III. Christine Daaé
Monsieur Firmin kóng liáu bô-m̄-tio̍h. Margarita tı̄ Faust kio̍k tiong ê piáu-hiān í-keng chiâⁿ-chò choân Paris siōng jia̍t-mn̂g ê oē-tê. I ê siaⁿ chin súi, tio̍h chhin-chhiūⁿ sian-lú hā-hoân bí-biāu ê koa-siaⁿ. Ta̍k ê lâng lóng chin kah-ı̀ i. Hit àm, hı̀-ı̄ⁿ lāi koan-chiòng ê chêng-sū, beh khàu beh chhiò, lóng sı̄ toè Christine ê koa-siaⁿ leh kiâⁿ. Daaé ê koa-siaⁿ sı̍t-chāi sı̄ ū kàu chán ê chán, ē-sái kóng sı̄ choân sè-kài siōng iu-siù ê koa-chiá !
Tı̄ bú-tâi āu-piah, Meg Giry tùi Aⁿie kóng, "Christine chiông-lâi m̄-bat ū chiah hó ê koa-siaⁿ, ūi-siáⁿ-mı̍h kin-á-jı̍t ē chhiùⁿ kah chiah hó leh? "
"Bô tiāⁿ lâng í-keng chhiàⁿ tio̍h ko-bêng ê im-ga̍k lāu-su."
Hit àm ta̍k-ke it-tı̍t leh thó-lūn Daaé ê tāi-chı̀. Tı̄ Box 14 lāi-té, Comte de Chagny Philippe tńg-sin koè-lâi tùi in sió-tı̄ bı̂-bı̂-á chhiò, kóng :
"Rao͘l lí kám-kak Daaé kin-á-jı̍t chhiùⁿ liáu siáⁿ-khoán? "
Vicomte de Chagny Rao͘l, kin-nı̂ 21 hoè. Nâ-sek ê ba̍k-chiu, o͘-sı̀m-sı̀m ê thâu-chang koh ū chı̍t hù tiⁿ-bı̍t ê chhiò-iông. Chagny ka-cho̍k ê le̍k-sú iu-kiú, chin hù-jū koh ū hó miâ-siaⁿ. Tı̄ Paris tio̍h ū chin choē cha-bó͘ gín-á leh kah-ı̀ Rao͘l. M̄-koh lóng bô hoat-tō͘ ín-khí Rao͘l ê chù-ı̀. I tùi in toā hiaⁿ chhiò chı̍t ē, kóng :
"Goá koh ē-tàng kóng siáⁿ-mı̍h leh? Christine chiū chhin-chhiūⁿ sian-lú kāng-khoán, chiū sı̄ án-ne. Goá chit-chūn siūⁿ beh lâi-khı̀ i ê hoà-chong-sek khoàⁿ i."
Philippe khoàⁿ tio̍h in sió-tı̄ chit khoán chheng-chhun siàu-liân ê chhiong-tōng, soah toā siaⁿ chhiò chhut-lâi. I pí Rao͘l toā beh kah 20 hoè. Khoàⁿ khí-lâi tio̍h chhin-chhiūⁿ in lāu-pē kāng-khoán.
"Goá liáu-kái," Philippe kóng, " Lí í-keng loân-ài ah! M̄-koh lí kin-á-jı̍t chiah lâi Paris, che mā-sı̄ lí thâu chı̍t pái lâi chit keng Opera hı̀-ı̄ⁿ. Lí kám ē-sái kā goá kóng lí sı̄ án-choáⁿ se̍k-sāi Christine ê? "
"Lí kám ē kı̀-tit 4 nı̂ chêng, goá tı̄ Brittany tō͘-ká thit-thô, goá chiū-sı̄ tı̄ hia tú tio̍h i. Hit-ê sı̂-chūn, gún nn̄g lâng chin-sim siong-ài, kàu taⁿ goá iá-sı̄ put-koán-sı̂ to ē khı̀ siūⁿ tio̍h i."
Comte de Chagny tùi In sió-tı̄ kóng " Mmm, Goá liáu-kái ah!" I sió thêng chı̍t leh koh bān-bān-á kóng, "Rao͘l, ài ē kı̀-tit i chí-sı̄ chı̍t ê chhiùⁿ Opera ê koa-chiá, lán tùi in chhù-nı̍h ê tāi-chı̀ kun-pún chiū bô liáu-kái."
