Oē-ke̍k Lı̂m Ha̍k-kiong Bo̍k-su
Tē 1 Bō͘: Lı̂m Ha̍k-tun siù-châi ê toā thiaⁿ, kiam iōng choè su-o̍h-á kàu-sek.
Pò͘-tı̀ : Pat-sian-toh chı̍t tè, í-liâu 3 liâu, ha̍k-seng iōng ê í-thâu-á kúi-nā liâu,kàu-su iōng ê í toh kok chı̍t liâu. Pán-poe chı̍t ki. Khóng-chú ūi-siōng chı̍t tiuⁿ tı̄ piah-nih. Ha̍k-seng tha̍k-chheh siaⁿ-im chin toā siaⁿ. Ha̍k-tun : Tú-chiah kà kè-khı̀ ê, lín bat ı̀-sù bô? Kó͘ chi io̍k bêng bêng-tek u thian-hā chiá, chiū-sı̄ kóng, kó͘-chá hiah ê ài beh chiong hó ê tō-tek hō͘ thiⁿ-kha-ē ê lâng oē bêng-pe̍k ê tāi-seng, tio̍h ài tı̄-lí kok-ka hō͘ hó; beh tı̄-lí kok-ka hō͘ hó, tio̍h tāi-seng chiong ka-kı̄ ê ka-têng kò͘ hō͘ i chéng-choê; nā ài hō͘ ka-têng chéng-choê, tāi-seng tio̍h siu-ióng ka-kı̄, beh siu-ióng ka-kı̄; sim-koaⁿ tio̍h ài sı̀-chiàⁿ; sim-koaⁿ beh ē sı̀-chiàⁿ, tāi-seng sim-su tio̍h ài sêng-sı̍t; sim-su beh sêng-sı̍t, tio̍h ài ēng chı̄n i ê tı̀-sek;tı̀-sek nā kàu, it-chhè bān hāng mı̍h ê chêng-lí chiū oē thiat-toé bêng-pe̍k. Chit chām chiū-sı̄ Khóng-chú kong ê hó ê kà-sı̄. Khóng-chú kong sı̄ lán Tiong-kok ū le̍k-sú í-lâi choè úi-tāi ê gâu-lâng, só͘-í lâng chheng i choè Tāi-sêng Chı̀-sèng Sian-su Khóng-hu-chú, sı̄ lán Tiong-kok lâng tı̄ sè-kài siōng choè khoa-kháu ê sū. Lín tāi-ke tio̍h ài jı̄n-chin tha̍k-chheh, chiong-lâi chiah oē choè gâu-lâng. Ū lâng ài beh mn̄g m̄-bat ê só͘-chāi bô ?
Ha̍k-seng : Sian-siⁿ, goán siā-nih kin-á-jı̍t phó͘-tō͘, iā ū choè hı̀, goán a-bú chhiáⁿ Sian-siⁿ tio̍h lâi hō͘ goán chhiáⁿ.
Ha̍k-kiong : Lín kiám chai-iáⁿ phó͘-tō͘ sı̄ sím-mı̍h ı̀-sù? Phó͘-tō͘ chiū-sı̄ chı̍t nı̂ chı̍t pái tē-ge̍k mn̂g khui, chheng-chheng bān-bān ê iau-kúi pàng chhut tē-ge̍k khí-lâi iông-kan, iông-kan ê oa̍h lâng ke-ke hō͘-hō͘ lóng tio̍h chú chhiⁿ-chhau, chú kàu chı̍t toh moá-moá lâi chhiáⁿ chiah ê iau-kúi, iā tio̍h kā pài, kiû in pó-pı̀, sı̍t-chāi m̄-sı̄ tha̍k-chheh lâng eng-kai sı̀n ê tāi-chı̀. Lán ê Khóng-chú kong kóng, “ Hui kı̂ kúi jı̂ chè chi, thiám iá”, nā m̄-sı̄ ka-kı̄ ê lâng sí khı̀ choè kúi, lâi kā chè, lâi kā hàu, sı̄ khı̀ phô͘-tháⁿ hiah ê kúi, sı̍t-chāi sı̄ kiàn-siàu ê sū.
Ha̍k-tun: Ha̍k-kiong tiām-tiām, hó lah,lí chit ê chia̍h hoan-á-kàu, m̄-sı̀n kong-má pu̍t-á, lí chiah kā goá khoàⁿ-māi leh.
Ha̍k-seng : Sian-siⁿ, nā sí-liáu tàu-tí sı̄ beh khı̀ tó-ūi?
Ha̍k-tun : Ū chı̍t ê ha̍k-seng mn̄g Khóng-chú kong kóng, Sí āu ê tāi-chı̀ cháiⁿ-iūⁿ? Lán ê Khóng-chú kong kóng, Siⁿ chêng ê sū to m̄ chai-iáⁿ, thái-thó oē chai sí-āu ê tāi-chı̀, só͘-í goá iā m̄-chai.
