Ok iú Ok-pò

Lâng chò pháiⁿ bē-bián-tit siū hêng-hoa̍t. Chit-sı̀ āu-sı̀ lóng sı̄ án-ni. Chāi-seⁿ i-ê sim bē pêng-an, ū sit-lo̍h thé-biān, ia̍h hō͘ lâng pān-choē. Sí-āu hêng-hoa̍t sı̄ ke̍k-tāng ke̍k-tn̂g; ia̍h bē siám-pı̄--tit.

Lâng chò hó kim-sı̀ siū siān-pò, ū tit-tio̍h an-sim koh hō͘ lâng tùi-tiōng, ia̍h koè-sı̀ hióng-siū éng-oán ê toā êng-kng, koh tit-tio̍h Siōng-tè bû-hān ê siúⁿ-sù.

Chèng-lâng tio̍h kín-sı̄n bo̍h-tit chò-khí-thâu sió-khoá ê pháiⁿ, kiaⁿ-liáu hit-ê pháiⁿ-iūⁿ sı̄ ná-kú ná-toā, chiū hêng-hoa̍t sı̄ ná-kú ná-tāng. Lán tāi-ke tio̍h siông-siông kiû Siōng-tè hō͘ goán kàu-gia̍h tı̀-sek kiam khùi-la̍t lâi thoat-lı̄ ta̍k-hāng ê choē-ok.

Tı̄ ē-té ū kı̀-chài nn̄g-chat-sū lâi piáu-bêng ok iú ok-pò, ia̍h kéng-kài lâng tio̍h tı̂-hông bo̍h-tit hoān-choē. Chóng-sı̄ lâng m̄-thang phah-sǹg ē-bı̄n kı̀-chài chân-jím ê hêng-hoa̍t sı̄ ha̍p-gı̂.

Sio-sí kiap-koan ê lâng

Bûn-bêng-hiaⁿ ū hoê-phoe thong-ti Cha̍p-saⁿ-kah kàu-hoē lâng ê khiàm-khoeh chiū soà siá chı̍t-hāng, chiū-sı̄ Sio-sí kiap-koan ê lâng. Phoe ū kóng:

Koh-chı̍t-hāng ê tāi-chı̀, sı̄ goá só͘ m̄-bat khoàⁿ-tio̍h ê sū, chiū-sı̄ lâng oa̍h-oa̍h kā-i sio-sí. Chiū-sı̄ tú-tio̍h kū-nı̂ chit-hō ê nı̂-tang, bô-thang-chia̍h, chē-chē chò-chha̍t ê lâng thau koah-be̍h, thau liú hân-chû; goá só͘ kóng hō͘ lâng sio-sí hit-ê lâng, sı̄ ūi-tio̍h mê--sı̂ khı̀ kiap-koan, iā hō͘ lâng lia̍h--tio̍h, in-ūi hit-ê lâng chin-gâu kiap lâng ê bōng. Chiàu chia ê sè-sio̍k-lâng kóng, hit ê lâng kiap lâng ê bōng chin-gâu, in-ūi lâng ê bōng cha̍p-hūn chha-put-to hō͘ i kiap sı̀-hūn khı̀.

Kàu tı̄ jı̄-goe̍h-chhe iû-goân sı̄ chhut mn̂g khı̀ kiap-bōng, hit-mê-hng tú-gū hiah ê teh-chiú hân-chû, chiú chhài-thâu ê lâng, chiū hō͘ in lia̍h-tio̍h, koaiⁿ-teh, kàu tı̄ chit jı̄-goe̍h jı̄-it chia ê chóng-lí lāu-toā chiah gí kóng tio̍h kā-i sio-sí-khı̀, bián-tit hō͘-i oa̍h-teh lâi sńg-hoāi lâng ê hong-súi, chiū tı̄ hit jı̄-it-jı̍t chha-put-to cha̍p-jı̄-tiám-chhut ê sı̂ chhoā-khı̀ Po͘-sim lâm-pêng hit ê po͘, tı̄-hia chhāi-thiāu, pa̍k hit-ê lâng tı̄ thiāu--nı̍h, sı̀-ûi chiah chiong tek-chhı̀-oe kap tek-kho͘ lâi chiap tı̄ hit-ê lâng ê seng-khu, lâu i ê hêng-khám kap thâu-khak chhut-hiān, ē-té chiah chiong chháu-á lâi ín-hoé.

Kàu teh-beh pàng-hoé sio ê sı̂, goá cháu-khı̀ Po͘-sim-ke, in-ūi m̄-káⁿ khoàⁿ hit-ê lâng tı̄ hoé ê tiong-ng, iā m̄-káⁿ thiaⁿ i tı̄ hoé tiong-ng ai-kiò ê siáⁿ. Goá khoàⁿ-kı̀ⁿ hit-ê lâng chin thè i kan-khó͘, kàu beh lâu-ba̍k-sái chhut-lâi. Hit-ê lâng goá khoàⁿ lóng bô hoân-ló ê khoán-sit. Goá thiaⁿ-kı̀ⁿ hiaⁿ-tı̄ teh kóng, hoé í-keng khí-to̍h chin-iām, sio-tio̍h i ê saⁿ-á-khò͘ ê sı̂, i-ê chhùi iáu teh pō͘ pı̂n-nn̂g, ia̍h-bô ài-kiò; kàu hit-tia̍p thâu-mn̂g í-keng hō͘ hoé sio-khı̀, seng-khu iā hō͘ hoé sio-tio̍h, chha-put-to beh tn̄g-khùi ê sı̂, kóng chiah ū iô-thâu hāiⁿ saⁿ-siaⁿ chiah sí.

