Má: Tân--ke bo̍k-su-niû! tio̍h lí lah, lí sı̄ án-choáⁿ tio̍h hiah kan-khó͘ lâi beh choè poē chó͘ bōng chong, kúi-kúi koài-koài ê Er-mau-chu, lí khoàⁿ! Lí hāi-sí lí ê kiáⁿ, kiám iā beh hāi sí lí ê cha-bó͘-kiáⁿ kap lí ka-kı̄ mah? Sím-mı̍h Iâ-so͘ m̄ Iâ-so͘, goá khoàⁿ lí ia̍h sı̄ pài chı̍t pài. kóng chı̍t kù hó bô? kiám m̄-sı̄ lóng oē-tàng tit-kiù lah mah!
Lāu-bú: Tit-kiù! Lín kiám chai sím-mı̍h sı̄ tit-kiù? Hoān-nā sı̀n-khò lán ê Chú Iâ-so͘ Ki-tok, I tèng tı̄ sı̍p-jı̄-kè téng, ūi-tio̍h lán ê choē sí, he chiū-sı̄ tit-kiù, Jı̂-chhiáⁿ........
Io: Jı̂-chhiáⁿ sím-mı̍h! lāu-toā! m̄-bián thiaⁿ chiah lô-so, pài m̄-pài.
Lāu-bú: Pài! pài sím-mı̍h! ǹg sím-mı̍h lâng kūi-pài, tû-liáu lán ê Chú Iâ-so͘ í-goā, sím-mı̍h lâng iā boē-oē kà goá pài !
Má: Heh-eh! m̄-bat hó-pháiⁿ, m̄-thiaⁿ khó͘-khǹg, m̄ kiaⁿ sí !
Lāu-bú: Sí ! goá ê Chú Iâ-so͘ kóng, “Hit ê thâi seng-khu boē-oē thâi lêng-hûn--ê, m̄-bián kiaⁿ in,” lín lia̍h choè the̍h to, the̍h kiàm, chiū thang háⁿ goá pàng-sak goá ê Chú Iâ-so͘ mah? Sí ah! sí ! hoán-tńg thang hō͘ goán khah chá khı̀ kı̀ⁿ thiàⁿ goán ê Chú, tı̄ I hia, chin khoài-lo̍k bô pí.
Má: Chin khoài-lo̍k bô pí ! hó! tāng chhiú!（nn̄g ê siaⁿ chhiⁿ-chhám âu-kiò,chèng-lâng thó͘-khùi ê siaⁿ, im-ga̍k hāu-kó) (choán-tiûⁿ, khui-chhia).
Bo̍k: (Ba̍k-sái sı̀-lâm-sûi)kûn-húi ēng chı̍t ki tn̂g chhiuⁿ chha̍k goá ê lāu-bú kap sió bē ê heng-chêng thàu kè ka-chiah.
Tiuⁿ: Ai-ò.....Ai-ò.......
Ông: Ai-ò.....chin khó-ò͘ⁿ！
Bo̍k:Che chiū-sı̄ goá chia̍h Iûⁿ-kàu só͘ chi-chhut ê tāi-kè (hi-seng) ka-sán ,sió-tı̄, sió-bē, lāu-bú.
Tiuⁿ: Lí lāu-lâng chin-chiàⁿ chia̍h che khó͘-thàng lah.
Ông: Í-āu ê chêng-hêng sı̄ án-choáⁿ?
Bo̍k: Húi-loān pêng-tēng í-āu, lāu-pē kap goá lóng tò-khı̀ kò͘-hiong, chhù lóng sio liáu-liáu, chhù-nih ê lâng iā bô khoàⁿ-kı̀ⁿ lah, goán tùi chı̍t ê chhin-ba̍k khoàⁿ-kı̀ⁿ hiān-tiûⁿ ê chêng-hêng ê lâng, chai-iáⁿ it-chhè ê keng-kè.
Tiuⁿ: In ê sin-si ū chhē tio̍h bô?
Bo̍k: Beh tó-ūi khı̀ chhē! tng-sı̂ in teh thâi lâng chhin-chhiūⁿ teh khà o͘-moâ, ku̍t chı̍t ê khiⁿ choân-pō͘ tâi toà hit lāi-bı̄n.