Ha̍k-kiong : Ìn-tō͘ pu̍t-kàu ê su-sióng, sı̄ kóng lâng nā sí, chiàu i siⁿ-chêng só͘ choè lâi pò-èng, choè hó ê lâng chhut-sı̀ choè pu̍t, choè lâng; choè pháiⁿ ê lâng chhut-sı̀ choè gû, bé, cheng-siⁿ. Só͘-í Ìn-tō͘ lâng m̄-káⁿ sat-seng, thâi gû, thâi ti, thâi cheng-siⁿ lâi chia̍h, in-ūi kiaⁿ-liáu thâi tio̍h in chó͘-kong, chó͘-má, sı̄m-chı̀ chng gû-iâ, bé-iâ kóng ū sı̂n lâi pài, lâi ho̍k-sāi, sı̍t-chāi sı̄ chin hó-chhiò ê sū. Goân-lâi lán Tiong-kok siōng kó͘-chá sı̄ pài Siōng-tè, chhòng-chō ú-tiū ê chú-cháiⁿ. Lán ê gâu-lâng, lán ê hông-tè chı̍t nı̂ chhun-chhiu nn̄g pái thoè choân kok kok-bı̂n thâi gû thoè peh-sı̀ⁿ chè-kò, jı̄n-choē, kiû Siōng-tè sù hok-khı̀ hō͘ thong thiⁿ-kha-ē ê bān bı̂n, kau siā chi lé, só͘-í sū Siōng-tè iá chiū-sı̄ chit ê ı̀-sù. Kàu Tông-tiâu ê sı̂, Ìn-tō͘ pu̍t-kàu thoân-jı̍p lán kok-lâng chiah ēng chhiú lâi jio̍k thô͘-ang-á, ēng to-á, chha̍k-á lâi tiau-khek ngó͘-siōng, kóng chiah ê lóng ū sı̂n lâi pài, lâi ho̍k-sāi, sı̍t-chāi sı̄ chin m̄-tio̍h, kóng chiah ê pu̍t-á oē pó-pı̀ lâng, sı̍t-chāi sı̄ koh-khah hó chhiò.
Ha̍k-tun: Ha̍k-kiong, lí thài khó-òⁿ, thài káu-koài-à, lí khı̀ chia̍h hoan-á-noā, jı̍p hoan-á-kàu, loān kóng chı̍t tiûⁿ. Lán chó͘-kong 13 tāi lâng liân-liân tiòng chı̀n-sū, kı̀-jiân choè toā koaⁿ, lán lāu-pē kap goá kap lín toā hiaⁿ iā lóng chı̀n siù-châi, lán tāi-tāi lóng sı̄ pài pu̍t, kin-á-jı̍t chhut tio̍h lí chit ê lo̍h kàu sí liáu bô lâng khàu ê ko͘-sı̂n gia̍t-chú, nā m̄-sı̄ goá teh chhı̄ lí, teh an-ùi lāu-bú, lāu-bú ūi-tio̍h lí khı̀ lo̍h-kàu, tòng lí bô hoat, í-keng tiàu-tāu sí liáu lah. Kin-á-jit hó-táⁿ-sí koh kóng chiah ê oē, lâi, kā lín pē kūi toà sı̂n-chú pu̍t-chó͘ ê bı̄n-chêng jı̄n-choē, kha̍p-thâu kiò m̄-káⁿ.
Ha̍k-kiong : Jı̄ hiaⁿ, goá choa̍t-tùi bô koh kūi tı̄ sı̂n-chú kap pu̍t-á ê bı̄n-chêng lâi pài lah, chhiáⁿ jı̄ hiaⁿ m̄-bián siū khı̀. (Ha̍k-tun kia̍h khí tek-poe, kiâⁿ kūn Ha̍k-kiong, tı̍t-tı̍t kòng, khí kha tı̍t-tı̍t that, ha̍k-seng kiaⁿ kàu phı̍h-phı̍h chhoah).
Ha̍k-tun: Chhé ! Lí chit ê khó-ò͘ⁿ ê cheng-siⁿ, thài ngı̄-sim boē kái-pı̀ⁿ. Lán pa-pa iā m̄-sı̄ sí saⁿ tang nn̄g tang, tú-tú kè-sin chı̍t nı̂, lí chiū khı̀ lo̍h hoan-á-kàu. Lán ê Khóng-hu-chú kóng, Sam liân bû kái û hū chi tō khó ūi hàu ı̀, bô chhái hō͘ lí tha̍k-chheh, lí chit hō kha-siàu í-keng bô lō͘-ēng lah, tùi kin-á-jı̍t khí kā goá chhut-khı̀, m̄-thang tńg-lâi kap goá jı̄n choè hiaⁿ-tı̄ lah. ( Ha̍k-tun lâu ba̍k-sái toā khàu, Ha̍k-kiong kiâⁿ chhut mn̂g. Ha̍k-tun hiòng ha̍k-seng kóng). Kin-á-jı̍t kàu chia chiū hó, tāi-ke tńg-khı̀ jı̄n-chin tha̍k-chheh.
