Tē 8 Bō͘: Cheng-sı̂n pı̄ⁿ-ı̄ⁿ ê Hoē-kheh-sek.
Pò͘-tı̀:Í, toh lóng chiâu-pı̄, Sòng chhēng chéng-choê ê i-ho̍k kiâⁿ jı̍p sek-lāi, Hoâ Phok-sū, i-seng, hō͘-sū khiā--khí-lâi.
Hoâ Phok-sū: (Kap Sòng ak-chhiú). Sòng Phok-sū pêng-an! Bô phah-sǹg goá kap lí lı̄-pia̍t liáu-āu khı̀ Au-chiu, kàu cha-jı̍t chiah tńg-lâi, tú-tú sı̄ chı̍t nı̂, chit tiong-kan, sui-jiân siá chin-choē tiuⁿ phoe hō͘ lí, tān-sı̄ lóng bô chiap-tio̍h lí hoê phoe. Cha-jı̍t khı̀ Hia̍p-hô Sı̂n-ha̍k-ı̄ⁿ chhē ı̄ⁿ-tiúⁿ, chiah chai-iáⁿ lí tı̄ chia, thiaⁿ kóng í-keng 193 jı̍t lah. Siōng-tè pı̀-iū lí pêng an, chin kiong-hí.
Sòng Phok-sū: Hoâ Kàu-siū, chin to-siā, goá hō͘ siáu ı̄ⁿ-tiúⁿ kap siáu i-seng koaiⁿ toà siáu-lâng pı̄ⁿ-ı̄ⁿ, chiok-chiok 193 jı̍t, Tān-sı̄ goá tı̄ pı̄ⁿ-ı̄ⁿ tha̍k Sin Kū-iok ū 40 piàn, hō͘ goá tit-tio̍h Siōng-tè ê un-tián kap Sèng-keng tiong ê khé-sı̄ chin toā, kám-kak chin khoài-lo̍k kap kám-siā. Siáu i-seng chin to-siā. (Khiā khí-lâi kap I-seng ak-chhiú).
I-seng: Hoâ Phok-sū, m̄-chai lí khéng choè pó-chèng-jı̂n chhoā Sòng Phok-sū chhut-ı̄ⁿ bô ? Tān-sı̄ ū chı̍t ê tiâu-kiāⁿ ,chiū-sı̄ chhut-ı̄ⁿ āu má-siōng sàng Sòng Phok-sū chē chûn tńg-khı̀ Tiong-kok.
Hoâ Kàu-siū: Īⁿ-tiúⁿ goá khéng choè pó-chèng-jı̂n, chhiáⁿ lí sûi-sı̂ pān-lí chún Sòng Phok-sū chhut-ı̄ⁿ.
I-seng:（Hō͘-sū the̍h khah-phı̀ⁿ hō͘ i-seng, i-seng chhiam-jı̄). Sòng Phok-sū, goá chún lí chhut-ı̄ⁿ, kiong-hí.
Hoâ Hu-jin: Sòng Phok-sū kiong-hí, chhiáⁿ lâi-khı̀ goán tau kiâⁿ-kiâⁿ. (Tāi-ke ak-chhiú lı̄-khui).
Tē 9 Bō͘: Sòng Bo̍k-su kheh-thiaⁿ.
Pò͘-tı̀: Kap chhut kok chêng siāng-khoán.
Bō͘-āu ê hòng-sàng: Sòng Phok-sū lı̄-khui hiuⁿ-lí, pún-kok kap pē-bú í-keng 7 nı̂ poàⁿ. 1927 nı̂ 11 ge̍h 8 jı̍t, sin-khu chhēng chı̍t niá chho͘-pò͘ tn̂g saⁿ, chhiú koāⁿ hêng-lí tńg-lâi kò͘-hiong ta̍h jı̍p kheh-thiaⁿ.
Sòng Bo̍k-su: Lí sı̄ siáⁿ lâng?
Sòng Phok-sū: A-pa, goá sı̄ Iok-hān.
Sòng Bo̍k-su: Hò͘ ! Lí chiàⁿ-chiàⁿ sı̄ Chú-un, kó-jiân sı̄ khí khong, sím-mı̍h lí sı̄ Iok-hān.
Sòng Phok-sū: A-pa, í-chêng ê Chú-un í-keng sí-lah, hiān-chāi sı̄ ū oa̍h-miā ê Iok-hān tńg-lâi ê.
