̍t i ê bı̄n kı̀ⁿ-tio̍h chiah-ê lâng ê sı̂, siūⁿ-tio̍h in kiám m̄ sı̄ Iâ-so͘ tı̄ saⁿ nı̂ thoân-tō só͘ chiap-chhio̍k ê lâng mah? Iâ-so͘ ê tō-lí kiám m̄ sı̄ ài hō͘ chiah-ê lâng hoé-kái mah? I thâu chı̍t-pái tùi chiah-ê lâng seⁿ khí lı̂n-bín kap thiàⁿ ê sim.
Chū-hoē liáu, bo̍k-su koan-khoàⁿ chiu-ûi saⁿ liân-chiap ê chiú-ka chiū tı̄ tò lâi ê lō͘-tiong ka-kiông koat-sim beh lâi tùi-hù chiah-ê chiú-ka, siūⁿ pān-hoat beh lâi chó͘-chí chit khoán seng-lí ê hoân-êng.
Kè-jı̍t Má bo̍k-su tı̄ i ê tha̍h-chheh thiaⁿ khoàⁿ sin-bûn, tha̍k-tio̍h Lē-bûn Jı̍t-pò ū chı̍t phiⁿ lūn-soat, tùi chit phiⁿ lūn-soat thang chai Nó͘-ní-bûn chú-pit cháiⁿ-iūⁿ teh lē-hêng hit-ê sē-iok. Hit-ê lūn-soat ū án-ni siá.
Chèng-tı̄ būn-tê ê tō-tek hong-bı̄n.
Kàu taⁿ Jı̍t-pò sı̄ ióng-hō͘ hiān-sı̂ ū koân-le̍k ê Tāi-chiòng-tóng. Só͘-í só͘-ū ê lūn-soat lóng khiā tı̄ chit tóng ê lı̍p-tiûⁿ teh siá. Chóng-sı̄ goán taⁿ ài tùi tho̍k-chiá kò-pe̍k chı̍t-hāng sū, chiū-sı̄ kim-āu goán ài khiā tı̄ chèng-gı̄ ê lı̍p-tiûⁿ lâi tiâu-cha, gı̄-lūn só͘ ū ê chèng-tı̄ būn-tê, oāⁿ-oē lâi kóng, goán bô ài koh khiā tı̄ lı̄-kí ê lı̍p-tiûⁿ lâi hoat-giân, chí ū ài ēng Iâ-so͘ ê cheng-sı̂n kap kàu-gı̄ choè ki-pún. Goán sı̍t-chāi khak-sı̀n kok-ka, kò-jı̂n, lóng siāng-khoán tio̍h khiā tı̄ êng-kng Siōng-tè ê hoat-chek lâi chò-sū.
Má bo̍k-su tha̍k tio̍h chit-ê lūn-soat tı̀m-thâu piáu-sı̄ i ê tông-ı̀.
I kè-sio̍k teh tha̍k sin-bûn ê sı̂, hut-jiân hoat-chhut chı̍t ê tio̍h-kiaⁿ ê siaⁿ, i ǹg i ê hū-jı̂n lâng kóng:
“Má-lı̄, lí chù-ı̀ thiaⁿ goá só͘ beh tha̍k ê” i ê siaⁿ in-ūi tio̍h-kiaⁿ teh chùn.
“Thih-lō͘ pō͘-tiúⁿ A-lek-san-tāi Pa-oà-su kim chá-khí hut-jiân sı̂-chit, lí-iû sı̄ in-ūi i hoat-kiàn tio̍h Thih-lō͘ kong-si kap ūn-sàng gia̍p-chiá ū pı̀-bı̍t chò ûi-hoān ê sū. I chò chı̍t ê Ki-tok-tô͘, put-jím kap chiah-ê ûi-hoat ê lâng kiat-ha̍p, chiū koat-ı̀ sı̂-chit. Lán chia-iáⁿ Pa-oà-su nā m̄ sı̄ Ki-tok-tô͘, chiū boē oē án-ni chò. I sui-jiân pún-sin hi-seng, iáu-kú ióng-kám lâi chiàu chin-lí choè-sū.”