（Pı̀-Bō͘)
Tē 2 Bō͘ : Ha̍k-kiong Bo̍k-su koán kheh-thiaⁿ.
Thiaⁿ ê chiàⁿ-bı̄n koà 10 kài, lâng-kheh í 4 ,5 liâu,toh chı̍t tè, (Ha̍k-kiong chē tı̄ lâng-kheh í chhut siaⁿ tha̍k Sèng-keng).
Ha̍k-kiong : Goān Siōng-tè lı̂n-bín goán,sù hok-khı̀ hō͘ goán, ēng bı̄n ê êng-kng chiò goán, hō͘ thong sè-kài bat Lí ê tō-lō͘, bān kok chai Lí ê kiù-un, goān bān-bı̂n o-ló Lí. Gû-gōng ê lâng sim-lāi kóng bô Siōng-tè, in to sı̄ siâ-ok, kiâⁿ khó-ò͘ⁿ ê choē-gia̍t, bô chı̍t ê kiâⁿ hó, liân chı̍t ê hó lâng iā bô. Choē-ok ê kang-chı̂ⁿ sı̄ sí, to̍k-to̍k Siōng-tè chiong to̍k-siⁿ Kiáⁿ siúⁿ-sù sè-kan, hō͘ kı̀ⁿ-nā sı̀n I ê lâng bián tı̂m-lûn, oē tit-tio̍h éng-oán oa̍h.
Bo̍k-su-niû : Bo̍k-su, goá kā lí phàu tê lâi--lah! (Tê-koàn khǹg toh-téng). Kin-á-jı̍t lán Ài-á pit-gia̍p tē jı̄ ko-lú, m̄-chai oē thang chhin-chhiūⁿ tong-sı̂ pit-gia̍p Lú-o̍h ê sı̂ choè thâu-miâ á boē? Sı̂-kan í-keng beh 3 tiám lah, hé-chhia liâm-piⁿ oē kàu, tāi-khài liâm-piⁿ oē tò-lâi.
Sūn-ı̀ : A-pa, a-bú.
Bo̍k-su-niû : Ò͘! Ì-ah, lí koh tńg-lâi lah.
Sūn-ı̀ : A-pa, a-bú goá koāⁿ chı̍t chiah koe tı̄m jı̂n-sam lâi beh hō͘ lín chia̍h, Ài-ah siá phoe kā goá kóng kin-á-jı̍t beh tńg-lâi. Kóng i kin-á-jı̍t choè pit-gia̍p-seng ê tāi-piáu, tı̄ pit-gia̍p-sek ê sı̂ kóng siā-sû, sı̍t-chāi chin êng-kng. Khó-sioh lán lóng bô lâng khı̀ hù.
Ha̍k-kiong: Goá sim teh siūⁿ ài khı̀, chóng-sı̄ chı̍t choā lō͘ chiah-nih hn̄g, koh tio̍h ke khai chı̂ⁿ.
Bo̍k-su-niû : Ì-ah, lí m̄-tio̍h m̄-thang put-sı̂ ke khai chı̂ⁿ, koāⁿ koe, ah, hı̂, bah lâi hō͘ goán chia̍h, sı̍t-chāi chin to-siā.
Sūn-ı̀ : A-pa, a-bú, thài ū iàu-kín, kūn-lâi Chài-sêng ah hoān-chiá chin-choē, siu-jı̍p chin hó, khoàⁿ ū sím-mı̍h hó-mı̍h, joā-nı̍h ta̍t-chı̂ⁿ ê, goá mā káⁿ boé lâi hō͘ lín chia̍h, lâi pò-tap lín ê thiàⁿ, iúⁿ-chhı̄ ê un-chêng.
Bo̍k-su: Sè-sio̍k lâng lóng chhiò lán sı̀n Iâ-so͘ ê lâng kóng, lo̍h-kàu sí liáu bô lâng khàu, kı̂-sı̍t in to m̄-chai, chāi-siⁿ chia̍h chı̍t lia̍p tāu, khah hó sí liáu chia̍h chı̍t ê ti-thâu. Siōng-tè 10 tiâu kài iā sı̄ kiò lâng tio̍h hàu-sūn pē-bú, tı̄ sè-kan beh chia̍h tn̂g hoè-siū. Kiáⁿ-jı̂ nā iú-hàu, ka-têng beh hô-pêng khoài-lo̍k, sı̍t-chāi iú-hàu sı̄ chin iàu-kín ê tāi-chı̀.
Sūn-ài : A-pa, a-bú, jı̄ ché goá tò-lâi lah.