Rao͘l kun-pún chiū bô leh thiaⁿ i kóng. Hó ê chhut-sin tùi I lâi kóng chı̍t tiám ı̀-gı̄ tio̍h bô. Koh chài-kóng, siàu-liân lâng tùi lāu-hoè-á ê siūⁿ-hoat, kun-pún tio̍h thiaⁿ boē jı̍p-hı̄ⁿ.
Christine ê pâng-keng goā-kháu, lâng khoeh kah moá-moá-moá. Ū chı̍t ūi i-seng khiā tı̄ Christine ê piⁿ-a. I bí-lē ê chhiò-iông khoàⁿ khí-lâi sı̄ hiah-nı̍h á pe̍h, kán-ná pēⁿ kah chin giâm-tiōng. Rao͘l khoàⁿ liáu m̄-kam, chhiong jı̍p-khı̀ mn̂g lāi, khan i ê chhiú, kóng :
"Christine! Tàu-té hoat-seng siáⁿ-mı̍h tāi-chı̀? Lí sin-khu bô sóng-khoài sı̄ bô ?" Rao͘l khû lo̍h-lâi toà i ê sin-khu piⁿ. "Lí kám boē kı̀-tit Goá ah! Rao͘l de Chagny! Lán tı̄ Brittany chò-hoé koè hiah-nı̍h-á hó ê jı̍t-chí, lí kám lóng boē kı̀-tit ah ! "
Christine giâ-thâu khoàⁿ i, nâ-sek ê ba̍k-chiu lāi chhiong-boán kiaⁿ-hiâⁿ. I kā chhiú kiu tńg-khı̀, "Goá m̄-bat lí, chhiáⁿ lí kín lı̄-khui chia. Goá sin-thé bô siáⁿ sóng-khoài."
Rao͘l khiā khí-lâi, bı̄n-á âng-âng-âng, chı̍t sı̂ soah kóng boē chhut oē. I-seng chin kín-kip leh hoah, "Chhiáⁿ ta̍k-ke lı̄-khui chit keng pâng-keng. Daaé su-iàu an-chēng chı̍t ê, i í-keng chin thiám ah."
I soá kàu mn̂g piⁿ-a, bô goā-kú ta̍k-ke lóng í-keng lı̄-khui pâng-keng, chhun Daaé ka-kı̄ chı̍t ê lâu tiàm pâng-keng lāi-té.
Rao͘l ka-kı̄ chı̍t ê tı̄ goā-kháu kiâⁿ-lâi koh kiâⁿ-khı̀, liâm-mi siūⁿ-khı̀, liâm-mi koh kám-kak chin ut-chut. Christine ná ē-sái kā i pàng boē-kı̀ leh? Ná-ū hoat-tō͘ tùi i kóng chit khoán oē lâi siong i ê sim. I tán kúi hun-cheng liáu-āu chiū chiâⁿ sè-lı̄, m̄-káⁿ lòng chhut-siaⁿ, kiâⁿ kàu Christine pâng-keng ê mn̂g-kháu. I pēng bô kā mn̂g phah-khui, in-ūi tng i beh khui-mn̂g ê sı̂, i thiaⁿ tio̍h pâng-keng lāi ū cha-po͘-lâng ê siaⁿ !
"Christine! Lí it-tēng ài ài goá! " Chı̍t ê cha-po͘-lâng ê siaⁿ thoân koè-lâi. Liáu-āu Rao͘l koh thiaⁿ-tio̍h Christine ê siaⁿ.
"Lí ná ē-sái án-ne kóng leh? Tng Goá ūi lí chhiùⁿ koa ê sı̂...? Kin-àm goá í-keng chı̄n goá só͘-ū ê khùi-la̍t chhiùⁿ hō͘ lí thiaⁿ. Goá í-keng chı̄n-le̍k ah! Chit-chūn, goá í-keng chiok thiám ah! " Siaⁿ-im lāi-té chhiong-boán iu-chhiû kap kiaⁿ-hiâⁿ.
"Lí chhiùⁿ kah chhin-chhiūⁿ sian-lú hā-hoân kāng-khoán! " Hit-ê cha-po͘ lâng kóng.
Rao͘l kiâⁿ soá-khui, goân-lâi tap-àn sı̄ án-ne, Christine í-keng ū ài-jı̂n ah! M̄-koh i ê siaⁿ ná-ē chiah-nı̍h bô khoài-lo̍k. Rao͘l bih tı̄ pâng-keng hù-kı̄n. I siūⁿ beh khoàⁿ chheng-chhó Christine ê ài-jı̂n, i ê chêng-te̍k, tàu-té sı̄ seⁿ-chò siáⁿ-khoán.
