Tı̄ bó͘ só͘-chāi ū chı̍t pái tı̄ Phín-phêng-hoē ê sı̂, ū nn̄g chiah soè-chiah bé, kàu-ke̍k súi. Kò͘ bé ê lâng sı̄ A-hui-lı̄-ka ê o͘-bı̄n ta-po͘-gín-ná, miâ kiò Cato(Khe-to). In teh kiâⁿ tı̄ pháu-bé-tiûⁿ ê sı̂, hiah-ê bé chin gâu thiaⁿ-thàn hit ê o͘-bı̄n gín-ná ê chhùi. Hioh-khùn ê sı̂, bé ēng in ê thâu-khak lûi Cato ê sin-khu, chhin-chhiūⁿ chin gâu thiàⁿ Cato ê khoán-sit.
Hit-tia̍p ū chı̍t ê ài boé bé ê lâng, mn̄g o͘-bı̄n gín-ná kóng, “Lí ài boē loā-choē chı̂ⁿ?” Cato kóng, “1000 kho͘!” Hit ê lâng kóng, “Oā! Hiah kùi. Goá hō͘ lí 600 kho͘, hó-m̄?” Cato iô-thâu m̄-khéng. Hit-sı̂ chin-choē lâng lâi teh khoàⁿ bé, chóng-sı̄ bô lâng ài boé. Hit ê ài boé ê lâng koh lâi kóng, “Goá kā lí kóng, chin kùi ho͘hN, bô lâng ài boé. Chit nn̄g chiah bé sı̄ sím-mı̍h lâng ê? I tek-khak hoaⁿ-hí boē goá 600 kho͘.” Kò͘ bé ê gín-ná kóng, “Sı̄ goá ê sió-chiá ê, nā bô 1000 kho͘ i m̄-boē.” Hit ê lâng chiū kóng, “Taⁿ, goá kā lí kóng: lí tio̍h kā i án-ni kóng, ū chı̍t chiah hut-jiân-kan pái-kha. Lí nā án-ni kóng, goá beh hō͘ lí pún-sin 50 kho͘. Lí boē goá 600 kho͘ cháiⁿ-iūⁿ m̄? Phah-sǹg lí tùi chhut-sı̀ káⁿ iáu m̄-bat ū 50 kho͘, ū á-bô?” Cato khiā tı̄ bé ê sin-piⁿ,thiaⁿ hit ê lâng kóng án-ni, hut-jiân gông-ngia̍h, tı̀-kàu bé iā gông-ngia̍h.
I chiū ǹg-bı̄n khoàⁿ hit ê lâng, kóng, “Lí phah-sǹg, in-ūi Chú hō͘ goá ê phê o͘, I soà hō͘ goá ê sim o͘ mah? Bô lah! Goá koat-toàn m̄-thàn lí ê oē, hō͘ goá ê sim bak-tio̍h o͘.” Tı̄ piⁿ-á khiā ū chı̍t ê hó-lé ê lâng chiū mn̄g Cato, “Lí ê sió-chiá cháiⁿ-iūⁿ ài boē i ê bé?” Cato chiū ı̀n kóng, “Goán khiàm-ēng 1000 kho͘. Kàu āu lé-pài nā bô tit-tio̍h 1000 kho͘, chhân-hn̂g tio̍h boē. Goá ê thâu-ke khiàm-ēng 1000 kho͘ nā-tiāⁿ, soà tú-tio̍h phoà-pı̄ⁿ. Koh chı̍t hāng, goán ê chhek-chhng ū hō͘ hé sio-lio khı̀, só͘-í ko͘-put-chiong goán sió-chiá tio̍h boē i ê bé.” Hit ê hó-lé ê lâng chiū kóng, “Taⁿ lí an-sim tò-khı̀, kā lí ê sió-chiá kóng, Bé boē liáu lah! Goá beh hō͘ i 1000 kho͘. Goá ê lô͘-po̍k tı̄-chia, i beh the̍h chı̂ⁿ hō͘ i, iā lí tio̍h kā i kóng, Goá beh khı̀ Au-chiu chı̍t nı̂ kú. Goá bô tı̄-teh ê sı̂, lí ê sió-chiá thang ēng chiah-ê bé, kàu tò-tńg lâi ê sı̂, i nā ài koh boé tò-tńg, iā hó, goá hoaⁿ-hí boē i khah sio̍k.”
Cato kóng: “Pa̍t-jı̍t, goá nā ū ki-hoē, goá hoaⁿ-hí choè lí ê chhe-ēng.” Hit ê lâng kóng, “Cato, lí í-keng ū pang-chān goá.” Cato kóng, cháiⁿ-iūⁿ? Goá m̄-bat lí, tùi tah-lo̍h í-keng pang-chān lí? Ìn kóng, Ū-iáⁿ. Sı̄ in-ūi lí hō͘ goá ū ki-hoē thang pang-chān pa̍t-lâng. Lí tú-á m̄-khéng siū hit ê boé bé ê lâng ê āu-chhiú-chı̂ⁿ, m̄-khéng hō͘ lí ê sim bak-tio̍h o͘. Tùi lí só͘ kóng tiong-tı̍t ê oē, í-keng ū pang-chān goá.
(Tâi-oân Kàu-hoē-pò tē 470 koàn, 1924 nı̂ 5 ge̍h)
