Nn̄g ê pháiⁿ-miā gín-á

Tı̄ chı̍t ê sè-sè ê chhân-chng, goán í-keng keng-koè nn̄g nı̂ lah. Tı̄ chū-nı̂ ê chit ê sı̂-chūn, tú-tù Koh-oa̍h-cheh liáu ê sı̂, goán nn̄g lâng hō͘ a-ı̂ chhoā lâi chia, siū i ê chiàu-kò͘, kā a-ı̂ tàu chò kang, keng-koè chē-chē sim-būn ê jı̍t-chí. Taⁿ goán ū khah toā-hàn lah. Ē kı̀-tit a-bú beh lı̄-khui sè-kan ê sı̂, kiò goán lâi bı̂n-chhn̂g-chêng, khan goán ê chhiú, iōng m̄-bat thiaⁿ-kı̀ⁿ ê iu-būn ê siaⁿ tùi goán kóng, “Goá ê sim-koaⁿ-á-kiáⁿ, goá beh lı̄-khui lín lah, bô lūn sím-mı̍h lâng to lâu goá bē tiâu. Bı̂n-á-chài beh ū lâng chiong á-bú hē tı̄ chhâ-siuⁿ-á, kng chhut-khı̀, lín nā cheng-sı̂n ē chhoē bô a-bú. Chóng-sı̄ lín m̄-thang siuⁿ koè-thâu hoân-ló, in-ūi goá beh khı̀ chhoē lín a-pa, beh kā i kóng lín lóng í-keng chin toā-hàn lah. Lín a-pa beh hō͘ Jı̍t-pún lâng kiò khı̀ chhut-cheng ê sı̂, lí chiah nn̄g hoè, lín sió-tı̄-á iáu tı̄ pak-tó͘-té, taⁿ lín lóng teh tha̍k-chheh lah. Chit tiong-kan m̄-sı̄ lín a-bú hō͘ lín toā-hàn, sı̄ thiⁿ-téng ê Siōng-tè chiàu-kò͘ lín. Taⁿ sui-jiân a-bú iā beh lı̄-khui lín, chóng-sı̄ thiⁿ-téng ê Siōng-tè bô pàng-sak lín, beh hō͘ lín tı̄ tē-chiūⁿ chiâⁿ-chò chı̍t ê ū lō͘-ēng ê lâng. Kiám-chhái lâng beh chhoā lín khı̀ pa̍t-ūi, lín tio̍h jím-siū, tio̍h thiaⁿ lâng ê kà-sı̄, tán-hāu á-bú koh-oa̍h lâi chhoē lín. Chú koh lâi ê jı̍t lâng lóng beh koh-oa̍h, lín a-pa iā teh tán-hāu hit-jı̍t thang kı̀ⁿ-tio̍h lín.” Hit sı̂ goá kan-ta chai, beh ū chı̍t ê thang kiaⁿ ê ūn-miā chhin-chhiūⁿ toā kha pò͘-tē beh té goán nn̄g ê khı̀ hn̄g-hn̄g ê só͘-chāi. A-bú in-ūi bô a-pa, lô-khó͘ tio̍h-boâ koè-thâu, sin-khu tài pēⁿ lâi lı̄-khui sè-kan. Goán hit sı̂ lóng m̄-chai gōng-gōng, chí-ū chai-iáⁿ a-bú hō͘ lâng kng chhut-khı̀ nā-tiāⁿ. Goán lâi toà a-ı̂ ê chhù ê thâu-chı̍t jı̍t, oē kı̀-tit goán nn̄g lâng khàu kui-jı̍t, sió-tı̄-á mn̄g goá kóng, “A-ché, chia sı̄ tó-ūi neh?” Goá mā m̄-chai, kan-ta oē hiáu kóng tán-hāu a-bú koh-oa̍h, i chiū ē kā lán kóng. Tùi hit-sı̂ khí, goán chiū bē thang koh khı̀ tha̍k-chheh. In-ūi chhân-chng bô ha̍k-hāu, beh tha̍k-chheh ài kiâⁿ chin hn̄g, koh tio̍h ài chı̂ⁿ. Tı̄ chia iā bô lé-pài-tn̂g, iā bô Chú-jı̍t-o̍h, goán múi-jı̍t lóng tı̄ chhân-hoāⁿ-kha, koáⁿ gô-á, chhı̄ iûⁿ-meh-á nā-tiāⁿ. Lâi kàu chit ê bô tiān-hoé ê chháu-tē, tı̄ mê-sı̂ sió-tı̄-á sı̂-sı̂ ài kóng kiaⁿ àm, kı̂-sı̍t goá mā chin kiaⁿ, goán nn̄g lâng teh khùn ê sè-sè ê pâng-keng, hong thàu ê sı̂ kı̀ⁿ-koaihN-kiò, ū-sı̂ niáu-chhú-á khı̄-kho̍k-kiò. Sió-tı̄-á poàⁿ-mê beh pàng-jiō, kiò goá kap i khı̀. Goá tı̄ mê-sı̂, sı̂-sı̂ ài cheng-sı̂n kā sió-tı̄-á kah-phoē, chiah chai chá-chêng a-bó cháiⁿ-iūⁿ tı̄ ta̍k hong-bı̄n ê thiàⁿ-sim.

