V. Hō͘ Rao͘l ê phoe
Hit lé-pài-saⁿ, Rao͘l mā siu tio̍h chı̍t tiuⁿ phoe. I kā phoe phah khui, khoàⁿ tio̍h ē-té ê chhiam-miâ, tu̍t-jiân kan suh chı̍t-kháu-khùi chhiò chhut-lâi. He sı̄ hit kang thàu-chá kàu chit-chūn ûi-it chhut-hiān koè ê chhiò-iông.
Chhin ài ê Rao͘l:
Goá tong-jiân ē kı̀-tit lí, goá ná ū khó-lêng ē kā lí pàng boē-kı̀-tit. Goá kám ē-sái iok lí toà pài-sı̀ ē-pō͘ saⁿ tiám lâi Tuileries hoe-hn̂g khoàⁿ goá. Pài-thok lí chhian-bān m̄-thang siūⁿ-khı̀.
Christine Daaé
Rao͘l kā phoe siu-jı̍p i ê khò͘-tē-á lāi. Siūⁿ-khı̀ ? Mài kóng-chhiò ! I ná ū hoat-tō͘ tùi sian-lú lâi hoat-phı̂-khı̀. Nn̄g tiám iá-boē kàu, I chiū í-keng tı̄ kong-hn̂g leh tán-hāu I ê Christine.
Saⁿ tiám koè 10 hun, i khai-sí kám-kak boē chū-chāi. Saⁿ tiám poàⁿ chı̍t koè, I kám-kak kui ê lâng kiông-kiông beh sí-khı̀ ah! Ū sı̂ chhiong-tōng kah sı̄m-chı̀ siūⁿ beh khı̀ thâi-lâng.
Koè-liáu chin-kú liáu-āu...liáu-āu...i lâi ah! I àn hoe-hn̂g lēng-goā hit-pêng cháu koè-lâi. Bô chı̍t bió cheng kú, í-keng lak-jı̍p-khı̀ Rao͘l ê heng-khám lāi.
"Ouh ! Goá ê Christine ! " Chı̍t pái koh chı̍t pái leh hoah, "Ouh ! Goá ê Christine!" Liáu-āu, in kiâⁿ-koè hoe-hn̂g, ná kiâⁿ ná kóng, kóng liáu chin kú. Chit ê chêng-kéng chiū kán-ná tńg-khı̀ kàu sı̀-nı̂ chêng tı̄ Brittany hái-hoāⁿ...
"M̄-koh Lí nà ē cháu khui m̄ chhap goá?" Rao͘l tih mn̄g, "Ūi-sím-mı̍h Lí bô siá phoe hō͘ Goá ? "
Soà lo̍h-lâi ū nn̄g, saⁿ hun-cheng kú, siang-lâng lóng bô-siaⁿ bô-soeh. Liáu-āu Christine seng khui-chhùi, i bān-bān-á kóng "Lí kap goá lóng iá-koh hiah siàu-liân. Goá chí-sı̄ chı̍t ê àn Norway lâi ê saⁿ-liû koa-chiá. Ah lí...lí sı̄ Vicomte de Chagny ê kùi-cho̍k. Goá chai-iáⁿ goá éng-oán mā bô khó-lêng chò lí ê khan-chhiú."
"M̄-koh, Christine, goá chin-chiàⁿ ài lí ! "
"M̄-sı̄ án-ne, Rao͘l ! Chhiáⁿ lí thiaⁿ goá kóng, hit ê sı̂-chūn goá cháu tńg-khı̀ Norway. Chı̍t nı̂-āu, gún lāu-pē chiū koè-sin khı̀ ah! Chı̍t-sı̂ kan-khó͘ sim-būn, goá koh tńg-lâi Paris, chiū it-tı̍t chhiùⁿ, phah-piàⁿ chhiùⁿ, siūⁿ beh chiâⁿ-chò chı̍t ê Opera ê koa-chiá, m̄-sı̄ beh chò chı̍t ê phó͘-thong ê koa-chiá niā-niā, goá phah-piàⁿ siūⁿ beh chò choân Paris siōng hó ê Opera ián-oân ! "
"Lí í-keng ta̍t-sêng ah! " Rao͘l bı̄n-toà-chhiò-iông kóng, "Choân Paris siâⁿ lóng í-keng tı̄ lí ê kha-té."
Christine kā thâu tàm lo̍h-lâi, bô koh kóng poàⁿ kù oē.
