Ngiâ-pu̍t oan-ke
Múi-nı̂ saⁿ-goe̍h 23 jı̍t chiū-sı̄ Má-chó͘-siⁿ; tı̄ Hú-siâⁿ ū chı̍t-keng toā Má-chó͘-biō; sı̄ chhāi toā-má chham jı̄-má. Āu-lâi ū hun jı̄-má ê sı̂n-siōng khı̀ Pak-káng ho̍k-sāi, hō-chò Pak-káng-má; kúi-nā nı̂ í-lâi, ū hong-siaⁿ i-ê miâ heng-kàu lâm-pak jı̄-lō͘; sı̀-ûi ê lâm-lí put-chí jia̍t-sim ho̍k-sāi; ū-ê khı̀ Pak-káng sio kim, ū-ê lâi Hú-siâⁿ, bô tiāⁿ-tio̍h. Pak-káng ê jı̄-má ū-sı̂ saⁿ-goe̍h-bı̄n tio̍h lâi Hú-siâⁿ, thàm toā-má.
Kin-nı̂ 3 goe̍h 14 jı̍t, ū jı̍p Hú-lāi; boē kàu siâⁿ-mn̂g ê sı̂, siâⁿ-lāi-goā ê biō ū cha̍p-goā téng toā-lián chhut-siâⁿ khı̀ tán-chih--i. Teh-beh saⁿ-kı̄n ê sı̂, tāi-ke saⁿ-chiⁿ ài seng chih--tio̍h, chhiúⁿ thâu-hiuⁿ khah ū miâ-siaⁿ, cháu kàu oan-ke; Sam-lāu-iâ-keng khah chhı̀-thâu-pio, toā-kı̂ kia̍h bô tú-hó, hō͘ Phó͘-chè-tiān kéng ê lâng lı̀-lı̀-phoà; tùi hit-tia̍p chiū khioh-hı̄n. Tú-tú jı̍p-siâⁿ ê sı̂ tāi-ke chiū sio-phah--lah, chham bē-mı̍h ê tàⁿ soà lòng-lòng--tó; í-kı̍p bē hún-koé ê au-á iā soà the̍h--khí-lâi chún chio̍h-thâu sio-tı̀m; kia̍h lâng ê tiàm-thang-pang chò khı̀-hâi lâi kòng--lo͘h ! Chham toè teh sûi-hiuⁿ ta-po͘ cha-bó͘ iā tio̍h-siong put-chí chē lâng; pu̍t-kiō ū-ê iā soà phah-pháiⁿ, lióng-pêng ū-ê tio̍h-siong chin siong-tiōng, tı̀-kàu tio̍h kng khı̀ hō͘ Koān-chú giām, iā soà lia̍h 4 ê lâng sàng-lo̍h koān.
Sam-lāu-iâ-keng chin m̄-goān tò-tńg-khı̀ kiò lâng lâi cha̍h tı̄ poàⁿ-lō͘ beh phah--i; tú-tú Phó͘-chè-tiān ê pu̍t-kiō koè, beh oá nn̄g-keng-chhù hn̄g, chiū hō͘ i ûi--teh. M̄-kú Phó͘-chè-tiān kiông koh chhoàⁿ, tó͘-ngē lê--koè-khı̀; tı̄-hia iū-koh oan-ke, pu̍t-kiō kng-cháu kàu Sió-má-chó͘, hia ê lâng chiū lâi kā in chò kong-chhin. Pu̍t-kiō hō͘ Sió-má-chó͘ lâu keh chı̍t-mı̂, chiah hō͘ i kng tò--khı̀. Sam-lāu-iâ keng ê lâng tio̍h-siong put-chí chē, Phó͘-chè-tiān iā bô chió.
Siāng hit-jı̍t Ē-thài-chú kap Lâm-chhiúⁿ iā phah kàu put-chí siong-tiōng; sı̄ in-ūi téng-pang khı̀ sàng Lâm-kun-sin Ông-iâ chiū ū chek-oàn.
Kàu 16 jı̍t Pak-káng-má beh tò--khı̀, Koān-chú chiū chiàu chhù-sū pâi-lia̍t hō͘ in sàng chhut siâⁿ, Bú-iâⁿ iā phài peng khı̀ tı̂-hông, sı̄ kiaⁿ-liáu hiah-ê pu̍t-kiō koh oan-ke. Sàng chhut-siâⁿ ê pu̍t-kiō kap lâng í-keng tò-tńg--lâi, Pak-káng má chiū kiâⁿ; beh kı̄n Chiu-á-boé-siā, hia ê lâng iā lâi chih--i, soà sàng koè in ê siā, chám-jiân ū hiah-hn̄g; hit-sı̂ in ê chhù chiū hō͘ hoé sio chin-chē keng, soà bô lâng thang phah-hoé; kàu in tò-tńg-lâi hoé í-keng hoa--lah ! Khó-kiàn kèng-pu̍t ē hāi-lâng chin chhám--ah !
(Tâi-lâm Hú-siâⁿ Kàu-hoē-pò tē 22 hō, 1887 nı̂ 4 goe̍h)