Lāu-bú: Chú-un, Chú-un, goá só͘ thiàⁿ ê kiáⁿ Chú-un, lí tńg-lâi lah. Kám-siā Chú ! O-ló Chú ! Goá koáⁿ-kín lâi thâi lí só͘ ài chia̍h ê koe, iā sūn-soà thong-ti Lı̂m Chhin-ke, chhiⁿ-ḿ kap Kím-hoâ lâi (lāu-bú thè chhut).
Sòng Bo̍k-su: Chú-un, lí chit kiāⁿ hêng-lí, í-goā iáu ū sím-mı̍h mı̍h-kiāⁿ bô?
Sòng Phok-sū: A-pa, goá só͘ ū ê mı̍h-kiāⁿ chiū-sı̄ chit ê hêng-lí, lāi-bı̄n sı̄ phoà koh kū ê saⁿ khò͘ nā-tiāⁿ, in-ūi goá só͘ tha̍k kè-khı̀ ê chheh it-chhè to sio-liáu lah.
Lı̂m Chhin-ke: Chú-un kiong-hí, lí Pêng-an tńg-lâi. (Nn̄g lâng ak-chhiú).
Sòng Phok-sū: A-pa, pêng-an! Kiong-hí !
Lı̂m Chhiⁿ-ḿ: Chú-un kiong-hí !
Sòng Phok-sū: A-bú, pêng-an! (tāi-ke ak-chhiú).
Sòng Phok-sū: Kím-hoâ pêng-an, chin to-siā, goá chhut kok tiong pē-bú tit-tio̍h lí ê pang-bâng, chin to-siā. (Nn̄g lâng ak-chhiú, Kím-hoâ lâu ba̍k-sái, Gô͘ Hāu-tiúⁿ kiâⁿ jı̍p-lâi).
Gô͘ Hāu-tiúⁿ: Sòng Phok-sū kiong-hí !
Sòng Phok-sū: Gô͘ Hāu-tiúⁿ pêng-an,(ak-chhiú, siāng-sı̂ lāu-bú phâng pn̄g chhài jı̍p-lâi, Kím-hoâ má-siōng kā pang-bâng, tāi-ke chē choè-hoé, Sòng Bo̍k-su khí-lâi kám-siā).
Sòng Bo̍k-su: To-siā Thiⁿ-pē Siōng-tè, goán ê chhùi tio̍h chheng-chàn Lí ê koân-lêng, Lí ê thiàⁿ-thàng, Lí ê lı̂n-bín hō͘ goán boē chhek-to̍k tit, lí siúⁿ-sù goá ê kiáⁿ-jı̂ Chú-un, 7 nı̂ poàⁿ kú chhut kok, kin-á-jı̍t pêng-an tńg-lâi ,choân-ke hoaⁿ-hí saⁿ-kı̀ⁿ, goán chhim-chhim kám-siā put chı̄n, kim-āu it-chhè ê sū kiû Lí kā goán an-pâi. Hiān-chāi goán beh hióng-siū Lí só͘ siúⁿ-sù ê it-chhè, bē hióng-siū ê tāi-seng khò Iâ-so͘ ê miâ kám-siā. À-bēng.（Tāi-ke chı̄n-la̍t chia̍h, chia̍h liáu-āu phok-sū khiā khí-lâi.）
Sòng phok-sū: Kèng-ài ê hāu-tiúⁿ, a-pa, a-bú kap chu-ūi. Goá kap lín lı̄-pia̍t 7 nı̂ poàⁿ, kim-jı̍t pêng-an tńg-lâi, khoàⁿ-kı̀ⁿ tāi-ke pêng-an, chin khoài-lo̍k, kám-siā Siōng-tè ê hông-un. Goá sui-jiân tı̄ Bí-kok tit-tio̍h Hoà-ha̍k Phok-sū, iā tit-to̍h Kim-sı̂ chióng-chiong. Tān-sı̄ phok-sū ê bûn-pı̂n kap chióng-chiong í-keng kā tı̀m lo̍h-khı̀ Thài-pêng-iûⁿ--lah, goá só͘ tha̍k-kè ê chheh choân-pō͘ kā sio liáu lah, chí-ū toà chı̍t pún, sı̄ goá tha̍k 40 piàn ê Sèng-keng tńg-lâi jı̂-í. Í-chêng ê Chú-un í-keng sí lah, hiān-chāi sı̄ Kiù-chú Iâ-so͘ kā goá kái miâ ê Iok-hān teh oa̍h. Kim-āu it-chhè lóng sı̄ thàn Chú ê bēng-lēng, chí-sı̄ lâi oa̍h jı̂-í.