 Tı̄ goe̍h-kng ê mê-sı̂, kap chē-chē gín-á tı̄ tiâⁿ-nih teh thit-thô ê sı̂, goán bē kám-kak sím-mı̍h, kàu tı̄ poàⁿ-mı̂, cheng-sı̂n ê sı̂, khoàⁿ tio̍h thang-á kng-kng, iā ū tō͘-peh-á teh háu ê siaⁿ, goá bat siong-sim soà háu--chhut-lâi, kiò sió-tı̄-á cheng-sı̂n, nn̄g lâng saⁿ-kap chhi-chhám háu, m̄-chai tı̄-sı̂ goán chiah ē thang koh kı̀ⁿ-tio̍h a-bú.
 Ū chı̍t jı̍t, goán koáⁿ gô-á khı̀ chin hn̄g chhı̄ ê sı̂, tı̄ hn̄g-hn̄g khoàⁿ-tio̍h chı̍t keng chhù, chhù-téng ū sı̍p-jı̄-kè, goán ê hoaⁿ-hí bē-kò͘-tit.  Goán chiū koáⁿ-kín khı̀, goán nn̄g ê chhiú khan-chhiú ûn-ûn-á tùi mn̂g jı̍p-khı̀, chēng-chauh-chauh ê lé-pài-tn̂g, goán kūi tı̄ hit ê tâi-chêng kı̂-tó, hō͘ goán thang koh chı̍t pái kap a-bú saⁿ-kı̀ⁿ, lóng bô lâng kiáu-jiáu goán.  Tùi hit jı̍t khí, goán chiah bat chhiò.  Kàu múi lé-pài-jı̍t goán lóng koáⁿ gô-á kàu chia, thang hù Chú-jı̍t-o̍h, in-ūi chit ê sı̄ goán só͘ ū sè-sè ê hi-bāng.  Goán chhoē-tio̍h lé-pài-tn̂g ná chhin-chhiūⁿ chhoē-tio̍h a-bú teh toà ê só͘-chāi ê lō͘.  Goán nā lâi chia, ná chhin-chhiūⁿ khah kūn a-bú ê chhù ê khoán.  Ū sı̂ sió-tı̄-á ài goá kóng kò͘-sū hō͘ i thiaⁿ, goá bē-hiáu kóng sím-mı̍h, kan-ta siūⁿ-khí í-chêng a-bú kóng hō͘ goá thiaⁿ ê nā-tiāⁿ.  Tı̄ àm-àm ê bı̂n-chhn̂g, nn̄g lâng kah tı̄ phoē-té, ba̍k-chiu kheh-kheh, goá chiū kóng a-bú só͘-kóng ê hō͘ sió-tı̄-á thiaⁿ.  Sui-jiân goán lóng thiaⁿ kàu se̍k-se̍k, iáu-kú hit sı̂ sı̄ goán siōng sio-lō ê sı̂.  Goán kheh sio-oá lâi saⁿ-kap kóng, “Ū chı̍t jı̍t, nn̄g ê gín-á beh khı̀ chhoē lāu-pē, in a-bú the̍h 3 hāng mı̍h hō͘ in, ...”  Hit sı̂ ná chhin-chhiūⁿ teh bı̂n-bāng, goán chiū chiām-chiām khùn--khı̀.

Koh bô joā kú Bó-chhin cheh beh kàu, goán ū chèng chin-chē chián-jiông hoe, beh tı̄ hit jı̍t the̍h lâi. Chú-jı̍t-o̍h, goá chhah pe̍h-hoe, chiong âng-hoe sàng pêng-iú. Goán ta̍k-jı̍t teh sǹg, ná chhin-chhiūⁿ hit jı̍t beh kı̀ⁿ-tio̍h a-bú. (Tâi-oân Kàu-hoē-kong-pò tē 773 hō, 1953 nı̂ 5 ge̍h)