Bo̍k-su-niû thiaⁿ liáu chai-iáⁿ che iā sı̄ chham-ka sē-iok ê kiat-kó. Bo̍k-su peh khí-lâi, kóng “Goá beh lâi khı̀ hóng-būn in,”chiū chhut-khı̀.
Kàu Pa-oà-su ê chhù kı̀ⁿ-tio̍h i ê sı̂, nn̄g lâng chí ū tiām-tiām ak-chhiú, tı̄ che bû-giân ê tiong-kan, nn̄g lâng lóng ū kám-kak hō͘-siōng ê liáu-kái kap chhin-bı̍t.
“Í-āu lí beh cháiⁿ-iūⁿ?”, chiong sū-chêng tâm-lūn liáu bo̍k-su mn̄g i.
“Chit-gia̍p mah? Iáu m̄ chai, ū siūⁿ ài koh chò tiān-sı̀n-oân.” I ê bı̄n ū piáu-hiān chhin-chhiūⁿ lâng tı̄ chiàn-tò͘ āu ê ià-siān, hit-ê chiàn-tò͘ sı̄ tı̄ i ê lāi-sim ê chiàn-tò͘.
“Bo̍k-su, goá ū chı̍t-hāng ài pài-thok lí ê, chiū-sı̄ goá tı̄ thih-lō͘ kang-chhiúⁿ só͘ khai-sí hit-ê ǹg kang-lâng thoân-tō ê sū, kong-si tāi-khài oē iông-ún chit-ê sū kè-sio̍k. Só͘-í chhiáⁿ lí siông-siông khı̀ hia thàm-hóng, tùi in káng-tō.”
Bo̍k-su tong-jiân tah-èng chit-ê pài-thok, nn̄g lâng saⁿ kap kı̂-tó chiū lı̄-khui. Bo̍k-su toà tio̍h bû-hān ê kám-khài tò khı̀. I it-hoat khak-sı̀n sı̍t-hêng sē-iok ê kiat-kó, tı̄ sı̀n-tô͘ ê tiong-kan, kàu tı̄ choân chhı̄-bı̂n ê tiong-kan teh beh ū sio̍k lêng ê toā kek-sin. Sin ê sū-sı̍t jı̍t-jı̍t hoat-seng. I teh siūⁿ m̄ chai ū lâng ūi-tio̍h chit-ê sū só͘ poē ê sı̍p-jı̄-kè koè tāng, tı̀-kàu poàⁿ-lō͘ tó-lo̍h--khı̀ á bô?
Keh-jı̍t iáu teh siūⁿ chit-ê sū ê sı̂, bián-lē-hoē hoē-tiúⁿ lâi. Má bo̍k-su chhiáⁿ i jı̍p lâi, tùi i kóng:
“Ū sím-mı̍h sū chhiáⁿ lí kóng. Hoat-lı̄-tek kun” Má bo̍k-su bo̍k-hoē í-lâi chiū kap i saⁿ bat. In-ūi i ūi kàu-hoē it-koàn tiong-sı̍t teh chò-kang, bo̍k-su chin chun-kèng i.
“Tāi-chı̀ sı̄ án-ni. Lé-pài-jı̍t goán ê siā-tiúⁿ kiò goá khı̀ thih-lō͘ kong-si thia-cha chı̍t kiāⁿ sū, goán in-ūi lé-pài-jı̍t bô ài khı̀, chiū siū thiat-chit. Goá sı̄ siūⁿ án-ni sı̄ lē-hêng goá só͘ chham-ka ê sē-iok, chóng-sı̄ chin choē lâng thí-chhiò goá. Lí siūⁿ cháiⁿ-iūⁿ?”
