Hit àm N̂g Sian-siⁿ hó-ı̀ lâu goá kap i chia̍h-pn̄g, ài goá chiong chit jı̍t ê kám-sióng pò hō͘ i chai. Goá kóng,
“Ūi-tio̍h beh hō͘ Ná-ná tùi goá ê sı̀n-jı̄m kap kái-tû i ê pi-koan, goá ba̍k-chêng bô beh kà i sím-mı̍h ha̍k-būn, chí-ū kap i kóng oē, chiong ū ı̀-gı̄ ê kò͘-sū, á-sı̄ chhiò oē hō͘ i hoaⁿ-hí, ū sı̂ chàu i ài thiaⁿ ê ga̍k-khiok, á-sı̄ sak lûn-í tı̄ hoe-hn̂g sàn-pō͘ chiū hó. M̄-chai N̂g Sian-siⁿ lí ê ı̀-kiàn cháiⁿ-iūⁿ?”
“Hó, goá chàn-sêng lí ê ı̀-kiàn. Ba̍k-chêng chí-iàu nā oē thang hō͘ i hoaⁿ-hí, sàu-tû i beh sí ê liām-thâu, goá chiū chin hoaⁿ-hí.”
“Goá oē chı̄n goá ê le̍k-liōng lâi kó͘-lē i; put-kò, nā beh hō͘ Ná-ná oē tùi sí ê liām-thâu oāⁿ choè oa̍h ê ióng-khı̀, tùi siau-ke̍k pı̀ⁿ choè chek-ke̍k, chiâⁿ-choè chân jı̂ put hoè ê lâng, goá jı̄m ûi ū chı̍t ê hong-hoat, chiū-sı̄ hō͘ i ū chı̍t ê sı̀n-gióng,bat chı̍t ê chō bu̍t Chú-----Siōng-tè kap Iâ-so͘ Ki-tok ê sı̀n-sim chiah ū hoat-tō͘.”
“Lí ê ı̀-sù sı̄ hō͘ i chiâⁿ-choè Ki-tok-kàu-tô͘, sı̄ bô?”
“Oē thang án-ni kóng, tng i nā bat Siōng-tè ê thiàⁿ, tùi Iâ-so͘ Ki-tok lâi beh chín-kiù i liáu-āu, put-tān i boē koh chhē sí ê lō͘, hoán-tńg oē tit-tio̍h khoài-lo̍k chhàn-lān ê jı̂n-seng, hoaⁿ-hí ū ı̀-gı̄ lâi oa̍h--lo̍h-khı̀.” Goá kóng.
“Hm̀, kiám-chhái ēng Ki-tok-kàu ê le̍k-liōng oē tit-tio̍h chit ê lí-sióng. Hó, Ông Sian-siⁿ, bô-lūn lí ēng sím-mı̍h hong-hoat, nā oē ta̍t kàu bo̍k-tek chiū hó; goá siong-sı̀n lí ū pān-hoat.”
Hit àm tńg-lâi, chiong chit hāng sū pek-chhiat kı̂-tó kau-tāi Siōng-tè. Chí-ū Siōng-tè chiah ū hoat-tō͘ pang-chān Ná-ná.
Ū chı̍t chá-khí Ná-ná iáu-bē chhut-lâi, goá lâi chē tı̄ kǹg-khı̂m chêng, soè siaⁿ teh chàu Beethoven ê “Hō͘ Ài-lē-su” (for Elise)kap Badarzewska ê “Siàu-lú ê kı̂-tó” (Mai-den is Prayer). Hut-jiân tı̄ goá ê āu-bı̄n ū lâng teh phah pho̍k-á.
“Chin gâu chàu, chin hó, chin hó.” M̄-chai sím-mı̍h sı̂, i ka-kı̄ sak lûn-í lâi tı̄ goá ê āu-bı̄n teh thiaⁿ, koh kóng, “Ông Sian-siⁿ, chū goá phoà-pı̄ⁿ chit nn̄g nı̂ lâi, goá lóng bô koh thiaⁿ tio̍h chiah-nih hó thiaⁿ ê im-ga̍k, tng-sı̂ goá o̍h kàu teh-beh oē-hiáu chàu “hō͘ Ài-lē-su” chit tiâu, taⁿ lóng pàng-khı̀ lah, chhiáⁿ lí koh chàu chı̍t pái hō͘ goá thiaⁿ, hó bô?”
