Ngá-kok khı̀ kı̀ⁿ-tio̍h Lú-ông
Tı̄ So͘-kek-lân ū chı̍t-ê gín-ná miâ kiò Ngá-kok. I-ê pē-bó í-keng koè-óng lah. Khó-sioh bô pêng-iú thang chiàu-kò͘ i.
Chit-ê gín-ná ài jı̍p-o̍h khı̀ tha̍k-chheh siū kà-sı̄; m̄-kú bô lâng thang thè i chhut-chı̂ⁿ, só͘-í bē-tàng khı̀ tha̍k. I siông-siông teh hoân-ló chit-chân tāi- chı̀, kàu ū chı̍t-jı̍t i ka-tı̄ siūⁿ kóng, “Taⁿ goá bô pē-bó lah, ia̍h bô chhin-chhek lah, goá beh khı̀ kı̀ⁿ goán ê Lú- ông, kiû i pang-chān goá.”
I án-ni kóng, sı̄ in-ūi chai hit-ê Lú-ông put-chí hó sim, ia̍h gâu lı̂n-bín thé- thiap sàn-hiong lâng.
Só͘-í chit-ê gín-ná ū kiâⁿ-kàu Lú-ông só͘ toà ê só͘-chāi. Tı̄ ông-kiong ê mn̂g- kháu ū chı̍t miâ peng teh pé-siú. I khoàⁿ gín-ná beh jı̍p--khı̀, chiū liâm-piⁿ chó͘-chí, hoah i kóng, “Lí ài-beh chhòng sím-mı̍h tāi-chı̀? M̄-thang jı̍p--khı̀.”
Ngá-kok ı̀n kóng, “Goá ài khı̀ kı̀ⁿ Lú-ông, chhiáⁿ lí hō͘ goá jı̍p--khı̀.”
Hit-ê peng-teng kan-ta chhiò i kóng, “Khám-bé khı̀ ah! Lí bē-kham-tit kı̀ⁿ i.”
Ngá-kok thiaⁿ-kı̀ⁿ án-ni, chiū iu-būn tò-tńg-khı̀, iân-lō͘ kiâⁿ, iân-lō͘ háu, ka-tı̄ teh phah-sǹg kàu chia sı̄ bô lō͘-ēng lah.
Tú-tú teh-beh thêng-kha, ū chı̍t lâng tùi i bı̄n-chêng keng-koè; khoàⁿ-kı̀ⁿ Ngá-kok iu-thâu khó͘-bı̄n, chiū mn̄g i kóng, “Gín-ná ah, lí in-ūi sím-mı̍h tāi- chı̀ teh iu-būn kàu án-ni?”
Ngá-kok chiū chiong i-ê tāi-chı̀ lóng- chóng kā i kóng. Hit-ê lâng chiū an-ùi i kóng, “Taⁿ lí thang an-sim, m̄-bián hoân-ló, goá beh chhoā lí kàu Lú-ông ê bı̄n-chêng.”
I chiū ı̀n kóng, “M̄-kú tı̄ mn̂g-kháu ū chı̍t-ê peng-teng, i m̄ hō͘ goá jı̍p--khı̀.”
Hit-ê lâng kóng, “Lí m̄-bián khoà-lū, m̄-sái kiaⁿ hit-ê peng-teng m̄ hō͘ lí jı̍p-- khı̀; lí tio̍h oá-khò goá, goá ún-tàng chhoā lí kàu Lú-ông ê bı̄n-chêng.”
Kóng-liáu chiū khan Ngá-kok ê chhiú,nn̄g lâng chò-hoé kiâⁿ kàu mn̂g-kháu. Hit-tia̍p peng-teng lóng m̄-káⁿ chó͘- tòng i, koh kā hit-ê chhoā-i ê lâng kiâⁿ-lé.
Kiâⁿ ū hiah hn̄g, koh khoàⁿ-kı̀ⁿ chı̍t- ê peng-teng tı̄-hia teh khiā. Ngá-kok ê sim iū-koh loé-chı̀. I chiū kóng, “Tı̄ hia iáu ū chı̍t-ê peng-teng, lí phah-sǹg i beh hō͘ lán jı̍p--khı̀ á-m̄?”
I kóng, “M̄-sái kiaⁿ, goá kā lí kóng, tio̍h oá-khò goá, koat-toàn ē-thang jı̍p.”
Taⁿ hit-tia̍p Ngá-kok siūⁿ bē-hiáu-tit, m̄-chai chit-ê lâng sı̄ chı̄-chūi; ia̍h m̄- chai hó khoán-thāi i kàu án-ni, sı̄ ūi-tio̍h sím-mı̍h iân-kò͘.
Só͘-í chiū hó-táⁿ lâi mn̄g. Hit-ê lâng kóng, “Goá sı̄ Lú-ông ê kiáⁿ.”
Ngá-kok thiaⁿ-kı̀ⁿ chit-kù-oē, chiū liâm-piⁿ chai i ún-tàng ē chhoā i tı̄ Lú- ông ê bı̄n-chêng; só͘-í bô koh khoà-lū; hoán-tńg hoaⁿ-hí hō͘ Thài-chú tı̍t-tı̍t chhoā i kàu Lú-ông ê pâng.
Lú-ông kap i kóng-oē, ia̍h put-chí hó khoán-thāi i; kàu āu-lâi chiàu Ngá-kok só͘ ı̀-ài, hō͘ i jı̍p-o̍h tha̍k-chheh siá-jı̄, í- kı̍p ha̍k-sı̍p pa̍t-mı̍h ê kà-sı̄; kàu toā- hàn ê sı̂-hāu chiū sêng-khı̀, chiâⁿ-chò ū toā lō͘-ēng ê lâng.
Taⁿ lán tāi-ke chiong chit-ê gín-ná ê sū thang lâi siūⁿ chı̍t-hāng tē-it iàu-kín ê tāi-chı̀, chiū-sı̄ lán tio̍h oá-khò lán ê Chú Iâ-so͘, chhin-chhiūⁿ Ngá-kok oá- khò hit-ê Lú-ông ê kiáⁿ chı̍t-poaⁿ-iūⁿ.
Lán ê Chú Iâ-so͘ sı̄ Thiⁿ-téng Siōng- tè ê Kiáⁿ; lán nā oá-khò i, i ún-tàng ē- tit-thang ín-chhoā lán kàu Siōng-tè ê bı̄n-chêng, ia̍h ē hō͘ lán tı̄ bān Ông ê Ông ê só͘-chāi khiā-khí kàu éng-oán.
Éng-oán kap Chú khiā-khí,
Chiàⁿ-sı̄ goá sim só͘ goān;
Thian-tông tn̂g oa̍h, bān sè bô sí,
Hióng-hok tı̍t kàu éng-oán.
(Tâi-lâm Kàu-hoē-pò, Tē 63 tiuⁿ, 1890 nı̂ 8 ge̍h)