“Goá siūⁿ lí sı̍t-chāi sı̄ siú lí ê sē-iok. Goá siūⁿ Iâ-so͘ boē tı̄ lé-pài jı̍t khı̀ chò chiah-ê kang-chok” bo̍k-su ēng moá ū khak-sı̀n ê gú-khı̀ ı̀n i.
“Chin to-siā, goá iā ná siūⁿ ná khak-sı̀n án-ni sı̄ tio̍h.”
Bo̍k-su kap i tâm-oē liáu chiū chhoā i khı̀ chhoē Lē-bûn-Jı̍t-pò ê Nó͘-ní-bûn. Nó͘-ní-bûn tong-jiân chin hoaⁿ-hí tit tio̍h chit-ê tông-chı̀, chiū-sı̄ saⁿ kap chham-ka sē-iok ê lâng lâi chò sū.
Tı̄ tò lâi ê lō͘ tiong, Má bo̍k-su siūⁿ-tio̍h i iáu boē khı̀ thàm-hóng siong-jı̂n Loā-tek, chiū oat tùi i ê tiàm khı̀. Loā-tek kàu taⁿ sı̄ chı̍t ê chiàⁿ-chng ê siong-jı̂n, hoān-sū sı̄ ēng lı̄-ek choè pún-ūi, chóng-sı̄ tùi chham-ka sē-iok í-lâi, liam-piⁿ kái-piàn i ê chú-gı̄, ài ēng Iâ-so͘ ê cheng-sı̂n tı̄ i ê siong-tiàm.
“Bo̍k-su, goá tùi chham-ka sē-iok í-lâi, chiū koat-ı̀ ài hō͘ Iâ-so͘ choè tiàm-chú. Goá khí-thâu siūⁿ kàu ê, chiū sı̄ Iâ-so͘ beh cháiⁿ-iūⁿ tùi-thāi tiàm-oân, goá chiū tiàu-chı̍p in, chiong goá ê koat-sim tùi in kóng, hit-jı̍t 10 goā lâng siū kám-tōng lâu ba̍k-sái. Goá ū siá kúi tiâu tiâu-iok tı̄ chia,” chiū tùi thoah-á the̍h chhut chı̍t tiuⁿ toaⁿ hō͘ bo̍k-su khoàⁿ. Só͘ siá ê sı̄ án-ni.
Siong-gia̍p-ka Loā-tek lia̍h choè Iâ-so͘ só͘ oē chò ê kúi-hāng iàu-sū:
1. I ūi-tio̍h kui êng-kng Siōng-tè chiah chò seng-lí, m̄-sı̄ tan-tan ūi-tio̍h thàn-chı̂ⁿ. 2. Só͘ thàn ê chı̂ⁿ bô lia̍h-choè sı̄ su-iú ê, sı̄ siūⁿ kóng Siōng-tè só͘ kau-tài, beh ēng tı̄ jı̂n-lūi hēng-hok ê lō͘-ēng. 3. Tùi só͘ chhiàⁿ ê lâng ài chhin-chhiat, ū thiàⁿ-sim, te̍k-pia̍t tùi in ê lêng-hûn koan-sim, che sı̄ pí thàn-chı̂ⁿ koh khah tiōng-iàu ê sū. 4.Bô sêng-sı̍t ê sū it-khài bô ài chò, tùi tông-gia̍p-chiá iā m̄-thang oàn-tò͘. 5.Pàng-sak chū-su, lia̍h hoaⁿ-hí pang-chān lâng choè kun-pún ê chú-gı̄. 6.Ēng chit-ê chú-gı̄ tùi-thāi chhiàⁿ-kang-lâng, kò͘-kheh kap tông-gia̍p-chiá.
Bo̍k-su tha̍k liáu siūⁿ-tio̍h i chā-jit só͘ siá hit tiuⁿ, kia̍h-thâu khoàⁿ-kı̀ⁿ Loā-tek jia̍t-sim ê bı̄n, chhin-chhiūⁿ ū toā ê koat-sim.
“Lí siūⁿ chiàu án-ni chò seng-lí oē hô mah?” bo̍k-su mn̄g i.