“Ǹg-bāng bô kú lí iā oē-hiáu chàu,” goá thiaⁿ i ê oē koh chàu chı̍t pái. Chàu liáu, i ê bı̄n chhiò kah chin tiⁿ; kàu taⁿ, m̄-bat khoàⁿ i ū chit khoán ê bı̄n-iông.
“Ông Sian-siⁿ, goá tùi kin-á-jı̍t khí, beh koh khai-sí o̍h, lí tio̍h kà goá.” I chin hoaⁿ-hí kā goá kóng.
Goá chiong kǹg-khı̂m-í the̍h cháu, sak i ê lûn-í oá-lâi, sui-jiân kha bô hoat-tō͘ thang ta̍h chiat-im-pán, m̄-kú chhiú oē thang toâⁿ. Goá chē tı̄ i sin-piⁿ, hō͘ i sûi-ı̀ toâⁿ khoàⁿ-māi. Nn̄g nı̂ lâi i ê chhiú koh bong-tio̍h kiān-poâⁿ, sui-jiân chhiú í-keng pı̀ⁿ chin ngı̄; nā-sı̄ ū kè-sio̍k ha̍k-sı̍p, m̄-bián poàⁿ nı̂ ún-tàng oē toâⁿ goá tú-chiah ê khiok. Tùi hit jı̍t khí, chit keng chhù khai-sí ū kǹg-khı̂m ê siaⁿ chàu chhut-lâi.
Ná-ná nā toâⁿ-khı̂m ià-siān ê sı̂, goá chiū sak i ê lûn-í chhut-lâi hoe-hn̂g sàn-pō͘, kóng hó-thiaⁿ koh chhiò-khoe ê kò͘-sū hō͘ i thiaⁿ, ū sı̂ thiaⁿ kàu hah-hah-chhiò, ū sı̂ i iā oē sūn-soà kóng hō͘ goá chhiò.
Jı̍t-chí chı̍t-jı̍t chı̍t-jı̍t kè-khı̀, Ná-ná ê bı̄n khah bô í-chêng hiah-nih siau-ke̍k lah. Ū chı̍t jı̍t, pún-hiong ê hı̀-hn̂g teh hòng-iòng chı̍t chhut tiān-iáⁿ miâ kiò “Se-siong khı̂m-toān”, Chit pō͘ iáⁿ-phı̀ⁿ goá í-keng khoàⁿ kè, goá jı̄n ûi ū hō͘ Ná-ná khoàⁿ ê kè-ta̍t, chiū chhéng-kiû N̂g sian-siⁿ ê tông-ı̀, beh chhoā Ná-ná khı̀ khoàⁿ. I tāi-seng tiû-tû kóng:
“Chū chiông goá hoān chit ê pı̄ⁿ chiū m̄-bat chhut-mn̂g khı̀ goā-ūi, tong-jiân koh-khah m̄-bat khı̀ khoàⁿ tiān-iáⁿ, in-ūi kiaⁿ lâng chhiò, ka-kı̄ kiàn-siàu.”
“Bô iàu-kín, che pèng m̄-sı̄ choē-koà.” goá chhiò kóng.
“M̄-kú lâng oē kā goá kim-kim siòng.” i koh tiû-tû ı̀n.
“Lán khoàⁿ àm-tiûⁿ, lō͘-nih bô lâng jı̄n oē chhut, lí koh koà chı̍t ki thài-iông ba̍k-kiàⁿ, chiū lóng bô lâng chai-iáⁿ lah.”
“Án-ni hó,” i chin hoaⁿ-hí tap-èng.
Hit àm, goá sak i ê lûn-chhia, tùi chhù kàu hı̀-hn̂g ū siong-tong ê lō͘-thêng, lō͘-nih goá ná kap i kóng oē ná hō͘ i khoàⁿ sı̀ chiu-ûi ê kéng-tı̀. I in-ūi chin kú bô chhut-mn̂g, só͘-í khoàⁿ kah chin tek-ı̀, lóng bô kám-kak lâng teh khoàⁿ i. Kàu hı̀-hn̂g, goá khı̀ kap thâu-ke kóng hó-sè, thâu-ke chin hoaⁿ-hí, te̍k-pia̍t kā goán chún-pı̄ sek-tòng ê só͘-chāi, hō͘ goá kap Ná-ná chē choè-hoé.