10 hun-cheng āu, Christine ka-kı̄ chı̍t ê lâng àn pâng-keng kiâⁿ chhut-lâi, àn hāng-lō͘ kiâⁿ chhut-khı̀. Rao͘l koh tı̄ hia tán chı̍t toā khùn, kı̂-koài ê sı̄ pēng bô lâng koh àn lāi-té kiâⁿ chhut-lâi! Khoàⁿ-khoàⁿ-leh, sı̀-piⁿ bô lâng, chiū cháu khı̀ pâng-keng mn̂g-kháu, kā mn̂g chūn-khui kiâⁿ jı̍p-khı̀, chı̍t jı̍p-khı̀ tio̍h kín kā mn̂g koaiⁿ khí-lâi. Oa̍t-thâu chı̍t khoàⁿ, soah bô khoàⁿ tio̍h poàⁿ ê lâng-iáⁿ.
"Lí tı̄ tó-ūi? Goá chai-iáⁿ lí bih tı̄ lāi-té, kín chhut-lâi!" Tán kui-po͘-kú, lóng bô hoê-èng. Rao͘l sı̀-kè chhoē, liâm-mi toh-á kha, liâm-mi saⁿ-tû á lāi. Boé-á liân piah-kak mā chhoē thàu-thàu, tio̍h sı̄ bô khoàⁿ poàⁿ ê lâng-iáⁿ.
IV. Opera kúi leh siūⁿ-khı̀ ah !
He sı̄ pài-jı̄ àm ê tāi-chı̀. Pài-saⁿ chái-khí Monsieur Armand kap Monsieur Firmin chhun-hong-moá-bı̄n. Choân Paris ê lâng lóng chin kah-ı̀ sin ê Margarita. Seng-oa̍h tiong ê it-chhè sı̄ chiah-nı̍h á sūn-sū. Āu chı̍t tiûⁿ ê ián-chhut sı̄ tiāⁿ tı̄ pài-gō͘.
Kāng-khoán sı̄ ián Faust, m̄-koh chit pái sı̄ oāⁿ La Carlotta lâi chhiùⁿ Margarita. Kàu pài-saⁿ ē-po͘ tāi-chı̀ soah koh khí piàn-hoà. In àn O.K. hia chiap tio̍h tē jı̄ tiuⁿ phoe.
"Lín ūi-siáⁿ-mih bô-ài thiaⁿ goá ê chhùi? It-tēng ài jiá goá siūⁿ-khı̀ chiah ē-sái hio͘h? Kā Box 5 lâu lo̍h-lâi hō͘ goá! Lín beh hō͘ goá ê 20000 kho͘ khǹg tı̄ tó-ūi? Pài-gō͘ lín it-tēng ài koh hō͘ Daaé chhiùⁿ Margarita, i chit-chūn í-keng sı̄ choân Paris siōng hó ê koa-chiá. La Carlatta í-keng bô hoat-tō͘ koh chhiùⁿ ah. I ê siaⁿ í-keng phoah kah chhin-chhiūⁿ gû leh háu kāng-khoán ah!
Lín ài ē kı̀-tit goá sı̄ chı̍t ê khó-phà ê te̍k-jı̂n! O.K.”
"Eh ! Firmin, Che kám koh sı̄ leh kóng-sńg-chhiò?" Monsieur Armand siūⁿ-khı̀ toā-siaⁿ kiò chhut-lâi, "Lán chit-chūn beh án-choáⁿ chiah hó leh? Tàu-té chit-ê só͘-chāi ê tō-ián sı̄ siáng? Sı̄ Lán iá-sı̄ O.K.? "
"Mài phùi ah, Armand! " Monsieur Firmin siān-tàu-tàu leh kóng, "Goá mā m̄-chai-iáⁿ tap-àn, Lán lâi-khı̀ kap Madame kóng khoàⁿ māi, chiū sı̄ tı̄ Box 5 hit khu leh kò͘-mn̂g hit-ê. Bô-tiāⁿ ē-tàng chhoē tio̍h chı̍t-koá soàⁿ-soh mā bô it-tēng."
M̄-koh mn̄g Madame Giry pēng bô tit-tio̍h siáⁿ-mı̍h. In hoat-hiān Madame Giry pēng bô kiaⁿ kúi, i mā bô leh kiaⁿ chit keng hı̀-ı̄ⁿ ê tō-ián.