Ông: Thài chân-jím lah, í-āu lāu-lâng ū chhē tio̍h hiah ê hiong-siú bô?
Bo̍k: Hiong-siú! chhē tio̍h lah, he sı̄ nn̄g nı̂ í-āu ê tāi-chı̀.
Ông: Cháiⁿ-iūⁿ chhē tio̍h ê? Sàng gê-mn̂g pān in sı̄ bô?
Bo̍k: Chheng-tiâu bé bêng-pe̍k Se-iûⁿ ê sū-bū, chai-iáⁿ Se-iûⁿ bûn-jı̄ ê lâng bô choē, ū chı̍t ê Se-iûⁿ ki-koan ài goá tng hoan-e̍k choè keng-lí, chı̍t kò ge̍h oē-tàng niá nn̄g pah kho͘ lêng-á-gûn.
Ông: Ah! bô phah-sǹg ê hó thâu-lō͘.
Bo̍k:Chióng-sı̄ goá chı̍t-ē siūⁿ-tio̍h sió-tı̄ sió-bē, lāu-bú tú-tio̍h hāi ê chêng-kéng, chiū sim-tiong kek-tōng, goá iā eng-kai chiong goá ê sı̀ⁿ-miā oân-choân hōng-hiàn hō͘ goá ê Chú.
Tiuⁿ: Tùi án-ni lí lāu-lâng chiū.....
Bo̍k: Goá chiū sı̂-khı̀ hit ê chı̍t kò ge̍h nn̄g pah lêng-á-gûn ê Se-iûⁿ ê bō͘-e̍k-siong ,kam-goān choè chı̍t kò ge̍h siu-jı̍p bô kàu 20 kho͘ ê sòng-hiong thoân-tō, jı̂-chhiáⁿ goá iáu-kú te̍k-pia̍t soán-tēng chı̍t ê só͘-chāi －choè goá thoân-tō ê tē-it chām.
Ông: Sím-mı̍h só͘-chāi? (im-ga̍k), (choán tiûⁿ) , (tang ! tang ! lô siaⁿ).
Bo̍k: (Kòng lô).Pò͘-tō-hoē! Pò͘-tō-hoē! kim ê-àm 7 tiám, toē-tiám tı̄ chhoan-nih Sêng-hông-biō mn̂g-kháu, hoan-gêng tāi-ke lâi thiaⁿ, (tang ! tang ! lô siaⁿ).(Hong-khı̂m siaⁿ, hoē-chiòng chhiùⁿ té koa ê siaⁿ), (Lâi sı̀n Iâ-so͘ ! lâi sı̀n Iâ-so͘ ! lâi sı̀n Iâ-so͘ hiān-chāi !........)
Bo̍k: Chhiáⁿ kok-ūi àⁿ-thâu, goán tāi-seng lâi kı̂-tó Chû-pi ê Thiⁿ-pē , thiàⁿ lán ê Chú Iâ-so͘, goá kám-siā Lí, kin-á-jı̍t Lí ín-chhoā goá lâi kàu chit ê chng-siā. kiû Lí ê un-tián lı̂m-kàu chia ê múi chı̍t ê lâng ê tiong-kan, khún-kiû Lí ke-thiⁿ hō͘ goá thiàⁿ-sim, jím-nāi ê sim lâi pang-chān ho̍k-sāi chit chng-nih ê lâng, kiû Chú kap goán saⁿ-kap tı̄-teh, chiok-hok kim ê-hng ê pò͘-tō͘-hoē, khò Iâ-so͘ Ki-tok ê miâ. A-men.(Im-ga̍k sió-khoá thêng).