Chit chhut tiān-iáⁿ sı̄ teh biô-siá chı̍t ê lú koa-chhiú, tng i chhut-miâ ê sı̂, hut-jiân hoān tio̍h siáu-jı̂ bâ-pı̀ chèng, i kám-kak hui-siông thòng-khó͘, siūⁿ beh chū-sat, āu-lâi i ê tiōng-hu kap pêng-iú siat-hoat ēng kang-chok lâi kó͘-lē i, hō͘ i chham-ka lô-kun ián-chhiùⁿ, kèng-jiân tı̄ chı̍t pái sēng-tāi ê ián-chhiùⁿ-hoē khiā khí-lâi.
Goá ná khoàⁿ tiān-iáⁿ, ná chù-ı̀ Ná-ná ê piáu-chêng, tng i khoàⁿ kàu hit ê koa-chhiú oē chē hui-ki pe-lâi pe-khı̀; choè lô-kun ián-chhiùⁿ ê sı̂, i soè siaⁿ kóng, “Goá iā beh chē hui-ki.” Choè-āu koa-lú tùi lûn-í téng peh khí-lâi ê sı̂, Ná-ná heng-hùn kàu lâu ba̍k-sái. Tiān-iáⁿ choè soah, teng to̍h khí-lâi, goá khoàⁿ i ê bı̄n chhiong-moá tio̍h bô hān ê kám-khài. Chit pō͘ tiān-iáⁿ tùi i ê khé-sı̄ chin toā, tńg-lâi kàu lō͘-nih, i tùi goá kóng, “Lâng nā ū sı̀n-sim, sin-thé sui-jiân ū khoat-hām, iáu-kú ū lō͘-ēng.”
“Tio̍h, só͘-í lí m̄-thang chū-pō chū-khı̀, tio̍h o̍h lú chú-kak ê bô͘-iūⁿ.”Goá koh kā i kóng, “Bô kú ū beh koh chı̍t chhut tiān-iáⁿ kiò-choè ‘Hiok-jı̍t tong-seng’, goá chiah koh chhoā lí lâi khoàⁿ.”
“Hó, chóng-sı̄ lí seng kóng chit ê loē-iông hō͘ goá thiaⁿ.” Goá ná sak ná kóng,“Chit ê kò͘-sū sı̄ teh biô-siá Bí-kok le̍k-sú siōng choè úi-tāi ê chóng-thóng Lô-su-hok Sian-siⁿ ê toān-kı̀. Tng i tı̄ chèng-tı̄ seng-gâi khai-sí chhàn-lān ê sı̂, put-hēng iā hoān tio̍h bâ-pı̀-chèng, nā-sı̄ che bô éng-hióng i ê hùn-tò͘, i khò siang chhiú ê ló͘-le̍k, choè-āu kèng-jiân chiâⁿ-choè chı̍t ūi úi-tāi ê chèng-tı̄-ka, chhut-miâ ê chóng-thóng.” Tı̄ an-chēng ê àm-mı̂, i tiām-tiām thiaⁿ, put-ti put-kak kàu chhù lah, lú-pı̄ chhut-lâi khui mn̂g, goá chiong lûn-í kau hō͘ lú-pı̄. Beh jı̍p-khı̀ ê sı̂, Ná-ná kā goá kóng,“ Í-āu chhiáⁿ lí siông-siông kóng chit khoán sū-sı̍t ê sū hō͘ goá thiaⁿ,” goá tàm-thâu. Goá siong-sı̀n tı̄ bô kú ê chiong-lâi jı̍t-chí oē kái-piàn i ê koan-liām.
Ū chı̍t àm, goá tiâu-kang soán toā im-ga̍k-ka Beethoven kúi tè choè chhut-miâ ê kau-hióng ga̍k-khiok hō͘ Ná-ná thiaⁿ, i kóng, chiah ê ga̍k-khiok sui-jiân chhut-miâ; nā-sı̄ bô siáⁿ oē-hiáu him-sióng, goá chiū chiong Beethoven ê seng-gâi kóng hō͘ i thiaⁿ, jiân-āu soat-bêng chiah ê khiok ê loē-iông.
