Pêng-bîn ê Ki-tok-toān/Tē VI Koàn/Tē-12 chiuⁿ

Tē-12 chiuⁿ: KOH TŃG-KHÌ CHIŪ-KŪN PĒ

Chóng-sī hit ê khòai-lo̍k, kî-Īⁿ, thang chhiⁿ-kiaⁿ ê kau-pôe sī bōe thang kú-tn̂g. Hit ê éng-oán ê Kiáⁿ ū tùi Pek-lī-hêng ê bé-tiâu chhut-hoat lâi hóng-būn chit sè-kan, taⁿ sī teh-beh soah lah. Tú-tú sī chhin-chhiūⁿ I sī kán-tan kóng ê. "Góa tùi PĒ chhut-lâi, ia̍h ji̍p sè-kan, koh lī-khui sè-kan lâi kui tī PĒ."

Chū-jiân sī án-ni. Lán Sī bōe-thang siūⁿ-chhut sím-mi̍h pa̍t-khoán ê chiong-kio̍k. Chhì-siūⁿ, siat-sú chit ê Ú-tiū ê Chú iáu o̍ah tī chit ê sió-sió ê tōe-bīn-chiūⁿ bó͘ chi̍t só͘-chāi, phì-jū lâi kóng, chit-tia̍p I iáu o̍ah tī iâ-lō͘-sat-léng, á-sī Lûn-tun siâⁿ, Pa-lí siâⁿ, á-sī Lô-má siâⁿ, chiū àn-chóaⁿ? Nā-sī án-ni I chí-ū ōe thang tiàm tī i hit-sî sī khiā-khí ê só͘-chāi nā-tiāⁿ, iā pa̍t só͘-chāi I chiū bōe thang tī-teh. Lán nā kan-ta án-ni siūⁿ mā-sī í-keng ū kàng-lo̍h I ê chu-keh, iā Sī bô ha̍p-lí ê sū.

Chóng-sī I ê jio̍k-thé tio̍h ài lī-khui khì, bô kap lán saⁿ-kap tiàm, tùi án-ni I ê Sîn-lêng chiū tī ta̍k só͘-chāi, ta̍k sî-chūn thang kap I khó-lîn ê ha̍k-seng saⁿ kiat-liân, chiū put-koán sím-mi̍h sî-chūn lán thang ji̍p tī lán ê ba̍t-pâng lâi koaiⁿ-mn̂g, tī-hia iā thang kap I saⁿ-kap khiā-khí. "Góa khì sī chòe lín ê lī-ek."

Lūn Seng-thian ê sū, chāi-lâi éng-éng ū lâng ài phāu hit-hō tan-sûn iù-tī ê kiàn-kái, chiū-sī kóng, I ê jio̍k-thé ū lī-khui chit sè-kan, tùi khong-tiong ti̍t-ti̍t chiūⁿm̂khì, āu-lâi chìn-ji̍p tī bû-chè-hān ê khong-kan kàu tī hit ê Éng-oán ê Thian-tông ê chō-ūi. Che sī iù-tī ê kiàn-kái. Siat-sú nā-sī chiàu sī kì-chài án-ni lâi kóng, lán chiū bōe bián-tit ài thê-khí chit ê iù-tī ê būn-tôe. Án-ni chiū Thian-tông sī chí-bêng chi̍t ê tiāⁿ-tio̍h ê só͘-chāi, á-sī chi̍t ê seng-oa̍h ê chōng-thài mah? Thian-tông sī chí-bêng chi̍t ê tiāⁿ-tio̍h hong-hiòng ê bó͘ só͘-chāi mah? Kî-si̍t tī chit ê put-sî teh ūn-choán ê tōe-kiû, lán kiám ōe thang kóng ū Téng-bīn kap Ē-bīn ê hun-piat mah?