Hit-ê lâng tú-tio̍h sio ê khoán sı̄ chhin-chhiūⁿ Thian-lō͘-le̍k-thêng. Chı̄n-tiong tı̄ Hu-hoa-chhı̄ hō͘ lâng sio ê khoán-sit chhāi chı̍t-ki-thiāu, ēng thih-soàⁿ lâi pa̍k i-ê seng-khu tı̄ thiāu--nı̍h. Lūn teh khoàⁿ ê lâng sı̄ chha-put-to chhin-chhiūⁿ Hi-pek-lâi ê phoe 12:1 só͘ kóng, ‘Khoàⁿ ê lâng hiah-choē, chhin-chhiūⁿ hûn teh tàⁿ’, hit ê thióng-po͘ lóng-sı̄ lâng. Hit-sı̂ lâng sio-sí liáu, lâng chiū phoà i-ê pak-tó͘ lâi the̍h i-ê sim-koaⁿ, kóng sı̄ beh khı̀ chia̍h, Hāiⁿ ah, thài ū hiah chân-jím ê lâng ah! Sio-sí to siuⁿ-khek-khui lah, iū-koh lâi chia̍h i-ê seng-khu ah!

Taⁿ só͘ kóng sı̄ chiah-ê: kiû sian-seⁿ thè goán kı̂-tó, hō͘ chiah ê hiaⁿ-tı̄ ē-tit-thang chai āu-lâi ê hêng-hoa̍t chhin-chhiūⁿ hit-hō; chiū bián-tit ko͘-hū Chú ê chhim-in, ē-tit-thang siám-pı̄ āu-lâi ê hêng-hoa̍t; ia̍h thè goá kı̂-tó hō͘ goá ē-tit-thang gâu lı̄-ek chiah hiaⁿ-tı̄ chí-moē. Sı̄ sim-só͘-goān.

Gín-á chò toā-chha̍t hō͘ koaⁿ-hú ó͘ ba̍k-chiu

Sio̍k-gú kóng, ‘Giâm koaⁿ-hú chhut kāu-chha̍t.’ In-ūi chêng-goe̍h Hōng-soaⁿ-koān-sio̍k ê kúi-nā só͘-chāi hō͘ chha̍t cheng-piàng, Koān-chú Lí kàm ū khí tūi-ngó͘ khı̀ A-lí-káng kı̄n-hū ê chng-siū ûi chha̍t-chng. Chha̍t lóng thoat-lı̄, ū chhiau-tio̍h kúi-nā pò͘-tē mı̍h; ū-ê chin ta̍t-chı̂ⁿ, chiū-sı̄ ū-gia̍h-lâng ê saⁿ-á-kûn, chı̍t-hù ta̍t-tit saⁿ-sı̀-cha̍p gı̂n. Koān-chú lóng m̄-chún gê-ia̍h tham-sim hia ê mı̍h, i lóng ū ta̍k-hāng koè-tiám kau hiah-ê pan-thâu khoàⁿ sı̄ sím-mı̍h lâng hō͘ chha̍t chhiúⁿ--ê, kiò lâng khı̀ jı̄n, jı̄n nā sı̄ i-ê, i thang the̍h tò--khı̀. Pan-thâu chı̄n-chiong hiah ê mı̍h-kiāⁿ tiàu tı̄ biō-kháu chhin-chhiūⁿ kó͘-i-tiàm ê khoán-sit.

Hiān-chāi chit-ê Hōng-soaⁿ-koān put-chí chheng-liâm; iā chin gâu lia̍h chha̍t, tùi i chiūⁿ-jı̄m sı̀-gō͘-nı̂, lia̍h chha-put-to sı̀-gō͘-cha̍p ê cheng-piàng chha̍t lâi thâi-thâu. Chóng-sı̄ cheng-piàng chha̍t ê tiong-kan iā ū cha̍p-sı̀-gō͘ hoè ê gín-ná. Kı̄n-lâi ū lia̍h-tio̍h chı̍t-ê 15 hoè ê toā-chha̍t. Koān-chú kóng bē pān-tit thâi-thâu, ū chiong nn̄g-lúi ba̍k-chiu phah-chhut-lâi, āu-lâi siū kaⁿ, thèng-hāu ba̍k-chiu thè-hông, chiū beh phài chhe-ia̍h, chhoā i khı̀ i cheng-piàng ê só͘-chāi phah-lô iû-ke, soà kóng-khí i chò chha̍t ê chêng-iû hō͘ lâng chai.

(Tâi-lâm Hú-siâⁿ Kàu-hoē-pò tē 98 koàn, 1893 nı̂ 6 ge̍h)