“Tong-jiân sı̄ oē lah! Lán nā thiàⁿ chhiàⁿ-kang lâng, iā in nā tùi lán tiong-sı̍t, chiū kiám-chió chin choē ê lōng-hùi. Khah khùn-lân ê, sı̄ tùi-thāi hiah-ê lı̄-kí ê siā-hoē lâng. Goá siūⁿ Iâ-so͘ nā chò seng-lí, ún-tàng bô ū chı̍t sut-á lı̄-kí sim. I oē thiàⁿ chhiàⁿ-kang-lâng, iā oē lia̍h saⁿ pang-chān sı̄ choè seng-lí ê bo̍k-te̍k, tē it sı̄ tāi-seng kiû Siōng-tè kok ê sı̍t-hiān. Goá iā beh chiàu chit-ê chú-gı̄ lâi kiâⁿ.”
Bo̍k-su siū chin toā ê kám-tōng, i siūⁿ Loā-tek nā chiàu chit-ê chú-gı̄ lâi sı̍t-hêng, oē chiâⁿ choè Lē-bûn-chhı̄ choè iú-le̍k ê káng-tō-chiá. Hoê-ka ê sı̂, chı̍t lō͘, i kiû Sèng-sı̂n pang-chān chiah-ê sē-iok-chiá koh khah ū khùi-la̍t thang lē-hêng sē-iok.
(khiàm tē 5-6 chiuⁿ)
Tē 7 Chiuⁿ
“Tè goá ê lâng bô kiâⁿ tı̄ àm.”
Pài-tn̂g ê cheng-siaⁿ teh tân, iáu boē kàu ūi ê sı̀n-tô͘ lóng ka-kín in ê kha-pō͘ ǹg pài-tn̂g teh kiâⁿ. Chá-khí Tē-it kàu-hoē ê hoē-chiòng iû-goân chin choē, chóng-sı̄ in ê sim in-ūi chá-khí soán-kí ê kiat-kó, kap cha-mê tı̄ Khek-thàn-chng ê sū-kò͘--Lō͘-lí ê sí chin heng-hùn.
Cha-mê ê hong-siaⁿ, chiū-sı̄ jı̄-khu kap saⁿ-khu chiú-ka êng-gia̍p hoè-chí ê sū sı̄ hu-ké ê, kı̂-sı̍t sı̄ Chiú-ka-tóng tit-tio̍h sèng-lı̄, koh kè-sio̍k thang khui chı̍t nı̂. Tı̄ chit pang ê soán-kí, Ki-tok-tô͘ pah-goā lâng khı̀-koân, pah-goā lâng tâu-phiò chān Chiú-ka-tóng, kiat-kó Chiú-ka-tóng sèng-lı̄.
Che-sı̄ chin thang siong-sim ê sū, bo̍k-su in-ūi chit-ê, tı̄ chá-khí ê káng-tō piàⁿ só͘-ū ê jia̍t-chêng kap ke̍k-tō͘ ê hùn-khài lâi chí-chek kap khoàn-bián Ki-tok-tô͘ m̄ eng-kai ūi su-jı̂n ê lı̄-ek lâi iông-ún chiú-ka ê chûn-chāi. Thiaⁿ-chiòng hián-jiân ū siū kám-tōng ê khoán-sit, ū lâm ê, ū lú ê teh lâu ba̍k-sái, Má-se chóng-tiúⁿ iā bô kò͘ i ê thé-biān, chí ū thâu-khak chhih-chhih teh chhit ba̍k-sái. Nó͘-ní-bûn chú-pit iā siū siāng-khoán ê kám-tōng, chêng lé-pài i ēng siā-lūn ke̍k-lia̍t pang-chān soán-kí ê sêng-kong, chóng-sı̄ chá-khí i kám-kak tı̄ siā-hoē Ki-tok-tô͘ ê liông-sim chiah bān kak-chhéⁿ, chiah-nih bô la̍t, lóng-sı̄ i ê chek-jı̄m. I chū-chek nā khah chá ló͘-le̍k, khah-chá kái-piàn jı̍t-pò ê hong-chiam, khah-chá ēng siā-lūn lâi kám-tōng lâng, kiám-chhái oē bián tı̀-kàu kin-á-jı̍t sit-pāi ê kiat-kó. Káng-tō soah, chiàu-siông ū La̍h-kiat sió-chiá ê to̍k-chhiùⁿ, chóng-sı̄ i iā sı̄ siū kám-tōng kàu lâu ba̍k-sái, tı̀-kàu chhiùⁿ chı̍t poàⁿ chiū chē lo̍h lâi; hoē-chiòng thiaⁿ-tio̍h i ê koa-siaⁿ pı̀ⁿ-choè háu ê siaⁿ, iā lóng toè i lâu ba̍k-sái; in lóng siū toā kám-tōng.