Sòng Bo̍k-su: Chú-un, lí í-keng the̍h Phok-sū tńg-lâi, iā tio̍h thoè goá thàn chı̍t-tiám-á chı̂ⁿ lâi pang-chān ke-lāi ê seng-oa̍h-hùi, in-ūi hiān-chāi goá ê ge̍h-kip chiah ū 35 kho͘ nā-tiāⁿ.
Sòng Phok-sū: A-pa, goá tit-tio̍h Hoà-ha̍k Phok-sū ê sı̂. Pak-kiaⁿ Tāi-ha̍k ê I-ha̍k ı̄ⁿ-tiúⁿ ū phah tiān-pò lâi beh chhiáⁿ goá khı̀ kà chheh, nı̂-hōng beh chı̍t bān kho͘, goá ū kā I kū-choa̍t lah. Goá pit-gia̍p ê Tāi-ha̍k kiò goá khı̀ Pak-kiaⁿ Tāi-ha̍k, choan-kong hoà-ha̍k, goá ū kā i kū-choa̍t. Sè-kan it-chhè ê miâ, lı̄ goá bô iân, chí-ū ūi Chú thoân hok-im sı̄ goá it-seng ê sù-bēng.
Gô͘ Hāu-tiúⁿ: Sòng Phok-sū, lí ê miâ-siaⁿ thoân piàn Bí-kok, goá lóng chai-iáⁿ, put-kò hiān-chāi lí iáu-bē koat-tēng hong-chiam. Chiām-sı̂ lâi bú-hāu kà Hoà-ha̍k hó bô? Chū-jiân goá boē chó͘-chí lí hiòng ha̍k-seng thoân-tō ê sū.
Sòng Phok-sū: Kı̀-jiân hāu-tiúⁿ ê hó-ı̀, goá hoaⁿ-hí chiap-siū, chū-jiân goá iā ū ı̀-sù hiòng ha̍k-seng thoân-tō.
Lāu-bú: Chú-un, lí kin-á-jı̍t tńg-lâi, tāi-ke to sı̄ chin hoaⁿ-hí, lí í-keng 25 hè,Kím-hoâ iā sı̄ 25 hè, goá siūⁿ kūn jı̍t tiong lâi kú-hêng kiat-hun tián-lé sı̄ choè hó, choè iàu-kín ê sū.
Sòng Phok-sū: A-bú ê thiàⁿ-thàng un chhim bû ke̍k, koe chú liáu chin hó-chia̍h. Kiat-hun ê sū chhiáⁿ a-pa, a-bú siat-hoat chiū-sı̄, goá bô ı̀-kiàn.
Lāu-bú: M̄-chai chhin-ke, chhiⁿ-ḿ cháiⁿ-iūⁿ, sím-mı̍h ı̀-kiàn?
Lı̂m Chhiⁿ-ḿ: Tong-jiân goán bô ı̄ⁿ-gı̄, chàn-sêng, iā oē chı̄n-liōng koáⁿ-kín pang-chān Kím-hoâ pı̄-pān kè-chng.
Lı̂m Chhin-ke: Chhin-ke, chhiⁿ-ḿ chin to-siā, hō͘ lín chhiáⁿ chin pá, chhiáⁿ Chú-un lí chiah siông lâi goán tau thit-thô, goán seng sit-lé. Kím-hoâ lí chiah chia pang-bâng chhiⁿ-ḿ, khang-khè choè liáu chiah tńg-lâi. Lí chhiáⁿ.
Tē 10 Bō͘: Ē-mn̂g cha-keng hùn-heng-hoē.
Pò͘-tı̀: Í, toh chiâu pâi, ián-oân choân-pō͘ chham-ka.
Bō͘-āu hòng-sàng: 1936 nı̂ 7 ge̍h, Sòng Phok-sū tı̄ Ē-mn̂g khui cha-keng hùn-heng-hoē, chham-ka ê lâng ū 1600 miâ. Tùi 哈爾濱,北京,南京,漢口,福州,台灣,新加坡,菲律賓,南洋,馬來亞téng-téng ê só͘-chāi, lóng ū chin-choē lâng lâi chham-ka. Hoē-kı̂ sı̄ chı̍t kò ge̍h, thang kóng sı̄ khong chiân bı̄ iú ê sēng-hóng. (Hoē-chiòng choê siaⁿ chhiùⁿ choè chhin-ài ê un-ài tı̄ goá sim-lāi. Gı̂m-si tiong bō͘ chiām-chiām khui, gı̂m liáu, Sòng khí-lı̍p).
