Niáu-chhú-pēⁿ

Chit-hō pēⁿ sı̄ ū chı̍t-chéng iù-iù ê mı̍h, ( ū lâng kóng Sè-lân-thâng, á-sı̄ kóng to̍k ), jı̍p lâng ê seng-khu, toà-tı̄ hoeh-lāi seⁿ-thoàⁿ. Chit-hō mı̍h ê seng-khu--nı̍h ū to̍k; chit-hō to̍k, ē hō͘ lâng ê chōng-hú chhut-hoeh, kap seng-khu hoat-jia̍t lâi tı̀-kàu sí. Pēⁿ-lâng ê pùn, jiō, thâm, í-kı̍p i só͘-ēng ê mı̍h, lóng ū to̍k.

Lūn thoân-jiám. Niáu-chhú tē-it gâu thoân chit-hō to̍k. In-ūi niáu-chhú khoài-khoài jiám-tio̍h, āu-lâi thoân hō͘ lâng. Hit-hō toà-tı̄ niáu-chhú seng-khu ê ka-cháu kā niáu-chhú ê hoeh, chia̍h-jı̍p pak-tó͘-lāi, āu-lâi lâi tèng-lâng ê sı̂, i ū thò͘-chhut, chiah koh suh, chiū chiong hit-hō to̍k chhin-chhiūⁿ lâi chèng tı̄ lâng ê seng-khu. Hō͘-sı̂n iā ē thoân to̍k, in-ūi i ài sı̀-kè hioh, chiū i-ê kha khoài-khoài tiâu to̍k, lâi thoân hē tı̄ pa̍t-ūi ; chóng-sı̄ i nā jiám-tio̍h to̍k,chiū ē sí.Kı̂-û báng-á, bat-sat, káu-hiā,iû-goân sı̄ chiàu téng-bı̄n só͘ kóng ê khoán; he̍k-sı̄ kā lâng, he̍k-sı̄ toà to̍k lâi hē tı̄ lâng ê chia̍h-mı̍h, á-sı̄ lâng seng-khu phoà-khang ê só͘-chāi, lóng sı̄ chit-hō khoán. Lūn chit-hō to̍k jı̍p-lâng ê seng-khu, khah-siông sı̄ tùi chia̍h-mı̍h í-kı̍p phı̄ⁿ-khang, á-sı̄ lâng seng-khu ū phoà-khang ê só͘-chāi.

Lūn tı̂-hông chit-hō pēⁿ. Chiàu téng-bı̄n só͘ kóng lâi khoàⁿ chiū chai, chiū-sı̄ tē-it iàu-kín tio̍h lia̍h niáu-chhú, nā lia̍h-tio̍h niáu-chhú, i-ê seng-khu só͘ ū ê ka-cháu m̄-thang hō͘ i cháu-khı̀, tio̍h ēng hoé kā i sio-khı̀. ( Chū-jiân tio̍h tāi-seng kā i phah-sí, jiân-āu thang ēng hoé sio.) Chia̍h-mı̍h tio̍h sè-jı̄ ; bē tı̄ ke-lō͘ ê mı̍h m̄-thang lām-sám chia̍h. Chia̍h-mı̍h tek-khak tio̍h koè-chú, nā koè chú-kún sı̄ khah thò-tòng, in-ūi kiaⁿ-liáu hō͘-sı̂n, káu-hiā, sı̀-kè sô, hioh, ē toà to̍k lâi ka-la̍uh tı̄ hit-hāng mı̍h. Só͘-chāi tio̍h chhòng chheng-khı̀-siùⁿ;seng-khu tio̍h sé ; saⁿ-á-khò͘ iā tio̍h chheng-khı̀; phoē, chhio̍h tio̍h pha̍k. Chhù-lāi tio̍h hō͘ jı̍t chiò-jı̍p-khı̀, iā bo̍h-tit kap hit-hō pēⁿ-lâng kau-thong. Jı̍t-kng chı̄n ū la̍t, m̄-sı̄ jı̍t ê sio, sı̄ jı̍t ê kng lâi chiò, chiū ē hō͘ hit-hō thâng sí. Chóng-sı̄ ēng io̍h-chúi lâi sé, iā ē hō͘ thâng sí. Chóng-sı̄ io̍h ê tāi-chı̀ goá m̄-bián kı̀, nā chiàu téng-bı̄n só͘ kóng lâi koan-hông, ǹg-bāng ē tû-khı̀ hit-hō pēⁿ. Sio̍k-gú kóng, Bô-pēⁿ khah-hó bat io̍h.

Jı̍t-pún-koaⁿ kiò-lâng lia̍h niáu-chhú, phah io̍h-chúi, á-sı̄ hoe-chúi, chhù-lāi tio̍h chheng-khı̀, chiàu án-ni khoàⁿ khiok sı̄ hó-ı̀. Sè-sio̍k-lâng m̄-chai-iáⁿ; lán sı̀n Chú Iâ-so͘ ê lâng nā chai, khiok tio̍h kā lâng kóng, bián-tit hō͘ in kiaⁿ-hiâⁿ, á-sı̄ siū-khı̀ m̄-hoaⁿ-hí chit-hō tāi-chı̀.

(Tâi-oân Hú-siâⁿ Kàu-hoē-pò tē 216 koàn, 1903 nı̂ 3 ge̍h)