Bo̍k: Chhiáⁿ kok-ūi thiaⁿ goá tha̍k chı̍t toāⁿ Sèng-keng, tı̄ Má-thài Hok-im-toān 5 chiuⁿ 38 chat kàu 48 chat. Che sı̄ Iâ-so͘ tı̄ sè-kan ê sı̂, chhin-chhùi tùi lâng kà-sı̄ ê oē: ”Lín bat thiaⁿ-kı̀ⁿ ū oē kóng, Ba̍k-chiu pê ba̍k-chiu, chhùi-khí pê chhùi-khí; nā-sı̄ goá kā lín kóng, Bo̍k-tit kap pháiⁿ tí-te̍k; nā ū lâng siàn lí chiàⁿ-pêng ê chhùi-phoé, tò-pêng-ê ia̍h oa̍t hō͘ i. Ū lâng ài kò lí, the̍h lí ê lāi-saⁿ, goā-saⁿ ia̍h pàng hō͘ i. Ū lâng bián-kióng lí kiâⁿ chı̍t lí, chiū kap i kiâⁿ nn̄g lí. Tùi lí kiû ê, hō͘ i; beh kā lí chioh ê,bo̍h-tit oa̍t-cháu. Lín bat thiaⁿ-kı̀ⁿ ū oē kóng, Tio̍h thiàⁿ lí ê chhù-piⁿ, oàn-hūn lí ê tùi-te̍k; nā-sı̄ goá kā lín kóng. Tùi te̍k lín ê, tio̍h thiàⁿ in; khún-tio̍k lín ê, tio̍h thoè in kı̂-tó; hō͘ lín chiâⁿ-choè lín tı̄ thiⁿ-nih ê Pē ê kiáⁿ........(Hoē-chiòng chhiùⁿ té-koa ê siaⁿ)(choán-tiûⁿ)
Io: (To̍k ! to̍k ! Phah mn̂g ê siaⁿ). Lāu Má kín khui mn̂g.
Má: (Khui mn̂g). Sı̄ sím-mı̍h lâng?
Io: Toā sū bô hó!
Má: Sím-mı̍h tāi-chı̀, m̄-bián chhiⁿ-kông,bān-bān-á kóng.
Io: Lán chng-nih kin-á-jı̍t thoân Iûⁿ-kàu ê lâng lâi, lí chhai khoàⁿ sı̄ sím-mı̍h lâng?
Má: Sı̄ sím-mı̍h lâng? khah kín kóng!
Io: Tân Bo̍k-su ê toā-kiáⁿ, iáu oē kı̀-tit boē? Taⁿ beh án-choáⁿ?
Má: Lí sı̄ án-choáⁿ chai-iáⁿ?
Io: Chai-iáⁿ! goá ū khoàⁿ-kı̀ⁿ leh.
Má: Khoàⁿ-kı̀ⁿ, sı̄ tı̄ tó-ūi?
Io: Ē-po͘ ū lâng tı̄ goā-kháu kòng-lô, kóng sı̄ sím-mı̍h pò͘-tō-hoē, hā-ngó͘ 7 tiám tı̄ chng-nı̍h ê Sêng-hông-biō kháu, lí kiám ū thiaⁿ-tio̍h?
Má: Ū thiaⁿ-tio̍h, iā ū thiaⁿ-tio̍h siaⁿ, m̄-kú pı̂n-toāⁿ khı̀ hia khoàⁿ.
Io: Sı̄ lah, goá iā chí-ū khoàⁿ-khoàⁿ leh, lō͘-piⁿ ū lâng kí goá kóng, Chit ūi kòng-lô thoân-kàu ê, chiū-sı̄ goán kè-khı̀ thâi-sí i ê lāu-bú, sió-tı̄, sió-bē ê Tân Bo̍k-su ê toā-kiáⁿ.
Má: Ah! Chiah-nih tú-hó.
Io: Kàu ê-àm chhit tiám, thàn àm-àm,goá iā kiâⁿ kàu Sêng-hông-biō mn̂g-kháu, hn̄g-hn̄g khiā teh thiaⁿ i kóng sím-mı̍h!
Má: I kóng sím-mı̍h?
Io: Goá kan-ta khiā tı̄ hn̄g-hn̄g thiaⁿ bô chin chheng-chhó, sím-mı̍h oàn-hūn tùi-te̍k, thiàⁿ tùi-te̍k.
Má: (Tiām-tiām siūⁿ). Lán soà boē tàng bih kúi-jı̍t-á, lán chhù-nih ê lâng beh án-choáⁿ? Koh i kı̀-jiân sı̄ ū sim beh lâi ê, soà m̄-sı̄ tiāu-cha pò͘-tı̀ hó lah, goá khoàⁿ lán tô-cháu iā boē tàng thoat-chhut i ê chhiú.