Sūn-ı̀ : Ài-ah, kiong-hí ! lí pit-gia̍p lah ,chin kiong-hí, chit pái ū choè thâu-miâ--bô ?
Sūn-ài : Sui-jiân bô choè thâu-miâ,chóng-sı̄ choè tāi-piáu chhut-khı̀ tı̀-sû. In-ūi hāu-tiúⁿ kóng goá ê phín-hēng tē it hó.
Bo̍k-su-niû : Ài-ah, sı̍t-chāi chin kiong-hí ! Goá soà pò lí chı̍t hāng hó siau-sit, téng-jı̍t Tâi-lâm Khó͘ Khé-hun Sian-siⁿ lâi beh kā lí choè chhin-chiâⁿ, lâm--ê kóng sı̄ Tâi-lâm hit ê bêng-i Gô͘ Chhiu-bı̂ Sian-siⁿ ê sió-tı̄ Gô͘ Kok-phoan, kóng i chin ài lí, chóng-sı̄ lín a-pa to m̄-bat hit ê Kok-phoan ah, só͘-í bô hoat-tō͘ thang kā hoê-tap, thiaⁿ-kı̀ⁿ Khó͘ Sian-siⁿ kóng, lín nn̄g lâng ū sio-bat, tàu-tí Kok-phoan ah siⁿ-choè ı̂ⁿ á píⁿ leh?
Sūn-ài: Sím-mı̍h kiò-chò ı̂ⁿ á píⁿ leh,a-bú.
Bo̍k-su-niû: Îⁿ, chiū-sı̄ chı̍t kho͘ toā-toā kho͘, pûi lok-lok; píⁿ, chiū-sı̄ siⁿ choè báng-á-kha, sán pi-pa lah. (Tāi-ke ha-ha-chhiò).
Sūn-ài: Kok-phoan siⁿ choè khok-thâu khok-thâu, seng-khu sán-kâu sán-kâu, bı̄n-māu bô ian-tâu, chóng-sı̄ tha̍k-chheh siong-tong gâu, joā-nih hó-chhiò leh, chiū-sı̄ ta̍k pái in sió-bē nā chio goá khı̀ in tau thit-thô, i chhùi chiū lı̍h-leh lı̍h-leh, kiâⁿ lâi kap goá kóng-oē.
Bo̍k-su-niû: Ài-ah, lí sı̍t-chāi chin hó-táⁿ, iā káⁿ kap ta-po͘ lâng kóng-oē, goá thiaⁿ tio̍h chin m̄ koàn-sı̀.
Ha̍k-kiong: M̄, thái ū lâng chhin-chhiūⁿ lí, 30 nı̂ chêng Liāu Bûn-gē in a-ko͘ khı̀ lín chhù kā lí choè chhin-chiâⁿ ê sı̂, lí thiaⁿ tio̍h chı̍t-kù, cháu-khı̀ bih 3 jı̍t m̄-káⁿ chhut-lâi chia̍h-pn̄g, sı̍t-chāi thài hó-chhiò lah. Sūn-ài: Kin-á-jı̍t goán ê pit-gia̍p-sek, Kok-phoan mā choè in sió-bē ê ka-tiúⁿ tāi-piáu lâi hù sek, choè sek liáu kap goán choè-hoé kiâⁿ chhut ha̍k-hāu mn̂g, hō͘ ha̍k-seng ta̍k ê chhiò kah ha̍h-ha̍h-kiò, hāi goá bı̄n lóng m̄-káⁿ kia̍h khí-lâi, kiàn-siàu kah bô tàng cháu khı̀ bih.
Ha̍k-kiong: Goá lóng bêng-pe̍k lah, Ài-ah, lí tùi chit chân chhin-sū ū kah-ı̀ bô? Kó͘-chá choè chhin lóng sı̄ kun-kù mûi-lâng ê oē kap pē-bú ê bēng-lēng chiū sêng, hiān-chāi í-keng bô siāng lah. Lâm lú siang-hong lóng sio-bat, koh tio̍h ū saⁿ ı̀-ài chiah oē sêng.
Sūn-ı̀: A-pa, a-bú, goá khoàⁿ Ài-ah bô ı̀-kiàn, lín nn̄g lâng kā phah-sǹg chiū hó.
Ha̍k-kiong: Kám-siā Siōng-tè, chit ê chhin-sū koat-tēng oē sêng lah. Án-ni, goá 3 ê cha-bó͘-kiáⁿ lóng kè hō͘ Ki-tok-tô͘ ê i-seng, sı̍t-chāi Siōng-tè thiàⁿ goá, thoè goá an-pâi chin hó-sè.
Sūn-ı̀: Ài-ah, kiong-hí! lēng-jı̍t tio̍h siá phoe hō͘ Khok-thâu-á Kok-phoan á, kiò i lâi thit-thô, hō͘ tāi-ke khoàⁿ-khoàⁿ--leh. (Khí-sin kiâⁿ oá toh). Goá koāⁿ chit chiah jı̂n-sam pó͘-io̍h-chiú koe káⁿ léng-khı̀ lah, lán tāi-ke koáⁿ-kín lâi chia̍h.
