IX. Khí tı̄ ô͘ téng-bı̄n ê chhù
Teng-hoé koh to̍h khí-lâi ê sı̂, Rao͘l chiū àn í-á peh khí-lâi. I cháu-hiòng lâu-thui, kiâⁿ koè hāng-lō͘ kàu bú-tâi āu-piah. Kiâⁿ kàu Christine ê hoà-chong-sek thâu-chêng sı̂, ū chı̍t ki chhiú chhun koè-lâi khan i.
" Chit ūi siàu-liân pêng-iú, tàu-té sı̄ hoat-seng siáⁿ-mı̍h tāi-chı̀ ? Lí cháu hiah kín sı̄ beh khı̀ tó-ūi ? "
Rao͘l oa̍t-thâu chı̍t khoàⁿ, khoàⁿ tio̍h Persian tn̂g-tn̂g ê bı̄n.
"Christine i..." Rao͘l ê siaⁿ chin kip, "Erek kā i lia̍h khı̀ ah! I chit-chūn lâng tı̄ tó-ūi? Chhiáⁿ lí kā goá kóng, án-choáⁿ chiah ū hoat-tō͘ kàu Erek khí tı̄ ô͘ lāi ê chhù, hó bô? "
"Toè Goá lâi!" Persian kóng soah chiū chhoā i kiâⁿ jı̍p-khı̀ Christine ê hoà-chong-sek, kā mn̂g koaiⁿ-khí-lâi, kiâⁿ kàu chı̍t bı̄n kiàⁿ ê thâu-chêng.
"Chit ê pâng-keng chiah chı̍t ê mn̂g niā-niā." Rao͘l kóng.
"Lí sió-tán chı̍t ē," Persian kóng liáu chiū kā chhiú khǹg toà kiàⁿ ê téng-bı̄n, soá lâi soá khı̀. Chı̍t hun-cheng āu, siáⁿ-mı̍h tāi-chı̀ mā bô hoat-seng. Koh bô joā-kú, hit bı̄n kiàⁿ soah khai-sí tín-tāng se̍h koè-lâi, chhut-hiān chı̍t ê toā khang-phāng. Rao͘l khoàⁿ tio̍h chit ê chêng-hêng, lāi-sim ū chı̍t tiám á kiaⁿ-hiâⁿ.
"Kín leh! Toè Goá lâi, m̄-koh ài sè-jı̄," Persian kóng, "Goá bat Erek. Goá mā chai-iáⁿ i ê pı̀-bı̍t. Kín kā lí ê chiàⁿ-chhiú khǹg toà lí ê thâu-khak-téng, chhin-chhiūⁿ goá án-ne. Sûi-sı̂ pó-chhı̂ chit ê chu-sè."
"Ūi-siáⁿ-mı̍h?" Rao͘l kóng.
"Lí ài ē-kı̀-tit Joseph Buqoest sı̄ án-choáⁿ sí eh! I ê ām-á-kún téng kám m̄-sı̄ ū chı̍t tiâu soh-á. Erek sı̄ chı̍t ê chin gâu iōng soh-á ê lâng, chiū sǹg sı̄ tı̄ o͘-àm tiong mā kāng-khoán."
In nn̄g lâng ná kiâⁿ ná ùi kē ê só͘-chāi kiâⁿ lo̍h-khı̀. In kiâⁿ koè chı̍t koá àm-so-so ê hāng-lō͘ kap lâu-thui. Chí-iàu ū chı̍t tiám á siaⁿ, Persian chiū ē thêng lo̍h-lâi thiaⁿ kui-po͘-kú.
"Lán tang-sı̂ chiah kiâⁿ ē kàu hit ê ô͘?" Rao͘l thau-thau-á sè-siaⁿ kā mn̄g.
" Lán bô beh keng-koè hit ê ô͘, Erek ē kàm-sı̄ hit tiâu lō͘. Mā m̄-sı̄ án-ne, lán beh se̍h koè ô͘, àn āu-piah jı̍p-khı̀. Goá chai-iáⁿ chı̍t koá pı̀-bı̍t ê mn̂g."