Io: Nā án-ni, lán beh cháiⁿ-iūⁿ?
Má: Oh! goá siūⁿ, kı̀-jiân i lâi lah, sı̄ án-choáⁿ bô tāi-seng hē-chhiú lia̍h goán?
Io: Kı̂-koài ! goá ; á-sı̄ siūⁿ án-ni.
Má: Tāi-chı̀ kàu án-ni, hoân-ló iā bô lō͘-ēng, lán seng bih kúi-jı̍t-á chiah koh kóng, chí-hó chhut-chāi i khı̀. (Im-ga̍k sió-khoá thêng).
Io: Lāu Má, í-keng kè 10 jı̍t lah, cháiⁿ-iūⁿ liân chı̍t-sut-á tōng-chēng to bô?
Má: Aih! goá kóng lah, bô sím-mı̍h éng-hióng, khoàⁿ chit ê khoán ná chhin-chhiūⁿ m̄-sı̄ beh lâi pò-siû ê.
Io: Thiaⁿ kóng chit 10 jı̍t lâi, hit ê Tân--ka toā-kiáⁿ piàn-kiâⁿ kui chng, hô-khı̀ ái-ái, khó͘-khǹg lâng sı̀n Iâ-so͘, chng-nih ê lâng lóng chhiáⁿ i chia̍h-pn̄g, tùi-thāi i chin hó.
Má: M̄-chai i ū khı̀ goán chhù-nih bô?
Io: Ū, khı̀ kúi-nā pái, koh hō͘ hiah ê gín-ná chı̍t-koá thn̂g-á kap ang-á-tô.
Má: (Siūⁿ chı̍t-ē). Chiàu goá khoàⁿ, lâng chin-sı̍t sı̀n Iâ-so͘, m̄-sı̄ ūi-tio̍h sím-mı̍h pò-siû, taⁿ lâi kóng, lán í-chêng tùi in só͘ choè iā sı̍t-chāi chin bô thian-liông.
Io: I iáu-kú án-ni tùi-thāi lán, goá ê sim iā kám-kak boē tàng kè, lán beh cháiⁿ-iūⁿ?
Má: Taⁿ tio̍h án-ni, lán tio̍h chhiáⁿ choân-chng ê lāu-toā hiân-jı̂n (thâu-lâng) pān kúi tè chiú-toh, pàng kúi ko ê liân-phàu kā in pê-choē, kam-goān chiap-siū in ê hêng-hoa̍t.
Io: Beh mē, beh phah, beh thâi, goá lāu Io lóng chhut-chāi i, koat-toàn bô the-sı̂ kam-goān sêng-siū.
Má: Hó, lán chiū án-ni choè. (Im-ga̍k) (Choán-tiûⁿ phàu siaⁿ, lâng siaⁿ toā nāu-jia̍t).
Má: Lâi lah, lâi lah, Tân--ka toā siàu-iâ lâi lah.
Io: Toā siàu-iâ, Iâ-so͘ Sian-siⁿ, chhiáⁿ lí chē.
Bo̍k: Má Sian-siⁿ, lí thái tio̍h hiah kang-hu, ke khai chı̂ⁿ.
Má: Bô no͘h, bô no͘h, kúi toh po̍h chiú chho͘-chhài, lio̍h-á piáu-sı̄ tiám-sim ê ı̀-sù.
Bo̍k: Kok-ūi a-peh, a-chek chhiáⁿ chē, boē kham-tit, boē kham-tit. (Chèng-lâng ê siaⁿ) Toā siàu-iâ chhiáⁿ chē.
Io: ( Phâng tê). Toā siàu-iâ, chhiáⁿ ēng tê.
Bo̍k: To-sāi, to-siā.
Io: (The̍h hun). Toā siàu-iâ, chhiáⁿ suh hun.
Bo̍k: To-siā, goá bô chia̍h hun.