Tē 3 Bō͘: Ha̍k-kiong Bo̍k-su 80 chiok-siū. Bo̍k-su kheh-thiaⁿ.
Pò͘-tı̀: Kap tē II bō͘ sio-siāng, cheng-ka í-toh kúi tè.
Chhut-tiûⁿ jı̂n-bu̍t: Keh Tiâu-sêng, N̂g Bú-tong lióng bo̍k-su, Ha̍k-kiong Bo̍k-su hu-hū, Sūn-ı̀, Sūn-ài, Toā kiáⁿ-sài Iûⁿ Chài-sêng, jı̄ kiáⁿ-sài Gô͘ Kok-phoan, sun Tong-bō͘, Khé-bûn.
Tong-bō͘: A-kong, kiong-hí siⁿ jı̍t lāu khong-kiān ! Keh Bo̍k-su, N̂g Bo̍k-su pêng-an. A-kong, goá tùi Jı̍t-pún boé chı̍t su siōng hó ê iûⁿ-mn̂g ê lāi-saⁿ khò͘ tńg-lâi hō͘ a-kong, koâⁿ-thiⁿ chhēng hō͘ boē koâⁿ.
Ha̍k-kiong : Àu-lo̍k-á , lí chin koai, chin khó-chhú, chin to-siā.
Khé-bûn : A-kong, a-má kiong-hí lāu khong-kiān ! Keh Bo̍k-su, N̂g Bo̍k-su pêng-an.
Ha̍k-kiong : Àu-lo̍k-á , lí iā tò-lâi sı̄ bô ? lí taⁿ tı̄ Tâi Tāi I-ha̍k-ı̄ⁿ kúi liân lah ?
Khé-bûn : Í-keng 3 liân lah , chit-pang tit-tio̍h 500 kho͘ ê chióng-ha̍k-kim, só͘-í goá boé chit pau lé-mı̍h lâi sàng a-kong, a-má hō͘ lín hoaⁿ-hí.
Ha̍k-kiong: Àu-lo̍k-á, lí sı̍t-chāi chin gâu, chin khó-chhú, chin to-siā. Tong-bō͘, Khé-bûn, lín nn̄g lâng bô kú lóng beh choè i-seng, lín tio̍h ài kèng-ùi Siōng-tè, o̍h Iâ-so͘ ê thiàⁿ lâng , lín ê i-gia̍p, lín ê jı̂n-seng tek-khak sêng-kong hēng-hok.
Keh Bo̍k-su: Taⁿ lán tāi-ke ūi-tio̍h lāu bo̍k-su ê chiok-siū lâi kám-siā lé-pài, lâi gı̂m Sèng-si 62 siú, lāu bo̍k-su tùi chit siú si lâi tit-tio̍h tō-lí sı̀n Iâ-so͘, i chin ài gı̂m chit siú, chhiáⁿ tāi-ke lâi gı̂m ( gı̂m liáu ) lâi khoàⁿ Chhut Ai-kı̍p-kı̀ 20 : 3-6 chat. Lı̂m Bo̍k-su, bo̍k-su-niû kiong-hí Siōng-tè siúⁿ-sù Lı̂m Bo̍k-su sin-thé kiān-khong, cheng-sı̂n pá-chiok lâi ngiâ-chih 80 hè, sı̍t-chāi chin thang kiong-hí khoài-lo̍k kám-siā ê só͘-chāi, Siōng-tè sù-hok siúⁿ-sù bo̍k-su 3 ê chhian-kim, 3 ê gâu koh hó ê kiáⁿ-sài, chiâⁿ 10 ê sun-á lóng sı̄ chin koai, chin gâu tha̍k-chheh, bo̍k-su , bo̍k-su-niû tek-khak chin boán-chiok , hoaⁿ-hí kám-siā Siōng-tè chiah tio̍h. Chit pak Cha̍p-tiâu-kài sı̄ bo̍k-su chin-pit siá--ê , siá liáu hui-siông súi,thang kóng sı̄ tı̀n-ka-pó. Tē 2 tiâu-kài kóng thiàⁿ Goá, siú Goá ê kài-bēng ê , Goá si-un hō͘ i kàu chheng pah tāi. Siōng-tè ê iok-sok èng-ún choa̍t-tùi bô chhò. Lāu bo̍k-su sı̀n Chú liáu, sui-jiân hō͘ i ê hiaⁿ-ko kòng, phah, that, ēng thih-liān liān toà toh-kha , tiàu chiūⁿ chhiū-téng 5 jı̍t iáu-kú bô sí , Siōng-tè siúⁿ-sù i tn̂g hè-siū lâi hióng-siū nı̂-lāu ê hok-khı̀, sı̍t-chāi hō͘ lán thang him-bō͘ thang o̍h ê só͘-chāi. Chit-tia̍p ài chhiáⁿ N̂g Bo̍k-su lâi kóng lāu bo̍k-su ê sū-chek, hō͘ lán ta̍k lâng oē thang koh-khah bêng-pe̍k, thang hō͘ lán éng-kiú siàu-liām.