Bô joā kú, in í-keng kàu hia. Ou-àm tiong Persian iōng chhiú tı̄ piah-téng mo͘ lâi mo͘ khı̀. "Ah! Tı̄ chia!" I chin hoaⁿ-hí sè-siaⁿ hoah chhut-lâi. I kā chhiûⁿ-ûi-á soá-khui, āu-piah chhut-hiān chı̍t ê mn̂g. I chiâⁿ sè-jı̄ kā mn̂g phah khui kiâⁿ jı̍p-khı̀. Chit ê sı̂-chūn, mn̂g soah hiông-hiông ka-kı̄ koaiⁿ khí-lâi. In í-keng kiâⁿ boē chhut-khı̀!
Pâng-keng lāi o͘-sô-sô. In chí-ū tán-thāi koh chù-ı̀ thiaⁿ. Persian kā chhiú khǹg toà piah téng lâi-hoê so-lâi-so-khı̀.
" Ah ! Bái ah ! " Persian leh hoah, " Lán kiâⁿ m̄-tio̍h mn̂g ah ! Chit keng sı̄ Erek hêng-hoa̍t lâng leh iōng ê pâng-keng, kui ê pâng-keng iōng kiàⁿ ûi khí-lâi. Lán sí tiāⁿ ah! Vicomte de Chagny, Lán kap sí-lâng í-keng chha bô joā-choē ah ! "
Chı̍t khai-sí, Rao͘l iá sa-bô-cháng, m̄-chai hoat-seng siáⁿ-mı̍h tāi-chı̀. Bô joā-kú i chiū liáu-kái ah! Tiān-hoé-kiû-á lóng to̍h khí-lâi, hn̄g-hn̄g ê só͘-chāi koh thoân-lâi chı̍t-chūn cha-po͘-lâng ê chhiò-siaⁿ. Erek chai-iáⁿ in tı̄ lāi-té.
Chit keng pâng-keng sı̄ iōng kiàⁿ cho͘ khí-lâi eh, pau-koat piah, tē-pán kap thian-pông lóng sı̄ iōng kiàⁿ lâi cho͘-sêng. Kiàⁿ ê téng-bı̄n ū chı̍t-koá tô͘, ū chhiū-á, hoe kap khe-lâu. Chit koá tô͘ chhin-chhiūⁿ leh thiàu-bú kāng-khoán tı̄ in ê ba̍k-chiu lāi tín-tāng. Pâng-keng lāi lú lâi lú joa̍h, lú lâi lú tòng-boē-tiâu. Rao͘l chhùi-ta koh joa̍h, khe-lâu tı̄ i ê ba̍k-chiu chêng soá koè-lâi soá koè-khı̀, chiū kán-ná leh chhiò i hām-bān lim boē tio̍h. I kā ba̍k-chiu ha̍p khí-lâi, khe-lâu iû-goân tı̄ i ê ba̍k-chiu chêng. Chúi, i su-iàu chúi! Kiàⁿ tı̄ i ê bı̄n-thâu-chêng teh kā i thí-chhiò. Bô joā-kú, i í-keng sı̀-ki bô-la̍t, bô la̍t thang kóng-oē. Sı̄m-chí bô la̍t thang kā ba̍k-chiu thí-khui. Chit ê sı̂-chūn, i í-keng boē kám-kak chhùi-ta. I chí-sı̄ kám-kak hiah-nı̍h-á thiám....
"Christine! Goá sı̄ chiah-nı̍h-á hām-bān. Siūⁿ beh pó-hō͘ lí, soah kàu kah kin-á-jı̍t án-ne chū-sin-lân-pó ê tē-pō͘..."
Thàu koè kiàⁿ, Christine khoàⁿ tio̍h i só͘ ài ê lâng tı̄ hia teh siū-khó͘. Erek chiū khiā tı̄ leh i āu-piah, àn i ê chhiú lám leh.
"I koh oa̍h bô joā-kú ah! Christine, lí bô joā-choē sı̂-kan thang khoàⁿ i ah! Lí boē-sái kā ba̍k-chiu kheh khí-lâi, siông-sè kā khoàⁿ!"
Christine siong-sim kah kóng boē chhut oē. I siūⁿ beh toā-siaⁿ kiò chhut-lâi, m̄-koh phian-phian kiò boē chhut siaⁿ, kám-kak sim í-keng sí, liáu-āu kóng :
"Lí ná ē-sái án-ne tùi-thāi goá, Erek! Lí kui-khı̀ kā goá thâi-sí hó ah!"