Má: Toā siàu-iâ, kin-á-jı̍t to-siā lí sióng-kong, tú-hó chng-nih ê chu-ūi tióng-poè iā chāi chō, goá kè-khı̀ choè ê tāi-chı̀ sı̍t-chāi tāng choē kai sí.
Io: Goá lāu Io iā eng-kai sí.
Má: Lí Toā Siàu-iâ, sio̍k-gú kóng tit hó, cháiⁿ-siòng pak-tó͘ lāi hó sái chûn........
Io: Tāi-jı̂n bô kı̀ siáu-jı̂n ê kè-sit.
Má: Lāu Io, m̄-bián chhap, thiaⁿ goá kóng....lí toā siàu-iâ, chin to-siā lí khoan-sù goá Má Toā-thâu chit tiâu miā, goá kim-sè, lâi-sè, lóng bô boē kı̀-tit lí ê toā un, toā tek.
Bo̍k: Kóng sím-mı̍h? Má Sian-siⁿ, kè-khı̀ ê tāi-chı̀ iā m̄-bián oàn lí, he sı̄ Mô͘-kúi tı̄ lí ê ba̍k-chiu, kà lí kiâⁿ tı̄ o͘-àm, só͘ choè ê m̄-sı̄ chhut tùi ka-kı̄ ê sū, koh iā m̄-sı̄ lí chı̍t ê lâng ê sū, sū-chêng kı̀-jiân kè-khı̀ chiū hō͘ i kè-khı̀, lán bô pit-iàu kóng lah.
Má: (Lâu ba̍k-sái). Chóng-sı̄ goá sim-lāi sı̍t-chāi boē tit kè, goá beh tng chiah ê chng-nih tióng-poè ê bı̄n-chêng, kā lí kha̍p thâu, kam-goān pê choē, beh lâi thiaⁿ toā siàu-iâ só͘ hoan-hù ê.
Io: Goá lāu Io hiòng toā siàu-iâ lí kha̍p chı̍t pah pái thâu.
Bo̍k: He boē ēng-tit, he boē ēng-tit, chhian-bān m̄-thang án-ni, chāi lán it-poaⁿ ê khoàⁿ khí-lâi, lí kè-khı̀ sat-hāi goá ê lāu-bú, sió-tı̄, sió-bē eng-kai kā goá pê choē, chóng-sı̄ lán tı̄ Chú Iâ-so͘ ê bı̄n-chêng lóng sı̄ choē-jı̂n, in-ūi Sèng-keng kóng, Sè-kan lâng lóng hoān-choē, khui-khiàm Siōng-tè ê êng-iāu,chí-ū lán jı̄n ka-kı̄ ê choē, Siōng-tè sı̄ sı̀n-sı̍t ê, sı̄ kong-gı̄ ê, tek-khak beh sià-bián lán ê choē, soé chheng-khı̀ lán it-chhè ê put-gı̄ .
Má: Iâ-so͘ oē sià-bián goán ê choē á boē?
Bo̍k: Oē, oē, I tı̄ sı̍p-jı̄-kè téng, ūi lán sí,ūi lán choē-ok ê kang-chı̂ⁿ, hù chhut liáu sí, I lâu ê pó-huih, thang soé-chheng lán it-chhè ê choē-koà, hoān-nā kàu I bı̄n-chêng lâi ê, I chı̍t ê iā bô pàng-sak, chí-ū lí siong-sı̀n I.
Io: Goá beh sı̀n I, goá beh sı̀n I.
Má: Lāu Io, sı̄, lán tio̍h sı̀n-khò chit ūi kiù lán ê Iâ-so͘, thang tû-khı̀ lán ê choē-gia̍t,....toā siàu-iâ, chhin-chhiūⁿ goá chit khoán ê lâng kiám oē kham-tit?
Io: Toā siàu-iâ, chhin-chhiūⁿ goá chiah-nih pháiⁿ kiám iā oē kham-tit?
Bo̍k: Oē kham-tit, oē kham-tit, chin kám-siā lán ê Pē Siōng-tè Chú Iâ-so͘,kim-jı̍t hō͘ goá khoàⁿ-tio̍h Lí kı̂-biāu ê chok-ûi, Lí ke̍k-toā ê êng-iāu, Lí oē hō͘ bān lâng jı̄n-choē hoé-kái kui-ǹg Lí.(Chèng-lâng ê siaⁿ) Toā siàu-iâ chiàⁿ-sı̄ khoan-hông tāi-liōng, Iâ-so͘ Sian-siⁿ chin hó.