" Christine ! " Rao͘l khin-khin-á kóng, "Goá siūⁿ beh mn̄g lí chı̍t hāng tāi-chı̀. Pài-jı̄ hit-àm, tı̄ lí hoà-chong-sek lāi-té ê cha-po͘ sı̄ siáⁿ lâng? Chhiáⁿ lí it-tēng ài kā goá kóng! Goá sı̄ lí ê pêng-iú, pêng-iú kám m̄-sı̄ ài hō͘-siong tàu-saⁿ-kāng ê? Kā Goá kóng i kiò-chò siáⁿ-mı̍h miâ hó bô? "
"Goá boē-sái kā lí kóng, che sı̄ chı̍t ê pı̀-bı̍t!" Christine chin sè-siaⁿ kā ı̀n, hó chhin-chhiūⁿ kiaⁿ lâng thiaⁿ tio̍h. "Goá mā m̄-bat khoàⁿ koè i, goá kan-taⁿ thiaⁿ-koè i ê siaⁿ. M̄-koh i kán-ná bû-só͘-put-ti. I chai-iáⁿ jı̄n-hô ê tāi-chı̀, só͘-í pài-jı̄ hit-àm, goá m̄-káⁿ kap lí kóng-oē. I sı̄ Goá ê im-ga̍k lāu-su. I sı̄ chı̍t ê chiok hó ê koa-chiá. Goá chit-chūn ū hoat-tō͘ chhiùⁿ kah chiah hó lóng-sı̄ i kà goá ê. I sı̄ goá im-ga̍k sı̀ⁿ-miā tiong ê thian-sài. I kóng i í-keng chhim-chhim ài tio̍h goá, goá kám ē-tàng lı̄-khui i leh? "
VI. La Carlotta pān Margarita
Pài-gō͘ thàu-chá, La Carlotta tı̄ i bı̂n-chhn̂g téng chia̍h chái-khí-tǹg. I ná lim ka-pi ná thiah-khui chái-khí sàng lâi ê phoe-sı̀n. Kı̂-tiong ū chı̍t tiuⁿ phoe pēng bô chhiam-miâ. Hit tiuⁿ phoe chiâⁿ té :
Lí tng teh phoah-pı̄ⁿ, lí kin-á-jı̍t àm-ah bô hoat-tō͘ chhiùⁿ Margarita, lí hó hó á kā goá lâu toà chhù-lāi, boē-sái khı̀ Opera hı̀-ı̄ⁿ. Nā bô, ı̀-goā sûi-sı̂ ē hoat-seng! Lí kám goān-ı̀ éng-oán sit-khı̀ lí ê siaⁿ?
La Carlotta khoàⁿ liáu khı̀ kah kui-sian-lâng peh khí-lâi thiàu, liân chái-khí-tǹg tio̍h bô chia̍h oân.
"Che it-tēng sı̄ Christine ê sí-tóng kià lâi eh ! " I leh siūⁿ, "In siūⁿ beh hō͘ i kin-á-jı̍t àm-ah koh ē-tàng chiūⁿ-tâi. Pháiⁿ-sè! Lín chó͘-má bô-thang hiah hó liāu-lí! Ba̍k-chiu peh khah kim leh, Goá chiah sı̄ choân Paris siōng hó ê Opera ián-oân! Bô lâng ē-tàng chó͘-tòng goá kin-á-jı̍t chiūⁿ-tâi chhiùⁿ Margarita."
Hit kang àm-sı̂ la̍k tiám, phoāⁿ-bú-ê í-keng tı̄ in ê hoà-chong-sek leh oāⁿ-saⁿ. Ná khai-káng ná kā o͘ tò͘ âng ê ho̍k-chong chhēng khí-lâi. Kı̂-tiong ū chı̍t ê cha-bó͘ gín-á, Meg Giry, chı̍t ê lâng tiām-tiām bô kóng-oē.
"Meg! Lí sı̄ án-choáⁿ lah! " Aⁿie Sorell koan-sim leh kā mn̄g.
"Goá leh hoân-ló Opera kúi." Meg kóng, "Gún ma-ah kóng mô͘-sı̂n-á tng leh siūⁿ-khı̀, i teh hoân-ló eng-àm ē hoat-seng siáⁿ-mı̍h tāi-chı̀."
"Ái-iô ! " Chı̍t ê o͘ thâu-chang ê cha-bó͘ gín-á kóng, "Siáng ē khı̀ kiaⁿ chı̍t ê lāu-hoè-á kúi ? "
Chı̍t tiám-cheng āu, Monsieur Armand kap Monsieur Firmin in nn̄g lâng kiâⁿ jı̍p-khı̀ Box 5 lāi-té chē lo̍h-lâi. Siáⁿ-mı̍h kúi-á-kó͘? In chı̍t-tiám-á to bô kā sı̀n-táu. Chit-keng hı̀-ı̄ⁿ lāi kun-pún to bô siáⁿ-mı̍h mô͘-sı̂n-á !