N̂g Bú-tong Bo̍k-su : Lı̂m Bo̍k-su, bo̍k-su-niû kiong-hí ! Tāi-ke kiong-hí! Lı̂m Bo̍k-su sı̄ goá choè chun-kèng tē it tāi khó-tio̍h kàu-su ê, tı̄ Chiong-hoà kàu-hoē choè 4 nı̂ thoân-tō, choè 16 nı̂ ê bo̍k-su, kàu 70 hè chiah thè-hiu choè chū-iû ê thoân-tō-jı̂n. I tha̍k Sı̂n-ha̍k-hāu 4 nı̂, sêng-chek choè hó pit-gia̍p. I lâi thiaⁿ tō-lí sı̀n Iâ-so͘ sı̄ 26 hè ê sı̂, ū chı̍t pái khı̀ kiáu-iú Keh Séng hiaⁿ ê chhù, khoàⁿ tio̍h toh-téng chı̍t pún Ióng-sim-sı̂n si, chı̍t-ē hian khí-lâi khoàⁿ, khoàⁿ tio̍h Siōng-tè chhòng-chō thiⁿ kap toē, siⁿ-chiâⁿ bān-mı̍h ta̍k hāng oē. Khoàⁿ liáu tio̍h chhiⁿ-kiaⁿ, in-ūi i só͘ tha̍k ê Sù-su Ngó͘-keng bô tàng chhē chhut chit khoán ê oē , chiū mn̄g Keh Séng hiaⁿ thái ū chit khoán chheh, Keh Séng hiaⁿ kā i kóng, sı̄ Iâ-so͘ kàu ê Sèng-si,bo̍k-su thiaⁿ tio̍h Iâ-so͘-kàu 3 jı̄, chiū hiâm Séng hiaⁿ khı̀ lo̍h-kàu, iā sūn-soà beh chio i khı̀ khoàⁿ hı̀, poa̍h-kiáu,chóng-sı̄ Séng hiaⁿ kā i kóng, kiáu í-keng kái lah, m̄-káⁿ koh poa̍h lah. Goân-lâi Lı̂m Bo̍k-su sı̄ chia̍h toā chiú, poa̍h toā kiáu ê lâng , chai-iáⁿ chit nn̄g hāng lóng sı̄ m̄-hó ê tāi-chı̀, ài beh kái-chèng sı̄ bô hoat-tō͘. Séng hiaⁿ soà tian-tò chio i khı̀ Ka-gı̄ lé-pài-tn̂g chhē Gô͘ Ì Thoân-tō-su, chhéng-kàu Iâ-so͘ Siōng-tè ê sū. Lé-pài-jı̍t chı̍t-ē kàu, kó-jiân nn̄g lâng sio-chio kiâⁿ 8 lí lō͘ khı̀ Ka-gı̄ lé-pài-tn̂g, tú-tú thoân-tō sian-síⁿ kóng Siōng-tè kàng toā hé sio-sí choē-ok koàn-boán ê Só͘-to-má, Ngô͘-mô͘-la̍h nn̄g ê siâⁿ ê lâng ê sū. Lı̂m Bo̍k-su thiaⁿ liáu chin kiaⁿ-hiâⁿ, chin kám-kek, soà hoán-hoé sı̀n Iâ-so͘. I sui-jiân sı̀n Chú liáu-āu tú-tio̍h ka-têng ê khún-tio̍k, hō͘ lâng koáⁿ chhut, chóng-sı̄ siū Gô͘ Ì Sian-siⁿ ê hó-ı̀, kài-siāu beh khı̀ Giâm-chêng kàu-hoē kà Sió-o̍h, thǹg chhiah-kha teh kiâⁿ-lō͘ ê sı̂, tú-tio̍h hoē-iú Gô͘ Khı̂m hiaⁿ, Gô͘ Khı̂m hiaⁿ thiaⁿ liáu i ê kéng-gū kap chai-iáⁿ i ê sòng-hiong khùn-khó͘, sûi-sı̂ chiong só͘ chhēng ê oê thǹg khí lâi hō͘ i chhēng, iā sàng i 400 chı̂ⁿ, chiah tāi-ke saⁿ-sı̂ lı̄-pia̍t, 27 hè chiah lâi Tâi-lâm tha̍k Sı̂n-ha̍k-hāu, tha̍k kàu 3 liân ê sı̂, siū kéng-soán khı̀ choè choân Tâi boē Sèng-keng ê kang-chok chı̍t nı̂.
