Pêng-an lióng-jū kim

Tı̄ sè-kan khiok ū chió-chió lâng m̄- bat keng-koè kan-khó͘ ê chêng-hêng. Chit-hō sū lâng chū-jiân ài thoat-lı̄. Sui-jiân sı̄ sè-sio̍k lâng in ē-hiáu tùi- tiōng pêng-an. In siông-siông ū khı̀ hē- pu̍t kiû an , m̄-kú chiàu lán bêng-bêng chai tùi chit-hō ê hong-hoat koat-toàn bô thang chhiâⁿ in-ê ı̀-goān .

Pêng-an ū nn̄g-khoán,chiū-sı̄ ké-iáⁿ--ê kap chin-sı̍t--ê . Lōng-tōng-chú tı̄ khí- thâu phah-sǹg ū khoàⁿ-oa̍h, āu-lâi chai bô. Gín-ná gōng-siūⁿ bô tha̍k-chheh , kan-ta thit-thô sı̄ hó , chóng--sı̄ kàu toā- hàn sı̄ bô lō͘-ēng ê lâng , chiū-sı̄ chin-chhám. Khang-hi ê pêng-an sı̄ chiām- sı̂ nā-tiāⁿ . Chin-sı̍t--ê sı̄ kú-tn̂g .

Nā ū choē, tek-khak bô pêng-an. Choē tı̄ sim--nı̍h ē toā khó͘-chhó͘--lâng. Chí-ū chheng-sim ê lâng ū pêng-an .

Sèng-chheh ū chiong chı̍t-tiâu khe lâi phı̀-jū pêng-an . Khe ū khí-thâu kap lō͘-boé, ia̍h teh lâu sı̄ ná-hn̄g ná-toā, koh tı̄ chiu-ûi ū chò toā lı̄-ek . Iâ-so͘ sı̄ oa̍h-miā kap pêng-an ê goân-thâu , ia̍h kàu lō͘-boé I-ê peh-sèⁿ ū hióng-siū thiⁿ--nı̍h ê pêng-an, ná-chún toā-hái ê kài kóng-khoah kài chhim-tı̂m . Koh, tı̄ chāi-seⁿ m̄-nā sı̄ pún-sin tit-tio̍h, ia̍h ē toā lı̄-ek tı̄ pa̍t-lâng .

Lán-ê sí-chó͘ ū sit-lo̍h in pún-jiân ê pêng-an lâi hoān-tio̍h chai-eh . In chiū chò Siōng-tè ê tùi-te̍k, soà ū liân-lūi- tio̍h chèng hō͘-è . Nā-sı̄ Siōng-tè ū khui-lō͘ kap lâng hô-iok, ia̍h ū siat I pêng-an ê kok. Tng Iâ-so͘ kàng-seng ê sı̂ thian-peng kap thiⁿ-sài ū o-ló Siōng-tè kóng , “ Téng-bı̄n êng-kng kui Siōng-tè, tē-bı̄n hô-pêng , lâng tit-tio̍h in-tián .” Chiàu lán chai chit-pún-kok sı̄ iáu-boē ū chiâu-pı̄ hô-pêng, hô-hòng thong thiⁿ-kha-ē bô án-ni-seⁿ. M̄-kú lán m̄-thang choa̍t-bāng . Lūn-kàu Iâ-so͘ koh-lâi ê chêng-hêng Í-sài-a ( 2:4 ) ū kı̀-chài kóng, “ Lia̍t-kok cheng-chiàn chiū pêng-tiāⁿ--i , kah in ēng to chò lê , ēng chhiuⁿ chò keh-á ; m̄-thang saⁿ kong-táⁿ, bo̍h-tit tùi- tiōng bú-gē.” Goān Siōng-tè chiâⁿ chit- ê sū .

Sui-jiân lâng ài tit-tio̍h pêng-an iáu- kú ū-sı̂ ū chē-chē ê chó͘-tòng , chiông- tiong thang kóng lâng chí-ū tùi-tiōng ē-pāi-hoāi ê mı̍h , ū khí su-io̍k , ia̍h bô kap Siōng-tè kau-poê .

Hoān-nā beh hióng-siū chin-sı̍t kú-tn̂g ê pêng-an , eng-kai tio̍h tāi-seng tit- tio̍h Sèng-sı̂n , in-ūi Sèng-chheh ū kóng pêng-an sı̄ Sèng-sı̂n chı̍t-hāng ê kiat- chí . Beh tit-tio̍h Sèng-sı̂n eng-kai tio̍h sêng-sı̍t kı̂-tó, koh āu-lâi sı̂-sı̂ tio̍h thé- thiap I-ê chêng , thàn Siōng-tè ê bēng- lēng , kap chhim-chhim sı̀n Chú , sim- koaⁿ lóng bô ı̂-e̍k , chiū pêng-an sı̍t-chāi ē lâi .

Lâng ē khiàm-ēng-tit chē-chē mı̍h, chóng--sı̄ toàn-toàn bē khiàm-ēng-tit pêng-an . Koh ,put-lūn chı̄-chūi ài tit- tio̍h pêng-an, chiū liâm-piⁿ ē. To̍k-to̍k tio̍h chiàu tú-á tı̄ téng-bı̄n só͘ kı̀-chài lâi kiâⁿ chiū tek-khak ē chiâⁿ-tit . Chhiáⁿ chèng-lâng koáⁿ-kín lâi sı̍t-siū pêng-an, kiaⁿ-liáu nā iân-chhiân, chiū seⁿ-chêng sí- āu lóng ū sit-lo̍h-khı̀ .

Chú só͘ siúⁿ-sù ê pêng-an sı̄ lâng siūⁿ- bē-kàu hiah toā . Goān tāi-ke éng-oán lâi hióng-siū i , chiū chin-chiàⁿ tùi sim thang ē kóng-tit, “Pêng-an lióng-jū kim.”

(Tâi-oân Hú-siâⁿ Kàu-hoē-pò, Tē 117 koàn, 1894 nı̂ 12 ge̍h)