"Madame Giry! Lâng lóng kóng Lí kap Opera lāi ê kúi sı̄ hó pêng-iú" Monsieur Armand án-ne mn̄g i, "Lí kám ē-sái kā Gún kóng chı̍t koá i ê tāi-chı̀, chhin-chhiūⁿ chı̍t koá lâng leh kóng i bô thâu-khak kám-ū-iáⁿ? "
"Iā-ū lâng kóng I bô sin-khu!" Monsieur Firmin kóng "Che kám sı̄ chin ê? "
Madame Giry khoàⁿ in nn̄g lâng ê bı̄n-sek, chhiò-chhiò á kóng, "Chit keng hı̀-ı̄ⁿ ê tō-ián sı̄ gōng-toā-tai! "
"Siáⁿ! " Monsieur Armand chha chı̍t-tiám-á kā saⁿ-jı̄-keng kiāu chhut-lâi, "Lí chit-ê cha-bó͘-lâng kā goá thiaⁿ hō͘ hó !... "
"Eh ! Chē lo̍h-lâi, pàng khah khin-sang leh! Lán sı̄ lâi thiaⁿ i kóng ê. " Monsieur Firmin kóng, "Madame Giry lí án-ne kóng sı̄ siáⁿ-mı̍h ı̀-sù ? "
"In-ūi O.K. í-keng tùi lín chiâⁿ kám-mō͘, nā-sı̄ i siūⁿ beh tı̍h siáⁿ-mı̍h, i pit-jiân the̍h ē tio̍h. I sı̄ hiah-nı̍h-á khiáu koh hiah-nı̍h-á gûi-hiám. Tı̄ lín chı̀n-chêng ê tō-ián chiū bô hiah-nı̍h gōng. Chı̍t khai-sí, in mā chhin-chhiūⁿ lín kāng-khoán bô-ài chhap Opera kúi. Soà lo̍h-lâi, tı̄ hı̀-ı̄ⁿ hoat-seng chı̍t koá kı̂-kı̂-koài-koài ê ı̀-goā, chı̍t koá ı̀-goā sū-kiāⁿ lóng hoat-seng tı̄ Opera kúi tng-teh siūⁿ-khı̀ ê sı̂. Liáu-āu, chit koá lāu tō-ián o̍h liáu chin kín, kúi beh tı̍h ê Box 5? I ē-tàng ta̍k-kang tı̄ hia khoàⁿ-hı̀! Kúi beh tı̍h chı̂ⁿ? Lán tio̍h kín koāⁿ hō͘ I. Tong-jiân, chit koá lāu tō-ián í-keng hō͘ I kà kah chin koai."
"Lí ài lòng-chheng-chhó, Gún chiah-sı̄ chit keng hı̀-ı̄ⁿ ê tō-ián ! M̄-sı̄ hit-ê mô͘-sı̂n-á !" Monsieur Armand ná kóng ná kiāu. I oa̍t-thâu tùi Monsieur Firmin kóng : "Chit-ê cha-bó͘-lâng it-tēng sı̄ khí-siáu ah! Lán ūi-sím-mı̍h ài thiaⁿ i ê? M̄ koán án-choáⁿ, pài-gō͘ àm iá-sı̄ beh hō͘ La Carlotta lâi chhiùⁿ Margarita. Firmin,lí kap goá iû-goân beh tı̄ Box 5 lâi khoàⁿ-hı̀, tio̍h bô ? "
"Hó ah! Lán tio̍h lâi chhı̀-khoàⁿ-māi, m̄-koh lán mā bô-ài jı̄n-hô ê ı̀-goā sū-kiāⁿ hoat-seng kám m̄-sı̄ leh ! "
Madame Giry kiâⁿ oá lâi-kàu chit nn̄g lâng ê thâu-chêng, "Lín ài thiaⁿ goá hó chhùi," kháu-khı̀ chiâⁿ pêng-chēng leh kóng, "Ài ē-kı̀-tit Joseph Buqoest! Goá sı̍t-chāi kā lín kóng, lín ē-sái kap O.K. chò hó-pêng-iú, m̄-koh lín nā bô chiàu-pō͘-lâi, i mā ē-sái piàn-chò chı̍t ê chiâⁿ pháiⁿ èng-hù ê te̍k-jı̂n."
In nn̄g lâng kā gı̂n, "Chit koá iōng-sû..." Monsieur Firmin bān-bān-á kóng, "Madame Giry Lí ná-ē án-ne kóng leh? "
"In-ūi I mā-sı̄ án-ne kā Goá kóng! Goá mā m̄-bat khoàⁿ-koè i, m̄-koh goá tiāⁿ-tiāⁿ ē thiaⁿ tio̍h i ê siaⁿ. I ê siaⁿ chin iu-bí, mā boē tùi lâng toā-siaⁿ sè-siaⁿ hoah !"