Má, Io: (Lâu ba̍k-sái) (hoaⁿ-hí). Toā siàu-Iâ, chin to-siā lí, koh khah kám-siā kiù goán ê Chú Iâ-so͘.
Bo̍k: M̄-bián khek-khı̀ lah, lóng tio̍h kám-siā lán ê Chú Iâ-so͘ (Choán ǹg tāi-chiòng). Kim-jı̍t ū lô-hoân chu-ūi sian-siⁿ ê tāi kà, sı̍t-chāi boē kham-tit, í-āu chhiáⁿ kok-ūi siông-siông kàu goá ê sió lé-pài-tn̂g lâi thiaⁿ hok-im.(Chèng-lâng ê siaⁿ) It-tēng, it-tēng lâi.(Im-ga̍k). (Choán-tiûⁿ hé-chhia khui ê siaⁿ).
Bo̍k: (Chêng-kám liû-lō͘). Ūi-tio̍h chit tiûⁿ ê sı̄-hui un-oàn, bô kàu chı̍t nı̂, hit chng-nih ê lâng lóng-chóng sı̀n Iâ-so͘ Sui-jiân goá sit-khı̀ liáu sió-bē, lāu-bú, chóng-sı̄ khiok tit-tio̍h hiah-nih choē sit-sòng ê lâng, goá ê sim chiū an-ùi lah, goá chai thiàⁿ goá ê Chú Iâ-so͘ ê sim, ia̍h tit-tio̍h moá-chiok.
Tiuⁿ: Lí lāu-lâng sı̍t-chāi chin úi-tāi.
Bo̍k: Ā ū, m̄-sı̄ khò goá ka-kı̄, goá boē sǹg tit sím-mı̍h, goá khò hit ê ke-thiⁿ hō͘ goá khùi-la̍t ê, hoān-sū lóng oē.
Ông: Chit 60 nı̂ lâi, lāu sian-siⁿ lóng kè-sio̍k choè thoân-kàu ê kang sı̄ bô?
Bo̍k: Sı̄, múi pái tng goá tú-tio̍h thoân-tō ê kang-chok siōng léng-tām, thè-āu, hoe-sim á-sı̄ sim-chı̀ siūⁿ beh kái kiâⁿ choè kı̂-thaⁿ kang-chok ê sı̂-chūn, siūⁿ tio̍h lāu-bú, sió-tı̄, sió-bē siū hāi ê chêng-kéng, sió chng-siā choân chng ê lâng kui Chú ê chêng-kéng, chiū tı̄ goá ê sim-lāi chhèng chhut hō͘ goá têng-sin tit-tio̍h khùi-la̍t, hùn-khí ūi Chú choè kang. Chit kúi cha̍p nı̂ lâi tit-tio̍h Chú ê un-tián, iā chhin-chhiūⁿ sù-tô͘ Pó-lô tı̄ sèng-keng kóng, Hit ê cheng-chiàn hó ê cheng-chiàn, goá taⁿ í-keng táⁿ-kè liáu ,tio̍h cháu ê lō͘ , goá í-keng cháu kè liáu, só͘ sı̀n ê tō-lí goá í-keng siú lah.
Tiuⁿ: Lí lāu sian-siⁿ ê kò͘-sū chin-chiàⁿ hō͘ goá siū kám-tōng, goá chin hoaⁿ-hí ,hó ūn tı̄ chhia-téng tú-tio̍h lāu sian-siⁿ.
Ông: Aih! che chin-chiàⁿ sı̄ thoân kı̂-khá ê kò͘-sū, í-āu goá iā beh kóng hō͘ pa̍t lâng thiaⁿ.
(Hé-chhia tân ê siaⁿ) (Im-ga̍k)
------------Oân-----------
(Tâi-oân Kàu-hoē Kong-pò tē 939-940,942-944 hō, 1964 nı̂ 8-10 ge̍h)