Chē lo̍h-lâi bô joā-kú, Monsieur Armand khoàⁿ tio̍h ū lâng kā hoe khǹg toà mn̂g-kháu, "Firmin!" I sè-siaⁿ kā hoah, "Kám sı̄ lí kā hoe khǹg toà hia ? "
Monsieur Firmin oa̍t-thâu khoàⁿ chı̍t ē, "Bô ah, Goá bé hoe beh chhòng siàⁿ? " Thâu-khak bong-bong-leh kóng, "Kám sı̄ Lí ka-kı̄ bé ê hoⁿh!"
"Lí leh khí-siáu hio͘h! Sih! Tiām-tiām, im-ga̍k í-keng khai-sí ah!"
Thâu ah chı̍t tiám-cheng iá boē lûn-kàu La Carlotta chhiùⁿ. Tē 5 ê Box lāi mā bô siáⁿ-mı̍h kı̂-koài ê tāi-chı̀ hoat-seng. Chit nn̄g ê tō-ián ê sim-chêng chiū lú lâi lú khin-sang khí-lâi. Bô joā-kú lûn-kàu La Carlotta chiūⁿ-tiûⁿ, Monsieur Firmin chiū oa̍t-thâu thau-thau-á mn̄g Monsieur Armand
"Lí kám ū thiaⁿ tio̍h siáⁿ-mı̍h siaⁿ? "
"Bô ah! " Monsieur Armand kā ı̀n, m̄-koh I it-tı̍t oa̍t-thâu khoàⁿ i ê āu-piah, nn̄g pái, saⁿ pái..., bı̄n-sek lú lâi lú pe̍h, pe̍h kah bı̄n-sek í-keng hoán-chheⁿ.
La Carlotta chı̍t tiâu koa koh chı̍t tiâu koa it-tı̍t chhiùⁿ lo̍h-khı̀, pēng bô siáⁿ-mı̍h tāi-chı̀ hoat-seng. Soà-lo̍h-lâi, tng i khai-sí chhiùⁿ chı̍t siú chin iu-bí ê chêng-koa ê sı̂-chūn...
"Goá ê ài khai-sí beh---khô͘-a̍k ! "
Ta̍k-ke sa lóng bô, tàu-té Carlotta sı̄ chhut siáⁿ-mı̍h būn-toê? Ná ē ū hit ê kı̂-koài ê siaⁿ---khô͘-a̍k?
Carlotta thêng chı̍t-chām-á, koh khai-sí têng chhiùⁿ chı̍t kái.
"Goá ê ài khai sí beh---khô͘-a̍k!"
"Goá bô hoat-tō͘ boē kı̀-tit Goá ê---khô͘-a̍k!"
He sı̄ chiuⁿ-chı̂ ê siaⁿ! Ta̍k-ke chiām-chiām bêng-liâu āu chiū khai-sí ū lâng tòng-boē-tiâu chhiò chhut-lâi. Monsieur Armand kā thâu tàm-lo̍h-lâi, iōng chhiú thèⁿ leh. Chit ê sı̂-chūn, Box lāi thoân-koè-lâi chı̍t ê siaⁿ, chı̍t ê cha-po͘-lâng ê siaⁿ, leh chhiò !
Lēng-goā, tı̄ hı̀-tâi-téng, khó-liân ê La Carlotta chı̍t kái koh chı̍t kái leh têng-chhiùⁿ.
"Goá bô hoat-tō͘ boē kı̀-tit Goá ê---khô͘-a̍k!"
Chit ê sı̂-chūn, chit nn̄g ê tō-ián koh thiaⁿ tio̍h hit ê cha-po͘-lâng ê siaⁿ, tı̄ In ê thâu-chêng, āu-piah, boán sı̀-koè.
"I kin-á-jı̍t ê koa-siaⁿ ē kā tiàu tı̄ chhù-téng ê tiān-hoé-koāⁿ kám-tōng kah lak-lo̍h-lâi! "
Nn̄g ê lâng hiông-hiông giâ-thâu khı̀ khoàⁿ hit pha kui chheng, kui bān lia̍p tiān-hoé-kiû-á só͘ cho͘ khí-lâi ê tiàu-teng. "Taⁿ chhám ah!" In ê bı̄n chiⁿ-sún-sún. Chit pha chhut-miâ ê tiàu-teng í-keng lı̄-khui soh-á, tı̍t-tı̍t hiòng ē-kha ê thiaⁿ-chiòng teh lo̍h-khı̀ !
Tùi chit keng Opera hı̀-ı̄ⁿ lâi kóng, che chin-chiàⁿ sı̄ chı̍t ê khióng-pò͘ ê àm-mı̂. Ū chı̍t ê hū-jı̂n-lâng khı̀ hō͘ hit pha tiān-hoé teh-sí. Lēng-goā koh ū chin choē lâng tio̍h tāng-siong. Hı̀-ı̄ⁿ chiok-chiok koaiⁿ-mn̂g nn̄g lé-pài. La Carlotta chiông-chhú í-āu, tio̍h kiat-sok liáu i chhiùⁿ-koa ê sı̀ⁿ-miā.