Chit-khoán iù-tī ê su-sióng, khiok-sī ū gō͘-kái ê só͘-chāi, chóng-sī ūi-tio̍h beh chhián-bêng Seng-thian ê tāi-ì, che mā bô bái kàu àn-chóaⁿ. Che thang kóng sī Seng-thian ê kò͘-sū Sī beh piáu-hiān ê chin-lí, chit ê tan-sûn ê piáu-siōng, chiū-sī piáu-bêng lán ê Chú ū tiàm tī i sîn-lêng ê jio̍k-thé lâi lī-khui lán ji̍p tī hit ê bû-hêng ê sè-kài, koh tò-tńg-khì I sī chhut-hoat, iā pún sī tī-teh ê sè-kài. Lán sìn lán sī kiò-chòe sī Seng-thian, chit ê iú-bêng ê sū-si̍t, put-kò sī piáu-bêng I ū chhin-chhiat, khiam-pi, ài hō͘ lán tan-sûn ê su-sióng ōe thang lí-kái i. Lūn hit ê khah ko-siōng ê sè-kài, chiū-sī pôaⁿ-kè lán hiān-chāi sī lí-kái ê lán khah-siông sī ài liân-sióng tī téng-bīn ū chōe-chōe chhiⁿ-chhùi ê thiⁿ, iā tī hit ê chhiⁿ-chhùi ê thiⁿ ê téng-bīn ū chōe-chōe chhiⁿ-sîn kôaiⁿ-kôaiⁿ ê só͘-chāi. In-ūi I ū jiōng-pō͘ lán tan-sûn ê sim-su, só͘-í I bô chhin-chhiūⁿ pa̍t ê sî-chūn, chū án-ni hō͘ lán bô khòaⁿ-kìⁿ I. I ū lī-pia̍t tōe-ni̍h ti̍t-ti̍t chiūⁿm̂khì, iā ū hûn lâi gêng-chiap I. Kî-si̍t hit ê ì-sù put-kò só͘ kóng I ū lī-khui lán chit ê hiān-chāi ê sè-kài lâi ji̍p tī lán Sī bōe lí-kái ê pia̍t sè-kài.

Chhin-chhiūⁿ án-ni, kàu tī chi̍t ji̍t I kap in chòe-āu siong-hōe liáu, chiū kap in éng-oán saⁿ lī-pia̍t chiūⁿ-thiⁿ. chòe-āu I ū kà-sī in lūn Siōng-tè kok ê sū. "Thiⁿ-téng, tōe-Ē ê koân í-keng lóng-chóng hō͘ góa. Só͘-í lín tio̍h khì phó͘ thiⁿ-ē chio bān peh-sìⁿ lâi chòe ha̍k-seng, kā in kiâⁿ-sóe-lé, hō͘ in kui tī PĒ, Kiáⁿ, Sèng Sîn ê miâ; kiⁿ-nā góa sī ū bēng-lēng lín ê, tio̍h kà-sī in siú; koh góa ji̍t-ji̍t kap lín tī-teh, kàu sè-kan ê lō͘-bé."

Āu-lâi I ū chhōa in chhut-khì kàu Pek-tāi-nî lâi tī-hia kap in chòe-āu lī-pia̍t. I chiū gia̍h khí chhiú lâi kā in chiok-hok. I teh chiok-hok ê sî, chiū lī-pia̍t in, siū chih-chiap chiūⁿ-thiⁿ.

Ná-sat-le̍k ê Iâ-so͘ ū chhin-chhiūⁿ án-ni lâi lī-khui lán tńg-khì chiū-kūn PĒ.

Lán ê Ki-tok-toān sī kàu-chia tn̄g-chām. Kî-si̍t I ê lâi-le̍k sī bô soah bé. Tú-tú sī chhin-chhiūⁿ lán tī thâu-chi̍t bīn só͘ kóng, I ê lâi-le̍k sī bô khí-thâu, sī tio̍h tò-tńg siūⁿ kàu tī hit ê Bô khòaⁿ-kìⁿ ê sè-kài; chhin-chhiūⁿ án-ni, lán chai chit-tia̍p sui-Sī bô ôan-choân, mā-sī tio̍h tī-chia lâi tn̄g chām khì. Kî-si̍t I ê lâi-le̍k sī bô soah bé, tio̍h ài koh sòa-chiap lâi siūⁿ tī chiong-lâi hit ê Bô-khòaⁿ-kìⁿ ê sè-kài I sī chòe ê sū-gia̍p.