“Chin-choē lâng chai-iáⁿ Beethoven sı̄ le̍k-sú-siōng choè chhut-miâ ê im-ga̍k-ka, m̄-kú i ê it-seng hui-siông khó-lı̂n, 17 hè lāu-bú sí, 10 hè lāu-pē sí, ka-têng hui-siông sàn-chhiah, i tio̍h hū-khí hû-ióng 5 ê sió-tı̄ sió-bē ê chek-jı̄m. In-ūi i ū im-ga̍k ê thian-châi, só͘-í lóng khò nn̄g ki chhiú chok-khiok kap ián-chàu lâi ı̂-chhı̂ ka-têng seng-oa̍h. Nā-sı̄ hō put tan hêng, tng i 30 hè ê sı̂, hit ê im-ga̍k choè tiōng-iàu ê khı̀-koan---hı̄-á, soà bô thiaⁿ-kı̀ⁿ, piàn-sêng chı̍t ê chhàu-lâng (耳聾), che tùi chı̍t ê im-ga̍k-ka sı̄ hô-téng toā ê táⁿ-kek. I kúi-nā pái siūⁿ beh chū-sat, āu-lâi i koat-chı̀ the̍h chhut ióng-khı̀, beh chiàn iâⁿ miā-ūn, i siá hō͘ chhin-iú ê phoe án-ni kóng:“Goá beh kap miā-ūn tí-khòng tò-té; Goá siong-sı̀n goá boē tùi ūn-miā àⁿ-thâu.”
I ê sêng-kong sı̄ tùi chia kek khí, hı̄-khang boē thiaⁿ tio̍h goā-kài ê siaⁿ, ēng sim-lêng chok-khiok; kó-jiân chiah ê sè-kài choè chhut-miâ ê “Miā-ūn kau-hióng-khiok,” “Eng-hiông kau-hióng-khiok,” “Chhân-hn̂g kau-hióng-khiok” kap chin-choē “Ha̍p-chàu-khiok” （命運、 英雄、 田園交響曲與協奏曲） lóng sı̄ tùi hı̄-khang bô thiaⁿ-kı̀ⁿ liáu-āu choè-chiâⁿ ê, sı̄m-chı̀ iáu-kú tı̄ Ui-iā-ná (Vieⁿa) chheng-bān lâng ê bı̄n-chêng chí-hui ga̍k-thoân. Te̍k-pia̍t chit siú MIĀ-Ūⁿ KAU-HIONG2-KHIOK, chiū-sı̄ teh biô-siá i ê pi-chhám jı̄ kap ūn-miā hùn-tò͘ tit-tio̍h choè-āu sèng-lı̄ ê ga̍k-khiok. Sè-kan lâng lóng kong-jı̄n sı̄ choè úi-tāi ê chı̍t siú ga̍k-khiok.
Goá kóng kàu chia, Ná-ná nn̄g lúi ba̍k-chiu thiaⁿ kah jı̍p-sı̂n, sûi-sı̂ kiò goá chiong chhiùⁿ-phı̀ⁿ tàu hō͘ i thiaⁿ, koh chı̍t-toāⁿ chı̍t-toāⁿ kā i soat-bêng:
0 3 3 3 1---1---0 2 2 2 7---1---1
Chhiùⁿ-phı̀ⁿ chàu chhut chong-giâm ê siaⁿ, che sı̄ put-hēng ê miā-ūn teh tùi Beethoven phah-mn̂g. Kè-khı̀ sı̄ miā-ūn tı̄ i ê sin-chiūⁿ teh ko-ko-tı̂ⁿ ê chhám-kéng, nā-sı̄ i m̄ jı̄n su, beh tí-khòng kàu bé---choè-āu i tek-sèng lah! Chàu chhut kek-tōng khái-soân ê ga̍k-im, i í-keng tu̍t-phoà khó-phàⁿ ê miā-ūn.
Tng chhiùⁿ-phı̀ⁿ chàu oân, Ná-ná ê ba̍k-chiu lāi iā kâm tio̍h heng-hùn ê ba̍k-sái lah.