Sòng Phok-sū: Choè chhin-ài Chú-lāi hiaⁿ-tı̄ chí-bē, lán í-keng saⁿ-kap seng-oa̍h kèng-pài Siōng-tè, gı̂m-si, kı̂-tó, cha-keng chiong-kūn chı̍t kò ge̍h lah,koh bô kúi jı̍t chiū oē kiat-sok, ta̍k lâng, sûi lâng tang sai lâm pak khı̀, siáⁿ sı̂ chiah oē saⁿ-kı̀ⁿ, tû-khí Siōng-tè í-goā, bô ū lâng oē chai. Siōng-tè nā khéng te̍k-pia̍t koán-kò͘, ǹg-bāng kim-āu ū tē 3 chhù ê cha-keng-hoē. Lán chit ê cha-keng-hoē kàu kiat-sok ê sı̂, choân-pún Sèng-keng kiōng 1189 chiuⁿ lóng oē thang cha oân, í-āu ǹg-bāng lán tāi-ke tńg-khı̀ ta̍k lâng ê toē-hng choè chı̍t ê Ki-tok ê cheng-peng pē Chú ê sı̍p-jı̄-kè, chiong-lâi lán tāi-ke tı̄ thiⁿ-téng saⁿ kı̀ⁿ, hióng-siū éng-oán ê hok-khı̀. Chit sı̂ goá ài thiaⁿ hái-goā lâi ê hiaⁿ-tı̄ chū goá kap lín lı̄-pia̍t hoê Tiong-kok í-āu lín cháiⁿ-iūⁿ oa̍h-tāng ê pò-kò. Tāi-seng chhiáⁿ Sin-ka-pho lâi ê hiaⁿ-tı̄, tē jı̄ chhiáⁿ Hui-lı̍p-pin ê hiaⁿ-tı̄, tē saⁿ Tâi-oân ê hiaⁿ-tı̄ lâi pò-kò.
Sin-ka-pho hiaⁿ-tı̄: Sòng Phok-sū kı̍p chu-ūi hiaⁿ-tı̄, goá chin kong-êng lâi pò-kò, Sòng Phok-sū lâi Sin-ka-pho thâu bé kiōng 6 chhù, só͘ tit-tio̍h ê bō͘-tō-iú iok 5 chheng miâ, goán ê pò͘-tō-tūi ū nn̄g pah liân tūi, tūi-oân lóng sı̄ khéng chia̍h-khó͘ o̍h Sòng Phok-sū ê kha-pō͘. Ǹg-bāng chiong-lâi ū ki-hoē koh chhiáⁿ Sòng Phok-sū lâi kian-kò͘ goán tāi-ke ê sı̀n-gióng.
Hui-lı̍p-pin hiaⁿ-tı̄: Goá sı̄ tùi Hui-lı̍p-pin lâi ê, Sòng Phok-sū lâi Hui-lı̍p-pin ū saⁿ pái, múi pái thiaⁿ tō-lí ê iok ū nn̄g chheng goā miâ. Sòng Phok-sū beh lı̄-khui Hui-lı̍p-pin ê sı̂, chı̍t chheng goā miâ ê hiaⁿ-tı̄ sàng kàu má-thâu chhiùⁿ lı̄-pia̍t si ê sı̂. chú-pin choân-pō͘ to thòng-khó͘ lâu ba̍k-sái, m̄-kam lı̄-pia̍t. Che sı̄ Hui-lı̍p-pin má-thâu khong-chiân bē ū ê chhin-bı̍t ê chêng-kéng. Taⁿ goán iā ū cho͘-chit chı̍t pah goā tūi ê pò͘-tō-tūi tò-chhù pò͘-tō. Chhiáⁿ chèng hiaⁿ-tı̄ sı̂-siông thoè goán kı̂-tó.
Tâi-oân chí-bē: Goá sı̄ tùi Tâi-oân lâi ê, kap goá saⁿ-kap lâi ê ū chı̍t pah goā lâng. Sòng Phok-sū tı̄ Tâi-lâm Sı̂n-ha̍k-ı̄ⁿ káng-tō ê sı̂, múi chhù to ū 5 chheng miâ í-siōng ê lâng lâi thiaⁿ, hoē-chiòng thiaⁿ liáu lóng jı̄n choē, hoán-hoé thòng-khó͘ lâu ba̍k-sái, kàu-hoē ho̍k-heng. Hiān-chāi cho͘-chit 295 tūi ê pò͘-tō-tūi, chek-ke̍k soan-iông hok-im. Khó-sioh Jı̍t-pún chèng-hú khı̄-sı̄ Ki-tok-tô͘, ū sı̂ siū kan-sia̍p, ap-pek, chhiáⁿ chu-ūi hiaⁿ-tı̄ chí-bē thoè goán kı̂-tó.