Iûⁿ Chài-sêng : N̂g Bo̍k-su, lí kiám chai-iáⁿ goán a-pa teh boē Sèng-keng hok-im chheh só͘ tú-tio̍h ê tāi-chı̀, chhin-chhiūⁿ tı̄ Pang-liâu, Tō͘-kun-eng lé-pài-tn̂g, Kiâm-chúi-káng, Chheng-chúi ( Gû-mā-thâu ). A-kong-tiàm khoe hiah ê tāi-chı̀ ?
N̂g Bo̍k-su: Lín tiūⁿ-lâng ū chı̍t jı̍t boē Sèng-keng kàu Pang-liâu, jı̍p-khı̀ chı̍t keng Hàn-io̍h-tiàm boē, io̍h-tiàm thâu-ke miâ choè Lı̂m Jū, chin hó-ı̀ chiong i só͘ boē ê chheh boé liáu-liáu, chı̂ⁿ iā sǹg liáu, kàu chı̍t-ē hian chheh khí-lâi khoàⁿ, khoàⁿ tio̍h Iâ-so͘ nn̄g jı̄, sûi-sı̂ chiong chheh lóng tı̀m hiat-ka̍k, chheh chı̂ⁿ koh chhiúⁿ tò-tńg, kha-chiⁿ kûn-thâu tı̍t cheng, tı̍t that, that chhut tiàm-goā, Lı̂m Bo̍k-su bô kap i kè-kàu, Sèng-keng, chheh khioh-khioh leh, hit mı̂ toà tı̄ io̍h-tiàm tùi-bı̄n ê hoàn-á-keng. Bô phah-sǹg, keh thiⁿ-kng khoàⁿ-kı̀ⁿ io̍h-tiàm lāi-bı̄n lâng khàu kah i-o-kiò, thiaⁿ lâng kóng cha-mı̂ Lı̂m Jū bô pı̄ⁿ sí khiàu-khiàu, hō͘ lín tiūⁿ-lâng chin gông-ngia̍h. Tı̄ Kiâm-chúi-káng pò͘-tō boē Sèng-keng ê sı̂ , iā ū siū tio̍h siⁿ-hūn-lâng boé Sèng-keng, chhiáⁿ lín tiūⁿ-lâng chia̍h-pn̄g, koh sàng 400 chı̂ⁿ hō͘ i, chin kám-kek. Tı̄ Tō͘-kun-eng lé-pài-tn̂g kè mı̂ ê sı̂,hit mı̂ chin joa̍h, thǹg-pak-theh teh khùn, poàⁿ-mı̂ kám-kak tio̍h heng-khám tāng-tāng teh lè, chı̍t-ē bong chiah chai-iáⁿ sı̄ chı̍t bé toā-choâ kui khûn teh tı̄ heng-khám, lín tiūⁿ-lâng kā lia̍h tı̀m hiat-ka̍k, pêng-an bô tāi-chı̀. Kàu tı̄ Chheng-chúi toà lú-koán, poàⁿ-mı̂ ı̂m-hū thau jı̍p-lâi i ê pâng-keng bı̂n-chhn̂g chio i choè pháiⁿ, lín tiūⁿ-lâng giâm-giâm kā chek-pı̄, chiong ı̂m-hū koáⁿ chhut-khı̀, mn̂g chhoàⁿ lè. Put-kò, tı̄ A-kong-tiàm khoe ê tāi-chı̀ goá m̄-chai, chhiáⁿ Iûⁿ Sian-siⁿ lí kóng.
Iûⁿ Chài-sêng: Goán tiūⁿ-lâng ū chı̍t jı̍t lo̍h toā-hō͘, tiòng toā-chúi, chē tek-pâi beh kè A-kong-tiàm khoe ê sı̂, tek-pâi tı̍t-tı̍t hō͘ khoe-chúi teh-beh lâu chhut hái ê sı̂, goán tiūⁿ-lâng kūi tı̄ tek-pâi téng kı̂-tó, hut-jiân-kan khí chı̍t tı̄n toā-hong, chiong tek-pâi-á chhe lâi khò khoe-hoāⁿ, tit-tio̍h pêng-an kè khoe.
Gô͘ Kok-phoan: N̂g Bo̍k-su. lí chai goán tiūⁿ-lâng tùi An-pêng chē chûn beh khı̀ phı̂ⁿ-ô͘ thoân-tō, kap tùi Phı̂ⁿ-ô͘ tńg-lâi beh khı̀ Chiong-hoà i-koán thoân-tō ê sı̂ só͘ tú-tio̍h ê sū bô ?