Chit ê Hok-im-su put-kò sī Iâ-so͘ ê jîn-keh kap I ūi-tio̍h jîn-lūi sī chòe ê sū-gia̍p ê le̍k-sú tiong saⁿ-cha̍p-saⁿ nî kú chi̍t chām ê le̍k-sú nā-tiāⁿ. Lūn chit ê Ki-tok-toān chêng ê sū sī ū kì-chài tī hit ê Éng-oánê kì-lio̍k, iā lūn chit ê Ki-tok-toān āu ê sū, sī ū kì-chài tī hit pêng ê sè-kài ê kì-lio̍k. "TĪ thiⁿ-ni̍h ū chheh hian khui-khui" hit-sî lán thang siūⁿ tī-hia choân jîn-lūi ū teh tha̍k i. SĪ lah, tī hit pêng ê sè-kài lán ū khòaⁿ-kìⁿ jîn-lūi ū koh teh siá i, chiū-sī tī tōe-bīn-chiūⁿ hiah ê úi-jîn, chhin-chhiūⁿ su-siúⁿ-ka, ōe-tô͘-ka, í-ki̍p si-jîn, lóng ū tī bī-lâi ê sè-kài koh sòa-chiap in ê kang teh siá I ê lâi-le̍k.

Chhin-chhiūⁿ án-ni, lūn Iâ-so͘ ê seng-oa̍h, lán sī tio̍h koh sòa-chiap lâi kóng-khí I tī hit pêng ūi-tio̍h lán jîn-lūi sī chòe ê sū-gia̍p, iā hit ê sū-gia̍p Sī beh sòa-chiap kàu éng-oán thang ôan-sêng i, iā kàu hit-sî Sí-sit kap TĒ-ge̍k, Pháiⁿ kap hit ê pháiⁿ ê lóng beh tú-tio̍h khì-sak tī Bia̍t-bô ê chhim-ian, iā hit-sî tùi chit ê Siōng-tè ê Ú-tiū beh éng-oán hòe-bô Pháiⁿ ê khùi-la̍t, iā Siōng-tè beh chòe bān-ū ê Chú-cháiⁿ, tiàm tī Bān-ū tiong.

Chit ê siū Sîn kám-tōng ê Iok-hān ū kóng, "hit-sî chiah Sī bān-ū ê kiat-kio̍k." Hit-sî kiám-chhái hiah ê úi-tāi ê lâng beh tī Thiⁿ-ni̍h ê TÔ͘-su-koán lâi siá kóng, taⁿ Ki-tok ūi-tio̍h jîn-lūi sī chòe ê sū-gia̍p sī chheng-chhó lah.

Seng-thian ê kò͘-sū, put-kò sī I chiâⁿ-chòe chi̍t ê sè-kan lâng tiàm sè-kan saⁿ-cha̍p-saⁿ nî, chit chi̍t-khoán ê le̍k-sú ê kiat-kio̍k nā-tiāⁿ.

Chiàu lán lâng sī teh sǹg chit ê sî-kan ê hoat-tō͘ lâi kóng, chiū-sī tī saⁿ-cha̍p-saⁿ nî chêng, tùi téng-bīn hit ê chhin-chhiat ê sè-kài ū chi̍t ê Eⁿ-á chhut-sì lâi ji̍p tī lán chit sè-kan, ūi-tio̍h lán jîn-lūi lâi o̍ah, lâi sí. Iā chèng Thian-kun Tī Kiù-chú Sèng-tān ê àm-mî ū chhut in ê kau-kài, ēng chong-pài, tông-chêng ê sim lâi chheng-chàn Siōng-tè ê hi-seng. "TĪ ke̍k kôaiⁿ ê ūi êng-kng kui tī Siōng-tè. Tōe-chiūⁿ hô-pêng Tī i sī hoaⁿ-hí ê lâng ê tiong-kan!"

TĪ saⁿ-cha̍p-saⁿ nî ê tiong-kan, in ū ēng kî-kòai kap kan-khó͘ ê sim lâi khòaⁿ lán sè-kan lâng, tùi in ê Chú só͘ hián-chhut ê thài-tō͘.

Chit-tia̍p lán tio̍h ài soah chit chi̍t-chām ê kò͘-sū. I ū chiong lán khó-lîn ê jîn-lūi ê sū, éng-oán khek-tiâu tī sim-ni̍h lâi tek-sèng, koh tńg-khì chē Tī chit ê Ú-tiū ê Chō-ūi, PĒ Siōng-tè, chèng Thian-kun, í-ki̍p tī Sèng-tān mî teh gîm-si ê Sèng-sài ê bīn-chêng.

Sûn Siáⁿ-mn̂g ah! Lín tio̍h kia̍h kôaiⁿ, éng-oán ê mn̂g ah! lín tio̍h kiah kôaiⁿ, êng-kng ê Kun-ông beh ji̍p. Chit ê êng-kng ê Kun-ông sī chī-chūi? Bān-kun ê Iâ-hô-hoa chiū-sī êng-kng ê Kun-ông.

: : : : : : (Ôan)