Lé-pài-soah sē-iok-chiá ióng-io̍k koh chū-chı̍p tı̄ hoē-gı̄-sek, tāi-ke ēng toā ê jia̍t-chêng teh thó-lūn beh jû-hô lâi táⁿ-tó Chiú-ka-tóng, choè-āu ta̍k lâng tâng-sim ūi-tio̍h chhı̄ ê kái-liông kı̂-tó.
Tùi Lō͘-lí ê sí, m̄-nā ū kám-tōng Tē-it kàu-hoē ê hoē-chiòng, liân Khek-thàn-chng iā ū kám-khài moá-moá ê khı̀-hun. Lō͘-lí ê ûi-hâi an-tı̀ tı̄ Poē-ní ê chhù, hit-ê te̍k-pia̍t hó ê koan-bo̍k sı̄ boē thang pí tit ê hó. Koan-hē Lō͘-lí ê sū chiâⁿ choè Khek-thàn-chng tâm-oē ê tiong-sim. Kè-jı̍t ê sin-bûn iā siông-sè thê-khí hit-ê giâm-siok sēng-tāi ê chòng-sek ê chêng-hêng.
“Pài-it ē-po͘ tı̄ sûn-hoê thoân-tō Khek-lı̂m sian-siⁿ ê pò͘-phâng lāi ū chı̍t ê te̍k-pia̍t ê chòng-sek. Koè-sin ê lâng chiū sı̄ chêng lé-pài tı̄ pò͘-tō-hoē hoé-kái ê Lō͘-lí,--chiú-ka ê cha-bó͘-lâng--, chóng-sı̄ i ê chòng-sek bô khah su kàu-hoē toā jı̂n-bu̍t ê chòng-sek. Khí-thâu ū sèng-koa-tūi bí-biāu ê ha̍p-chhiùⁿ, koh ū La̍h-kiat sió-chiá ê to̍k-chhiùⁿ, i ê koa-siaⁿ kàu-gia̍h thang kám-tōng lâng. Khek-lı̂m sian-siⁿ kán-tan kóng kúi-kù, liáu-āu ū Má bo̍k-su ê ián-soat, i chı̄n-la̍t kóng-khí chiú-ka chûn-chāi ê to̍k-hāi, soà ēng Lō͘-lí hoé-kái kap sí ê chêng-hêng lâi kiat-sok. Soà lo̍h-khı̀ sı̄ tē-it oē kám-tōng lâng ê tiûⁿ-bı̄n. Pò͘-phâng lāi ê hū-jı̂n-lâng ta̍k lâng the̍h chı̍t lúi hoe, gı̂m-si kàu koan-bo̍k piⁿ, chiong hoe pâi moá koaⁿ-chhâ. “Goá sı̄ bê-lō͘ ê iûⁿ” tùi in ê chhùi, tı̄ chit-ê tiûⁿ-bı̄n gı̂m-chhut-lâi, sı̄ te̍k-pia̍t oē kám-tōng lâng ê. Pò͘-phâng goā só͘ khiā ê lâng khoàⁿ chit-ê tiûⁿ-bı̄n bô m̄ siū kám-tōng lâu ba̍k-sái. Choè-āu ū La̍h-kiat sió-chiá ê to̍k-chhiùⁿ “Iûⁿ káu-cha̍p-káu tó-teh pêng-an......chí-ū chı̍t-chiah bê tı̄ soaⁿ-kan lı̄-khui iûⁿ-tiâu hn̄g-hn̄g......” Kı̀-chiá m̄-bat chham-ka chòng-sek siū chiah toā ê kám-tōng.
