NIVEA

Un-tō͘ kàng kàu 14 tō͘, chit-lō chiah gàn ê thiⁿ, chhoán-khùi phı̄ⁿ-khang to ē thiàⁿ, kiaⁿ bı̄n pit--khı̀, chhut-mn̂g chı̀n-chêng lóng ē boah koá NIVEA. “Ou-siông sa̍h-suh” tùi chin chē lâng lâi kóng, sı̄ phoāⁿ in sêng-tióng chiok tiōng-iàu ê kı̀-tı̀, NIVEA tùi goá mā ū kāng-khoán ê ı̀-gı̄, pau-hâm mama tùi goán ê koan-sim. Tha̍k kok-hāu-á ê sı̂, piān-nā kàu koâⁿ--lâng, chái-khí-sı̂-á mama beh chài goán khı̀ tha̍k-chheh ê sı̂, lóng ē kā goán boah NIVEA. Goá bô ài bı̄n-á iû-iû, i chhiú nā lâi goá tō siám, kiàn-pái lóng bú kah i hong-hoé-to̍h, kā goá ê thâu chhı̍h--leh, chhiú kā toā-toā-la̍t hoê lo̍h chhùi-phoé kap thâu-khak-hia̍h-á, boah liáu tō koh tı̀ mn̂g-bō-á, hit-ê sı̂-chūn goá bô kah-ı̀ NIVEA ê bı̄, kô͘ iû-iû hō͘ goá chiok bô sóng-khoài, tiāⁿ-tiāⁿ tán chē khí o͘to͘bai téng, tō sûi iōng mn̂g-bō͘-á chò bı̄n-kin, kā bı̄n-á ê iû chhit chheng-khı̀. Ū boah ke-kiám ū chha, jı̂-chhiáⁿ ē-káng ê koâⁿ--lâng khah bô hiah khok-hêng, sui-bóng lóng kā NIVEA hoê hoê tiāu, bı̄n sı̄ lóng bô khı̀ pit--tio̍h. Toā-hàn lâi-kàu hō͘-chúi kāu sip-khı̀ tāng ê Tâi-pak, ū 1-kiàn tńg Tâi-lâm, hō͘ mama khoàⁿ tio̍h goá ê bı̄n pit--khı̀-a, i ná kā goá liām, oat--leh tō chhut-khı̀ kā goá bé 1-ap NIVEA, kāng-khoán ê pau-chong, sio-siâng ê khı̀-bı̄, mama ê koan-sim mā iû-goân bô piàn. I chhùi--nih kau-tài goá ài ka-tı̄ chiàu-kò͘ ka-tı̄, toā-lâng toā-chéng--a, mama sı̄ bē-ēng leh toè tı̄ lí sin-khu-piⁿ. Goá chiok pháiⁿ-sè, tio̍h koh hō͘ mama hoân-ló, koh khı̀ khoàⁿ-tio̍h i bô-êng chhut--lâi, bak-chúi sé-oáⁿ, sé-saⁿ, lóng kā kha-chhiú lōng kah pit--khı̀-a, ū tang-chūn koh ē lâu-hoeh, chin m̄-kam. Kiò i m̄-thang taⁿ-á kò͘ lāu(pē) kò͘ sè(goán), ka-tı̄ m̄ tio̍h-ài ē-hiáu pó-ióng...... Khoàⁿ khǹg tı̄ toh-á-kak ê NIVEA, siūⁿ-tio̍h kò͘-hiong ê mama, mama, lí ū boah NIVEA--bô? Tio̍h chhēng khah sio--leh, m̄-thang koâⁿ--tio̍h. Ū 1-kang, mama lāu--a, goá mā ē kā boah NIVEA! (TGB Thong-sı̀n tē 32 kı̂, 2002 nı̂ 5 goe̍h)