"Goá ná-ē khı̀ thâi lí? Goá sı̄ chiah-nı̍h-ah ài lí. Christine, lí kè hō͘ goá chò bó͘ hó bô? Lí nā ē-tàng ài goá, kè goá chò bó͘, nā án-ne, Rao͘l kap Persian chiū ē-tàng koh oa̍h ! "
Christine bān-bān-á kā bı̄n oa̍t koè-lâi. I chù-ba̍k leh khoàⁿ Erek hit ê khióng-pò͘ koh bái ê bı̄n, bān-bān-á kóng :
"Hó, Erek, chū chit-má khai-sí, goá chiū sı̄ lí ê lâng ah!" I siang-chhiú àn Erek ê ām-á-kún lám khí-lâi, chim i, iōng i chhiong-boán jia̍t-chêng ê chhùi-tûn bān-bān-á chim tı̄ Erek bô siáⁿ chéng-chê ê chhùi. Christine chim liáu bān-bān-á kóng, "Khó-liân bô lâng thiàⁿ-sioh ê Erek! "
Erek ba̍k-chiu kim-kim m̄-káⁿ siong-sı̀n, "Lí kèng-jiân khéng chim goá! Goá pēng bô bián-kióng lí ài án-ne choè, lí kèng-jiân ka-kı̄ goān-ı̀ án-ne chò. Ouh! Goá ê Christine! Lí chiū chhin-chhiūⁿ sian-lú hā-hoân. Che sı̄ goá thâu-chı̍t-pái hō͘ cha-bó͘-lâng chim koè. Chiū sı̄ gún ma-ma mā m̄-bat kā goá chim koè. Chū Goá sè-hàn khai-sí, Chí-iàu goá kiâⁿ oá koè-khı̀, i chóng-sı̄ kā thâu oa̍t-khui m̄ chhap goá."
Erek kā thâu tàm leh, siang-chhiú am leh khai-sí khàu-chhut-lâi, chē toà Christine ê kha piⁿ-a, kóng :
"Christine, lí chū-iû ah! Lí ē-tàng chhoā Rao͘l lı̂-khui chia, kè hō͘ i, khoài-khoài lo̍k-lo̍k koè jı̍t-chí. Kan-taⁿ ǹg-bāng lí ū-sı̂-á mā ē khı̀ siūⁿ tio̍h Goá, Erek. Cháu! Chhiáⁿ lín kín lı̂-khui chia. "
X. Madame Giry pài-hóng Persian
Soah-lo̍h-lâi ê kúi ê lé-pài, choân Paris ê lâng lóng leh kóng hit àm Opera hı̀-ı̄ⁿ só͘ hoat-seng ê tāi-chı̀. Ta̍k-ke lóng siūⁿ beh chai-iáⁿ tàu-té Christine Daaé cháu tó-ūi khı̀ ah? Vicomte de Chagny chit-má tı̄ tó-ūi? In kám lóng iá oa̍h leh ?
Opera lāi ê mô͘-sı̂n-á leh ?
Kúi lé-pài í-āu, ū chı̍t kang ē-po͘, Giry sió-chiá cháu-khı̀ Rivoli hoe-hn̂g hù-kı̄n chı̍t keng sè-sè ê chhù. I jı̍p-khı̀ lāi-bı̄n, peh chiūⁿ lâu-thui kiâⁿ kàu siōng koân hit chàn, kā mn̂g phah-khui ê sı̄ Persian.
Giry sió-chiá giâ-thâu khoàⁿ I, kóng :
"Chiâⁿ-kú bô khoàⁿ tio̍h lí, lí chai-iáⁿ hit koá tap-àn, tio̍h bô? Chhiáⁿ lí kā goá kóng, in kám iá-koh oa̍h tı̄ chit ê sè-kan?"
"Jı̍p-lâi-chē chiah koh kóng." Persian sè-siaⁿ kā ı̀n.
In chē leh thang-á-mn̂g piⁿ-a, goā-kháu ē-tàng khoàⁿ tio̍h Rivoli kong-hn̂g.