Ah! Khek-thàn-chng ê lâng kiám bô tùi Lō͘-lí ê sí ū só͘ kám-chhiok mah? Ū! Siong-sı̀n Lō͘-lí sui-jiân chò hi-seng lâi sí, iáu-kú i ê sí ū toā kám-tōng Khek-thàn-chng o͘-àm ê lâng. Hit àm ê pò͘-tō, kó-jiân ū 20 ê hoé-kái-chiá.
Poē-ní chit pang tùi Lō͘-lí ê sí iā ū toā ê koat-sim. I tùi La̍h-kiat sió-chiá kóng khí i ê ı̀-sù.
“Goá ū siūⁿ ài chiong goá ê châi-sán the̍h chhut-lâi choè chı̍t hāng sū-gia̍p thang pang-chān chit khoán tūi-lo̍h ê cha-bó͘-lâng. Goá ū kap sió-tı̄ Loā-lı̂n chham-siông, i iā ū tông-ı̀”.
“Lí beh ēng loā choē chı̂ⁿ tı̄ chit-ê sū-gia̍p?” La̍h-kiat mn̄g i. Kàu-taⁿ in m̄ káⁿ mn̄g kim-chı̂ⁿ siōng ê sū, chóng-sı̄ tùi chham-ka sē-iok í-lâi in lóng lia̍h kim-chı̂ⁿ sı̄ Siōng-tè só͘ kau-thok ê, só͘-í khoàⁿ chò sı̄ pêng-siông ê sū.
“Choè-chió ū sı̀, gō͘ cha̍p bān kho͘. Goá ê sió-tı̄ khí-thâu iā ū chiah choē chı̂ⁿ, chóng-sı̄ hoé-kái í-chêng hòng-chhiòng ê seng-oa̍h ū hùi khı̀ chı̍t poàⁿ, I iā koat-sim beh chiong só͘ chhun ê, chiàu “Nā-sı̄ Chú beh cháiⁿ-iūⁿ choè” lâi ēng. Goá chhut tı̄ jı̍t-pò ê 50 bān, goá siong-sı̀n bô m̄ tio̍h, chóng-sı̄ tùi chiú-ka chit hong-bı̄n iā ài lâi chhut-la̍t. Tāi-seng, goá ài tı̄ Khek-thàn chng bé thó͘-toē, tı̄ hia thang kiàn-siat siu-iông hoé-kái-chiá ê siok-sià, ióng-ló-ı̄ⁿ, ha̍k-hāu téng. Goá pún-sin iā ài chhin-sin ū hūn tı̄ chit-ê kang. Goá nā siūⁿ tio̍h chiú-ka tı̄ hia ê kiông-sēng chiū chin sit-bāng. Só͘ kiù chhut ê sı̄ chió-sò͘, tı̂m-lûn ê sı̄ toā to-sò͘”. I peh-khí-lâi, kiâⁿ lâi kiâⁿ khı̀, chhin-chhiūⁿ i ūi chit-ê sū chin siong-sim.
“Sı̄ lah! chóng-sı̄ lí m̄ bián sit-bāng. Lí chit tiâu chı̂ⁿ ún-tàng oē pang-chān lâng hēng-hok, ǹg-bāng bô kú ū sı̀n-chiá lâi pān chhı̄-chèng, chiū chiú-ka boē thang koh chûn-chāi”. La̍h-kiat ēng ū ǹg-bāng ê oē khı̀ an-ùi i.