N̂g Bo̍k-su : Chit nn̄g hāng goá lóng m̄-chai, put-kò goá chai i ū hō͘ Jı̍t-pún kun kiông-pek kap Jı̍t-pún hái-kun tùi Pò͘-tē-chhùi chiūⁿ-lio̍k lâi chiàm-niá Tâi-oân. Tong-sı̂ Tiong Jı̍t chiàn-cheng, Chheng-kok toā pāi, poê-siông Jı̍t-pún chı̍t ek poeh chheng bān niú gûn kap koah Tâi-oân Phı̂ⁿ-ô͘ hō͘ Jı̍t-pún, Lı̂m Bo̍k-su kiù liáu chin-choē lán ê tông-pau sı̄ sū-sı̍t, Jı̍t-pún kun su-lēng-koaⁿ chin ài Lı̂m Bo̍k-su lâi pang-bâng in, chóng-sı̄ lín tiūⁿ-lâng tùi Jı̍t-pún kun su-lēng-koaⁿ kóng, “Goá í-keng chiong-sin hiàn hō͘ Iâ-so͘, kui-sı̀-lâng m̄-káⁿ ûi-poē I ê un,” soà hō͘ su-lēng-koaⁿ mē ba-kah, chiū kap su-lēng-koaⁿ lı̄-khui tńg-khı̀ Phı̂ⁿ-ô͘, í-goā ê sū goá m̄-chai.
Gô͘ Kok-phoan: Goán tiūⁿ-lâng kap su-lēng-koaⁿ saⁿ-sı̂ ê sı̂ , su-lēng-koaⁿ 10 ê lêng-gûn hō͘ i. I chiū tùi An-pêng chē chûn beh tńg-khı̀ Phı̂ⁿ-ô͘, bô phah-sǹg tú-tio̍h toā hong-éng , chûn tı̄ hái-tiong 10 goā mı̂ jı̍t, iā bô bí, bô chúi, kui chûn ê lâng hiám-hiám sí toà hái-tiong, chóng-sı̄ tit-tio̍h Siōng-tè ê un-tián pêng-an kàu Má-keng, tı̄ goán ê pún só͘-chāi lóng-chóng hoāⁿ saⁿ keng kàu-hoē, kàu Mûi Bo̍k-su khı̀ Phı̂ⁿ-ô͘ ê sı̂, kap Mûi Bo̍k-su saⁿ-kap thoân hok-im. Mûi Bo̍k-su tńg-lâi Chiong-hoà liáu, chiah tùi Tâi-lâm Kàu-sū-hoē iau-kiû goán tiūⁿ-lâng tio̍h khı̀ Chiong-hoà i-koán thoân-tō. I tùi Phı̂ⁿ-ô͘ tńg-lâi Tâi-lâm beh khı̀ Chiong-hoà ê sı̂, kap Liâm Bo̍k-su í-goā nn̄g lâng, sui-jiân tit-tio̍h 4 miâ ê Hiàn-peng pó-hō͘ tâng-kiâⁿ, chóng-sı̄ tı̄ poàⁿ-lō͘ hō͘ thó͘-húi ûi teh , chiong só͘ toà ê hêng-lí chhiúⁿ liáu-liáu, chóng-sı̄ sûi-sı̂ tit-tio̍h Jı̍t-pún peng toà 40 goā lâng lâi kiù, thó͘-húi pàng-sak só͘ chhiúⁿ ê mı̍h cháu liáu-liáu, āu-lâi chiah pêng-an kàu i-koán.
N̂g Bo̍k-su : Gô͘ Sian-siⁿ, chin to-siā, chit chām ê tāi-chı̀ bô lí kóng goá soà m̄-chai. Lı̂m Bo̍k-su, m̄-chai lí tùi lí ê jı̄ hiaⁿ sím-mı̍h khoán ê sim-chêng.
Ha̍k-kiong : Goá sui-jiân hō͘ goá ê jı̄ hiaⁿ hāi bô sí , chóng-sı̄ goá ūi-tio̍h goá ê jı̄ hiaⁿ kı̂-tó 15 nı̂, āu-lâi goá ê jı̄ hiaⁿ iā khı̀ Tâi-lâm kà Sió-o̍h,iā hoán-hoé sı̀n Iâ-so͘. I sui-jiân khah chá sí, i beh sí ê sı̂ ū kiò-i ê kiáⁿ tio̍h kui-sı̀-lâng sı̀n Iâ-so͘.
N̂g Bo̍k-su : Lı̂m Bo̍k-su chóng-kiōng ūi Chú chò-kang 40 nı̂, sı̍t-chāi sı̄ hō͘ lán Tâi-oân kàu-hoē chin thang siàu-liām ê sū. Goān Chú chiok-hok lāu bo̍k-su, bo̍k-su-niû kin-āu sin-thé kiān-khong, cheng-sı̂n pá-chiok, pek-nı̂ kai-ló sı̄ goá ê sim-goān.
Chhiáⁿ tāi-ke lâi gı̂m-si, 431 siú.
（Pı̀-Bō͘) Oân
(Tâi-oân Kàu-hoē Kong-pò tē 993-994 hō, 1966 nı̂ 11 ge̍h)