Sòng Phok-sū: Chin hoaⁿ-hí ê hó siau-sit, goān êng-kng kui Chú ê miâ. A-men. Kin-jı̍t te̍k-pia̍t beh kóng gō͘ ê piáⁿ nn̄g bé hı̂ ê sū. Iâ-so͘ tı̄ sè-kan ê sı̂, chin-choē bı̂n-chiòng ài khoàⁿ I, ài thiaⁿ I ê thoân hok-im, ài I i-hó ū pı̄ⁿ ê lâng. Hit jı̍t iok-lio̍k ū 5 chheng lâng tı̄ khòng-iá, in-ūi sı̂ í-keng àm, bı̂n-chiòng iau-gō tòng boē tiâu, Iâ-so͘ khó-lı̂n in,kiò ha̍k-seng hō͘ bı̂n-chiòng chia̍h, chóng-sı̄ Hui-le̍k kóng, ká-sú ū jı̄-cha̍p niú gûn lâi boé piáⁿ, bı̂n-chiòng thài choē, kun-pún iā chia̍h bô sím-mı̍h. Chóng-sı̄ Ná-tàn-gia̍p kóng, ū chı̍t ê soè-kiáⁿ toà gō͘ ê piáⁿ nn̄g bé hı̂, Iâ-so͘ kiò I toà lâi, ǹg thiⁿ chiok-siā peh phoà the̍h hō͘ ha̍k-seng, ha̍k-seng pun hō͘ bı̂n-chiòng. Múi lâng chia̍h kàu pá, siu-sı̍p só͘ chhun ê piáⁿ-chhùi iáu ū cha̍p-jı̄ kheng. Tùi chit hāng sū thang khoàⁿ chhut Iâ-so͘ ê koân-lêng, thiàⁿ-sim, kap iau-gō ê bı̂n-chiòng sı̄ thài choē. Hiān-chāi lán ê tông-pau iā sı̄ iau-gō ê lâng moá-moá sı̄, lín iā tio̍h hō͘ in chia̍h. Lín ta̍k lâng iā gō͘ ê piáⁿ nn̄g bé hı̂, lín ê ngó͘-koan, phı̄ⁿ ba̍k kı̍p lín ê ngó͘-cháiⁿ, ngó͘-chí chiū-sı̄ lín só͘ ū ê gō͘ ê piáⁿ, lín ê nn̄g ki chhiú, nn̄g ki kha, nn̄g lúi ba̍k-chiu, nn̄g ê hı̄ chiū-sı̄ nn̄g bé hı̂. Lí nā khéng hōng-hiàn hō͘ Chú, chú oē kái-piàn lín chiâⁿ-choè chhı̄ gō͘ chheng lâng, he̍k-sı̄ sò͘ bān lâng ê cheng-sı̂n bí-niû. Chhian-bān m̄-thang siūⁿ beh pó-liû lí ê piáⁿ kap hı̂, chiū-sı̄ lín ê ngó͘-koan, kha-chhiú choè ka-kı̄ ê lō͘-ēng, iā m̄-thang siūⁿ bı̂n-chiòng tng iau-gō ê sı̂ chiong piáⁿ boē koân kè, thàn toā chı̂ⁿ, chhin-chhiūⁿ lí siūⁿ goá sı̄ chı̍t ê ha̍k-chiá, kho-ha̍k ka, ū toē-ūi, ū châi-kàn, lâng nā chhiáⁿ lí thoân-tō, lí chiū beh chin-choē ê nı̂-hōng, nā bô chiū m̄-choè. Iā chhian-bān m̄-thang siūⁿ ka-kı̄ ê châi-lêng kan-ta lâu teh, ēng tı̄ chhin-chiâⁿ, he̍k-sı̄ siūⁿ kóng iau-gō ê bı̂n-chiòng hiah choē, kun-pún gō͘ ê piáⁿ nn̄g bé hı̂ ū sím-mı̍h chok-iōng, put jû siù-chhiú pông-koan, jı̄m-ı̀ hòng-tōng hióng-lo̍k, bô lı̄-ek ka-kı̄, iā bô lı̄-ek sè-kan, lâng jû-kó án-ni, chiū-sı̄ kai-sí ! Chhin-ài ê hiaⁿ-tı̄ chí-bē, Iâ-so͘ khoài lâi lah! Sèng-kang tng bâng, nā bô kı̍p-sı̂ koáⁿ-kín choè kang, hit-sı̂ khiā tı̄ Chú ê bı̄n-chêng ná oē thang tit-tio̍h Chú kóng, lí sı̄ hó koh chı̄n-tiong ê lô͘-po̍k, thang jı̍p tı̄ Chú-lâng ê khoài-lo̍k ah? Chhin-ài ê hiaⁿ-chí ! Sı̂ sı̄ jı̍t-sı̂, tio̍h choè kang, mı̂-sı̂ nā kàu chiū bô ki-hoē lah! Goān lán chiong choân-sin hiàn hō͘ Chú, choè oa̍h-oa̍h ê chè, Chú oē kái-piàn lí choè úi-tāi ê khı̀-kū. Lán tāi-ke lâi chhiùⁿ Goá ê sı̀ⁿ-miā hiàn hō͘ Lí, choè Lí chhe-ēng kàu chı̍t sı̀ ê si.