“Goá iā án-ni ǹg-bāng; sē-iok-chiá nā ná ke-thiⁿ, khùi-la̍t chiū oē ná toā, koh chhı̄-lāi ê sı̀n-chiá ū 500 lâng, nā án-ni chiú-ka ê ūn-miā sı̄ thang chai ê”. Kóng kàu chia i ēng khún-chhiat ê gú-khı̀ ǹg La̍h-kiat kóng:“La̍h-kiat, lí choè toā ê pang-chān chiū-sı̄ lí ê koa-siaⁿ. Goá ū siūⁿ, lâi siat im-ga̍k ha̍k-hāu tı̄ hia, siu-iông hiah-ê cha-bó͘ gín-ná, ēng im-ga̍k ê khùi-la̍t lâi pang-chān in koè ko-siōng, chheng-kiat, siān-liông ê seng-oa̍h”. Poē-ní iáu-boē kóng liáu, La̍h-kiat ê bı̄n chiū hoat kng hoaⁿ-hí khí lâi, chhin-chhiūⁿ hoat-hiān tio̍h che sı̄ i it-seng ê sū-gia̍p.
“Sı̄! Sı̄! Goá chin hoaⁿ-hí chò chit-ê kang. Goá goān-ı̀ hōng-hiàn it-seng tı̄ chit-ê. Goá sı̀n sı̄ Siōng-tè ài goá chò ê. Poē-ní, lán í-keng ū hit tiâu siū sèng-pia̍t ê toā tiâu chı̂ⁿ, koh ū hōng-hiàn ê lâng, lán it-tēng oē chò-chiâⁿ toā-sū”.
Nn̄g lâng chin hoaⁿ-hí kóng kàu chin jia̍t-sim, chiū tı̄ sek-lāi kiâⁿ lâi kiâⁿ khı̀.
Chit sı̂ tú-hó Poē-ní ê sió-tı̄ Loā-lı̂n jı̍p lâi, khoàⁿ tio̍h La̍h-kiat chiū beh koh oat chhut-khı̀. In-ūi i siūⁿ tio̍h chá-chêng hòng-tōng ê sı̂ bat ǹg La̍h-kiat kiû-hun cháiⁿ-iūⁿ siū kū-choa̍t chiū chin pháiⁿ-sè. Sui-jiân i thiàⁿ i ê sim bô piàn, chóng-sı̄ taⁿ bô ióng-khı̀ thang koh kò-pe̍h. La̍h-kiat tńg khı̀ liáu-āu nn̄g ê chí-moē-á chiū saⁿ-kap tâm-lūn. Poē-ní tı̄ i ê sim-lāi khak-sı̀n La̍h-kiat ún-tàng oē chiap-siū i kái-piàn liáu ê sió-tı̄ ê thiàⁿ, chiū tı̄ sim-lāi hoaⁿ-hí.
Nn̄g goe̍h-jı̍t koh koè khı̀ lah! Tı̄ Lē-bûn chhı̄ ū choē-choē ê sū. Te̍k-pia̍t Tē-it kàu-hoē ê sē-iok-chiá ū tiong-sı̍t tı̄ sē-iok, chiū ū choē-choē kám-tōng lâng ê sū. Khek-lı̂m hu-hū í-keng kiat-sok tı̄ Khek-thàn-chng ê pò͘-tō, chiàu goā-piáu khoàⁿ Khek-thàn-chng iû-goân sı̄ tı̄ choē-ok o͘-àm ê chōng-thāi, chóng-sı̄ tı̄ lāi-bı̄n ū ke-thiⁿ hoé-kái ê lâng teh koè-tio̍h sin ê seng-oa̍h.
