Nā-sı̄ kàu Eng-ko

 Nā-sı̄ kàu Eng-ko 
  Goá chiū ē thiaⁿ--tio̍h 
  Jı̄-cha̍p kúi tang chêng 
  Khin-khin ê hō͘-siaⁿ 
 Nā-sı̄ kàu Eng-ko 
  Goá chiū ē thiaⁿ--tio̍h 
  Lāu-lāu ê ke-thâu 
  Léng-léng ê hō͘ 
  Ko͘-toaⁿ ê hō͘-soàⁿ 
  Ha̍p-chhiòⁿ chı̍t-siú kó͘-chá ê koa 
 Nā-sı̄ kàu Eng-ko 
  Goá chiū ē thiaⁿ--tio̍h 
  Tiām-tiām oan-oan ê sió-lō͘ 
  To-chêng ê khe-lâu 
  Chhiòⁿ bı̂n-bāng ê koa-siaⁿ 
 Nā-sı̄ kàu Eng-ko 
  Kó͘-chá ē hoé-chhia-thâu--a 
  Sı̄-m̄-sı̄ iáu-koh tı̄ hia 
  Tiām-tiām leh tán--goá