Tē 11 Bō͘: Pak-kiaⁿ Se-san siok-sià.
Pò͘-tı̀: Pı̄ⁿ-chhn̂g chı̍t ê, í saⁿ, sı̀ liâu, toh-téng io̍h-koàn, chúi-pân, Sòng chhe kı̍p tē saⁿ cha-bó͘-kiáⁿ khiā tı̄ chhn̂g-piⁿ.
Bō͘-āu hòng-sàng: 1935 nı̂, Sòng Phok-sū chē chûn tı̄ Iông-chú-kang ê sı̂, ū chı̍t mı̂ bāng-kı̀ⁿ i ê lāu-pē khiā tı̄ i ê sin-piⁿ, tùi phok-sū kóng: Chú-un, goá tāi-seng lí khı̀ kı̀ⁿ Thiⁿ-pē, chóng-sı̄ lí iáu ū 7 nı̂ ê sèng-kang, kóng liáu hêng-iáⁿ chiū siau-soàⁿ. Keh-jı̍t chûn-tiúⁿ the̍h chı̍t tiuⁿ tiān-pò hō͘ Sòng Phok-sū, kó-jiân sı̄ i ê lāu-pē í-keng khı̀-sè. Sòng Phok-sū kàu 1942 nı̂ sèng-kang chiū oân-moá, 12 ge̍h 14 hō pı̄ⁿ tāng tı̄ Pak-pêng Hia̍p-hô i-ı̄ⁿ tē it pái chhiú-su̍t, 1943 nı̂ 3 ge̍h 27 jı̍t tı̄ Thian-tin tē jı̄ pái chhiú-su̍t, 1944 nı̂ 6 ge̍h 12 jı̍t tı̄ pak-pêng Tek-kok pı̄ⁿ-ı̄ⁿ tē 4 chhù chhiú-su̍t, chhiú-su̍t āu bô kú thè ı̄ⁿ, kap bó͘-kiáⁿ tı̄ Se-san siok-sià chēng-ióng.
Sòng Phok-sū: Choè chhin-ài ê hiân-chhe, goá chū tē it chhù chhiú-su̍t í-āu ,tit-tio̍h lí mı̂-jı̍t ê chiàu-kò͘ kı̍p múi jı̍t ê kı̂-tó, goá ê sim chin pêng-an, goá sı̀n goá ê lêng-hûn siū Chú tiàu í-āu, lí iā sı̄ kè-sio̍k sı̀n-khò Siōng-tè, chiàu-kò͘ ko͘-jı̂, sı̍t-chāi kám-siā lí ê un-ài bô chı̄n. Goá it-seng ūi Chú lô-khó͘, lóng bô chek-chū châi-sán lâu hō͘ lín, jı̂-chhiáⁿ siⁿ-chêng iā bô chhiong-hun ê sı̂-kan khiā tı̄ chhù-nih hióng-siū hu-chhe, hū-chú thian-lûn ê hēng-hok kap khoài-lo̍k, jı̂-chhiáⁿ nn̄g ê kiáⁿ-jı̂ hoān pı̄ⁿ tı̂m-tiōng sí-khı̀, bâi-chòng, iā bô sı̂-kan lâi kı̀ⁿ chı̍t bı̄n, chham-ka song-chòng, sı̍t-chāi choè lāu-pē, choè tiōng-hu toā sit-lo̍h pún-pūn, ka-kı̄ iā sı̄ thòng-khó͘ bān-hūn. Chóng-sı̄ lán ê Chú ū kóng, Thiàⁿ pē-bú khah kè-thâu tı̄ thiàⁿ goá ê, boē kham-tit tı̄ goá; thiàⁿ kiáⁿ, cha-bó͘-kiáⁿ khah kè-thâu tı̄ thiàⁿ goá ê, boē kham-tit tı̄ goá, chit tiám iā sı̄ lí bêng-pe̍k ê só͘-chāi. Goá ê sèng-kang í-keng oân lah, Tiong-kok 35 séng bô ū chı̍t séng, chı̍t siâⁿ kı̍p hiong-tı̀n goá bô kàu ê só͘-chāi; hiān-chāi kàu-hoē í-keng hùn-heng lah, goá ê sim-goān, goá ê sù-bēng í-keng oân lah, chí-ū tán-hāu Chú tiàu nā-tiāⁿ. Song-chòng ê sū goá só͘ thiàⁿ ê Ông Bêng-tō oē siat-hoat, bián khoà-ı̀, tio̍h an-sim.