Má bo̍k-su chiong i hioh-joa̍h só͘ beh ēng hái-goā lú-hêng ê chı̂ⁿ hō͘ chı̍t ke sàn-chhiah m̄-bat chhut-goā ê lâng khı̀ hái-piⁿ pı̄-sú. Bo̍k-su pún-sin koh khı̀ pang-chān i khoán hêng-lí, sàng kàu chhia-thâu. I kap in ak-chhiú saⁿ-sı̂ ê sı̂, sim-lāi ū hô-téng toā ê hí-lo̍k ah! Chit-ê ka-cho̍k ū 6 ê lâng, chı̍t ê pēⁿ-jio̍k ê eⁿ-á, chı̍t ê pái-kha, in ê lāu-pē chū-sat 2 pái sí bô khı̀, in ê lāu-bó sı̄ kū-nı̂ liû-hêng jia̍t-pēⁿ ê sı̂ sit-lo̍h 3 ê kiáⁿ ê put-hēng ê hū-jı̂n-lâng. Ah! In sı̄ loā nih su-iàu kàu pı̄-sú-tē khı̀ oāⁿ cheng-sı̂n, suh hó khong-khı̀ ah! Bo̍k-su ê ba̍k-chiu sàng in lı̄-khui ê sı̂, sim-lāi ū chin toā ê hoaⁿ-hí kap kám-tōng.
Tang-thiⁿ koè liáu, chhun-thiⁿ koh kàu. Tùi Má bo̍k-su hoat-khí hit-ê kái-kek ūn-tōng kàu-taⁿ í-keng chı̍t nı̂ lah! Kin-á-jı̍t tı̄ Tē-it kàu-hoē ê lé-pài te̍k-pia̍t sēng-hóng. Má bo̍k-su tı̄ káng-tō tiong ū kóng-khí chı̍t nı̂ lâi sē-iok-chiá só͘ chò hō͘ Chú hoaⁿ-hí ê sū; koh chhiat-chhiat khó͘-khǹg iáu-boē chham-ka sē-iok ê lâng tio̍h koáⁿ-kín goān-ı̀ khut-ho̍k lâi kiâⁿ Chú só͘ hoaⁿ-hí ê lō͘.
Chit jı̍t tú-hó Chi-ka-ko siâⁿ Ná-sat-le̍k kàu-hoē ê bo̍k-su Pò͘-ní-su iā lâi tı̄ hia lé-pài, i sı̄ Má bo̍k-su ê tông-chhong. Hit jı̍t Má bo̍k-su ê káng-tō, pò-kò ū toā-toā kám-tōng chit-ê sı̂n-ha̍k phok-sū. I tńg khı̀ kàu i ê chhù, boē thang koh chhin-chhiūⁿ chá-chêng lia̍h só͘ chò ê chò moá-ı̀, “Nā-sı̄ Chú beh cháiⁿ-iūⁿ choè”chiâⁿ-chò i su-siūⁿ ê tiong-sim. Hit jı̍t i thong-jı̍t tı̄ i ê tha̍k-chheh-pâng su-siūⁿ chit-ê būn-tê; i hoán-hok ka-kı̄ liām “Nā-sı̄ Chú beh cháiⁿ-iūⁿ choè? Nā-sı̄ Chú beh cháiⁿ-iūⁿ choè, goá kiám m̄ bián kun-tè I mah?” I choè-āu kūi-lo̍h kiû Sèng Sı̂n ê pang-chān, hō͘ i iā thang chhin-chhiūⁿ Má bo̍k-su hoat-khí chı̍t ê ūn-tōng tı̄ i ê kàu-hoē lâi chhui-hêng.
Chú tı̄ khek-se-má-nı̂ ê kı̂-tó: “Chóng-sı̄ m̄-sı̄ chiàu goá só͘ ài, sı̄ chiàu Lí só͘ ài”--Che sı̄ khoàⁿ bô ka-kı̄ ê kı̂-tó. Lán ê Chú siōng-chhiáⁿ khoàⁿ bô ka-kı̄, hô-hòng lán ah! Lán kiám m̄-bián tio̍h koh khah thiat-tí ê pàng-sak ka-kı̄, choa̍t-tùi sūn-ho̍k Chú mah?