Goá í-keng tit-tio̍h Ná-ná ê sı̀n-jı̄m, i iā chiām-chiām khoài-lo̍k, í-chêng chin chió chhiò-iông ê bı̄n, taⁿ chiām-chiām teh bêng-lóng khí-lâi. Goá chèng-sek kā i siōng-khò, phian-tēng sı̂-kan-pió, tû-liáu keng-siông ê oa̍h-tāng, kóng kò͘-sū, sàn-pō͘ í-goā, ke-thiⁿ ha̍k-hāu khò-thêng, im-ga̍k him-sióng, bûn-ha̍k ê gián-kiù, siá-chok, liān kǹg-khı̂m. Ūi-tio̍h beh hō͘ i bô siūⁿ ka-kı̄ ê put-hēng, goá tiâu-kang khǹg Sèng-keng, kàu-hoē cha̍p-chı̀ kap choē-choē hó ê chheh, hō͘ i tı̄ pêng-siông sı̂ thang tha̍k. Ū chı̍t jı̍t goá khı̀ ê sı̂, i tú-tú teh tha̍k Hái-lûn Khek-le̍k (Helen Keller)só͘ siá ê “Goá ê sı̀n-gióng,” i sûi-sı̂ mn̄g goá kóng:
“Kiám ū iáⁿ Helen Keller sı̄ chı̍t ê chhiⁿ-mı̂, chhàu-hı̄ koh é-káu ê cha-bó͘-lâng?” “Ū iáⁿ,” goá ı̀n.
“Án-choáⁿ chı̍t ê bô ba̍k-chiu thang khoàⁿ, bô hı̄-khang thang thiaⁿ, koh boē kóng oē ê lâng oē-hiáu siá jı̄, koh oē-hiáu tù-chok, sı̄m-chı̀ chiâⁿ-choè sè-kài chhut-miâ ê bûn-ha̍k-ka, kàu-io̍k-ka?”
“Sı̄m-chı̀ oē-hiáu thiaⁿ im-ga̍k, him-sióng hoe-ba̍k kéng-tı̀, koh chai-iáⁿ tùi-hong só͘ beh kóng ê oē.” Goá koh ke-thiⁿ lo̍h-khı̀.
“Kiám oē án-ni? I beh ēng sím-mı̍h khı̀-koan thiaⁿ im-ga̍k, khoàⁿ hoe-chháu kap lâng kóng oē?” I koh-khah hò͘ⁿ-kı̂ mn̄g.
“Ēng i hit nn̄g ki chhiú kap phı̄ⁿ, tng i chiong chhiú-chí khǹg oá tùi-hong ê chhùi, chiū chai-iáⁿ tùi-hong teh kóng sím-mı̍h oē; thiaⁿ im-ga̍k iā sı̄ án-ni, chhiú oá-kūn lat-pat ê thâu-chêng, chiū kap phó͘-thong lâng siāng-khoán teh him-sióng koa-khiok. Lâng nā kap i chiap-chhiok kúi pái í-āu hit lâng jı̍p-lâi, i chiū sûi-sı̂ jı̄n--chhut-lâi, che sı̄ ēng i ê phı̄ⁿ oē thang phı̄ⁿ chhut chiu-ûi ê sū.”
“Lí ná kóng, goá ná siūⁿ boē-hiáu hit ê goân-in, i m̄-sı̄ sı̂n, ná lí ū chiah-nih lı̄-hāi?” i koh mn̄g.
“In-ūi i tùi nn̄g ê chin gâu ê lāu-su: chı̍t ê lâm--ê, miâ kiò B. Thomson kap chı̍t ê lú--ê, miâ kiò A. Sullivan, tùi soè-hàn chiū ēng khó͘-sim kā i kàu-io̍k ê kiat-kó. Siōng iàu-kín, chiū-sı̄ Helen Keller pún-sin phāu tio̍h toā ê sı̀n-sim, koat-sim kap nāi-sim,” goá chià tio̍h chit ê lâi àm-sı̄ i.
“Lí só͘ kóng chia ê lâng, in ūi sím-mı̍h ū chit khoán le̍k-liōng chiâⁿ-choè hiah-nih úi-tāi iâⁿ-kè chı̍t ê bô khoat-hām ê lâng, iā goá thái boē?”
“Ná-ná, goá siong-sı̀n lí iā oē, chí-iàu lí goān-ı̀ ha̍k-sı̍p in ê pı̀-koat,” goá ēng khak-sı̀n kā i pó-chèng.