"Tāi-chı̀ sı̄ án-ne," Persian bān-bān á khai-sí kóng, "Opera lāi ê kúi í-keng sí ah! I chı̍t-tah-á kú tio̍h bô siūⁿ beh koh oa̍h lo̍h-khı̀. Saⁿ kang chêng goá khoàⁿ tio̍h i ê sí-thé. Iā in-ūi án-ne, goá kin-á-jı̍t chiah káⁿ kā lí kóng i ê tāi-chı̀. I í-keng bô hoat-tō͘ lâi thâi goá ah ! "
"Lí sı̄ kóng Opera lāi ê mô͘-sı̂n-á sı̄ lâng m̄-sı̄ kúi? " Madame Giry mn̄g.
"Tio̍h sı̄ ah, i ê miâ kiò-chò Erek, che mā m̄-sı̄ i ê chiàⁿ-miâ. I sı̄ tı̄ Hoat-kok chhut-sı̀, m̄-koh goá sı̄ tı̄ Persian se̍k-sāi i ê. I sı̄ chı̍t ê chin chhut-sek ê kiàn-tio̍k-su. Hit ê sı̂-chūn, gún tı̄ hia chò-hoé chò-sit. Ū chı̍t-chām-á, gún sı̄ boē-bái ê pêng-iú. Āu-lâi i soá tńg-lâi Paris. Goá toè i āu-piah tńg-lâi. Goá siūⁿ beh chai-iáⁿ i tàu-té beh chhòng-siáⁿ. I sı̄ chı̍t ê hiah-nı̍h-á khiáu koh gûi-hiám ê jı̂n-bu̍t. I ū hoat-tō͘ tông-sı̂ chhut-hiān tı̄ nn̄g, saⁿ ê só͘-chāi, siaⁿ koh ē-tàng àn pa̍t-ūi thoân koè-lâi. I mā ē-sái iōng soh-á chò chin choē tāi-chı̀. I iā ē-tàng chò chin kı̂-khá ê kiàⁿ kap mn̂g. Lí siūⁿ khoàⁿ-māi. I tàu khí chit keng hı̀-ı̄ⁿ, khí hı̀-ı̄ⁿ lāi tē-hā choē-choē ê hāng-lō͘. I koh tı̄ ô͘ tiong khí chı̍t keng pı̀-bı̍t ê chhù. In-ūi i bái kah kiaⁿ lâng ê bı̄n, i í-keng bô hoat-tō͘ tı̄ hı̀-ı̄ⁿ goā-bı̄n seng-chûn lo̍h-khı̀ ah! Lán ē-tàng thé-hoē i ê pi-ai. Khó-liân ê Erek, i sı̄ hiah-nı̍h-á khiáu koh chiah-nı̍h-á bái. Ta̍k-ke nā khoàⁿ tio̍h i ê bı̄n, chiū cháu kán-ná poe leh! I chiū seng-oa̍h tı̄ chit-khoán kı̂-koài ê khoân-kéng lāi-té. Chı̍t poàⁿ chhiūⁿ lâng, chı̍t poàⁿ chhiūⁿ kúi. M̄-koh, choè-āu i iā-sı̄ chı̍t ê cha-po͘-lâng, i siūⁿ beh tit-tio̍h cha-bó͘-lâng ê ài..."
Persian kóng kàu chia, sió thêng chı̍t ê, Madame Giry koh kā mn̄g.
"Ah Christine Daaé kap Vicomte Rao͘l tı̄ tó-ūi leh? In tàu-té hoat-seng siáⁿ-mı̍h tāi-chı̀ ? "
Persian chhùi-á chhiò-chhiò, "Sı̄ ah! Tàu-té chit nn̄g ê siàu-liân-lâng cháu-tó-khı̀ leh? Khó-lêng í-keng bô lâng chai-iáⁿ ah!"
Āu-lâi, Rao͘l kap Christine m̄-bat koh tı̄ Paris chhut-hiān koè, bô-tiāⁿ in í-keng chē hé-chhia khı̀ pak-pō͘ choè-hoé kè bô-iu bô-chhiû ê hó jı̍t-chí. Bô-tiāⁿ Christine iu-bí ê koa-siaⁿ iá tı̄ bó͘ chı̍t-ê só͘-chāi leh chhiùⁿ, tio̍h chhin-chhiūⁿ tı̄ léng koh súi ê Norway soaⁿ-lāi, ū siáng chai-iáⁿ?