Sòng chhe: Chhin-ài ê Iok-hān, goá bêng-pe̍k lí sı̄ Siōng-tè chı̄n-tiong ê lô͘-po̍k, lí ê lô-khó͘. Lí ê tio̍h-boâ sı̄ pêng siông lâng bô hoat-tō͘ choè kah kàu ê,lí ê sin-thé oē phah pháiⁿ-khı̀, iā sı̄ tùi goá bô hoat-tō͘ kun-sûi lí, mı̂-jı̍t chiàu-kò͘ lí ê só͘ tı̀, sı̍t-chāi chin kè boē tit khí. Chóng-sı̄ che iā sı̄ chù-tēng ê ūn-miā, Siōng-tè ê chí-ı̀, goá iā goān-ı̀. Kap lí chia̍h khó͘ ê it-chhè ê sū í-keng piàn chiâⁿ chı̍t tiûⁿ ê bı̂n-bāng, chhiáⁿ lí an-sim, m̄-thang siong-sim.
Sòng Phok-sū: Goá só͘ thiàⁿ ê cha-bó͘-kiáⁿ, goá tı̄ sè-kan í-keng sı̄ bô kú ê lâng lah, goá khı̀ liáu-āu, lí piàn chiâⁿ bô pē ê ko͘-lú, lí tio̍h koai-koai, thiàⁿ sió-bē, iú-hàu lāu-bú, chiong-lâi nā choè lú thoân-tō iā sı̄ chin hó ê sū.
Sòng lú: A-pa, goá bêng-pe̍k lí ê thiàⁿ. Goá oē thiàⁿ sió-bē, iú-hàu a-bú, chhiáⁿ lí an-sim. Goán sui-jiân sı̄ ko͘-jı̂, bô pē ê lú-chú, chóng-sı̄ goán chhim-sı̀n lí sı̄ khı̀ thian-tông tiâu-kı̀ⁿ Thiⁿ-pē, hióng-siū thian-tông ê hok-khı̀; goán sı̀n a-pa lí sı̄ chit sè-kan choè úi-tāi ê lāu-pē, goá kap a-bú ta̍k jı̍t teh thoè lí kı̂-tó bô soah, chhiáⁿ a-pa lí an-sim.(Ông Bêng-tō, i-seng kı̍p hō͘-sū kiâⁿ--jı̍p-lâi).
I-seng: (Bong me̍h liáu iô-thâu), Sòng Phok-sū, goá í-keng chı̄n liáu goá ê pún-hūn, koh chù chı̍t ki chu-ióng siā chiū hó.
Sòng Phok-sū: Chhin-ài ê i-seng, hō͘-sū kı̍p goá só͘ thiàⁿ ê Bêng-tō, chin to-siā. Goá thâu-boé pēⁿ nn̄g nı̂, chhiú-su̍t sı̀ chhù, goá sin-piⁿ bô chı̍t hun gō͘ lı̂ chı̂ⁿ, tùi lí ê thiàⁿ-thàng kap hiân-bêng koh hó ê siat-hoat, it-chhè tùi thiàⁿ Chú ê hiaⁿ-tı̄ kià lâi pang-chān. Goá ê sim-tiong ē kám-siā kap khoài-lo̍k bô hoat-tō͘ thang piáu-hiān. Goān Chú chiok-hok thiàⁿ i ê it-chhè ê lâng. Cha-mê Iâ-so͘ tùi goá kóng, Iok-hàn, lí tio̍h tńg-lâi lah. Kin chái-khí Iâ-so͘ chài lâi khiā tı̄ mn̂g-kháu, só͘-í goá ê sim chin pêng-an hoaⁿ-hí, chhiáⁿ lí m̄-bián kiaⁿ, bián hoân-ló, tio̍h chhim-sı̀n kiù-chú Iâ-so͘; ūi Chú kiàn-chèng thoân hok-im, (Chhut-ián jı̂n-oân chı̀n-jı̍p).
I-seng: Sòng Phok-sū lêng-hûn í-keng lı̄-khui sè-kan lah!
Ông Bêng-tō: Chu-ūi chhin-ài ê hiaⁿ-chí, Siōng-tè chı̄n-tiong ê po̍k-jı̂n,lán choè kèng-thiàⁿ ê Sòng Phok-sū, i sı̄ lán Tiong-kok iú sú í-lâi choè úi-tāi ê pò͘-tō-ka, hùn-heng-ka, í-keng siū Chú tiàu lêng-hûn kui thian lah! I it-seng ūi Chú chia̍h-khó͘, thǹg chhiah-kha,chhēng chho͘-pò͘ tn̂g-phàu, ū sı̂ siū lâng lêng-jio̍k, húi-pòng, khún-tio̍k,hām-hāi, chóng-sı̄ Siōng-tè pı̀-iū i. I thoân-tō 18 nı̂, si-hô bô tham lâng chı̍t kho͘ gûn, i ê bó͘-kiáⁿ pı̂n-khùn kan-khó͘,chí-ū Siōng-tè chai nā-tiāⁿ. I sui-jiân sin-thé tài pı̄ⁿ, chóng-sı̄ choân-kok ê tông-pau chhiat-bāng i, ài thiaⁿ i ê káng-tō, ài i thoè in ê pı̄ⁿ-lâng kı̂-tó, i khò Iâ-so͘ ê miâ i-hó chin-choē ê pı̄ⁿ-lâng, i kiaⁿ-liáu sèng-kang choè boē oân ,thoa-pı̄ⁿ mı̂-jı̍t kóng tō-lí, an-ùi sò͘ pah bān sim-tiong thòng-khó͘ ê lâng, hō͘ in ū Kiù-chú Iâ-so͘ ê kiù-un thang tit-tio̍h pêng-an. Choè-āu i ê pı̄ⁿ sı̄ hı̀ kiat-hu̍t ê pı̄ⁿ, chóng-sı̄ i ta̍k sı̂ kap Chú tông-chāi, chiàn iâⁿ pı̄ⁿ-mô͘. Hiān-chāi i í-keng tit-tio̍h Chú siúⁿ-sù êng-kng ê bián-liû, éng-oán hióng-siū thian-tông ê hok-khı̀. I ūi-tio̍h lán tông-pau hoān-choē só͘ lâu ê ba̍k-sái, Siōng-tè í-keng thoè i chhit lah. Ǹg-bāng lán tāi-ke kian-kò͘ sı̀n-sim, lâi o̍h i ê kha-pō͘ thoân hok-im, chiong-lâi oē kap Sòng Phok-sū saⁿ-kap tı̄ thian-tông saⁿ-kı̀ⁿ. Chit sı̂ lán lâi gı̂m Thian-tông sı̄ goá ke, tò-lâi ah, sè-kan bián khoà-ı̀, Thian-tông sı̄ goá ke, tò-lâi ah, sè-kan bián khoà-ı̀.
(Kàng-bō͘).
Bō͘ āu hòng-sàng: Chhin-ài ê hiaⁿ-tı̄ chí-bē, choè-āu ê pò-kò sı̄ Sòng Phok-Sū 1944 nı̂ 8 ge̍h 18 jı̍t siōng-ngó͘ 7 tiám 7 hun, lêng-hûn siū tiàu kui thian. I ê koan-bo̍k sı̄ iōng choè hó ê hiuⁿ-chhâ lâi choè. 8 ge̍h 22 jı̍t chhut-chòng ê sı̂ , choân-kok kok séng lóng ū tāi-piáu lâi hoē-chòng, chin-choē pò͘-tō-thoân ê thoân-tiúⁿ; lâi kng i ê koan-bo̍k , chhut-soaⁿ ê sı̂ sı̄ iân-lō͘ gı̂m-si, sàng kàu Sòng Phok-sū siⁿ-chêng siông-siông tan-to̍k só͘ ài khı̀ kı̂-tó ê chháu-po͘, tı̄ hia an-chòng. I ê toā chhian-kim miâ choè Chhòng-sè-kı̀(thian kiáⁿ), hiān-chāi iáu jia̍t-sim choè thoân-tō, ūi Chú thoân hok-im, sı̄ lán choè hoaⁿ-hí siū an-ùi ê só͘-chāi. Choè-āu chiok chu-ūi kiān-khong. Chài-hoē!
(Tâi-oân Kàu-hoē Kong-pò tē 919-921, 922, 924-928 hō, 1963 nı̂ 10 ge̍h-1964 nı̂ 2 ge̍h)
